ಹೊಸದಿಲ್ಲಿ: ಇದು ರಾಜ ಮಹಾರಾಜರ ಕಾಲದ ಮಾತಲ್ಲ.. ಇವತ್ತಿಗೂ ಕೂಡಾ ವ್ಯಾಘ್ರ ಹಂತಕರ ಆರ್ಭಟ ಜೋರಾಗೇ ಇದೆ. ವನ್ಯಜೀವಿ ಸಂರಕ್ಷಣೆಗೆ ಅದೆಂಥಾ ಬಿಗಿ ಕಾನೂನುಗಳೇ ಬಂದಿದ್ರೂ ಕೂಡಾ, ಹುಲಿಗಳ ಸಂತತಿ ದೇಶದಲ್ಲಿ ಕಡಿಮೆಯಾಗ್ತಿದ್ದರೂ ಕೂಡಾ, ಪ್ರಾಣಿಗಳ ರಾಜನ ರಕ್ಷಣೆ ಇಂದಿಗೂ ಮರೀಚಿಕೆ. ಇದಕ್ಕೆ ಸಾಕ್ಷಿ, ಇದೀಗ ಹೊರಬಿದ್ದಿರುವ ರಿಪೋರ್ಟ್.. ಈ ವರದಿಯ ಅಂಶಗಳನ್ನು ನೋಡಿದ್ರೆ ಭಾರತೀಯರಾದ ನಾವು ನಿಜಕ್ಕೂ ತಲೆ ತಗ್ಗಿಸಲೇಬೇಕು. 21ನೇ ಶತಮಾನದ ಆರಂಭದಿಂದ, ಅಂದರೆ 2 ಸಾವಿರ ಇಸ್ವಿಯಿಂದ 2008ರವರೆಗೆ ಈ ಭೂಮಿಯ ಮೇಲಿದ್ದ 1977 ಹುಲಿಗಳು ಹಂತಕರ ಪೈಶಾಚಿಕ ಕೃತ್ಯಕ್ಕೆ ಬಲಿಯಾಗಿವೆ. ಈ ಪೈಕಿ ಭಾರತೀಯ ಹಂತಕರ ಕೃತ್ಯವೇ ಮೇಲುಗೈ ಸಾಧಿಸಿದೆ..! ಬರೋಬ್ಬರಿ 626 ಹುಲಿಗಳು ಭಾರತದಲ್ಲಿ ಕಾಡುಗಳ್ಳರ ದುರಾಸೆಗೆ ಜೀವಬಿಟ್ಟಿವೆ. ವಿಶಾದ್ಯಂತ ಬಲಿಯಾದ ಹುಲಿಗಳ ಲೆಕ್ಕಕ್ಕೆ ಹೋಲಿಸೋದಾದ್ರೆ ಶೇಕಡಾ 26.5ರಷ್ಟು ಹುಲಿಗಳು ಭಾರತದಲ್ಲೇ ಬಲಿಯಾಗಿವೆ. ಹುಲಿಗಳ ಸಂತತಿಯನ್ನು ಹೊಂದಿರುವ ವಿಶ್ವದ ಒಟ್ಟು 32 ದೇಶಗಳಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ ಈ ಸಂಗತಿ ಬಯಲಾಗಿದೆ. ಬ್ರಿಟನ್ನ ಕೇಂಬ್ರಿಜ್ ನಲ್ಲಿರುವ ಟ್ರಾಫಿಕ್ ಇಂಟರ್ ನ್ಯಾಷನಲ್ ಎಂಬ ಸಂಸ್ಥೆ ನಡೆಸಿದ ಈ , ವನ್ಯಜೀವಿ ಪ್ರಿಯರಲ್ಲಿ ಬೇಸರದ ಜೊತೆಗೆ ಆಕ್ರೋಶವನನ್ನೂ ಉಂಟುಮಾಡಿದೆ. ಹುಲಿ ಹತ್ಯಾಕಾಂಡದಲ್ಲಿ ಭಾರತ ಮೊದಲ ಸ್ಥಾನ ಪಡೆದರೆ 2ನೇ ಹಾಗೂ 3ನೇ ಸ್ಥಾನಗಳನ್ನು ಕ್ರಮವಾಗಿ ಥೈಲ್ಯಾಂಡ್ ಹಾಗೂ ಇಂಡೋನೇಷ್ಯಾ ಪಡೆದಿವೆ. ವಿಶ್ವದಲ್ಲೇ ಅತಿಹೆಚ್ಚು 2226 ಹುಲಿಗಳನ್ನು ಹೊಂದಿರುವ ದೇಶ ಎಂಬ ಹೆಮ್ಮೆ ಭಾರತಕ್ಕಿದೆ. ಇತ್ತೀಚಿಗಷ್ಟೆ ಹೊರಬಿದ್ದ ಸರ್ಕಾರಿ ವರದಿಯಲ್ಲಿ ದೇಶ ಹುಲಿ ಸಂತತಿ ಸಂವರ್ಧನೆಯಲ್ಲಿ ಮುಂದಿದೆ ಎಂಬ ಅಂಶ ಬಯಲಾಗಿತ್ತು. ಆದ್ರೆ ಇದೀಗ ಹುಲಿಗಳ ಹತ್ಯಾಕಾಂಡದಲ್ಲೂ ಭಾರತವೇ ಮುಂಚೂಣಿಯಲ್ಲಿರೋದು ನಿಜಕ್ಕೂ ವಿಷಾದನೀಯ ಸಂಗತಿ.
from India & World News in Kannada | VK Polls https://ift.tt/31WWIly
