ಉಡುಪಿ: ಹೆಚ್ಚುತ್ತಿರುವ ಲವ್ ಜಿಹಾದ್ ವಿರುದ್ಧ ರಾಜ್ಯದಲ್ಲೂ ಕಠಿಣ ಕಾನೂನು ಕ್ರಮ ಜಾರಿಗೆ ಬರಲಿದೆ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ನಳಿನ್ ಕುಮಾರ್ ಕಟೀಲ್ ಹೇಳಿದ್ದಾರೆ. ಮಣಿಪಾಲದಲ್ಲಿ ಶುಕ್ರವಾರ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿದ , ಮುಖ್ಯಮಂತ್ರಿ ಯಡಿಯೂರಪ್ಪ ಮತ್ತು ಸಚಿವ ಸಂಪುಟ ಈ ನಿಟ್ಟಿನಲ್ಲಿ ಶೀಘ್ರವೇ ತೀರ್ಮಾನ ಕೈಗೊಳ್ಳಲಿದೆ ಎಂದರು. ಗ್ರಾಮ ಸ್ವರಾಜ್ಯ ಸಮಾವೇಶ!ರಾಜ್ಯದ 5,808 ಗ್ರಾ. ಪಂ. ಗಳಲ್ಲಿ 96,000 ಅಭ್ಯರ್ಥಿಗಳಿದ್ದು ಶೇ. 80 ಗೆಲುವಿನ ಗುರಿಗಾಗಿ ಲಕ್ಕಿ ಜಿಲ್ಲೆ ಉಡುಪಿಯಿಂದ ಆರಂಭವಾದ ಗ್ರಾಮ ಸ್ವರಾಜ್ಯ ಸಮಾವೇಶ ಪ್ರತಿ ಜಿಲ್ಲೆಯಲ್ಲೂ ಎರಡು ಕಡೆ ಆರು ತಂಡಗಳ ಮೂಲಕ ನಡೆಯಲಿದೆ. ಕಾರ್ಯಕರ್ತರ ಗೆಲುವನ್ನು ಸವಾಲಾಗಿ ಸ್ವೀಕರಿಸಲಾಗಿದೆ ಎಂದು ತಿಳಿಸಿದರು. ಪಂಚಸೂತ್ರ ಅಳವಡಿಕೆ!ಶೇ. 90ಮತಗಟ್ಟೆಗಳಲ್ಲಿ ಪೇಜ್ ಪ್ರಮುಖ್ ನಿಯೋಜನೆ, ಸಂಘಟನಾತ್ಮಕ ಗೆಲುವಿಗೆ ಪಂಚರತ್ನ ಸಮಿತಿ ಸಹಿತ ಪ್ರತಿ ಜಿಲ್ಲೆಯಲ್ಲೂ ವಾರ್ ರೂಂ, ಕಾಲ್ ಸೆಂಟರ್, ಕುಟುಂಬ ಮಿಲನದಂತಹ ಪಂಚಸೂತ್ರ ಅಳವಡಿಸಲಾಗಿದೆ. ರಾಜ್ಯ, ಕೇಂದ್ರದ ಸಾಧನೆಯನ್ನು ಜನರ ಬಳಿಗೆ ಒಯ್ಯಬೇಕು ಎಂದರು. ಗ್ರಾಮ ರಾಜ್ಯದಿಂದ ರಾಮರಾಜ್ಯ!ಪ್ರಧಾನಿ ಮೋದಿ ಗ್ರಾ. ಪಂ. ಸಶಕ್ತೀಕರಣ, ಮೂಲಕ ನೇರ ಅನುದಾನ ಒದಗಿಸಿದ್ದಾರೆ. ಸ್ವಾಯತ್ತೆ ಮೂಲಕ ಗ್ರಾಮ ರಾಜ್ಯದಿಂದ ರಾಮರಾಜ್ಯ ನಿರ್ಮಾಣಕ್ಕೆ ಆದ್ಯತೆ ನೀಡಲಾಗಿದೆ. ಜನಸಾಮಾನ್ಯರ ಬಳಿ ತೆರಳಿ ಗ್ರಾ. ಪಂ. ನಿಂದ ಲೋಕಸಭೆ ತನಕ ಗೆಲುವಿನ ಗುರಿಯಿದೆ ಎಂದು ಇದೆ ವೇಳೆ ನಳೀನ್‌ ಕುಮಾರ್ ಕಟೀಲ್ ತಿಳಿಸಿದರು. ಸಂಪುಟ ವಿಸ್ತರಣೆ ಶೀಘ್ರ!ಕೇಂದ್ರದ ಬಿಜೆಪಿ ವರಿಷ್ಠರ ಜತೆ ಸಿಎಂ ಬಿ. ಎಸ್. ಯಡಿಯೂರಪ್ಪ ಸಮಾಲೋಚಿಸಿ ತಮ್ಮ ವಿವೇಚನೆಗೆ ಅನುಗುಣವಾಗಿ ಸಂಪುಟ ವಿಸ್ತರಣೆ ಮಾಡಲಿದ್ದಾರೆ. ಹಲವು ಸಚಿವರು ತಮ್ಮ ಇಲಾಖಾ ಯೋಜನೆ ಅಂಗೀಕಾರ, ಅನುದಾನಕ್ಕಾಗಿ ದಿಲ್ಲಿಗೆ ತೆರಳಿ ನಾಯಕರ ಭೇಟಿ ಮಾಡುತ್ತಿದ್ದು ಇದಕ್ಕೆ ಅನ್ಯ ಅರ್ಥ ಕಲ್ಪಿಸಬೇಕಿಲ್ಲ. ಮಂಗಳೂರಿನಲ್ಲಿ ರಾಷ್ಟ್ರ ವಿರೋಧಿ ಘೋಷಣೆ, ಬರಹ ಕುರಿತಂತೆ ಅದನ್ನು ಯಾರೇ ಹಾಕಿದ್ದರೂ ಕಠಿಣ ಕ್ರಮ ಕೈಗೊಳ್ಳಬೇಕು ಎಂದರು. ಸುದ್ದಿಗೋಷ್ಟಿಯಲ್ಲಿ ಉಪಮುಖ್ಯಮಂತ್ರಿ ಡಾ. ಅಶ್ವತ್ಥ ನಾರಾಯಣ, ಸಂಸದೆ ಶೋಭಾ ಕರಂದ್ಲಾಜೆ, ಕೋಲಾರ ಸಂಸದ ಮುನಿಸ್ವಾಮಿ, ಮಹೇಶ್ ಟೆಂಗಿನಕಾಯಿ, ಗೀತಾ ವಿವೇಕಾನಂದ, ಉದಯ ಕುಮಾರ್ ಶೆಟ್ಟಿ, ಕುಯಿಲಾಡಿ ಸುರೇಶ್ ನಾಯಕ್, ಲಾಲಾಜಿ ಆರ್. ಮೆಂಡನ್, ಕೆ. ರಘುಪತಿ ಭಟ್, ಮಟ್ಟಾರು ರತ್ನಾಕರ ಹೆಗ್ಡೆ, ದಿನಕರ ಬಾಬು ಉಪಸ್ಥಿತರಿದ್ದರು.
from India & World News in Kannada | VK Polls https://ift.tt/3o3M6My
