ಪ್ರಮೋದ ಹರಿಕಾಂತ ಬೆಳಗಾವಿ: ಈ ಹಿಂದೆ ಮತ್ತು ಇತ್ತೀಚೆಗೆ ಹಂಚಿಕೆಯಾಗಿರುವ ನಿಗಮ ಮಂಡಳಿಗಳ ಹೆಚ್ಚಿನ ಹುದ್ದೆಗಳು ಕೆಜೆಪಿ ಮೂಲದವರ ಪಾಲಾಗಿದ್ದು, ಮೂಲ ಕಾರ್ಯಕರ್ತರಲ್ಲಿ ಅಸಮಾಧಾನ ಭುಗಿಲೆದ್ದಿದೆ. ಇದೇ ಮೊದಲ ಬಾರಿಗೆ ಅತಿ ಹೆಚ್ಚು ರಾಜಕೀಯ ಅಧಿಕಾರ ಪಡೆದುಕೊಂಡಿರುವ ಜಿಲ್ಲಾ ಬಿಜೆಪಿಯಲ್ಲಿ, ಸದ್ಯ ಅಧಿಕಾರದ ಕೊರಗು ಕಾಡಲಾರಂಭಿಸಿದೆ. ಮೂಲ ಬಿಜೆಪಿ ಕಾರ್ಯಕರ್ತರು ಇನ್ನೂ ಕಾರ್ಯಕರ್ತರಾಗಿಯೇ ಉಳಿದಿದ್ದರೆ, ಕೆಜೆಪಿಯಿಂದ ಬಂದವರು ಅಧಿಕಾರ ಹಿಡಿಯುತ್ತಿದ್ದಾರೆ ಎನ್ನುವ ಸಂಕಟ ಬಿಜೆಪಿ ಕಾರ್ಯಕರ್ತರನ್ನು ಕಾಡುತ್ತಿದೆ. 18 ವಿಧಾನಸಭಾ ಕ್ಷೇತ್ರಗಳನ್ನು ಹೊಂದಿರುವ ಬೆಳಗಾವಿ ಜಿಲ್ಲೆಗೆ ಸದ್ಯ 10 ನಿಗಮ ಮಂಡಳಿಗಳು ಸೇರಿ 17 ಕ್ಕೂ ಹೆಚ್ಚು ಪ್ರಮುಖ ಹುದ್ದೆಗಳನ್ನು ನೀಡಲಾಗಿದೆ. ಅದರಲ್ಲಿ ಕೆಲ ಅಭ್ಯರ್ಥಿಗಳ ಆಯ್ಕೆಯಂತೂ ಬಿಜೆಪಿ ನಾಯಕರಲ್ಲಿಯೇ ಆಶ್ಚರ್ಯ ಹುಟ್ಟಿಸಿದೆ. ಪಕ್ಷಕ್ಕಾಗಿ ದುಡಿಯುವ ಬದಲು ಮುಖಂಡರ ಬೆನ್ನು ಬೀಳುವುದು ಯೋಗ್ಯ ಎಂದು ಕಾರ್ಯಕರ್ತರು ನೋವು ಹೊರಹಾಕುತ್ತಿದ್ದಾರೆ. ಶೇ.70ರಷ್ಟು ಕೆಜೆಪಿ: ಸದ್ಯ ಅಧಿಕಾರ ಪಡೆದಿರುವವರ ಪೈಕಿ ಶೇ.70 ರಷ್ಟು ನಾಯಕರು ಕೆಜೆಪಿ ಮೂಲದವರು. ಬಿಜೆಪಿಯಲ್ಲಿಯೇ ಮೂರ್ನಾಲ್ಕು ದಶಕಗಳಿಂದ ಕಾರ್ಯಕರ್ತರಾಗಿದ್ದವರು ಇನ್ನೂ ಕಾರ್ಯಕರ್ತರಾಗಿಯೇ ಉಳಿದಿದ್ದಾರೆ. ರಾಜ್ಯಸಭಾ ಸದಸ್ಯ ಈರಣ್ಣ ಕಡಾಡಿ ಅವರನ್ನು ಹೊರತುಪಡಿಸಿ ಮೂಲ ಬಿಜೆಪಿ ಕಾರ್ಯಕರ್ತರಿಗೆ ಇನ್ನೂ ಅಧಿಕಾರ ಸಿಕ್ಕಿಲ್ಲ ಎನ್ನುವುದು ಕಾರ್ಯಕರ್ತರ ಗೋಳು. ಮೂಲ ಬಿಜೆಪಿಗರು ಎಲ್ಲಿ?: ಬೆಳಗಾವಿಯಲ್ಲಿ ಬಿಜೆಪಿ ಅಧಿಕಾರ ಹಿಡಿಯಲು ಆರಂಭಿಸಿ ಮೂರು ದಶಕಗಳೇ ಕಳೆದಿವೆ. ಅದರಲ್ಲಿ ಮೂಲ ಬಿಜೆಪಿಗರಾಗಿ ಅಧಿಕಾರದಲ್ಲಿಇರುವವರು ರಾಜ್ಯ ಸಭಾ ಸದಸ್ಯ ಈರಣ್ಣ ಕಡಾಡಿ, ಬೆಳಗಾವಿ ದಕ್ಷಿಣ ಕ್ಷೇತ್ರದ ಶಾಸಕ ಅಭಯ ಪಾಟೀಲ್‌. ಉಳಿದವರೆಲ್ಲರೂ ಜನತಾದಳ, ಕಾಂಗ್ರೆಸ್‌, ಎಂಇಎಸ್‌ ಮೂಲದವರು. ವಿಜಯೇಂದ್ರ ಬಣ ಮೇಲುಗೈ: ಬೆಳಗಾವಿಯಲ್ಲಿರುವ 13 ಬಿಜೆಪಿ ಶಾಸಕರ ಪೈಕಿ ಐವರಿಗೆ ಇನ್ನೂ ಯಾವುದೇ ಹೆಚ್ಚುವರಿ ಅಧಿಕಾರ ಸಿಕ್ಕಿಲ್ಲ. ಎಂಟು ಶಾಸಕರ ಪೈಕಿ ಮೂವರಿಗೆ ಸಚಿವ ಸ್ಥಾನ ನೀಡಲಾಗಿದೆ. ಒಟ್ಟು 10 ನಿಗಮ ಮಂಡಳಿಗಳ ಪೈಕಿ ಮೂವರು ಶಾಸಕರು ನಿಗಮ ಮಂಡಳಿ ಅಧ್ಯಕ್ಷರಾಗಿದ್ದಾರೆ. ಚುನಾಯಿತರಲ್ಲದ ಏಳು ಜನರನ್ನು ವಿವಿಧ ಹುದ್ದೆಗಳಿಗೆ ನೇಮಿಸಲಾಗಿದೆ. ಅದರಲ್ಲಿ ಐವರು ಕೆಜೆಪಿಯಿಂದ ಬಂದವರು. ಒಬ್ಬರು ಈಗಷ್ಟೇ ಪಕ್ಷ ಸೇರಿದವರು. ಇವರೆಲ್ಲರೂ ಈಗ ಸಿಎಂ ಬಿಎಸ್‌ ವೈ ಅವರ ಪುತ್ರ ವಿಜಯೇಂದ್ರ ಅವರೊಂದಿಗೆ ಗುರುತಿಸಿಕೊಂಡಿದ್ದಾರೆ. ಬೆಳಗಾವಿಯಲ್ಲಿ ರಾಜಕಾರಣಿಗಳ ಕೊರತೆ ಇಲ್ಲ. ಪ್ರತೀ ಪಕ್ಷದಲ್ಲಿ ಘಟಾನುಘಟಿ ಮುಖಂಡರು ಇದ್ದಾರೆ. ಬಿಜೆಪಿಯಲ್ಲಿಯೂ ಸಾಕಷ್ಟು ಕಾರ್ಯಕರ್ತರು ಅನೇಕ ವರ್ಷಗಳಿಂದ ಅಧಿಕಾರದ ನಿರೀಕ್ಷೆಯಲ್ಲಿದ್ದಾರೆ. ಅಂಥವರನ್ನು ಕಡೆಗಣಿಸಲಾಗಿದೆ. ಬೆಂಗಳೂರಿನಲ್ಲಿ ನಾಯಕರ ಹಿಂದೆ ಓಡಾಡಿಕೊಂಡಿದ್ದವರಿಗೆ ಅಧಿಕಾರ ನೀಡಲಾಗಿದೆ ಎನ್ನುವುದು ಮೂಲ ಬಿಜೆಪಿಗರ ದೂರು. 'ಇತ್ತೀಚೆಗೆ ಪಕ್ಷಕ್ಕೆ ಬಂದವರಿಗೆಲ್ಲಅಧಿಕಾರ ಸಿಗುತ್ತಿದೆ. ಅವರ ರೀತಿಯಲ್ಲಿಯೇ ಕಾರ್ಯಕರ್ತರಿಗೂ ಅಧಿಕಾರ ಕೊಟ್ಟರೆ ನಮಗೂ ಖುಷಿ. ಇಷ್ಟು ವರ್ಷ ಪಕ್ಷಕ್ಕಾಗಿ ದುಡಿದು ಏನು ಮಾಡಿದ್ದೀರಿ ಎಂದು ಮನೆಯಲ್ಲಿ ಕೇಳಿದಾಗ ಸಂಕಟವಾಗುತ್ತದೆ. ರಾಜ್ಯದ ಮುಖಂಡರು ಇದನ್ನು ಗಮನಿಸಬೇಕು' ಎನ್ನುತ್ತಾರೆ ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಬಿಜೆಪಿ ಮುಖಂಡ. 'ಸರಕಾರ ವಲಸಿಗರಿಗೆ ಅಧಿಕಾರ ಕೊಡುತ್ತಿದೆ. ಶಾಸಕರು ಸ್ಥಳೀಯ ಮಟ್ಟದಲ್ಲಿ ತಮ್ಮ ಬೆಂಬಲಿಗರಿಗೆ ಅಧಿಕಾರ ಹಂಚುತ್ತಾರೆ. ಮೂಲ ಕಾರ್ಯಕರ್ತರು ಏನು ಮಾಡಬೇಕು?' ಎಂದು ಬಿಜೆಪಿ ಹಿರಿಯ ಮುಖಂಡರೊಬ್ಬರು ಅಳಲು ತೋಡಿಕೊಳ್ಳುತ್ತಾರೆ.
from India & World News in Kannada | VK Polls https://ift.tt/2HNTtZb
