ವಾಷಿಂಗ್ಟನ್‌: ಗಡಿ ಪ್ರದೇಶ ಲಡಾಕ್‌ನಲ್ಲಿ ಸೇನಾನೆಲೆಗಳೂ ಸೇರಿದಂತೆ ಇತರ ನಿರ್ಮಾಣ ಕಾಮಗಾರಿಗಳನ್ನು ಕೈಗೊಳ್ಳುವ ಮೂಲಕ ಚೀನಾವು ಭಾರತವನ್ನು ಸಮರಕ್ಕೆ ಪ್ರಚೋದಿಸುತ್ತಿದೆ ಎಂದು ಅಮೆರಿಕದ ಡೆಮಾಕ್ರಟಿಕ್‌ ಪಕ್ಷದ ಪ್ರಭಾವಿ ಸಂಸದ ರಾಜಾ ಕೃಷ್ಣಮೂರ್ತಿ ಆತಂಕ ವ್ಯಕ್ತಪಡಿಸಿದ್ದಾರೆ. ''ಈ ಹಿಂದೆ ದಕ್ಷಿಣ ಚೀನಾ ಸಾಗರದಲ್ಲಿ ಕೂಡ ಚೀನಾ ಸೇನೆ ಇದೇ ಮಾದರಿ ಅತಿಕ್ರಮಣ ಕುತಂತ್ರ ಮಾಡಿತ್ತು. ಇದರಿಂದಾಗಿ ಸಾಗರವನ್ನು ಹಂಚಿಕೊಂಡಿರುವ ಇತರ ರಾಷ್ಟ್ರಗಳನ್ನು ಪ್ರಚೋದಿಸಿ ಬಿಕ್ಕಟ್ಟು ಸೃಷ್ಟಿಸಿತ್ತು. ಶಾಂತ ಮತ್ತು ಸ್ಥಿರವಾದ ಪರಿಸ್ಥಿತಿಯನ್ನು ತನ್ನ ಆಕ್ರಮಣಶೀಲತೆಯಿಂದ ಬದಲಾಯಿಸುವ ಹುನ್ನಾರ ಚೀನಾ ಮಿಲಿಟರಿಯದ್ದು,'' ಎಂದು ಅವರು ಹೇಳಿದ್ದಾರೆ. ''ಈಗಾಗಲೇ ಇಂಡೋ-ಪೆಸಿಫಿಕ್‌ ಪ್ರಾಂತ್ಯದಲ್ಲಿ ಪ್ರಜಾಪ್ರಭುತ್ವ ಆಧರಿತ ರಾಷ್ಟ್ರಗಳ ಪ್ರಾಬಲ್ಯ ಹೆಚ್ಚಿಸಿ ಚೀನಾದ ಅತಿಕ್ರಮಣವನ್ನು ಹತ್ತಿಕ್ಕಲು ಭಾರತ, ಜಪಾನ್‌, ಆಸ್ಪ್ರೇಲಿಯಾ ಹಾಗೂ ಅಮೆರಿಕ ಸೇರಿಕೊಂಡು ಕ್ವಾಡ್‌ ಒಕ್ಕೂಟ ರಚಿಸಿಕೊಂಡಿವೆ. ನಾಲ್ಕು ರಾಷ್ಟ್ರಗಳ ಸೇನಾಪಡೆಗಳು ಇತ್ತೀಚೆಗೆ ಮಲಬಾರ್‌ ತಾಲೀಮು ಕೂಡ ನಡೆಸಿವೆ. ಈ ಮೂಲಕ ಚೀನಾಗೆ ಪರೋಕ್ಷ ಎಚ್ಚರಿಕೆ ರವಾನಿಸಲಾಗಿದೆ,'' ಎಂದು ಕೃಷ್ಣಮೂರ್ತಿ ತಿಳಿಸಿದ್ದಾರೆ. ದಕ್ಷಿಣ ಚೀನಾ ಸಾಗರದಲ್ಲಿ13 ಲಕ್ಷ ಚದರ ಮೈಲಿ ಪ್ರದೇಶ ತನ್ನೆದೆಂದು ಚೀನಾ ಮೊಂಡು ವಾದ ಮಂಡಿಸುತ್ತಿದೆ. ಜತೆಗೆ ಆತುರದಲ್ಲಿ ಹಲವು ದ್ವೀಪಗಳನ್ನು ಅತಿಕ್ರಮಿಸಿ ಸೇನಾ ನೆಲೆಗಳನ್ನು ಸ್ಥಾಪಿಸುತ್ತಿದೆ. ಈ ಕ್ರಮವನ್ನು ಸಾಗರದಲ್ಲಿ ತಮ್ಮ ಪಾಲು ಕೂಡ ಹೊಂದಿರುವ ಬ್ರುನಿ, ಮಲೇಷ್ಯಾ, ಫಿಲಿಪ್ಪೀನ್ಸ್‌, ತೈವಾನ್‌ ಮತ್ತು ವಿಯೆಟ್ನಾಂ ಸರಕಾರಗಳು ಖಂಡಿಸಿವೆ. ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಚೀನಾದ ಅತಿಕ್ರಮಣ ಕುತಂತ್ರಕ್ಕೆ ಛೀಮಾರಿ ಹಾಕಿವೆ. ನೇಪಾಳಕ್ಕೆ ಚೀನಾ ರಕ್ಷಣಾ ಸಚಿವ ದೌಡು ಭಾರತದ ವಿದೇಶಾಂಗ ಸಚಿವಾಲಯ ಕಾರ್ಯದರ್ಶಿ ಹರ್ಷವರ್ಧನ್‌ ಶ್ರಿಂಗ್ಲಾಅವರು ಎರಡು ದಿನಗಳ ನೇಪಾಳ ಭೇಟಿ ಮುಗಿಸಿ ಹಿಂದಿರುಗಿದ ಬೆನ್ನಿಗೇ ಚೀನಾದ ರಕ್ಷಣಾ ಸಚಿವ ಜನರಲ್‌ ವೀ ಫೆಂಘಿಘಿ ಭಾನುವಾರ ನೇಪಾಳಕ್ಕೆ ದೌಡಾಯಿಸಿದ್ದಾರೆ. ''ದ್ವಿಪಕ್ಷೀಯ ಮಿಲಿಟರಿ ಸಹಕಾರ ವೃದ್ಧಿ ಸಂಬಂಧ ಮಾತುಕತೆಗೆ ಆಗಮಿಸಿದ್ದೇನೆ,'' ಎಂದು ಸುದ್ದಿಗಾರರಿಗೆ ತಿಳಿಸಿರುವ ಫೆಂಘಿಘಿ , ಅಧ್ಯಕ್ಷೆ ಬಿದ್ಯಾ ದೇವಿ ಭಂಡಾರಿ, ಪ್ರಧಾನಿ ಕೆ.ಪಿ. ಶರ್ಮಾ ಒಲಿ ಅವರೊಂದಿಗೆ ವಿಶೇಷ ಸಭೆ ನಡೆಸಲಿದ್ದಾರೆ. ನೇಪಾಳ ಗೃಹ ಸಚಿವ ರಾಮಬಹದ್ದೂರ್‌ ಥಾಪಾ ಅವರು ಫೆಂಘಿಘಿ ಜತೆಗಿರಲಿದ್ದಾರೆ ಎಂದು ತಿಳಿದುಬಂದಿದೆ. ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ಅವರು ನೇಪಾಳಕ್ಕೆ ಭೇಟಿ ನೀಡಿದ ನಂತರ ಚೀನಾ ಸರಕಾರದ ಪ್ರಮುಖರೊಬ್ಬರು ನೇಪಾಳಕ್ಕೆ ಭೇಟಿ ನೀಡುತ್ತಿರುವುದು ಇದೇ ಮೊದಲು.
from India & World News in Kannada | VK Polls https://ift.tt/3fO4O83
