ಆಕ್ಲೆಂಡ್: ಯುವ ಪ್ರತಿಭೆ ಸಿಡಿಸಿದ ಸ್ಫೋಟಕ ಶತಕದ ಬಲದಿಂದ ಅಬ್ಬರಿಸಿದ ನ್ಯೂಜಿಲೆಂಡ್‌ ತಂಡ, ಪ್ರವಾಸಿ ವಿರುದ್ಧದ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ಸರಣಿಯ 2ನೇ ಪಂದ್ಯದಲ್ಲಿ 238/3 ರನ್‌ಗಳ ಬೃಹತ್‌ ಮೊತ್ತ ದಾಖಲಿಸಿತು. ಸರಣಿಯ ಮೊದಲ ಪಂದ್ಯದಲ್ಲಿ ಡಕ್ವರ್ತ್‌ ಲೂಯಿಸ್‌ ನಿಯಮದನ್ವಯ 5 ವಿಕೆಟ್‌ಗಳ ಜಯ ದಾಖಲಿಸಿದ್ದ ಆತಿಥ್ಯ ನ್ಯೂಜಿಲೆಂಡ್‌, ಇದೀಗ ಎರಡನೇ ಪಂದ್ಯದಲ್ಲೂ ಬಹುತೇಕ ಗೆಲುವನ್ನು ತನ್ನದಾಗಿಸಿಕೊಂಡಿದೆ. ಈ ಮೂಲಕ 3 ಪಂದ್ಯಗಳ ಸರಣಿಯಲ್ಲಿ ಟ್ರೋಫಿ ಗೆಲುವನ್ನು ಬಹುತೇಕ ಖಾತ್ರಿ ಪಡಿಸಿಕೊಂಡಿದೆ. ಮೌಂಟ್‌ ಮೌಗಾನುಯ್‌ನಲ್ಲಿರುವ ಬೇ ಓವಲ್‌ ಕ್ರೀಡಾಂಗಣದಲ್ಲಿ ಭಾನುವಾರ ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ನ್ಯೂಜಿಲೆಂಡ್‌, ತನ್ನ ಪಾಲಿನ 20 ಓವರ್‌ಗಳಲ್ಲಿ ಕೇವಲ 3 ವಿಕೆಟ್ ಮಾತ್ರವೇ ಕಳೆದುಕೊಂಡು 238 ರನ್‌ಗಳ ಬೃಹತ್‌ ಮೊತ್ತ ಪೇರಿಸಿತು. ವಿಂಡೀಸ್‌ ಬೌಲರ್‌ಗಳನ್ನು ಅಕ್ಷರಶಃ ಬೆಂಡೆತ್ತಿ ಬ್ರೇಕ್‌ ಹಾಕಿದ 23 ವರ್ಷದ ಬಲಗೈ ಬ್ಯಾಟ್ಸ್‌ಮನ್‌ ಗ್ಲೆನ್‌ ಫಿಲಿಪ್ಸ್‌, ತಮ್ಮ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್ ವೃತ್ತಿ ಬದುಕಿನ ಚೊಚ್ಚಲ ಶತಕ ಬಾರಿಸಿದರು. ಇದಕ್ಕೂ ಮುನ್ನ 56 ರನ್‌ ಅವರ ವೈಯಕ್ತಿಕ ಶ್ರೇಷ್ಠ ಮೊತ್ತವಾಗಿತ್ತು. ಚೆಂಡನ್ನು ಕ್ರೀಡಾಂಗಣದ ಮೂಲೆ ಮೂಲೆಗೆ ಬಡಿದಟ್ಟಿದ ಫಿಲಿಪ್ಸ್‌, 46 ಎಸೆತಗಳಲ್ಲಿ ಶತಕ ಪೂರೈಸಿದರಲ್ಲದೆ ಎದುರಿಸಿದ 51 ಎಸೆತಗಳಲ್ಲಿ 10 ಫೋರ್‌ ಮತ್ತು ಬರೋಬ್ಬರಿ 8 ಸಿಕ್ಸರ್‌ಗಳ ಬಲದಿಂದ 108 ರನ್‌ ಸಿಡಿಸಿದರು. ಇದು ನ್ಯೂಜಿಲೆಂಡ್‌ ತಂಡದ ಪರ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ದಾಖಲಾದ ಅತಿ ವೇಗದ ಶತಕವಾಗಿದೆ. ವಿಶ್ವ ಕ್ರಿಕೆಟ್‌ನಲ್ಲಿ 10ನೇ ಅತ್ಯಂತ ವೇಗದ ಶತಕ ಎನಿಸಿಕೊಂಡಿದೆ. ಇದಕ್ಕೂ ಮುನ್ನ ಈ ದಾಖಲೆ ಕಿವೀಸ್‌ನ ಎಡಗೈ ಆರಂಭಿಕ ಬ್ಯಾಟ್ಸ್‌ಮನ್‌ ಕಾಲಿನ್‌ ಮನ್ರೊ ಅವರ ಹೆಸರಲ್ಲಿತ್ತು ಮನ್ರೊ 47 ಎಸೆತಗಳಲ್ಲಿ ಶತಕ ಸಿಡಿಸಿದ ಸಾಧನೆ ಮಾಡಿದ್ದರು. ಇನಿಂಗ್ಸ್‌ ಅಂತ್ಯಕ್ಕೆ ಇನ್ನೊಂದು ಎಸೆತ ಬಾಕಿ ಇರುವಾಗ ಎದುರಾಳಿ ತಂಡದ ನಾಯಕ ಕೈರೊನ್‌ ಪೊಲಾರ್ಡ್‌ ಅವರ ಬೌಲಿಂಗ್‌ನಲ್ಲಿ ವಿಕೆಟ್ ಕೈಚೆಲ್ಲಿದ ಫಿಲಿಪ್ಸ್‌, ಇದಕ್ಕೂ ಮುನ್ನ 3ನೇ ವಿಕೆಟ್‌ಗೆ ಮತ್ತೊಬ್ಬ ಪ್ರತಿಭಾನ್ವಿತ ಬ್ಯಾಟ್ಸ್‌ಮನ್‌ ಡೆವೋನ್‌ ಕಾನ್ವೇ ಅವರೊಟ್ಟಿಗೆ 184 ರನ್‌ಗಳ ಅಮೋಘ ಜೊತೆಯಾಟವಾಡಿದ್ದರು. ಫಿಲಿಪ್ಸ್‌ಗೆ ಉತ್ತಮ ಸಾಥ್‌ ನೀಡಿದ ಕಾನ್ವೇ, 37 ಎಸೆತಗಳಲ್ಲಿ ತಲಾ 4 ಫೋರ್‌ ಮತ್ತು ಸಿಕ್ಸರ್‌ನೊಂದಿಗೆ ಅಜೇಯ 65 ರನ್‌ ಸಿಡಿಸಿದರು. ವೆಸ್ಟ್‌ ಇಂಡೀಸ್‌ ಪರ ಒಶೇನ್‌ ಥಾಮಸ್‌ (44ಕ್ಕೆ 1), ಫೇಬಿಯೆನ್‌ ಆಲೆನ್‌ (35ಕ್ಕೆ 1) ಮತ್ತು ಕೈರೊನ್‌ ಪೊಲಾರ್ಡ್‌ (9ಕ್ಕೆ 1) ವಿಕೆಟ್ ಪಡೆದ ಬೌಲರ್‌ಗಳೆನಿಸಿದರು. ಬಳಿಕ ಗುರಿ ಬೆನ್ನತ್ತಿದ ವೆಸ್ಟ್‌ ಇಂಡೀಸ್‌ ತಂಡ 16 ಓವರ್‌ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 138 ರನ್‌ ಗಳಿಸುವ ಮೂಲಕ ಸೋಲಿನ ಸುಳಿಗೆ ಸಿಲುಕಿತ್ತು. ಸಂಕ್ಷಿಪ್ತ ಸ್ಕೋರ್‌ನ್ಯೂಜಿಲೆಂಡ್: 20 ಓವರ್‌ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 238 (ಮಾರ್ಟಿನ್ ಗಪ್ಟಿಲ್‌ 34, ಟಿಮ್‌ ಸೀಫರ್ಟ್‌ 18, ಡೆವೋನ್‌ ಕಾನ್ವೇ ಅಜೇಯ 65, ಗ್ಲೆನ್‌ ಫಿಲಿಪ್ಸ್‌ 108; ಒಶೇನ್‌ ಥಾಮಸ್‌ 44ಕ್ಕೆ 1, ಫೇಬಿಯೆನ್‌ ಆಲೆನ್‌ 35ಕ್ಕೆ 1, ಕೈರೊನ್‌ ಪೊಲಾರ್ಡ್‌ 9ಕ್ಕೆ 1).
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3lmucmC
