ದುಬೈ: ಹದಿಮೂರನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್‌ ಲೀಗ್‌ ಟೂರ್ನಿಯ ಕಳೆದ ಎರಡು ಪಂದ್ಯಗಳಲ್ಲಿ ಸೋಲು ಅನುಭವಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಆಟಗಾರರು ತೀವ್ರತೆಯ ಕೊರತೆ ಎದುರಿಸುತ್ತಿದ್ದು, ಪಂದ್ಯ ಆರಂಭಕ್ಕೂ ಮುನ್ನ 'ಗ್ಲೂಕೋಸ್‌' ಸೇವಿಸುವಂತೆ ಟೀಮ್‌ ಇಂಡಿಯಾ ಮಾಜಿ ಆರಂಭಿಕ ಬ್ಯಾಟ್ಸ್‌ಮನ್‌ ಸಿಎಸ್‌ಕೆಯನ್ನು ಕಾಲೆಳೆದಿದ್ದಾರೆ. ಶುಕ್ರವಾರ ರಾತ್ರಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ 44 ರನ್‌ಗಳ ಸೋಲು ಅನುಭವಿಸಿದ ಬಳಿಕ ಈ ರೀತಿ ವಿರೇಂದ್ರ ಸೆಹ್ವಾಗ್ ಪ್ರತಿಕ್ರಿಯೆ ನೀಡಿದ್ದಾರೆ. "ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಬ್ಯಾಟ್ಸ್‌ಮನ್‌ಗಳು ತೀವ್ರವಾಗಿ ಆಡುವುದಿಲ್ಲ. ಹಾಗಾಗಿ, ಪಂದ್ಯಕ್ಕೂ ಮುನ್ನ 'ಗ್ಲೂಕೋಸ್‌' ಸೇವಿಸಿ' ಆಡಿ," ಎಂದು ಸೆಹ್ವಾಗ್ ಟ್ವೀಟ್‌ ಮಾಡಿದ್ದಾರೆ. ಡೆಲ್ಲಿ ನೀಡಿದ್ದ 176 ರನ್‌ಗಳ ಗುರಿ ಹಿಂಬಾಲಿಸಿದ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ನಿಗದಿತ 20 ಓವರ್‌ಗಳಲ್ಲಿ 131 ರನ್‌ಗಳಿಗೆ ಸೀಮಿತವಾಗಿತ್ತು. ಅಂತಿಮವಾಗಿ ಚೆನ್ನೈ ಫ್ರಾಂಚೈಸಿ 44 ರನ್‌ಗಳಿಂದ ಸೋಲು ಅನುಭವಿಸಿತ್ತು. ನಾಯಕ ಮತ್ತೊಮ್ಮೆ 6ನೇ ಕ್ರಮಾಂಕದಲ್ಲಿ ಇಳಿದು ಕೇವಲ 15 ರನ್‌ ಗಳಿಸಿ ಔಟ್‌ ಆದರು. ಚೆನ್ನೈ ಫ್ರಾಂಚೈಸಿ ಪರ ಮತ್ತೊಮ್ಮೆ ಆರಂಭಿಕ ಜೋಡಿ ಮುರಳಿ ವಿಜಯ್‌ ಹಾಗೂ ಶೇನ್‌ ವ್ಯಾಟ್ಸನ್ ಜೋಡಿ ವಿಫಲವಾಯಿತು. ಮುರಳಿ ವಿಜಯ್‌ 10 ರನ್‌ ಹಾಗೂ ಶೇನ್‌ ವ್ಯಾಟ್ಸನ್ 14 ರನ್‌ಗಳಿಗೆ ಔಟ್‌ ಆದರು. ಡುಪ್ಲೆಸಿಸ್‌ 45 ರನ್‌ ಗಳಿಸಿದರೆ, ಕೇದಾರ್‌ ಜಾಧವ್‌ 26 ರನ್‌ ಹಾಗೂ ಎಂಎಸ್ ಧೋನಿ 15 ರನ್‌ಗಳನ್ನು ಗಳಿಸಿದರು. ಆದರೆ, ತಂಡದ ಗೆಲುವು ತಂದುಕೊಡುವಲ್ಲಿ ಇವರ ರನ್‌ಗಳ ಸಾಕಾಗಲಿಲ್ಲ. ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಎಂಎಸ್ ಧೋನಿ, ಕಳೆದ ಎರಡು ಪಂದ್ಯಗಳಿಂದ ಅಲಭ್ಯರಾಗಿದ್ದ ಅಂಬಾಟಿ ರಾಯುಡು ಮುಂದಿನ ಪಂದ್ಯಕ್ಕೆ ಲಭ್ಯರಾಗುವುದನ್ನು ಸ್ಪಷ್ಟಪಡಿಸಿದರು ಹಾಗೂ ಪಂದ್ಯ ಸೋಲಿಗೆ ಕಾರಣವನ್ನು ಬಹಿರಂಗಪಡಿಸಿದರು. "ಇಂದಿನ ಹಣಾಹಣಿ ನಮ್ಮ ಪಾಲಿಗೆ ಒಳ್ಳೆಯ ಪಂದ್ಯ ಎಂದು ನಾನು ಯೋಚಿಸುವುದಿಲ್ಲ. ಪಂದ್ಯಕ್ಕೆ ಮಂಜು ಇರಲಿಲ್ಲ ಹಾಗೂ ವಿಕೆಟ್‌ ತುಂಬಾ ನಿಧಾನಗತಿಯಿಂದ ಕೂಡಿತ್ತು. ಬ್ಯಾಟಿಂಗ್‌ನಲ್ಲಿ ಮತ್ತೆ ಹಿನ್ನಡೆ ಅನುಭವಿಸಿದ್ದು ತುಂಬಾ ಬೇಸರ ತರಿಸಿದೆ. ಆರಂಭಿಕ ಆಘಾತ ಅನುಭವಿಸಿದ್ದ ನಾವು, ಮಧ್ಯಮ ಕ್ರಮಾಂಕದಲ್ಲಿ ರನ್‌ ರೇಟ್‌ ಏರಿಸಲು ಹೋರಾಟ ಮಾಡಿದ್ದೆವು. ಆದರೂ ಗೆಲುವು ಪಡೆಯಲು ಸಾಧ್ಯವಾಗಿಲ್ಲ," ಎಂದು ಹೇಳಿದರು. "ಮುಂದಿನ ಪಂದ್ಯಕ್ಕೆ ಬಲಿಷ್ಟವಾಗಿ ಕಮ್‌ಬ್ಯಾಕ್‌ ಮಾಡುತ್ತೇವೆ. ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ಅಂಬಾಟಿ ರಾಯುಡು ಮುಂದಿನ ಪಂದ್ಯಕ್ಕೆ ಲಭ್ಯರಾಗಲಿದ್ದಾರೆ. ಅವರ ಆಗಮನದಿಂದ ಪಂದ್ಯದ ಸಮತೋಲನ ಇನ್ನುಷ್ಟು ಉತ್ತಮವಾಗಲಿದೆ. ರಾಯುಡು ಆಗಮನದಿಂದ ಮತ್ತೊಬ್ಬ ಬೌಲರ್‌ನೊಂದಿಗೆ ಪ್ರಯೋಗ ಮಾಡಲು ಅವಕಾಶ ಸಿಕ್ಕಂತಾಗುತ್ತದೆ. ಕಳೆದ ಪಂದ್ಯಗಳಲ್ಲಿ ನಾವು ಹಿನ್ನಡೆ ಅನುಭವಿಸಿದ್ದ ಕೆಲ ಸಂಗತಿಗಳ ಬಗ್ಗೆ ಯೋಚಿಸಬೇಕಾದ ಅಗತ್ಯವಿದೆ," ಎಂದು ಸುದ್ದಿಗೋಷ್ಠಿಯಲ್ಲಿ ಎಂಎಸ್ ಧೋನಿ ತಿಳಿಸಿದರು. ಮುಂದಿನ ಶುಕ್ರವಾರ ದುಬೈನಲ್ಲಿ ಸನ್‌ ರೈಸರ್ಸ್ ಹೈದರಾಬಾದ್ ವಿರುದ್ಧ ಸಿಎಸ್‌ಕೆ ಮುಂದಿನ ಪಂದ್ಯವಾಡಲಿದೆ. ಇನ್ನೂ ಆರು ದಿನಗಳ ದೀರ್ಘ ಅಂತರ ಇರುವುದರಿಂದ ಧೋನಿ ಪಡೆಗೆ ಬಲಿಷ್ಟವಾಗಿ ಕಮ್‌ಬ್ಯಾಕ್‌ ಮಾಡಲು ಇದೊಂದು ಉತ್ತಮ ಅವಕಾಶ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3iccVv2
