ಕೇಪ್‌ ಕೆನವರಲ್: ಜೀವಿಗಳಿಗೆ ಭೂಮಿಯ ನಂತರದ ಆವಸಸ್ಥಾನ ಎಂದು ಹೇಳಲಾಗಿರುವ ಮಂಗಳನಲ್ಲಿ ಸರೋವರಗಳಿರುವ ಕುರುಹುಗಳನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ್ದಾರೆ. ಅಂತಾರಾಷ್ಟ್ರೀಯ ಖಗೋಳ ವಿಜ್ಞಾನಿಗಳ ತಂಡ ಮಂಗಳ ಗ್ರಹದಲ್ಲಿ ಉಪ್ಪು ನೀರಿನ ಸರೋವರಗಳಿರುವುದನ್ನು ಪತ್ತೆ ಮಾಡಿದೆ. ಆದರೆ ಈ ಸರೋವರಗಳು ಮಂಗಳನ ನೆಲದಡಿ ಹುದುಗಿವೆ ಎಂದು ತಿಳಿಸಿದ್ದಾರೆ. ಈಗಾಗಲೇ ಎರಡು ವರ್ಷಗಳ ಹಿಂದೆಯೇ ಮಂಗಳನಲ್ಲಿ ದೊಡ್ಡ ಜಲಾಶಯ ಇರುವುದಾಗಿ ಸಂಶೋಧಕರು ತಿಳಿಸಿದ್ದರು. ಇದೀಗ ಮಂಗಳನ ನೆಲದಾಳದಲ್ಲಿ ಇನ್ನೂ ಮೂರು ಸರೋವರಗಳ ಉಪಸ್ಥಿತಿಯನ್ನು ಸಂಶೋಧಕರು ಪತ್ತೆ ಮಾಡಿದ್ದಾರೆ. ಈ ಕುರಿತು 'ನೇಚರ್' ಖಗೋಳ ವಿಜ್ಞಾನ ನಿಯತಕಾಲಿಕೆ ಸೋಮವಾರ ಪ್ರಕಟಿಸಿದೆ. ರೋಮ್ ವಿಶ್ವವಿದ್ಯಾಲಯದ ಖಗೋಳ ವಿಜ್ಞಾನಿಗಳು ಎರಡು ವರ್ಷದ ಹಿಂದೆಯೇ ಮಂಗಳ ನೆಲದಡಿ ಬೃಹತ್‌ ಸರೋವರಗಳು ಹುದುಗಿರುವ ಕುರಿತು ಅಂದಾಜಿಸಿದ್ದರು. ಆದರೆ, ಹಲವು ದತ್ತಾಂಶಗಳಿಂದ ಖಚಿತಪಡಿಸಿಕೊಂಡ ನಂತರ ಈ ವಿಚಾರವನ್ನು 'ನೇಚರ್' ನಿಯತಕಾಲಿಕೆಯಲ್ಲಿ ಪ್ರಕಟಿಸಿದ್ದಾರೆ. ಈ ವಿಜ್ಞಾನಿಗಳು 'ಯೂರೋಪಿಯನ್‌ ಸ್ಪೇಸ್‌ ಏಜೆನ್ಸಿಯ' ರಾಡಾರ್‌ ಸೌಂಡರ್‌ನ ದತ್ತಾಂಶಗಳನ್ನು ಬಳಸಿ ಸಂಶೋಧನೆ ನಡೆಸಿದ್ದಾರೆ. ಮಂಗಳನ ನೆಲದಡಿ ಸುಮಾರು 20ರಿಂದ 30 ಕಿಲೋಮಿಟರ್‌ನಷ್ಟು ವಿಸ್ತಾರವಾಗಿ ಈ ಸರೋವರಗಳು ಹರಡಿಕೊಂಡಿವೆ. ಒಂದು ವಿಸ್ತಾರವಾಗಿದ್ದು, 30 ಕಿಮೀ ಅಗಲವಿದೆ. ಉಳಿದ ಎರಡು ಸರೋವರಗಳು ಕೂಡ ಹಲವು ಕಿಮೀ ಉದ್ದಕ್ಕೆ ಚಾಚಿವೆ ಎಂದು ಸಂಶೋಧಕರು ತಿಳಿಸಿದ್ದಾರೆ. ಮಂಗಳನಲ್ಲಿ ಸರೋವರಗಳ ಇರುವಿಕೆಯನ್ನು ಸಾಬೀತುಪಡಿಸುವ ಹಲವು ಸಾಕ್ಷ್ಯಾಧಾರಗಳನ್ನು ಸಂಶೋಧಕರು ಒದಗಿಸಿದ್ದಾರೆ. ಮಂಗಳನಲ್ಲಿ ಜೀವಾಂಕುರ ಸಾಧ್ಯವೇ? ಒಂದು ವೇಳೆ ಮಂಗಳನಲ್ಲಿ ನೀರಿನ ಸೆಲೆ ಇರುವುದು ನಿಜವಾದರೆ, ಅದು ಜೀವಿಗಳ ಆವಿರ್ಭಾವಕ್ಕೆ ಕಾರಣವಾಗಲಿದೆ. ಜೀವಿಗಳ ಉಗಮಕ್ಕೆ ಸಿದ್ಧವಾಗುತ್ತಿದ್ದರೆ ಮುಂದೆ ಅಲ್ಲಿಯೋ ಜೀವಿಗಳ ಉಗಮವಾಗುವ ಸಾಧ್ಯತೆ ಇದೆ. ಸರೋವರಗಳಲ್ಲಿನ ಉಪ್ಪಿನ ಪ್ರಮಾಣವು ಇಲ್ಲಿ ನಿಜವಾದ ಸಮಸ್ಯೆಯಾಗಿದೆ. ಮಂಗಳ ಗ್ರಹದ ಯಾವುದೇ ಭೂಗತ ಸರೋವರಗಳು ನೀರು ದ್ರವವಾಗಿ ಉಳಿಯಲು ಸಮಂಜಸವಾಗಿ ಹೆಚ್ಚಿನ ಉಪ್ಪಿನಂಶವನ್ನು ಹೊಂದಿರಬೇಕು ಎಂದು ಹೇಳಲಾಗಿದೆ. ಮಂಗಳನಲ್ಲಿ ಶಾಖ ಕಡಿಮೆ: 'ಮಂಗಳನ ಒಳಭಾಗದಿಂದ ಅಲ್ಪ ಪ್ರಮಾಣದ ಶಾಖವಿರಬಹುದು. ಆದರೆ, ಮಂಜುಗಡ್ಡೆಯನ್ನು ಕರಗಿಸಲು ಇದು ಸಾಕಾಗದು. ಹೀಗಾಗಿ ಅಂತರ್ಗತ ಸರೋವರಗಳಲ್ಲಿ ನೀರು ದ್ರವರೂಪಕ್ಕೆ ಬರಲು ಉಪ್ಪಿನ ಅಂಶ ಹೆಚ್ಚಿರಬೇಕು ಎಂದು ಸಂಶೋಧಕರು ತಿಳಿಸಿದ್ದಾರೆ.
from India & World News in Kannada | VK Polls https://ift.tt/34n8nx1
