ಎಂ.ಎನ್‌. ಅಹೋಬಳಪತಿ ಚಿತ್ರದುರ್ಗ ಚಿತ್ರದುರ್ಗ: ಯಾವುದೇ ಗ್ರಾಪಂ ವ್ಯಾಪ್ತಿಯಲ್ಲಿ ಸೋಶಿಯಲ್‌ ಆಡಿಟ್‌ ನಡೆಸಲು ಸ್ಪಷ್ಟ ಮಾರ್ಗಸೂಚಿ ಇದೆ. ಸ್ಥಳ ಭೇಟಿ, ಎಂ.ಬಿ.ಪರಿಶೀಲನೆ, ಉದ್ಯೋಗಖಾತ್ರಿ ಮಾರ್ಗಸೂಚಿ ಪಾಲನೆ, ಜಾಬ್‌ಕಾರ್ಡ್‌ ಪರಿಶೀಲನೆ, ಕಾಮಗಾರಿ ಸ್ಥಳ ಮಾಪನ ಇತ್ಯಾದಿಗಳನ್ನು ಮಾಡಬೇಕು. ಗ್ರಾಮಸಭೆ ಆಯೋಜಿಸಿ, ಭಾಗವಹಿಸಿದ ಗ್ರಾಮಸ್ಥರಿಂದ ಆಕ್ಷೇಪಣೆ ಸ್ವೀಕರಿಸಿ, ನಡಾವಳಿ ದಾಖಲಿಸಬೇಕು. ಎಲ್ಲ ಕಡೆ ಇದು ವ್ಯವಸ್ಥಿತವಾಗಿ ನಡೆಯುವುದಿಲ್ಲ. ಕೆಲವು ಕೋ ಆರ್ಡಿನೇಟರ್‌ಗಳು ತಮಗಿರುವ ಅಧಿಕಾರ ದುರುಪಯೋಗಪಡಿಸಿಕೊಂಡು ವಾಸ್ತವಾಂಶಕ್ಕೆ ಭಿನ್ನವಾಗಿ ಆಕ್ಷೇಪಣೆ ದಾಖಲಿಸುತ್ತಾರೆ ಎನ್ನುವ ದೂರುಗಳಿವೆ. ಸೋಶಿಯಲ್‌ ಆಡಿಟ್‌ ಗ್ರಾಪಂ ಹಂತದಲ್ಲಿ ನರೇಗಾದಲ್ಲಿ ಪಾರದರ್ಶಕತೆ ಹೆಚ್ಚಿಸುವ ಬದಲು ಕೋ ಆರ್ಡಿನೇಟರ್‌ಗಳ ಸ್ವ ಹಿತಾಸಕ್ತಿ ಹಾಗೂ ಪಿಡಿಒಗಳನ್ನು ಹೆದರಿಸಿ, ಬೆದರಿಸುವ ಅಸ್ತ್ರವಾಗಿ ಬಳಕೆಯಾಗುತ್ತಿದೆ. ಸೋಶಿಯಲ್‌ ಆಡಿಟ್‌ನಲ್ಲಿ ಉದ್ದೇಶ ಪೂರ್ವಕವಾಗಿ ಸೂಚಿಸುವ ಹೆಚ್ಚಿನ ಆಕ್ಷೇಪಣೆ ಹಾಗೂ ವಸೂಲಾತಿ ಪ್ರಮಾಣಕ್ಕೆ ಹೆದರಿ ನರೇಗಾ ಕಾಮಗಾರಿ ಅನುಷ್ಟಾನಕ್ಕೆ ಪಿಡಿಒಗಳು ಹಿಂದೇಟು ಹಾಕುವಂತಾಗಿದೆ. ಗ್ರಾಪಂಗಳಲ್ಲಿ ಲೋಕಲ್‌ ಇಂಟರ್ನಲ್‌ ಆಡಿಟ್‌ ನಡೆಯುತ್ತದೆ. ಜತೆಗೆ ಸಿಎಜಿ, ಜಮಾಬಂಧಿ ನಡೆಯುತ್ತದೆ. ವಿಶೇಷ ಹಗರಣ, ಲೋಪಗಳು ಕಂಡು ಬಂದಲ್ಲಿ ಜಿಪಂನಿಂದ ವಿಶೇಷ ಆಡಿಟ್‌ ಸಹಾ ಮಾಡಿಸಲಾಗುತ್ತದೆ. ಇಷ್ಟರ ನಡುವೆ ಸೋಶಿಯಲ್‌ ಆಡಿಟ್‌ ಮಾತ್ರ ಪಿಡಿಒಗಳಿಗೆ ತಲೆನೋವಾಗಿ ಪರಿಣಮಿಸಿದೆ. ಸೋಶಿಯಲ್‌ ಆಡಿಟ್‌ನಲ್ಲಿ ಆಕ್ಷೇಪಣೆ ಆಗಿದ್ದೆಲ್ಲವೂ ವಸೂಲಾತಿ ವ್ಯಾಪ್ತಿಗೆ ಬರುವುದಿಲ್ಲ. ಆಕ್ಷೇಪಣೆಗೆ ಕಾರಣವಾದ ದಾಖಲೆ, ವಿವರಣೆ ಕೊಟ್ಟಲ್ಲಿ ತಾಪಂನ ಅಡಾಕ್‌ ಕಮಿಟಿ ಈ ಆಕ್ಷೇಪಣೆಗಳನ್ನು ಅನೂರ್ಜಿತಗೊಳಿಸುತ್ತದೆ. ಇಷ್ಟಾಗಿಯೂ ಕೂಡ ಕೋ ಆರ್ಡಿನೇಟರ್‌ಗಳ ನಕಾರಾತ್ಮಕ ಧೋರಣೆಯಿಂದಾಗಿ ಸೋಶಿಯಲ್‌ ಆಡಿಟ್‌ ದೊಡ್ಡ ಸಮಸ್ಯೆ, ಸವಾಲುಗಳನ್ನು ತಂದಿಟ್ಟಿದೆ. ಪಿಡಿಒ, ಸಿಬ್ಬಂದಿಗೆ ಬಡ್ತಿ ಕಟ್‌ ಕೆಲ ಮಾಹಿತಿ ಹಕ್ಕು ಕಾರ್ಯಕರ್ತರು ಆಕ್ಷೇಪಣೆಯ ಮೊತ್ತವನ್ನೇ ವಸೂಲಾತಿ ಮೊತ್ತ ಎಂದು ಭಾವಿಸಿ, ಪದೇ ಪದೇ ಲೋಕಾಯುಕ್ತಕ್ಕೆ ದೂರು ಸಲ್ಲಿಸುವುದು, ಒಂಬುಡ್ಸ್‌ಮನ್‌ಗೆ ಶಿಸ್ತು ಕ್ರಮ ಜರುಗಿಸಲು ದೂರು ಸಲ್ಲಿಸುವುದರಿಂದ ಪಿಡಿಒಗಳು, ಸಿಬ್ಬಂದಿ ನೌಕರರು ಬಡ್ತಿ ಅವಕಾಶಗಳನ್ನು ಕಳೆದುಕೊಳ್ಳುವ ಸ್ಥಿತಿ ಬಂದೊದಗಿದೆ. ಕಾಮಗಾರಿ ಗುಣಮಟ್ಟದ ತಾಂತ್ರಿಕ ಅನುಭವ ಇಲ್ಲದೇ ನೀಡುವ ವರದಿಗಳು ಎಷ್ಟೋ ಪಿಡಿಒಗಳು ತಮ್ಮ ಸೇವಾವಧಿಯುದ್ದಕ್ಕೂ ವಸೂಲಾತಿ ಮೊತ್ತ ಪಾವತಿಸುವ ಒತ್ತಡಕ್ಕೆ ಸಿಲುಕಿಸಿವೆ. ಒಂದು ಕಡೆ ಗುರಿ ಸಾಧನೆಯ ಒತ್ತಡ, ಮತ್ತೊಂದು ಕಡೆ ಜನಪ್ರತಿನಿಧಿಗಳ ಒತ್ತಡದ ನಡುವೆ ಪಿಡಿಒಗಳು ಹೈರಾಣಾಗಿದ್ದಾರೆ. ಜಿಲ್ಲಾ, ತಾಲೂಕು ಸಂಯೋಜಕರ ವಿರುದ್ಧ ದೂರು ಕೋ ಆರ್ಡಿನೇಟರ್‌ಗಳು ಕಿರುಕುಳ ಹೇಗಿರುತ್ತದೆ ಎಂಬುದಕ್ಕೆ ಜಿಲ್ಲಾ ಕೋಆರ್ಡಿನೇಟರ್‌ ಉಮಾ ಹಾಗೂ ತಾಲೂಕು ಕೋ ಆರ್ಡಿನೇಟರ್ ಉಷಾರಾಣಿ ವಿರುದ್ಧ ಪಿಡಿಒಗಳ ಜಿಲ್ಲಾ ಘಟಕದಿಂದ ಸಾಮಾಜಿಕ ಪರಿಶೋಧನಾ ನಿರ್ದೇಶನಾಲಯ ನಿರ್ದೇಶಕರಿಗೆ ನೀಡಿರುವ ದೂರು ಉದಾಹರಣೆಯಾಗಿದೆ. ಒಂದೇ ಕಾಮಗಾರಿಗೆ ಎರಡೆರಡು ಬಾರಿ ವಸೂಲಾತಿ ತೋರಿಸಲಾಗುತ್ತಿದೆ. ಅನುಷ್ಟಾನ ಇಲಾಖೆಗಳೊಂದಿಗೆ ಹಣಕಾಸಿನ ಆಮಿಷಕ್ಕೆ ಒಳಗಾಗಿ ಯಾವುದೇ ರೀತಿಯ ಆಕ್ಷೇಪಣೆ, ವಸೂಲಾತಿ ಸಲ್ಲಿಸದೇ ಗ್ರಾಪಂ ಪಿಡಿಒಗಳಿಗೆ ಮಾತ್ರ ವಸೂಲಾತಿ ತೋರಿಸುತ್ತಿದ್ದಾರೆ ಎಂದು ದೂರು ನೀಡಿದ್ದಾರೆ. ಗ್ರಾಮಸಭೆ ಅಧ್ಯಕ್ಷರ ಸಹಿಯನ್ನು ತಾವೇ ಮಾಡಿಕೊಳ್ಳುತ್ತಾರೆ. ಆರು ತಿಂಗಳು ಕಳೆದರೂ ಗ್ರಾಮಸಭೆ ನಡಾವಳಿ ಪುಸ್ತಕ ಪಿಡಿಒಗಳು ನೀಡುತ್ತಿಲ್ಲ. ಅಡಾಕ್‌ ಕಮಿಟಿಗೆ ಸರಿಯಾದ ರೀತಿಯಲ್ಲಿ ಸ್ಪಂದಿಸುತ್ತಿಲ್ಲ. ಎಲ್ಲ ಪಂಚಾಯಿತಿಗಳಿಗೂ ಒಂದೇ ತೆರನಾದ ವರದಿ ನೀಡುತ್ತಿದ್ದಾರೆ. ಕೂಡಲೇ ಇವರನ್ನು ಬೇರೆ ಜಿಲ್ಲೆಗೆ ವರ್ಗಾಯಿಸಿ, ಯಾವುದೇ ಅಡೆತಡೆಗಳಿಲ್ಲದೇ ಸಾಮಾಜಿಕ ಲೆಕ್ಕ ಪರಿಶೋಧನೆ ನಡೆಸಲು ಅನುವು ಮಾಡಿಕೊಡಬೇಕು ಎಂದು ಮನವಿ ಮಾಡಿದ್ದಾರೆ. ಜಿಲ್ಲಾ ಹಾಗೂ ತಾಲೂಕು ಕೋ ಆರ್ಡಿನೇಟರ್ ವಿರುದ್ಧ ಪಿಡಿಒಗಳ ಜಿಲ್ಲಾಘಟಕದಿಂದ ಬಂದಿರುವ ದೂರು ಪರಿಶೀಲಿಸಿ, ಸರಕಾರಕ್ಕೆ ಕಳುಹಿಸಲಾಗಿದೆ. ಟಿ.ಯೋಗೇಶ್‌, ಸಿಇಒ
from India & World News in Kannada | VK Polls https://ift.tt/3q3TMQU
