ಬಿಯಾರಿಟ್ಸ್: ಇಂದು (ಭಾನುವಾರ) ಫ್ರಾನ್ಸ್ನ ಬಿಯಾರಿಟ್ಸ್ನಲ್ಲಿ ನಡೆಯಲಿರುವ ಜಿ-7 ರಾಷ್ಟ್ರಗಳ ಶೃಂಗಸಭೆಯಲ್ಲಿ ಪ್ರಧಾನಿ ಅವರು ಭಾಗವಹಿಸಲಿದ್ದು, ಜಮ್ಮು-ಕಾಶ್ಮೀರ ವಿಷಯದ ಕುರಿತು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜತೆ ಮಾತುಕತೆ ನಡೆಸುವ ಸಾಧ್ಯತೆ ಇದೆ. ಏಳು ಶ್ರೀಮಂತ ರಾಷ್ಟ್ರಗಳ ಜಿ7 ಗುಂಪಿನ ಸಭೆಗೆ ಭಾರತಕ್ಕೆ ವಿಶೇಷ ಆಹ್ವಾನವಿದ್ದು, ಜಾಗತಿಕ ಆರ್ಥಿಕತೆ ಮಂದಗತಿ ಮತ್ತು ವ್ಯಾಪಾರ ಯುದ್ಧದ ಬಗ್ಗೆ ಹೆಚ್ಚುತ್ತಿರುವ ಕಾಳಜಿಯಿಂದ ಈ ಮಹತ್ವದ ಸಭೆ ಮೇಲೆ ವಿಶ್ವದ ಕಣ್ಣು ನೆಟ್ಟಿದೆ. ಅಭಿವೃದ್ಧಿ ಹೊಂದಿದ ರಾಷ್ಟ್ರಗಳ ಗುಂಪಿನ ಈ ವಾರ್ಷಿಕ ಸಭೆಯಲ್ಲಿ ಅಮೆಜಾನ್ ಕಾಡುಗಳಲ್ಲಿನ ಬೆಂಕಿ, ಬ್ರೆಕ್ಸಿಟ್ನ ಅಸ್ತವ್ಯಸ್ತತೆ ಕೊನೆಗೊಳಿಸುವುದು ಮತ್ತು ವ್ಯಾಪಾರ ಉದ್ವಿಗ್ನತೆ ಕಡಿಮೆ ಮಾಡುವುದು ಸೇರಿದಂತೆ ಹಲವು ವಿಷಯಗಳ ಬಗ್ಗೆ ಚರ್ಚೆ ನಡೆಯಲಿದೆ. ಆರಂಭದ ಕೆಲವೇ ಗಂಟೆಗಳ ಮೊದಲು ಪ್ರಾನ್ಸ್ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಅವರು ದೂರದರ್ಶನದಲ್ಲಿ ಸಾರ್ವಜನಿಕರನ್ನು ಉದ್ದೇಶಿಸಿ ಮಾತನಾಡಿದ್ದು, ಅಮೆಜಾನ್ ಕಾಡಿನ ಬೆಂಕಿ ವಿಷಯ ಕಾರ್ಯಸೂಚಿಯ ಅಗ್ರಸ್ಥಾನದ ವಿಷಯವಾಗಿದೆ ಎಂದು ತಿಳಿಸಿದ್ದರು. ಆದರೆ, ಆತಿಥೇಯ ರಾಷ್ಟ್ರ ಫ್ರಾನ್ಸ್ನ ಅಧ್ಯಕ್ಷ ಇಮಾನ್ಯುಯಲ್ ಮ್ಯಾಕ್ರಾನ್ ಅವರು ಈ ಶೃಂಗಸಭೆ ಕುರಿತು ಹೆಚ್ಚಿನ ನಿರೀಕ್ಷೆ ಹೊಂದಲು ಸಾಧ್ಯವಿಲ್ಲ ಎಂದು ಈಗಾಗಲೇ ಹೇಳಿದ್ದಾರೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಜಾಗತಿಕ ಹವಾಮಾನ ಬದಲಾವಣೆ ತಡೆಯಲು ರೂಪಿಸಿರುವ ಒಪ್ಪಂದಕ್ಕೆ ಸಂಬಂಧಿಸಿದಂತೆ ಯಾವುದೇ ಷರತ್ತಿಗೆ ಒಪ್ಪುವ ಸಾಧ್ಯತೆಯನ್ನು ಮ್ಯಾಕ್ರಾನ್ ತಳ್ಳಿಹಾಕಿದ್ದಾರೆ. ಅಮೇಜಾನ್ ಕಾಡ್ಗಿಚ್ಚಿನ ಹಿನ್ನೆಲೆಯಲ್ಲಿ ಈ ಬಾರಿಯ ಶೃಂಗಸಭೆಯಲ್ಲಿ ಜಾಗತಿಕ ಹವಾಮಾನ ಬದಲಾವಣೆ ವಿಚಾರ ಹೆಚ್ಚಿನ ಮಹತ್ವ ಪಡೆದುಕೊಂಡಿದೆ. ಜತೆಗೆ ವಿವಿಧ ದೇಶಗಳ ನಡುವೆ ವ್ಯಾಪಾರ ನಿರ್ಬಂಧ ತೆರವುಗೊಳಿಸುವ ಬಗ್ಗೆಯೂ ಚರ್ಚೆ ನಡೆಯಲಿದೆಯಾದರೂ ಈ ನಿಟ್ಟಿನಲ್ಲೂ ಯಾವುದೇ ಮಹತ್ವದ ಫಲಿತಾಂಶ ನಿರೀಕ್ಷಿಸುವಂತಿಲ್ಲ ಎಂದು ಮೂಲಗಳು ಹೇಳಿವೆ. ಐದು ವರ್ಷಗಳ ಹಿಂದೆ ಜಿ-7ನಿಂದ ಹೊರಬಿದ್ದ ರಷ್ಯಾವನ್ನು ಮತ್ತೊಮ್ಮೆ ಗುಂಪಿಗೆ ಸೇರಲು ಅವಕಾಶ ನೀಡಬೇಕೆಂಬ ಟ್ರಂಪ್ ಮನವಿಯನ್ನು ಈಗಾಗಲೇ ಮ್ಯಾಕ್ರಾನ್ ತಳ್ಳಿಹಾಕಿದ್ದರೆ.
from India & World News in Kannada | VK Polls https://ift.tt/2KTKLr4
