ಆತೀಶ್‌ ಬಿ. ಕನ್ನಾಳೆ ಶಿವಮೊಗ್ಗ: ಇಂದಿರಾ ಕ್ಯಾಂಟೀನ್‌ಗಳ ಸ್ಥಿತಿ ಗಂಭೀರವಾಗಿದೆ. ಜಿಲ್ಲೆಯಲ್ಲಿ ಆರು ಕ್ಯಾಂಟೀನ್‌ಗಳು ಕಾರ್ಯನಿರ್ವಹಿಸುತ್ತಿದ್ದು, ಎರಡು ತಿಂಗಳು ಸೇರಿ ಒಟ್ಟು 48 ಲಕ್ಷ ರೂ. ಬಿಲ್‌ ಬಾಕಿ ಇದೆ. ಮೊದಲೇ ಕೋವಿಡ್‌ನಿಂದಾಗಿ ಕ್ಯಾಂಟೀನ್‌ ಉಸ್ತುವಾರಿ ವಹಿಸಿಕೊಂಡಿರುವವರು ಆರ್ಥಿಕವಾಗಿ ಸಂಕಷ್ಟದಲ್ಲಿದ್ದು ತಿಂಗಳುಗಟ್ಟಲೇ ಹಣ ಬಾರದೇ ಸೇವೆ ನೀಡುವುದು ಅವರ ಪಾಲಿಗೂ ಕಷ್ಟಕರವಾಗಿದೆ. ಶಿವಮೊಗ್ಗ ನಗರದಲ್ಲಿರುವ ನಾಲ್ಕು ಕ್ಯಾಂಟೀನ್‌ ಸೇರಿ ನಿತ್ಯ ಬೆಳಗ್ಗೆ 1600, ಮಧ್ಯಾಹ್ನ 1200 ಮತ್ತು ಸಂಜೆ 400 ಊಟಕ್ಕೆ ಬೇಡಿಕೆ ಇದೆ. ಅದರಂತೆ ನಿತ್ಯ ಹಸಿದು ಬಂದವರಿಗೆ ಕಡಿಮೆ ದರದಲ್ಲಿ ಆಹಾರ ಪೂರೈಸುವ ಕೆಲಸ ಮಾಡಲಾಗುತ್ತಿದೆ. ಭದ್ರಾವತಿಯಲ್ಲಿ ಕ್ಯಾಂಟೀನ್‌ ಆರಂಭಗೊಂಡು ಒಂದು ವರ್ಷ ಗತಿಸಿದ್ದು, ಎಂಟು ತಿಂಗಳ 28 ಲಕ್ಷ ರೂ. ಬಾಕಿ ಇದೆ. ಅಲ್ಲಿ ನಿತ್ಯ ಬೆಳಗ್ಗೆ 650-700, ಮಧ್ಯಾಹ್ನ 350 ಮತ್ತು ಸಂಜೆ 100 ಊಟಕ್ಕೆ ಬೇಡಿಕೆ ಇದೆ. ಪರಿಸ್ಥಿತಿ ಇದೇ ರೀತಿ ಮುಂದುವರಿದರೆ ಹೆಚ್ಚೆಂದರೆ ಆರೇಳು ತಿಂಗಳು ಇಂದಿರಾ ಕ್ಯಾಂಟೀನ್‌ಗಳನ್ನು ನಡೆಸಲು ಸಾಧ್ಯ ಎನ್ನುವುದು ನಿರ್ವಹಣೆ ಹೊತ್ತವರ ಅಭಿಪ್ರಾಯವಾಗಿದೆ. ಕಡಿಮೆ ದರದಲ್ಲಿ ಊಟ ಕಲ್ಪಿಸುವ ಕ್ಯಾಂಟೀನ್‌ಗಳು ಕೂಲಿ ಕಾರ್ಮಿಕರು, ಬೀದಿ ವ್ಯಾಪಾರಿಗಳು, ಪ್ರಯಾಣಿಕರು ಸೇರಿದಂತೆ ಹಲವರ ಪಾಲಿಗೆ ಕಾಮಧೇನುವಿನಂತೆ ಕಾರ್ಯನಿರ್ವಹಿಸುತ್ತಿವೆ. ಅದರಲ್ಲೂ ಕೋವಿಡ್‌ ಕಷ್ಟ ಕಾಲದಲ್ಲಿ ಹೋಟೆಲ್‌ಗಳನ್ನು ಹಲವು ತಿಂಗಳುಗಳ ಕಾಲ ಬಂದ್‌ ಮಾಡಲಾಗಿತ್ತು. ಈ ವೇಳೆ, ಬಸ್‌ ನಿಲ್ದಾಣ, ಎಪಿಎಂಸಿ ಮತ್ತಿತರ ಕಡೆ ಕೆಲಸ ಮಾಡುವ ಕಾರ್ಮಿಕರಿಗೆ ಅನ್ನ ನೀಡಿದ್ದೇ ಈ ಕ್ಯಾಂಟೀನ್‌ಗಳು. ಆದರೆ, ಬಿಲ್‌ಗಳನ್ನು ಸಲ್ಲಿಸಿದರೂ ಇದುವರೆಗೆ ಹಣ ಬಿಡುಗಡೆ ಮಾಡಿಲ್ಲ. ಇನ್ನೂ ಶುರುವಾಗದ ಕ್ಯಾಟೀನ್‌ ಸಾಗರದಲ್ಲಿ ಇಂದಿರಾ ಕ್ಯಾಂಟೀನ್‌ ಕಟ್ಟಡ ಸಿದ್ಧಗೊಂಡು ಒಂದು ವರ್ಷ ಗತಿಸಿದೆ. ಆದರೆ, ಇದುವರೆಗೆ ಅದನ್ನು ಹಸ್ತಾಂತರ ಮಾಡದೇ ಇರುವುದರಿಂದ ಸಾರ್ವಜನಿಕರಿಗೆ ಇದರ ಸೌಲಭ್ಯ ಪ್ರಾಪ್ತವಾಗಿಲ್ಲ. ಇನ್ನುಳಿದಂತೆ, ಶಿಕಾರಿಪುರ, ಸೊರಬದಲ್ಲಿ ತಲಾ ಒಂದು ಕ್ಯಾಂಟೀನ್‌ ನಿರ್ಮಾಣ ಹಂತದಲ್ಲಿವೆ. ತೀರ್ಥಹಳ್ಳಿಯಲ್ಲಿ ಇನ್ನೂ ಸ್ಥಳ ಹುಡುಕಾಟ ನಡೆದಿದೆ. ಸರಕಾರದ ಮಹತ್ವಾಕಾಂಕ್ಷಿ ಯೋಜನೆಯಾದ ಇಂದಿರಾ ಕ್ಯಾಂಟೀನ್‌ನಿಂದ ಬಡವರಿಗೆ ಪ್ರಯೋಜನವಾಗುತ್ತಿದೆ. ಆದರೆ, ಶಿವಮೊಗ್ಗ ಜಿಲ್ಲೆಯಲ್ಲಿ ಇನ್ನೂ ಹಲವು ಶಿವಮೊಗ್ಗ, ಭದ್ರಾವತಿ ಹೊರತು ಎಲ್ಲಿಯೂ ಈ ಸೇವೆಯೇ ಜನರಿಗೆ ಸಿಗುತ್ತಿಲ್ಲ. ಭದ್ರಾವತಿಯದ್ದು ಕಳೆದ 8 ತಿಂಗಳ 28 ಲಕ್ಷ ರೂ. ಹಾಗೂ ಶಿವಮೊಗ್ಗದ ನಾಲ್ಕು ಕ್ಯಾಂಟೀನ್‌ ಸೇರಿ ಎರಡು ತಿಂಗಳ ಒಟ್ಟು 20 ಲಕ್ಷ ರೂ. ಹಣ ಬರುವುದು ಬಾಕಿ ಇದೆ. ಮಹಾನಗರ ಪಾಲಿಕೆಗೆ ಬಿಲ್‌ ನೀಡಲಾಗಿದೆ. ಶರತ್‌ ಎಸ್‌. ವ್ಯವಸ್ಥಾಪಕರು, ಇಂದಿರಾ ಕ್ಯಾಂಟೀನ್‌, ಶಿವಮೊಗ್ಗ
from India & World News in Kannada | VK Polls https://ift.tt/30nVykz
