ಹೊಸದಿಲ್ಲಿ: ನ್ಯೂಜಿಲೆಂಡ್‌ ತಂಡದ ಸ್ಟಾರ್‌ ಆಲ್‌ರೌಂಡರ್‌ ಜೇಮ್ಸ್ ಆಂಡರ್ಸನ್, ಸೋಷಿಯಲ್‌ ಮೀಡಿಯಾ ವೇದಿಕೆಗಳಲ್ಲಿ ಅಭಿಮಾನಿಗಳೊಟ್ಟಿಗೆ ಚರ್ಚಿಸುವುದರಲ್ಲಿ ಎಂದಿಗೂ ಹಿಂದೆ ಬಿದ್ದಿಲ್ಲ. ಅದರಲ್ಲೂ ಟ್ವಿಟರ್‌ನಲ್ಲಿ ಅಭಿಮಾನಿಗಳು ಕೇಳುವ ಪ್ರಶ್ನೆಗಳಿಗೆ ಯಾವುದೇ ಅಳುಕಿಲ್ಲದೆ ಉತ್ತರ ನೀಡುವುದರಲ್ಲಿ ಎತ್ತಿದ ಕೈ. ಇತ್ತೀಚೆಗಷ್ಟೇ ಟ್ವಟಿರ್‌ನಲ್ಲಿ ನೀಶಮ್ ಅವರನ್ನು ಪಾಕಿಸ್ತಾನ್ ಸೂಪರ್ ಲೀಗ್ ಬದಲಿಗೆ ಇಂಡಿಯನ್ ಸೂಪರ್ ಲೀಗ್ ಆಯ್ಕೆ ಮಾಡಿಕೊಳ್ಳಲು ಕಾರಣ ಏನೆಂದು ಪಾಕಿಸ್ತಾನ ಕ್ರಿಕೆಟ್‌ನ ಅಭಿಮಾನಿಯೊಬ್ಬರು ಕೇಳಿದ್ದರು. ಇದಕ್ಕೆ ಜಿಮ್ಮಿ ತಮ್ಮದೇ ಶೈಲಿಯಲ್ಲಿ ಉತ್ತರ ನೀಡಿದ್ದಾರೆ. ಐಪಿಎಲ್‌ 2020 ಟೂರ್ನಿಯಲ್ಲಿ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ತಂಡದ ಪರ ಆಡಲಿದ್ದಾರೆ. 13ನೇ ಆವೃತ್ತಿಯ ಐಪಿಎಲ್‌ ಟೂರ್ನಿ ಸೆಪ್ಟೆಂಬರ್‌ 19ರಿಂದ ನವೆಂಬರ್‌ 10ರವರೆಗೆ ಯುನೈಟೆಡ್‌ ಅರಬ್‌ ಎಮಿರೇಟ್ಸ್‌ ಆತಿಥ್ಯದಲ್ಲಿ ನಡೆಯಲಿದೆ. "ಜಿಮ್ಮಿ ನೀಶಮ್ ನೀವು ಐಪಿಎಲ್‌ ಆಡುತ್ತಿದ್ದೀರಿ ಆದರೆ ಪಿಎಸ್ಎಲ್ ಏಕೆ ಆಡುವುದಿಲ್ಲ? ಐಪಿಎಲ್‌ನಲ್ಲಿ ನಿಮಗೆ ಹಣ ಮತ್ತು ಐಶಾರಾಮ ಸಿಗುತ್ತದೆ ಎಂದು ಅಲ್ಲಿ ಆಡುತ್ತೀರ ಅಲ್ಲವೆ? ಆದರೆ ಪಿಎಸ್‌ಎಲ್‌ನಲ್ಲಿ ಇದ್ಯಾವುದೂ ಸಿಗುವುದಿಲ್ಲ ಎಂದು ಆಡುವುದಿಲ್ಲ. ಬಹಳ ಬೇಸರದ ಸಂಗತಿ ಇದು," ಎಂದು ಅಲಿ ಹೈದರ್ ಎಂಬ ಪಾಕಿಸ್ತಾನದ ಕ್ರಿಕೆಟ್ ಅಭಿಮಾನಿಯೊಬ್ಬ ಪ್ರಶ್ನೆ ಮಾಡಿದ್ದರು. ಇದಕ್ಕೆ ಉತ್ತರ ನೀಡಿದ ಜಿಮ್ಮಿ, "ಬದಲಿಗೆ ಪಿಎಸ್ಎಲ್ ಟೂರ್ನಿಯನ್ನು ನಮ್ಮ ಬೇಸಿಗೆಯ ಮಧ್ಯದಲ್ಲಿ ಆಯೋಜಿಸಲಾಗುತ್ತದೆ ಇದಕ್ಕಾಗಿ ಇರಬಹುದು?," ಎಂದು ಮಾರ್ಮಿಕವಾಗಿ ಹೇಳಿದ್ದಾರೆ. ನ್ಯೂಜಿಲೆಂಡ್‌ನಲ್ಲಿ ಡಿಸೆಂಬರ್‌ನಿಂದ ಫೆಬ್ರವರಿ ಅವಧಿಯಲ್ಲಿ ಬೇಸಿಗೆ ಕಾಲ ಇರಲಿದ್ದು, ಈ ಅವಧಿಯಲ್ಲಿ ಹೆಚ್ಚು ಅಂತಾರಾಷ್ಟ್ರೀಯ ಕ್ರಿಕೆಟ್ ಆಡಲಾಗುತ್ತದೆ. ಈ ಅವಧಿಯಲ್ಲಿ ಪಿಎಸ್ಎಲ್ ಆಯೋಜಿಸಲಾಗುತ್ತದೆ. ಹೀಗಾಗಿ ಕಿವೀಸ್‌ ಆಟಗಾರರಿಗೆ ಪಿಎಸ್‌ಎಲ್‌ನಲ್ಲಿ ಪಾಲ್ಗೊಳ್ಳಲು ಸಾಧ್ಯವಾಗುವುದಿಲ್ಲ ಎಂಬುದು ವಾಸ್ತವ. 2014ರಲ್ಲಿ ಐಪಿಎಲ್‌ಗೆ ಪದಾರ್ಪಣೆ ಮಾಡಿದ್ದ ಜಿಮ್ಮಿ ನೀಶಮ್, ಡೆಲ್ಲಿ ಡೇರ್‌ಡೆವಿಲ್ಸ್‌ (ಕ್ಯಾಪಿಟಲ್ಸ್‌) ತಂಡದ ಪರ 4 ಪಂದ್ಯಗಳನ್ನು ಆಡಿದ್ದರು. ಈ ಬಾರಿ ಕಿಂಗ್ಸ್‌ ಇಲೆವೆನ್‌ ತಂಡದ ಪರ ಆಡುವುದನ್ನು ಎದುರು ನೋಡುತ್ತಿದ್ದಾರೆ. ಪಂಜಾಬ್‌ ಪಡೆ ಈಗಾಗಲೇ ಯುಎಇ ತಲುಪಿ 6 ದಿನಗಳ ಕ್ವಾರಂಟೈನ್‌ ನಂತರ 3 ವಾರಗಳ ಅಭ್ಯಾಸ ಶಿಬಿರವನ್ನು ಕೈಗೊಂಡಿದೆ. ಪಂಜಾಬ್‌ ತಂಡದ ಸಮರಾಭ್ಯಾಸದ ವಿಡಿಯೋವನ್ನು ಕಿಂಗ್ಸ್‌ ಇಲೆವೆನ್‌ನ ಸೋಷಿಯಲ್‌ ಮೀಡಿಯಾ ವೇದಿಕೆಗಳಲ್ಲಿ ಹಂಚಿಕೊಳ್ಳಲಾಗಿದ್ದು, ಯುಎಇನಲ್ಲಿನ ಬಿಸಿಯ ವಾತಾವರಣದ ಬಗ್ಗೆ ಕಿಂಗ್ಸ್‌ ತಂಡದ ಕ್ಯಾಪ್ಟನ್‌ ರಾಹುಲ್‌ ಮಾತನಾಡಿದ್ದಾರೆ. "ಮನೆಯಲ್ಲಿ ಬಹಳ ಸಮಯ ಉಳಿದಿದ್ದೆವು. ಹೀಗಾಗಿ ತಂಡದ ಜೊತೆಗೆ ಆಡುವ ಅವಕಾಶ ಸಿಕ್ಕಿದ್ದು ನಿಜಕ್ಕೂ ಉತ್ತಮ ಅನುಭವ ತಂದುಕೊಟ್ಟಿದೆ. ಅಂದಹಾಗೆ ತಣ್ಣನೆಯ ವಾತಾವರಣದಲ್ಲಿ ಬ್ಯಾಟ್‌ ಮಾಡಲು ಇಷ್ಟ ಪಡುತ್ತಿದ್ದೆ. ಆದರೆ ನಾವೆಲ್ಲರೂ ಇಂತಹ ಬಿಸಿಯ ವಾತಾವರಣದಲ್ಲಿ ಆಡಲೇಬೆಕು," ಎಂದು ರಾಹುಲ್‌ ಹೇಳಿಕೊಂಡಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/34VeBWM
