ಅಪರಿಚಿತ ವ್ಯಕ್ತಿಗಳು ಮಕ್ಕಳೊಂದಿಗೆ ಹಿತವಾಗಿ ಮಾತನಾಡುತ್ತಾ, ಆಟವಾಡುತ್ತಾ, ಮಕ್ಕಳನ್ನು ತಮ್ಮ ಕಡೆಗೆ ಸೆಳೆದುಕೊಂಡು ಅವರ ಮನಸ್ಸನ್ನು ಹಾಳು ಮಾಡುವ ಸಂಭವ ಇರುತ್ತದೆ ಹಾಗೂ ಆ ಮೂಲಕ ಮಕ್ಕಳ ಮೇಲೆ ನಾನಾ ರೀತಿಯ ದೌರ್ಜನ್ಯ ಎಸಗುವ ಸಾಧ್ಯತೆ ಇರುತ್ತದೆ.
ಅಶೋಕ್. ಆರ್. ಪಿ.
ತುಮಕೂರು:
ಕೊರೊನಾ ಸೋಂಕು ಪೂರ್ಣ ಪ್ರಮಾಣದಲ್ಲಿ ನಿಯಂತ್ರಣಕ್ಕೆ ಬಾರದ ಹಿನ್ನೆಲೆಯಲ್ಲಿ ಶಾಲೆಗಳು ಆರಂಭವಾಗದಿರುವುದು ಮಕ್ಕಳು, ಹದಿಹರೆಯದವರ ಬಾಳಿಗೆ ಮುಳ್ಳಾಗಿದೆ. ಆನ್ಲೈನ್ ಕ್ಲಾಸ್, ಮೊಬೈಲ್ ಗೇಮ್ಸ್, ವಾಟ್ಸಪ್, ಫೇಸ್ಬುಕ್ ಎಂದು ಸದಾ ಅಂತರ್ಜಾಲ ಪ್ರಪಂಚದಲ್ಲಿ ಮುಳುಗಿರುವ ಮಕ್ಕಳು ಅಶ್ಲೀಲ ವಿಷಯಗಳತ್ತ ಆಕರ್ಷಿತರಾಗುತ್ತಿದ್ದಾರೆ.
ಕೆಲವೊಮ್ಮೆ ಕಿಡಿಗೇಡಿಗಳು ಮಕ್ಕಳನ್ನು ಜಾಲತಾಣಗಳಲ್ಲಿ ಪರಿಚಯ ಮಾಡಿಕೊಂಡು ಅವರ ವಿಶ್ವಾಸ ಗಳಿಸುತ್ತಿದ್ದಾರೆ. ಮಕ್ಕಳಿಗೆ ಅಶ್ಲೀಲ ಚಿತ್ರಗಳನ್ನು ತೋರಿಸಿ, ಅವರನ್ನೂ ಅಶ್ಲೀಲ ಕಾರ್ಯಗಳಿಗೆ ಬಳಸಿಕೊಳ್ಳುವುದು ನಡೆಯುತ್ತಿದೆ. ಇದನ್ನು ಗಂಭೀರವಾಗಿ ಪರಿಗಣಿಸಿರುವ ಸರಕಾರ 'ಮಕ್ಕಳ ರಕ್ಷಣೆ ನಮ್ಮೆಲ್ಲರ ಹೊಣೆ' ಎಂಬ ಕಾರ್ಯಕ್ರಮದ ಮೂಲಕ ಮಕ್ಕಳ ರಕ್ಷಣೆಗೆ ಧಾವಿಸಿದೆ.
ಚೈಲ್ಡ್ ಪೋರ್ನೋಗ್ರಫಿ
ಮಕ್ಕಳನ್ನು ಅಶ್ಲೀಲ ವಿಷಯಗಳತ್ತ ಸೆಳೆದು, ಮಕ್ಕಳು ಅಶ್ಲೀಲ ಚಟುವಟಿಕೆಗಳಲ್ಲಿ ಭಾಗವಹಿಸುವಂತೆ ಪ್ರೋತ್ಸಾಹಿಸುವುದು, ಮಕ್ಕಳ ನಗ್ನ ಚಿತ್ರಗಳನ್ನು ಚಿತ್ರೀಕರಿಸುವುದನ್ನು ಚೈಲ್ಡ್ ಪೋರ್ನೋಗ್ರಫಿ ಎಂದು ಹೆಸರಿಸಿದ್ದು, ಈ ವಿಷವರ್ತುಲದಿಂದ ಮಕ್ಕಳನ್ನು ರಕ್ಷಿಸುವ ಕಾರ್ಯಕ್ಕೆ ಮಕ್ಕಳ ರಕ್ಷಣಾ ಘಟಕದ ಮೂಲಕ ಸರ್ಕಾರ ಚಾಲನೆ ನೀಡಿದೆ. ಚೈಲ್ಡ್ ಪೋರ್ನೋಗ್ರಫಿ ಬಗ್ಗೆ ಪೋಷಕರು ಮತ್ತು ಶಿಕ್ಷಕರಲ್ಲಿ ಜಾಗೃತಿ ಮೂಡಿಸುವ ಕಾರ್ಯಕ್ಕೆ ಈಗಾಗಲೇ ಚಾಲನೆ ದೊರೆತಿದೆ.
ಮಕ್ಕಳ ಬಗ್ಗೆ ಇರಲಿ ಎಚ್ಚರ
ಮಕ್ಕಳು ಮೊಬೈಲ್, ಕಂಪ್ಯೂಟರ್ನಲ್ಲಿ ಆನ್ಲೈನ್ ಶಿಕ್ಷಣಕ್ಕಿಂತ ಹೆಚ್ಚಾಗಿ ಗೇಮ್, ವಾಟ್ಸಪ್, ಫೇಸ್ಬುಕ್, ಇಸ್ಟಾಗ್ರಾಂಗಳಲ್ಲಿಯೇ ಹೆಚ್ಚು ಸಮಯ ಕಳೆಯುತ್ತಿದ್ದಾರೆ. ಈ ರೀತಿ ಮಕ್ಕಳು ಫೇಸ್ಬುಕ್, ವಾಟ್ಸಾಪ್ ನೋಡುವಾಗ, ಗೂಗಲ್ನಲ್ಲಿ ಯಾವುದಾದರೂ ವಿಷಯವನ್ನು ಹುಡುಕುವಾಗ ಹಾಗೂ ಗೇಮ್ಸ್ ಆಡುವಾಗ, ಆಕಸ್ಮಿಕವಾಗಿ ಅಶ್ಲೀಲ ಚಿತ್ರಗಳನ್ನು ನೋಡುವ ಸಾಧ್ಯತೆಗಳು ಹೆಚ್ಚಾಗಿರುತ್ತವೆ. ಕೆಲವೊಮ್ಮೆ ಮಕ್ಕಳು ಅಶ್ಲೀಲ ಚಿತ್ರಗಳನ್ನು ನೋಡಿ ಪ್ರಚೋದಿತರಾಗಿ ಮತ್ತೆ ಮತ್ತೆ ಅದೇ ತರಹದ ಚಿತ್ರಗಳನ್ನು ನೋಡಲು ಆಸಕ್ತರಾಗಿ ಅಂತಹ ವೆಬ್ಸೈಟ್ಗಳನ್ನು ಹುಡುಕಲು ಪ್ರಾರಂಭಿಸುತ್ತಾರೆ.
ಕೆಲವು ಮಕ್ಕಳು ಮೊಬೈಲ್ನಲ್ಲಿ ಗೇಮ್ ಆಡುವಾಗ ಅಪರಿಚಿತ ವ್ಯಕ್ತಿಗಳ ಪರಿಚಯವಾಗಿ ಅವರೊಂದಿಗೆ ಗೇಮ್ಸ್ ಆಡುತ್ತಾರೆ. ಆ ಅಪರಿಚಿತ ವ್ಯಕ್ತಿಯ ಹಿನ್ನೆಲೆ ಯಾರಿಗೂ ತಿಳಿದಿರುವುದಿಲ್ಲ. ಅಪರಿಚಿತ ವ್ಯಕ್ತಿಗಳು ಮಕ್ಕಳೊಂದಿಗೆ ಹಿತವಾಗಿ ಮಾತನಾಡುತ್ತಾ, ಆಟವಾಡುತ್ತಾ, ಮಕ್ಕಳನ್ನು ತಮ್ಮ ಕಡೆಗೆ ಸೆಳೆದುಕೊಂಡು ಅವರ ಮನಸ್ಸನ್ನು ಹಾಳು ಮಾಡುವ ಸಂಭವ ಇರುತ್ತದೆ ಹಾಗೂ ಆ ಮೂಲಕ ಮಕ್ಕಳ ಮೇಲೆ ನಾನಾ ರೀತಿಯ ದೌರ್ಜನ್ಯ ಎಸಗುವ ಸಾಧ್ಯತೆ ಇರುತ್ತದೆ. ಇಂತಹವರನ್ನೇ ಚೈಲ್ಡ್ ಪೋರ್ನೋಗ್ರಾಫರ್ಸ್ ಎಂದು ಕರೆಯಲಾಗುತ್ತದೆ ಮತ್ತು ಇವರಿಂದ ಮಕ್ಕಳನ್ನು ರಕ್ಷಿಸುವುದೇ ಸವಾಲಾಗಿದೆ.
ಪೋಷಕರು, ಶಿಕ್ಷಕರು ಹೀಗೆ ಮಾಡಿ
ಚೈಲ್ಡ್ ಪೋರ್ನೋಗ್ರಫಿಯಿಂದ ಮಕ್ಕಳನ್ನು ಪಾರು ಮಾಡಲು ಪೋಷಕರು ಮಕ್ಕಳೊಂದಿಗೆ ಹೆಚ್ಚಿನ ಸಮಯವನ್ನು ಕಳೆಯಬೇಕು, ಮಕ್ಕಳೊಂದಿಗೆ ಒಳಾಂಗಣ ಆಟಗಳನ್ನು ಆಡುವುದು, ಮಕ್ಕಳ ಆಸಕ್ತಿಗಳ ಬಗ್ಗೆ ಗಮನ ಹರಿಸುವುದು, ಮಕ್ಕಳಿಗೆ ಸಂಸ್ಕಾರ, ಸಂಪ್ರದಾಯಗಳ ಬಗ್ಗೆ ಅರಿವು ಮೂಡಿಸಬೇಕು.
ಮಕ್ಕಳು ಮೊಬೈಲ್, ಲ್ಯಾಪ್ಟಾಪ್ ಬಳಕೆಯನ್ನು ಮಾಡುವಾಗ ಪೋಷಕರ ಸಮ್ಮುಖದಲ್ಲಿಯೇ ಬಳಕೆ ಮಾಡುವಂತೆ ನಿರ್ಬಂಧಿಸಬೇಕು, ಅನವಶ್ಯಕವಾಗಿ ಮಕ್ಕಳಿಗೆ ಲ್ಯಾಪ್ಟಾಪ್, ಮೊಬೈಲ್, ಟ್ಯಾಬ್ಗಳನ್ನು ಕೊಡಬಾರದು, ಇಂಟರ್ನೆಟ್ ಬಳಸುವಾಗ ಅಪರಿಚಿತ ವ್ಯಕ್ತಿಗಳು ಪರಿಚಯವಾದರೆ ಹಾಗೂ ಅಶ್ಲೀಲ ಚಿತ್ರಗಳು ಕಂಡುಬಂದಲ್ಲಿ ಪೋಷಕರ ಗಮನಕ್ಕೆ ತರುವಂತೆ ಪೋಷಕರು ಮಕ್ಕಳಲ್ಲಿ ಅರಿವು ಮೂಡಿಸಬೇಕು. ಶಿಕ್ಷಕರು ಮಕ್ಕಳಿಗೆ ಮೊಬೈಲ್, ಇಂಟರ್ನೆಟ್ಗಳನ್ನು ಎಷ್ಟರಮಟ್ಟಿಗೆ ಬಳಸಬೇಕು ಹಾಗೂ ಯಾವ ರೀತಿ ಬಳಸಬೇಕು ಎಂಬುದರ ಬಗ್ಗೆ ಅರಿವು ಮೂಡಿಸಬೇಕಿದೆ.
ತಪ್ಪದೇ ದೂರು ದಾಖಲಿಸಿ
ಇಂತಹ ಘಟನೆಗಳು ನಡೆದಾಗ ಪೋಷಕರು ಕೂಡಲೇ ಸಿಇಎನ್ (ಸೈಬರ್ ಕ್ರೈಂ ನಾರ್ಕೊ -ಎಕಾನಾಮಿಕ್ ಅಫೇರ್ಸ್ ಪೊಲೀಸ್ ಸ್ಟೇಷನ್) ಪೊಲೀಸ್ ಠಾಣೆಗೆ ದೂರು ನೀಡಬೇಕು. ಪ್ರತಿ ಜಿಲ್ಲೆಯಲ್ಲಿ ಪೊಲೀಸ್ ವರಿಷ್ಠಾಧಿಕಾರಿ ಕಚೇರಿಯಲ್ಲಿ ಸಿಇಎನ್ ಪೊಲೀಸ್ ಠಾಣೆ ಕಾರ್ಯನಿರ್ವಹಿಸುತ್ತಿದೆ. ತಮಗೆ ದೂರು ಬಂದಾಗ ಸಿಇಎನ್ ಪೊಲೀಸ್ ಅಧಿಕಾರಿಗಳು ದೂರು ನೀಡಿದವರ ವಿವರಗಳನ್ನು ಹಾಗೂ ಸಂತ್ರಸ್ತ ಮಕ್ಕಳ ವಿವರಗಳನ್ನು ಗೌಪ್ಯವಾಗಿಡುತ್ತಾರಲ್ಲದೇ ಆರೋಪಿಗಳನ್ನು ಪತ್ತೆ ಮಾಡಿ ಕಾನೂನು ಕ್ರಮ ಜರುಗಿಸುತ್ತಾರೆ. ಹೀಗಾಗಿ ಪೋಷಕರು, ಶಿಕ್ಷಕರು ಸೇರಿದಂತೆ ಪ್ರತಿಯೊಬ್ಬರೂ ಮಕ್ಕಳನ್ನು ಈ ಚೈಲ್ಡ್ ಪೋರ್ನೋಗ್ರಫಿಯಿಂದ ರಕ್ಷಿಸುವ ನಿಟ್ಟಿನಲ್ಲಿ ಜವಾಬ್ದಾರಿಯನ್ನು ನಿರ್ವಹಿಸಬೇಕಿದೆ.
from India & World News in Kannada | VK Polls https://ift.tt/395ttDM
