ಹರೀಶ ಎಲ್‌. ತಲಕಾಡು ಮೈಸೂರು: ಕೊರೊನಾ ವೈರಸ್‌ ಹೆಚ್ಚಳದ ಬಳಿಕ ಹೇರಲಾದ , ಇದರಿಂದ ಸೃಷ್ಟಿಯಾದ ಆರ್ಥಿಕ ಸಂಕಷ್ಟ, ಉದ್ಯೋಗ ನಷ್ಟ, ಸಂಬಳಕ್ಕೆ ಕತ್ತರಿ.. ಹೀಗೆ ಹಲವು ಸಂಕಷ್ಟಗಳಿಂದಾಗಿ ಹಲವರು ಕಳ್ಳತನದಂಥಾ ದುಷ್ಕೃತ್ಯಗಳಿಗೆ ಇಳಿಯುತ್ತಿದ್ದಾರೆ. ಅನಿವಾರ್ಯವಾಗಿ ದುಷ್ಕೃತ್ಯಕ್ಕೆ ಇಳಿದು ಅಪರಾಧಿ ಪಟ್ಟ ಕಟ್ಟಿಕೊಳ್ಳುತ್ತಿರುವ ದುರಂತ ಕಥೆಗಳ ಒಂದಷ್ಟು ಉದಾಹರಣೆಗಳು ಇಲ್ಲಿವೆ.. ಪ್ರಕರಣ 1: ರಿಯಲ್‌ ಎಸ್ಟೇಟ್‌ ಬ್ರೋಕರ್‌ ಆಗಿ ಕೆಲಸ ಮಾಡುತ್ತಿದ್ದ 50ರ ಆಸುಪಾಸಿನ ವ್ಯಕ್ತಿ, ಲಾಕ್‌ ಡೌನ್‌ ಎಫೆಕ್ಟ್‌ನಿಂದ ಯಾವುದೇ ವ್ಯಾಪಾರ ನಡೆಯದೆ ಕಂಗಾಲಾಗಿದ್ದ. ಪರಿಣಾಮ ನೆರೆ ಮನೆಯಲ್ಲಿಯೇ ದರೋಡೆ ನಡೆಸಲು ಸ್ಕೇಚ್‌ ಹಾಕಿದ. ಪ್ರಕರಣ 2: ಬಟ್ಟೆ ವ್ಯಾಪಾರ ಮಾಡಿಕೊಂಡಿದ್ದ ಮೈಸೂರಿನ ಉದಯಗಿರಿಯ ನಿವಾಸಿ, ಲಾಕ್‌ಡೌನ್‌ನಿಂದ ಆದ ನಷ್ಟದಿಂದ ಹಣ ಸಂಪಾದನೆಗಾಗಿ ಸ್ನೇಹಿತರೊಡನೆ ಸೇರಿ ದರೋಡೆ ನಡೆಸಿದ್ದ. ಈ ರೀತಿಯ ಹಲವು ಪ್ರಕರಣಗಳು ಮೈಸೂರಿನಲ್ಲಿಯೇ ವರದಿಯಾಗಿವೆ. ನಗರದಲ್ಲಿ ಇತ್ತೀಚೆಗೆ ನಡೆದ ದರೋಡೆ, ಸುಲಿಗೆ ಪ್ರಕರಣಗಳಲ್ಲಿ ಹಳೆಯ ಅಪರಾಧಿಗಳೊಂದಿಗೆ ಹೊಸಬರು ಭಾಗಿಯಾಗಿರುವುದು ಪೊಲೀಸರ ತನಿಖೆ ವೇಳೆ ಬೆಳಕಿಗೆ ಬಂದಿದೆ. ಲಾಕ್‌ಡೌನ್‌ ಎಫೆಕ್ಟ್‌ನಿಂದ ಮೈಸೂರು ನಗರದಲ್ಲಿ ಸುಲಿಗೆ, ದರೋಡೆ ಮತ್ತು ಕಳ್ಳತನ ಪ್ರಕರಣಗಳು ಹೆಚ್ಚಾಗಿವೆ. ಕೇವಲ ಎರಡು ತಿಂಗಳ ಅವಧಿಯಲ್ಲಿ 50ಕ್ಕೂ ಹೆಚ್ಚು ಕೃತ್ಯಗಳು ದಾಖಲಾಗಿದ್ದು, ಸಾರ್ವಜನಿಕರು ಆತಂಕ್ಕೀಡಾಗುವಂತೆ ಮಾಡಿದೆ. ಹಳೆಯ ವೃತ್ತಿಪರ ಅಪರಾಧಿಗಳೊಂದಿಗೆ ಹೊಸಬರು ಈ ಕೃತ್ಯಗಳಲ್ಲಿ ಪಾಲ್ಗೊಳ್ಳುತ್ತಿರುವುದು ಪೊಲೀಸರಿಗೆ ಹೊಸ ತಲೆ ನೋವಾಗಿದೆ. ಇದರ ನಡುವೆಯೂ ಮೈಸೂರು ನಗರ ಪೊಲೀಸರು, ಅಪರಾಧ ಕೃತ್ಯವೆಸಗಿ ತಲೆ ಮರೆಸಿಕೊಂಡಿರುವ ದುಷ್ಕರ್ಮಿಗಳನ್ನು ಪತ್ತೆ ಹಚ್ಚಿ ಹೆಡೆಮುರಿ ಕಟ್ಟುವ ಕೆಲಸ ಮಾಡುತ್ತಿದ್ದಾರೆ. ಆಗಸ್ಟ್‌ನಿಂದ ಸೆಪ್ಟೆಂಬರ್‌ವರೆಗೂ ನಿರಂತರವಾಗಿ ವಾಹನ ಕಳವು, ಸರಗಳವು, ದರೋಡೆ, ಸುಲಿಗೆ, ಮನೆಗಳ್ಳತನದಂತಹ ಪ್ರಕರಣಗಳ ಸಂಖ್ಯೆ ಹೆಚ್ಚಾಗುತ್ತಿದ್ದು, ಸಾರ್ವಜನಿಕರು ಭಯಭೀತರಾಗುವಂತೆ ಮಾಡಿದೆ. ಮೈಸೂರು ನಗರದಲ್ಲಿ ಇತ್ತೀಚೆಗೆ ನಡೆದಿರುವ ಏಳಕ್ಕೂ ಅಧಿಕ ಸರಗಳವು ಪ್ರಕರಣಗಳು ಮಹಿಳೆಯರನ್ನು ಚಿಂತೆಗೆ ದೂಡಿವೆ. ರಾತ್ರಿ ವೇಳೆ ನಡೆದಾಡುವವರನ್ನು ಗುರಿಯಾಗಿಸಿಕೊಂಡು ಸುಲಿಗೆ ಮಾಡುವಂತಹ ಪ್ರಕರಣಗಳು ಭೀತಿ ಸೃಷ್ಟಿಸಿವೆ. 28ಕ್ಕೂ ಅಧಿಕ ವಾಹನ ಕಳವು ಪ್ರಕರಣಗಳು ದ್ವಿಚಕ್ರ ವಾಹನ ಸವಾರರಿಗೆ ನೆಮ್ಮದಿ ಇಲ್ಲದಂತೆ ಮಾಡಿವೆ. ಕೆ.ಆರ್‌.ಠಾಣೆ ಸಮೀಪದಲ್ಲಿಯೇ ಎರಡು ಅಂಗಡಿಗಳ ಬಾಗಿಲು ಒಡೆದ ಕಳ್ಳರು, ಮತ್ತೆರಡು ಅಂಗಡಿಗಳ ಬಾಗಿಲು ಮೀಟಲು ಯತ್ನಿಸಿದ್ದರು. ಗಸ್ತಿಗೆ ತೊಡಕು: ಅಪರಾಧ ನಿಯಂತ್ರಣಕ್ಕೆ ಪೊಲೀಸರ ಗಸ್ತು ಕೂಡ ಪ್ರಮುಖವಾಗಿದೆ. ಆದರೆ, ಕೊರೊನಾ ಸೋಂಕು ತಗುಲಿ 470ಕ್ಕೂ ಹೆಚ್ಚು ಪೊಲೀಸರು ಆಸ್ಪತ್ರೆಗೆ ದಾಖಲಾಗಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅಲ್ಲದೆ ಕೆಲವರು ಹೋಂ ಕ್ವಾರಂಟೈನ್‌ ಆಗಿರುವುದರಿಂದ ಗಸ್ತಿಗೆ ಸಿಬ್ಬಂದಿ ಕೊರತೆ ಎದುರಾಗಿದೆ. ಹೀಗಾಗಿ ಪರಿಣಾಮಕಾರಿಯಾಗಿ ಗಸ್ತು ವ್ಯವಸ್ಥೆ ಮಾಡಲಾಗುತ್ತಿಲ್ಲ ಎನ್ನುತ್ತಾರೆ ಪೊಲೀಸ್‌ ಅಧಿಕಾರಿಯೊಬ್ಬರು. ನಡೆಯದ ವಿಶೇಷ ಕಾರ್ಯಾಚರಣೆ: ಈ ಹಿಂದೆ ಅಪರಾಧ ಕೃತ್ಯಗಳು ಹೆಚ್ಚಾಗುತ್ತಿದ್ದಂತೆಯೇ ಮೈಸೂರು ನಗರದ ಪೊಲೀಸರಿಂದ ಆಪರೇಷನ್‌ ಡಿಕಾಯ್‌, ಆಪರೇಷನ್‌ ಚೀತಾ, ಆಪರೇಷನ್‌ ಫಾಸ್ಟ್‌ ಟ್ರ್ಯಾಕ್‌ನಂತಹ ವಿಶೇಷ ಕಾರ್ಯಾಚರಣೆಗಳು ನಡೆಯುತ್ತಿದ್ದವು. ಈಗ ಅಂತಹ ಯಾವುದೇ ವಿಶೇಷ ಕಾರ್ಯಾಚರಣೆಗಳನ್ನು ಪೊಲೀಸರು ನಡೆಸುತ್ತಿಲ್ಲ. ಅಪರಾಧ ನಿಯಂತ್ರಣಕ್ಕೆ ಕಾರ್ಯಾಚರಣೆ ನಡುವೆ ಅಪರಾಧ ಕೃತ್ಯಗಳು ನಡೆದ ತಕ್ಷಣ ಕಾರ್ಯ ಪ್ರವೃತ್ತರಾಗುತ್ತಿರುವ ಮೈಸೂರು ನಗರ ಪೊಲೀಸರು, ಅಪರಾಧಿಗಳನ್ನು ತಕ್ಷಣ ಬಂಧಿಸುವ ಕೆಲಸ ಕೂಡ ಮಾಡುತ್ತಿದ್ದು, ಸಾಕಷ್ಟು ಹಳೆಯ ಅಪರಾಧ ಪ್ರಕರಣಗಳು ಬೆಳಕಿಗೆ ಬರುತ್ತಿವೆ. ಅಲ್ಲದೆ ಪ್ರತಿ ಪೊಲೀಸ್‌ ಠಾಣೆಯ ಎಲ್ಲಾ ಪೊಲೀಸ್‌ ಅಧಿಕಾರಿ ಮತ್ತು ಸಿಬ್ಬಂದಿಯನ್ನು ಅಪರಾಧ ಕೃತ್ಯಗಳ ಪತ್ತೆಗೆ ಬಳಸಿಕೊಳ್ಳಲಾಗುತ್ತಿದೆ ಎನ್ನುತ್ತಾರೆ ಅಪರಾಧ ಮತ್ತು ಸಂಚಾರ ವಿಭಾಗದ ಡಿಸಿಪಿ ಗೀತಾ ಪ್ರಸನ್ನ. ಮೈಸೂರು ನಗರದಲ್ಲಿಲಾಕ್‌ಡೌನ್‌ ಬಳಿಕ ನಡೆಯುತ್ತಿರುವ ಅಪರಾಧ ಕೃತ್ಯಗಳ ನಿಯಂತ್ರಣಕ್ಕೆ ವಿಶೇಷ ಗಮನ ಹರಿಸಲಾಗಿದ್ದು, 50ಕ್ಕೂ ಹೆಚ್ಚು ಮಂದಿಯನ್ನು ಬಂಧಿಸಲಾಗಿದೆ. ಇವರಲ್ಲಿ ಹೊಸಬರು ಕೂಡ ಇದ್ದಾರೆ. ಸಾರ್ವಜನಿಕರ ಸಹಕಾರದಿಂದ ಅಪರಾಧ ಕೃತ್ಯಗಳ ನಿಯಂತ್ರಣಕ್ಕೆ ಕಟ್ಟು ನಿಟ್ಟಿನ ಕ್ರಮ ಕೈಗೊಳ್ಳಲಾಗಿದೆ. ಹಳೆಯ ಪ್ರಕರಣ ವಿಲೇವಾರಿಗೂ ಆದ್ಯತೆ ನೀಡಲಾಗಿದೆ ಎಂದು ಅಪರಾಧ ಮತ್ತು ಸಂಚಾರ ವಿಭಾಗ ಡಿಸಿಪಿ ಗೀತಾ ಪ್ರಸನ್ನ ಮಾಹಿತಿ ನೀಡಿದ್ದಾರೆ.
from India & World News in Kannada | VK Polls https://ift.tt/343KxG5
