ವಿಯೆನ್ನಾ: ಪ್ರಾನ್ಸ್ ಬಳಿಕ ಇದೀಗ ಯುರೋಪ್ ಖಂಡದಲ್ಲಿ ಮತ್ತೊಂದು ಉಗ್ರ ಕೃತ್ಯ ನಡೆದಿದೆ. ಆಸ್ಟ್ರಿಯಾದಲ್ಲಿ ಉಗ್ರರು ರಾಕ್ಷಸ ಪ್ರವೃತ್ತಿ ತೋರಿದ್ದಾರೆ. ರಾಜಧಾನಿ ವಿಯೆನ್ನಾದ ಕಿಕ್ಕಿರಿದ ಪ್ರದೇಶದಲ್ಲಿ ಏಕಾಏಕಿ ಉಗ್ರರು ಏಕಾಏಕಿ ಗುಂಡು ಹಾರಿಸಿದ್ದು ಈ ಪೈಕಿ ಒಬ್ಬರು ಮೃತಪಟ್ಟರೆ, 15 ಮಂದಿ ಹೆಚ್ಚು ಮಂದಿಗೆ ಗಂಭೀರ ಗಾಯವಾಗಿದೆ ಎಂದು ಅಲ್ಲಿನ ಪೊಲೀಸರು ತಿಳಿಸಿದ್ದಾರೆ. ಇನ್ನು ಓರ್ವ ಉಗ್ರನನ್ನು ವಿಯೆನ್ನಾ ಪೊಲೀಸರು ಹೊಡೆದುರುಳಿಸಿದ್ದಾರೆ. ಈ ಬಗ್ಗೆ ಮಾಹಿತಿ ನೀಡಿರುವ ಆಸ್ಟ್ರಿಯಾದ ಚಾನ್ಸಲರ್ ಸೆಬಾಸ್ಟಿಯನ್ ಕುರ್ಜ್, ಒಬ್ಬ ಉಗ್ರನನ್ನು ಪೊಲೀಸರು ಕೊಂದು ಹಾಕಿದ್ದಾರೆ. ಇನ್ನು ಹಲವರು ತಪ್ಪಿಸಿಕೊಂಡಿರುವ ಸಾಧ್ಯತೆ ಇದೆ. ಅವರ ಬಳಿ ಆಧುನಿಕ ಶಸ್ತ್ರಾಸ್ತ್ರಗಳು ಇದ್ದವು. ಅವರು ಎಲ್ಲದಕ್ಕೂ ಸಿದ್ದರಾಗಿ ಬಂದಂತೆ ಇತ್ತು. ನಾವು ಕೂಡ ಉಗ್ರರ ಕುಕೃತ್ಯದ ಸಂತ್ರಸ್ತರು ಎಂದು ನೋವು ತೋಡಿಕೊಂಡರು. ಇನ್ನು ಘಟನೆ ಬಗ್ಗೆ ಮಾಹಿತಿ ನೀಡಿರುವ ಪೊಲೀಸರು, ರಾತ್ರಿ ಸುಮಾರು ಎಂಟು ಗಂಟೆ ಬಳಿಕ ವಿಯೆನ್ನಾದ ಪ್ರಮುಖ ಸ್ಥಳಗಳಲ್ಲಿ ಭಾರೀ ಗುಂಡಿನ ದಾಳಿ ನಡೆದಿದೆ. ಕಿಕ್ಕಿರಿದು ಜನರು ಸೇರಿರುವ ಕೆಫೆ ಹಾಗೂ ರೆಸ್ಟೋರೆಂಟ್ಗಳಿರುವ ಆರು ಪ್ರದೇಶಗಳಲ್ಲಿ ಉಗ್ರರು ಕೃತ್ಯ ಎಸಗಿದ್ದಾರೆ. ಓರ್ವ ಉಗ್ರ ಗನ್ ಹಿಡಿದುಕೊಂಡು ಯಾವುದೇ ಭಯವಿಲ್ಲದೆ ಜನರತ್ತ ನಡೆದುಕೊಂಡು ಹೋಗಿ ಗನ್ನಿಂದ ಶೂಟ್ ಮಾಡುವ ದೃಶ್ಯ ಹಲವು ವಿಡಿಯೊಗಳಿಂದೆ ತಿಳಿದುಬಂದಿದೆ ಎಂದು ಮಾಹಿತಿ ನೀಡಿದ್ದಾರೆ. ಅಲ್ಲದೇ ಗುಂಡಿನ ದಾಳಿ ನಡೆಸಿರುವ ಹಿಂದಿನ ಕಾರಣವನ್ನು ತನಿಖೆ ನಡೆಸಿ ಮಾಹಿತಿ ನೀಡಲಾಗುವುದು ಎಂದಿದ್ದಾರೆ. ಯಹೂದಿಗಳು ಟಾರ್ಗೆಟ್? ವಿಯೆನ್ನಾದಲ್ಲಿರುವ ಯಹೂದಿಗಳ ಪ್ರಾರ್ಥನಾ ಮಂದಿರದಲ್ಲೂ ಉಗ್ರರು ಗುಂಡಿನ ದಾಳಿ ನಡೆಸಿದ್ದಾರೆ ಎಂದು ತಿಳಿದುಬಂದಿದೆ. ಆದರೆ ರಾತ್ರಿಯಾಗಿದ್ದರಿಂದ ಪ್ರಾರ್ಥನಾ ಮಂದಿರ ಬಂದ್ ಮಾಡಲಾಗಿತ್ತು. ಹೀಗಾಗಿ ಯಾವುದೇ ದುರ್ಘಟನೆ ಸಂಭವಿಸಿಲ್ಲ. ಆದರೆ ಪ್ರಾರ್ಥನಾ ಮಂದಿರದ ಮೇಲೆ ದಾಳಿ ಮಾಡುವ ಮೂಲಕ ಯಹೂದಿಗಳನ್ನು ಉಗ್ರರು ಟಾರ್ಗೆಟ್ ಮಾಡಿದ್ದರಾ ಅಥವಾ ದಾರಿ ತಪ್ಪಿಸುವ ದೃಷ್ಟಿಯಿಂದ ಈ ಕೃತ್ಯ ಎಸಗಲಾಗಿದ್ಯಾ? ಎನ್ನುವ ಚರ್ಚೆಗಳು ಕೂಡ ಇದೀಗ ಆರಂಭವಾಗಿದೆ. ಇತ್ತೀಚೆಗೆ ಫ್ರಾನ್ಸ್ನಲ್ಲಿ ಎರಡು ಉಗ್ರ ದಾಳಿ ನಡೆದಿದ್ದು ಮೂವರು ಹತರಾಗಿದ್ದಾರೆ. ಯುರೋಪ್ ಖಂಡದಲ್ಲಿ ಇದೀಗ ಇದು ಮೂರನೇ ಉಗ್ರ ದಾಳಿಯಾಗಿದೆ.
from India & World News in Kannada | VK Polls https://ift.tt/38bIgwx
