ಕೊರೊನಾ, ವಿದ್ಯಾಗಮ ಎಫೆಕ್ಟ್: ಮುಚ್ಚಿದ್ದ ಸರ್ಕಾರಿ ಶಾಲೆ ಓಪನ್, ಖಾಸಗಿ ಮೋಹ ತೊರೆದ ಪೋಷಕರು

ನಾಗರಾಜ್‌ ನವೀಮನೆ ಮೈಸೂರು: ಮಕ್ಕಳ ಕೊರತೆಯಿಂದ ಮುಚ್ಚಿದ್ದ ಹಲವು ಸರಕಾರಿ ಶಾಲೆಗಳು ಇದೀಗ ಮತ್ತೆ ಬಾಗಿಲು ತೆರೆಯುತ್ತಿದ್ದು, ಹಳೆ ವೈಭವ ಮರುಕಳಿಸುತ್ತಿದೆ! ಮೈಸೂರು ಜಿಲ್ಲೆಯೊಂದರಲ್ಲೇ ನಾಲ್ಕು ಸರಕಾರಿ ಶಾಲೆಗಳು ಮತ್ತೆ ಬಾಗಿಲು ತೆರೆದು ಮಕ್ಕಳಿಗೆ ಕಲಿಕೆ ಆರಂಭಿಸಿದೆ. ಮೈಸೂರಿನ ಎಚ್‌.ಡಿ.ಕೋಟೆ ತಾಲೂಕು ಒಂದರಲ್ಲೇ ಮುಚ್ಚಿದ್ದ ಮೂರು ಸರಕಾರಿ ಶಾಲೆಗಳನ್ನು 2020-21ನೇ ಶೈಕ್ಷಣಿಕ ಸಾಲಿನಲ್ಲಿ ಮತ್ತೆ ತೆರೆಯಲಾಗಿದೆ. ನಂಜನಗೂಡಿನ ಒಂದು ಶಾಲೆ ಯೋಜನೆ ದೆಸೆಯಿಂದ ರಿ- ಓಪನ್‌ ಆಗಿದೆ. ಚಾಮರಾಜನಗರದಲ್ಲಿ ಮೂರು ಶಾಲೆಗಳು ತೆರೆಯಲು ಸಿದ್ಧತೆ ಆರಂಭವಾಗಿದ್ದರೆ, ಕೊಡಗಿನ ಮೂರು ಶಾಲೆ ತೆರೆಯಲು ಡಿಡಿಪಿಐ ಪ್ರಸ್ತಾವನೆ ಸಿದ್ಧಪಡಿಸಿದ್ದಾರೆ. ಕೊರೊನಾದಿಂದ ಉಂಟಾದ ಆರ್ಥಿಕ ಸಂಕಷ್ಟ, ವಿದ್ಯಾಗಮ ಯೋಜನೆಯ ಪರಿಣಾಮಕಾರಿ ಅನುಷ್ಠಾನ, ಸರಕಾರಿ ಶಾಲೆಯಲ್ಲಿ ಶುರುವಾದ ಆಂಗ್ಲ ಮಾಧ್ಯಮ ಹಾಗೂ ಇಲ್ಲಿ ಸಿಗುತ್ತಿರುವ ಹಲವು ಸೌಲಭ್ಯಗಳಿಂದ ಆಕರ್ಷಿತರಾಗಿರುವ ಹಳ್ಳಿ ಹಾಗೂ ಹೋಬಳಿಯಲ್ಲಿರುವ ಪೋಷಕರೇ, ಸರಕಾರಿ ಶಾಲೆಗಳನ್ನು ತೆರೆಯುವಂತೆ ಶಿಕ್ಷಕರನ್ನು ಮನವಿ ಮಾಡುತ್ತಿದ್ದಾರೆ. ಆ ಮೂಲಕ ಈ ಹಿಂದೆ ಕಾವೇರಿ ಕೊಳ್ಳದ ಭಾಗದಲ್ಲಿದ್ದ ಸರಕಾರಿ ಶಾಲೆಗಳ ವೈಭವ ನಿಧಾನವಾಗಿ ಗರಿಬಿಚ್ಚುತ್ತಿದೆ. 'ಎಚ್‌.ಡಿ.ಕೋಟೆಯ ನಿಂಗೇನಹಳ್ಳಿಯ ಪೋಷಕರೇ ನನ್ನ ಬಳಿ ಬಂದು ಮುಚ್ಚಿರುವ ಸರಕಾರಿ ಶಾಲೆಯನ್ನು ತೆರೆಯುವಂತೆ ಮನವಿ ಮಾಡಿದರು. ನಂತರ ಶಿಕ್ಷಣಾಧಿಕಾರಿಗಳೊಂದಿಗೆ ಸಭೆ ನಡೆಸಿ ಶಾಲೆಯನ್ನು ಪುನಃ ತೆರೆಯಲಾಯಿತು. ಪೋಷಕರೇ ಇಡೀ ಶಾಲೆ ಆವರಣವನ್ನು ಗುಡಿಸಿ ಸ್ವಚ್ಛಗೊಳಿಸಿದರು. ಅದೇ ರೀತಿ ತಾಳೆಗೌಡನ ಹುಂಡಿ, ತಾರಕದಲ್ಲೂ ಕಳೆದ ಎರಡು ವರ್ಷದಿಂದ ಮುಚ್ಚಿದ್ದ ಎರಡು ಶಾಲೆಗಳನ್ನು ತೆರೆಯಲಾಗಿದೆ' ಎಂದು ಎಚ್‌.ಡಿ.ಕೋಟೆ ಬಿಇಒ ರೇವಣ್ಣ 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದರು. ಸದ್ಯ ಎಚ್‌.ಡಿ.ಕೋಟೆಯ ನಿಂಗೇನಹಳ್ಳಿಯಲ್ಲಿ14 ಮಕ್ಕಳ ದಾಖಲಾತಿ ಆಗಿದೆ. ತಾರಕದ ಸರಕಾರಿ ಕಿರಿಯ ಪ್ರಾಥಮಿಕ ಶಾಲೆಯಲ್ಲಿ 10 ಮಕ್ಕಳು ಹಾಗೂ ತಾಳೆಗೌಡನಹುಂಡಿಯಲ್ಲಿ 14 ಮಕ್ಕಳು ಪ್ರವೇಶ ಪಡೆದಿದ್ದಾರೆ. ಕಡಿಮೆಯಾದ ಖಾಸಗಿ ಶಾಲೆ ವ್ಯಾಮೋಹ: ಸರಕಾರಿ ಶಾಲೆಗಳು ಗುಣಮಟ್ಟದ ದೃಷ್ಟಿಯಿಂದ ಯಾವುದೇ ಖಾಸಗಿ ಶಾಲೆಗಳಿಗೆ ಕಡಿಮೆ ಇಲ್ಲ. ಆದರೂ ಪೋಷಕರ ಖಾಸಗಿ ಶಾಲೆ ವ್ಯಾಮೋಹ ಹಾಗೂ ತಮ್ಮ ಮಗು ಇಂಗ್ಲಿಷ್‌ ಭಾಷೆ ಕಲಿಯಬೇಕೆಂಬ ಆಸೆಯಿಂದ ಬಹುತೇಕ ಪೋಷಕರು ಮಕ್ಕಳನ್ನು ಕಾನ್ವೆಂಟ್‌ಗೆ ಸೇರಿಸುತ್ತಿದ್ದರು. ಆದರೆ, ಇದೀಗ ಸರಕಾರಿ ಶಾಲೆ ಬಗ್ಗೆ ಪೋಷಕರಲ್ಲಿ ನಂಬಿಕೆ ಬಂದಿದೆ. ಸರಕಾರಿ ಶಾಲೆಯಲ್ಲೇ ಗುಣಮಟ್ಟದ ಶಿಕ್ಷಣ ಹಾಗೂ ಸೌಲಭ್ಯ ಸಿಗುತ್ತಿರುವುದು ಇದಕ್ಕೆ ಮುಖ್ಯ ಕಾರಣ ಎನ್ನುತ್ತಾರೆ ಶಿಕ್ಷಣ ತಜ್ಞರು. ಏನು 'ಪಂಚ' ಕಾರಣ?

1. ಸರಕಾರಿ ಶಾಲೆಗಳಲ್ಲಿಆಂಗ್ಲಮಾಧ್ಯಮ ಶುರು ಮಾಡಿರುವುದು
2. ಶುಲ್ಕ, ಪುಸ್ತಕ, ಊಟದ ಚಿಂತೆ ಪೋಷಕರಿಗೆ ಇರುವುದಿಲ್ಲ
3. ಕೊರೊನಾದಿಂದ ಉಂಟಾಗಿರುವ ಆರ್ಥಿಕ ಸಂಕಷ್ಟ
4. ಆನ್‌ಲೈನ್‌ ತರಗತಿ ಮೇಲೆ ಪೋಷಕರಿಗೆ ನಂಬಿಕೆ ಇಲ್ಲದಿರುವುದು
5. ಹಳ್ಳಿಗಳಲ್ಲಿ ಸಮರ್ಪಕವಾಗಿ ವಿದ್ಯಾಗಮ ಯೋಜನೆ ಅನುಷ್ಠಾನ.

ಎಲ್ಲಿ? ಎಷ್ಟು? ಮೈಸೂರು (4) ಚಾಮರಾಜನಗರ (3) ಕೊಡಗು- 3 (ಪ್ರಸ್ತಾವನೆ) ಹಾಸನ-14 ಬಹುತೇಕರು ಖಾಸಗಿ ಶಾಲೆಗಳಿಂದ ಪುನಃ ಸರಕಾರಿ ಶಾಲೆಗೆ ಬಂದಿದ್ದಾರೆ. 'ವಿದ್ಯಾಗಮ' ಯೋಜನೆ ನಮ್ಮನ್ನು ಮತ್ತೊಮ್ಮೆ ಕೈಹಿಡಿದಿದೆ. ಕನಿಷ್ಠ 10 ಮಕ್ಕಳಿದ್ದರೆ ಸರಕಾರಿ ಶಾಲೆ ತೆರೆಯಲು ಅವಕಾಶವಿದೆ. ಹಾಗಾಗಿ ಈ ವರ್ಷ ಮೈಸೂರು ಜಿಲ್ಲೆಯಲ್ಲಿ ಮುಚ್ಚಿದ್ದ 4 ಸರಕಾರಿ ಶಾಲೆಯನ್ನು ಪುನಃ ತೆರೆಯಲಾಗಿದೆ ಎಂದು ಮೈಸೂರು ಡಿಡಿಪಿಐ ಡಾ.ಪಾಂಡುರಂಗ ಮಾಹಿತಿ ನೀಡಿದ್ದಾರೆ. ಮಡಿಕೇರಿ ತಾಲೂಕಿನ ಮದನಾಡು, ಸೋಮವಾರಪೇಟೆ ತಾಲೂಕಿನ ಎರಡು ಸರಕಾರಿ ಶಾಲೆ ಸೇರಿ ಒಟ್ಟು 3 ಶಾಲೆ ತೆರೆಯಲು ಪ್ರಸ್ತಾವನೆ ಸಿದ್ಧಪಡಿಸಲಾಗಿದೆ. ದಾಖಲಾತಿ ಮುಗಿದಿದ್ದು, ಈ ವರ್ಷದಿಂದ ಮತ್ತೆ ಬಾಗಿಲು ತೆರೆದು ಮಕ್ಕಳಿಗೆ ಕಲಿಕೆ ಶುರು ಮಾಡಲಾಗುವುದು ಎಂದು ಕೊಡಗು ಡಿಡಿಪಿಐ ಪಿ.ಎಸ್‌.ಮಚ್ಚಾಡೋ ತಿಳಿಸಿದ್ದಾರೆ.

from India & World News in Kannada | VK Polls https://ift.tt/3j6hKHi