ಬಾಸೆಲ್ (ಸ್ವಿಜರ್ಲೆಂಡ್): ಎರಡು ಬಾರಿಯ ಬೆಳ್ಳಿ ಪದಕ ವಿಜೇತೆ ಪಿ.ವಿ.ಸಿಂಧೂ ಇಲ್ಲಿ ನಡೆಯುತ್ತಿರುವ 2019ನೇ ಸಾಲಿನ ಬಿಡಬ್ಲ್ಯುಎಫ್ ವಿಶ್ವ ಚಾಂಪಿಯನ್ಶಿಪ್ನಲ್ಲಿ ಸೆಮಿಫೈನಲ್ಗೇರಿದ ಸಾಧನೆ ಮಾಡಿದ್ದಾರೆ. ಶುಕ್ರವಾರ ನಡೆದ ಮಹಿಳೆಯರ ಸಿಂಗಲ್ಸ್ ವಿಭಾಗದ ಕ್ವಾರ್ಟರ್ ಫೈನಲ್ ಮುಖಾಮುಖಿಯಲ್ಲಿ ಸೋಲಿನ ದವಡೆಯಿಂದ ಪಾರಾಗಿರುವ 5ನೇ ಶ್ರೇಯಾಂಕದ ಸಿಂಧೂ, ಚೈನೀಸ್ ತೈಪೆಯ ತಾಯಿ ತ್ಸು ಯಿಂಗ್ ವಿರುದ್ಧ 12-21, 23-21, 21-19ರ ಅಂತರದ ಕಠಿಣ ಗೆಲುವು ದಾಖಲಿಸಿದರು. ಆರಂಭಿಕ ಸೆಟ್ನಲ್ಲಿ ಆಘಾತ ಎದುರಿಸಿದ ಸಿಂಧೂ ಪಂದ್ಯದಲ್ಲಿ ತಿರುಗೇಟು ನೀಡಲು ಹರಸಾಹಸ ಪಡಬೇಕಾಯಿತು. ಅಷ್ಟೇ ಯಾಕೆ ದ್ವಿತೀಯ ಸೆಟ್ ಪ್ರಯಾಸದಲ್ಲಿ ಗೆದ್ದರು. ಆದರೂ ಛಲ ಬಿಡದ ಸಿಂಧೂ ನಿರ್ಣಾಯಕ ಸೆಟ್ನಲ್ಲಿ ಅಮೋಘ ಆಟವನ್ನು ಪ್ರದರ್ಶಿಸುವ ಮೂಲಕ ಪಂದ್ಯ ವಶಪಡಿಸಿಕೊಂಡರು. ಒಂದು ತಾಸು 11 ನಿಮಿಷಗಳ ವರೆಗೂ ಸಾಗಿದ ಕಠಿಣ ಹೋರಾಟದ ಕೊನೆಯಲ್ಲಿ ಸಿಂಧೂ ಗೆಲುವಿನ ಮಂದಹಾಸ ಬೀರಿದರು. ಈ ಮೂಲಕ ಪ್ರಶಸ್ತಿಯತ್ತ ದಿಟ್ಟ ಹೆಜ್ಜೆಯನ್ನಿಟ್ಟಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/328qrbt
