ವೆಂ.ಸುನೀಲ್‌ ಕುಮಾರ್‌, ಕೋಲಾರ ಬೆಂಗಳೂರು: ವಾತಾವರಣದಿಂದ ಮಾವಿನ ಹೂವು ಬಿಡುವುದು ತಡವಾಗುತ್ತದೆ. ವಾಸ್ತವದಲ್ಲಿ ವಾತವಾರಣವು ಹೂ ಮತ್ತು ಕಾಯಿಗಟ್ಟಲು ಸೂಕ್ತವಾಗಿರುತ್ತದೆ. ಆದರೆ, ಚಳಿಯ ಜೊತೆಗೆ ಚಂಡಮಾರುತದ ಪರಿಣಾಮ ಸುರಿಯುತ್ತಿರುವ ಮಳೆಯು ರೈತರಲ್ಲಿ ಆತಂಕ ಹೆಚ್ಚಲು ಕಾರಣವಾಗಿದೆ. ಯಾಕೆಂದರೆ, ಕಳೆದ ವರ್ಷವೂ ಅಕ್ಟೋಬರ್‌ ಹಾಗೂ ಡಿಸೆಂಬರ್‌ನಲ್ಲಿ ನಿರಂತರವಾಗಿ ಮಳೆ ಸುರಿದ ಪರಿಣಾಮ ಹೂ ಬಿಡುವುದು, ಕಾಯಿ ಕಚ್ಚುವ ಕ್ರಿಯೆ ವಿಳಂಬವಾಗಿತ್ತು. ಪರಿಣಾಮ ಶೇ.50ರಷ್ಟು ಫಸಲು ಮಾತ್ರ ರೈತರ ಕೈಸೇರಿತ್ತು. ಸಾಮಾನ್ಯವಾಗಿ ಒಂದು ವರ್ಷ ಮಾವು ಉತ್ತಮ ಇಳುವರಿ ಬಂದರೆ ಮುಂದಿನ ವರ್ಷ ಕಡಿಮೆ ಇಳುವರಿ ಬರುತ್ತದೆ ಎಂದು ಹೇಳಲಾಗುತ್ತದೆ. ಆದರೆ, ಹವಾಮಾನ ವೈಪರಿತ್ಯಗಳಿಂದಾಗಿ ಕಳೆದ ಕೆಲ ವರ್ಷಗಳಿಂದ ನಿರೀಕ್ಷಿತ ಪ್ರಮಾಣದಲ್ಲಿ ಫಸಲು ಬಂದಿಲ್ಲ. ಹೂವಿನ ಮೇಲೆ ಇಳುವರಿ ನಿರೀಕ್ಷೆ ಕಳೆದ ವರ್ಷದ ಇಳುವರಿ ಆಧಾರದ ಮೇಲೆ ಪ್ರಸಕ್ತ ಸಾಲಿನ ಮಾವಿನ ಇಳುವರಿ ನಿರೀಕ್ಷೆ ಮಾಡುವ ಬದಲಿಗೆ ಮರದಲ್ಲಿ ಬಿಟ್ಟಿರುವ ಹೂವಿನ ಆಧಾರದ ಮೇಲೆ ಅಧಿಕಾರಿಗಳು ಇಳುವರಿ ನಿರೀಕ್ಷಿಸುತ್ತಿದ್ದಾರೆ. ಹೀಗಾಗಿ ಹೂ ಬಿಡುವುದು ಪ್ರಮುಖ ಘಟ್ಟವಾಗಿದ್ದು, ಸೂಕ್ತ ವಾತಾವರಣವಿಲ್ಲದಿದ್ದರೆ ಹೂ ಬಿಡುವ ಪ್ರಕ್ರಿಯೆ ಮುಂದಕ್ಕೆ ಹೋಗುತ್ತದೆ ಎಂಬುದು ಅಧಿಕಾರಿಗಳ ಅಭಿಪ್ರಾಯ. ಚಳಿ ಹಾಗೂ ಬಿಸಿಲಿನ ವಾತಾವರಣ ಮಾವಿನ ಹೂ ಚಿಗುರುವುದಕ್ಕೆ ಸೂಕ್ತವಾಗಿರುತ್ತದೆ. ಆದರೆ, ಮಳೆ ಮುಂದುವರಿದರೆ ಹೂ ಬಿಡುವ ಕ್ರಿಯೆ ಮುಂದೂಡಿಕೆಯಾಗುತ್ತದೆ. ಬಾಲಕೃಷ್ಣ, ಉಪನಿರ್ದೇಶಕರು, ಮಾವು ಅಭಿವೃದ್ಧಿ ಕೇಂದ್ರ, ವಗಳಗೆರೆ ಚಳಿ ವಾತಾವರಣ ಪೂರಕ ನಿವಾರ್‌ ಸೈಕ್ಲೋನ್‌ನಿಂದ ಕರ್ನಾಟಕದಲ್ಲಿ ತೋಟಗಾರಿಕೆ ಬೆಳೆಗಳಿಗೆ ಹೆಚ್ಚಿನ ಹಾನಿ ಉಂಟಾಗಿಲ್ಲ. ಯಾಕೆಂದರೆ 8-10 ಸೆಂಟಿಮೀಟರ್‌ ಮಳೆಯಾಗಿದ್ದಿದ್ದರೆ ತುಂಬಾ ತೊಂದರೆಯಾಗುತ್ತಿತ್ತು. ಆದರೆ ಇದೀಗ ಕೇವಲ 1.5 ಯಿಂದ 2 ಸೆಂಟಿಮೀಟರ್‌ ಮಾತ್ರ ಮಳೆಯಾಗಿರುವುದರಿಂದ ತೋಟಗಾರಿಕೆ ಬೆಳೆಗಳಿಗೆ ಯಾವುದೇ ರೀತಿಯ ಹಾನಿಯಾಗಿಲ್ಲ. ಹಾಗಿದ್ದೂ, ಚಳಿ ಹೆಚ್ಚಾದರೆ ಬಳ್ಳಿ ಜಾತಿಯ ತರಕಾರಿ ಬೆಳೆಗಳಲ್ಲಿ ಹೂವು ಉದುರಿ, ಇಳುವರಿ ಕುಂಠಿತಗೊಳ್ಳುತ್ತದೆ ಎಂದು ತೋಟಗಾರಿಕೆ ಇಲಾಖೆ ಅಧಿಕಾರಿಗಳು ತಿಳಿಸಿದರು. ''ಬೆಂಗಳೂರು ಸುತ್ತಮುತ್ತ ಹಾಗೂ ರಾಜ್ಯದ ಇತರೆ ಜಿಲ್ಲೆಗಳಲ್ಲಿ ಬೆಳೆಯುವ ತೋಟಗಾರಿಕೆ ಬೆಳೆಗಳಾದ ಸೇವಂತಿಗೆ, ಗುಲಾಬಿ, ಹೂಕೋಸು, ಎಲೆಕೋಸು, ಬೀಟ್‌ರೂಟ್‌, ಕ್ಯಾರಟ್‌, ದ್ರಾಕ್ಷಿಗೆ ಉತ್ತಮ ವಾತಾವರಣವಿದೆ. ಅದರಲ್ಲೂಆಲೂಗಡ್ಡೆ ಬೆಳೆ ಮತ್ತು ಅವರೆಕಾಯಿ, ತೊಗರಿಕಾಯಿಗಳನ್ನು ಚಳಿಗಾಲದ ಬೆಳೆಗಳೆಂದೇ ಕರೆಯಲಾಗುತ್ತಿದ್ದು, ಈ ಬೆಳಿಗಳಿಗೆ ಚಳಿ ಹೆಚ್ಚಾದಷ್ಟು ಇಳುವರಿಗೆ ಅನುಕೂಲ,'' ಎನ್ನುತ್ತಾರೆ ತೋಟಗಾರಿಕೆ ಇಲಾಖೆಯ ನಿವೃತ್ತ ಅಪರ ನಿರ್ದೇಶಕ ಡಾ. ಎಸ್‌.ವಿ. ಹಿತ್ತಲಮನಿ. ರಾಜ್ಯದ ಇತರೆಡೆ ಹೇಗಿದೆ ಪರಿಸ್ಥಿತಿ?
- ಕೊಡಗಿನಲ್ಲಿ ಕಾಫಿ ಹಣ್ಣಾಗುತ್ತಿದ್ದು ಮಳೆ ಬಂದರೆ ತೊಂದರೆಯಾಗಲಿದೆ.
- ಚಾಮರಾಜನಗರ ಜಿಲ್ಲೆಯಲ್ಲಿ ಸತತ ಮೋಡದಿಂದ ಅರಿಶಿನ ಬೆಳೆಗೆ ತೊಂದರೆ ಆಗುವ ಸಾಧ್ಯತೆ ಹೆಚ್ಚು.
- ಬಾಗಲಕೋಟೆ, ವಿಜಯಪು ಜಿಲ್ಲೆಗಳಲ್ಲಿ ದಾಳಿಂಬೆ, ದ್ರಾಕ್ಷಿ ಈಗ ಹೂ ಬಿಡುವ ಸಮಯ ಆಗಿದ್ದರಿಂದ ಮಂಜಿನಿಂದ ಹೂ ಉದುರುತ್ತದೆ.
- ಬಳ್ಳಾರಿ, ಕೊಪ್ಪಳ ಹಾಗೂ ರಾಯಚೂರು ತ್ರಿವಳಿ ಜಿಲ್ಲೆಯಲ್ಲಿ ಭತ್ತ, ಮೆಣಸಿನಕಾಯಿ, ತೊಗರಿ, ಹತ್ತಿ ಬೆಳೆಗಳಿಗೆ ಹಾನಿಯಾಗುವ ಆತಂಕ. ಉತ್ತರ ಕನ್ನಡ ಜಿಲ್ಲೆಯಲ್ಲಿ ಭತ್ತದ ಕೊಯ್ಲುಗೆ ಅಡ್ಡಿ.
- ಧಾರವಾಡ ಜಿಲ್ಲೆಯಲ್ಲಿ ಮೋಡ ಕವಿದ ವಾತಾವರಣದಿಂದ ಕಡಲೆಗೆ ಕೀಟಗಳ ಬಾಧೆ ಹೆಚ್ಚುವ ಸಾಧ್ಯತೆ ಇದೆ. ಬೀದರ್‌ ಜಿಲ್ಲೆ ಬಾಳೆ ಬೆಳೆಯ ಮೇಲೆ ಪರಿಣಾಮ.
from India & World News in Kannada | VK Polls https://ift.tt/2J95lG4
