ವಾಷಿಂಗ್ಟನ್: ಇಡೀ ಜಗತ್ತು ಅಮೆರಿಕದ ಅಧ್ಯಕ್ಷೀಯ ಮತ್ತು ಉಪಾಧ್ಯಕ್ಷೀಯ ಚುನಾವಣೆಗೆ ಫಲಿತಾಂಶಕ್ಕಾಗಿ ಕಾತರದಿಂದ ಕಾಯುತ್ತಿದೆ. ಜಾಗತಿಕ ರಾಜಕಾರಣದ ಪಥವನ್ನು ನಿರ್ದೇಶಿಸಬಲ್ಲ ಶಕ್ತಿ ಇರುವ ಅಮೆರಿಕ ಚುನಾವಣಾ ಫಲಿತಾಂಶ ಇಡೀ ವಿಶ್ವವನ್ನು ತುದಿಗಾಲಿನಲ್ಲಿ ನಿಲ್ಲಿಸಿದೆ. ಆದರೆ ಈ ಬಾರಿ ಅಮೆರಿಕದ ಚುನಾವಣಾ ಫಲಿತಾಂಶ ತಡವಾಗಿ ಘೋಷಣೆಯಾಗುವ ಸಾಧ್ಯತೆ ದಟ್ಟವಾಗಿದೆ. ಇದಕ್ಕೆ ಹಲವಾರು ಕಾರಣಗಳಿದ್ದು, ಹೊಸ ಅಮೆರಿಕನ್ ಅಧ್ಯಕ್ಷರನ್ನು ನೋಡಲು ಜಗತ್ತು ಇನ್ನೂ ಸ್ವಲ್ಪ ಕಾಯಬೇಕಾದ ಪರಿಸ್ಥಿತಿ ಎದುರಾಗಿದೆ. ಪ್ರಮುಖವಾಗಿ ಕೊರೊನಾ ವೈರಸ್ ಹಾವಳಿಯ ಕಾರಣಕ್ಕೆ ಈ ಬಾರಿ ಅಮೆರಿಕದಲ್ಲಿ ಮೇಲ್-ಇನ್ ಮತದಾನದಲ್ಲಿ ಭಾರೀ ಹೆಚ್ಚಳವಾಗಿದೆ. ಹೀಗಾಗಿ ಬಹುತೇಕ ರಾಜ್ಯಗಳಲ್ಲಿ ಅಂಚೆ ಮತಗಳನ್ನು ಎಣಿಸಲು ಹೆಚ್ಚಿನ ಸಮಯ ತೆಗೆದುಕೊಳ್ಳುತ್ತದೆ ಎಂದು ಹೇಳಲಾಗಿದೆ. ಈ ಬಾರಿ ಅಂಚೆ ಮತದಾನದ ಪ್ರಮಾಣ ಸುಮಾರು 8 ಕೋಟಿಗಳಷ್ಟು ಹೆಚ್ಚಾಗಬಹುದು ಎಂದು ನಿರೀಕ್ಷಿಸಲಾಗಿದ್ದು, ಬಹುತೇಕ ರಾಜ್ಯಗಳಲ್ಲಿ ಮತ ಎಣಿಕೆ ಕಾರ್ಯ ವಿಳಂಬವಾಗಲಿದೆ. ಹೀಗಾಗಿ ನೇರ ಮತದಾನದ ಮೂಲಕ ಸ್ಪಷ್ಟ ಚಿತ್ರಣ ದೊರೆಯದಿರುವ ಸಾಧ್ಯತೆ ಇದ್ದು, ಅಂಚೆ ಮತದಾನದ ಮತಗಳ ಎಣಿಕೆ ಕಾರ್ಯ ಮುಗಿದ ಬಳಿಕವಷ್ಟೇ ಹೊಸ ಅಧ್ಯಕ್ಷರ ಹೆಸರನ್ನು ಘೋಷಿಸಬೇಕಾಗುತ್ತದೆ. ಸಂಪೂರ್ಣ ಅಂಚೆ ಮತದಾನ ಎಣಿಕೆ ಕಾರ್ಯ ಕೆಲವು ದಿನ ಅಥವಾ ಕೆಲವು ವಾರಗಳನ್ನು ತೆಗೆದುಕೊಳ್ಳಬಹುದು ಎಂದೂ ಚುನಾವಣಾ ಅಧಿಕಾರಿಗಳು ತಿಳಿಸಿದ್ದಾರೆ. ಒಂದು ವೇಳೆ ಚುನಾವಣಾ ಫಲಿತಾಂಶ ವಿವಾದಕ್ಕೆ ಕಾರಣವಾದರೆ ದೀರ್ಘ ಸಮಯದ ಕಾನೂನು ಹೋರಾಟಕ್ಕೆ ಮುನ್ನುಡಿ ಬರೆದರೂ ಅಚ್ಚರಿಯಿಲ್ಲ ಎನ್ನುತ್ತಾರೆ ತಜ್ಞರು. ಒಟ್ಟಿನಲ್ಲಿ ಅಮೆರಿಕದ ಚುನಾವಣಾ ಫಲಿತಾಂಶ ಘೋಷಣೆ ಈ ಬಾರಿ ವಿಳಂಬವಾಗುವ ಸಾಧ್ಯತೆ ದಟ್ಟವಾಗಿದ್ದು, ಶ್ವೇತಭವನಕ್ಕೆ ಹೊಸ ಅಧ್ಯಕ್ಷರ ಆಗಮನವನ್ನು ನೋಡಲು ಅಮೆರಿಕದ ಜನತೆಯೂ ಸೇರಿದಂತೆ ಇಡೀ ಜಗತ್ತು ಕಾಯಬೇಕಿದೆ.
from India & World News in Kannada | VK Polls https://ift.tt/2TRreeM
