ಹೊಸದಿಲ್ಲಿ: ಕೋಲ್ಕತಾ ನೈಟ್‌ ರೈಡರ್ಸ್ ವಿರುದ್ಧ ಇನ್ನು 30 ಅಥವಾ 40 ರನ್‌ಗಳು ಕಲೆ ಹಾಕಿದ್ದರೆ, ನಮ್ಮ ಪಾಲಿಗೆ ಪಂದ್ಯ ಇನ್ನಷ್ಟು ಅದ್ಭುತವಾಗಿರುತ್ತಿತ್ತು ಎಂದು ತಂಡದ ನಾಯಕ ಡೇವಿಡ್‌ ವಾರ್ನರ್‌ ತಿಳಿಸಿದ್ದಾರೆ. ಶನಿವಾರ ರಾತ್ರಿ ನಡೆದ ಐಪಿಎಲ್‌ ಪಂದ್ಯದಲ್ಲಿ ಎಲ್ಲಾ ವಿಭಾಗಗಳಲ್ಲೂ ಅದ್ಭುತ ಪ್ರದರ್ಶನ ತೋರಿದ ಕೋಲ್ಕತಾ ನೈಟ್‌ ರೈಡರ್ಸ್, 7 ವಿಕೆಟ್‌ಗಳಿಂದ ಸನ್ ರೈಸರ್ಸ್ ಹೈದರಾಬಾದ್‌ ತಂಡವನ್ನು ಮಣಿಸಿತು. ಮೊದಲು ಬ್ಯಾಟಿಂಗ್ ಮಾಡಿದ ಹೈದರಾಬಾದ್‌ ಫ್ರಾಂಚೈಸಿ ನಿಗದಿತ 20 ಓವರ್‌ಗಳಿಗೆ 142 ರನ್‌ ಗಳನ್ನು ಗಳಿಸಿತ್ತು. ಬಳಿಕ 143 ರನ್‌ಗಳ ಗುರಿ ಹಿಂಬಾಲಿಸಿದ ಕೆಕೆಆರ್‌, 7 ವಿಕೆಟ್‌ಗಳ ಸುಲಭ ಜಯ ದಾಖಲಿಸಿತು. ಕೆಕೆಆರ್‌ ಪರ ಅತ್ಯುತ್ತಮ ಬ್ಯಾಟಿಂಗ್ ಮಾಡಿದ 62 ಎಸೆತಗಳಲ್ಲಿ 70 ರನ್‌ಗಳನ್ನು ಗಳಿಸಿದರು. ಇಯಾನ್‌ ಮಾರ್ಗನ್‌ 29 ಎಸೆತಗಳಲ್ಲಿ 42 ರನ್‌ಗಳನ್ನು ಗಳಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಪಂದ್ಯದ ಬಳಿಕ ಸಂದರ್ಶನದಲ್ಲಿ ಮಾತನಾಡಿದ ಡೇವಿಡ್‌ ವಾರ್ನರ್‌," ನಾನು ತೆಗೆದುಕೊಂಡ ನಿರ್ಧಾರ ಸರಿಯಾಗಿಯೇ ಇದೆ ಎಂದು ಭಾವಿಸುತ್ತೇನೆ. ಡೆತ್‌ ಬೌಲಿಂಗ್‌ ನಮ್ಮ ತಂಡದ ಶಕ್ತಿ. ವೇಗವನ್ನು ಹೆಚ್ಚಿಸಲು ಈ ವಿಕೆಟ್‌ ಸ್ವಲ್ಪ ಕ್ಲಿಷ್ಟಕರವಾಗಿದೆ ಎಂದು ನನಗೆ ಅನಿಸುತ್ತಿದೆ. ಪಂದ್ಯದ ಪ್ರಾರಂಭದಲ್ಲಿ ನಾವು ನಿಧಾನಗತಿಯಲ್ಲಿ ಆಡಿದ್ದಕ್ಕೆ ವಿಷಾದಿಸುತ್ತೇನೆ ಮತ್ತು ನನ್ನ ನಿರ್ಧಾರಕ್ಕೆ ನಾನು ಅಂಟಿಕೊಳ್ಳುತ್ತೇನೆ," ಎಂದು ಹೇಳಿದರು. ಸನ್ ರೈಸರ್ಸ್ ಹೈದರಾಬಾದ್‌ ತಮ್ಮ ಇನಿಂಗ್ಸ್‌ನಲ್ಲಿ ವೇಗವನ್ನು ಪಡೆದುಕೊಳ್ಳಲಿಲ್ಲ. ಕಳೆದ ಪಂದ್ಯದಲ್ಲಿ ದುಬಾರಿಯಾಗಿದ್ದ ಪ್ಯಾಟ್‌ ಕಮಿನ್ಸ್(19ಕ್ಕೆ 1) ಈ ಹಣಾಹಣಿಯಲ್ಲಿ ಅದ್ಭುತವಾಗಿ ಬೌಲಿಂಗ್‌ ಮಾಡಿದ್ದರು ಹಾಗೂ ವರುಣ್‌ ಚಕ್ರವರ್ತಿ (25ಕ್ಕೆ 1) ಮಧ್ಯಮ ಓವರ್‌ಗಳಲ್ಲಿ ಉತ್ತಮವಾಗಿ ನಿಬಾಯಿಸಿದ್ದರು. ಟೆಸ್ಟ್‌ ಪಂದ್ಯದ ರೀತಿ ಬೌಲಿಂಗ್‌ ಮಾಡಿದ ಪ್ಯಾಟ್‌ ಕಮಿನ್ಸ್ ಅವರನ್ನು ಶ್ಲಾಘಿಸಿದರು. ಅವರು ತಮ್ಮ ಅದ್ಭುತ ಬೌಲಿಂಗ್‌ನಿಂದ ನಾವು ಗಳಿಸಬಹುದಾದ 30 ಅಥವಾ 40 ರನ್‌ಗಳನ್ನು ನಿಯಂತ್ರಿಸಿದರು. "ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಹಾಕುತ್ತಿದ್ದ ಲೈನ್‌ ಅಂಡ್‌ ಲೆನ್ತ್‌ ಅನ್ನೇ ಈ ಪಂದ್ಯದಲ್ಲಿ ಹಾಕಿದರು. ಇದು ನಮಗೆ ಸ್ವಲ್ಪ ಮುಳುವಾಯಿತು. ಅಲ್ಲದೆ, ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವುದು ಸ್ವಲ್ಪ ಕಷ್ಟವಾಯಿತು. 4 ಅಥವಾ 5 ಓವರ್‌ಗಳಲ್ಲಿ ನಾವು 20 ರನ್‌ಗಳಿಗೆ ಸೀಮಿತವಾಗಿದ್ದು, ನಮಗೆ ತೀರಾ ಹಿನ್ನಡೆಯಾಯಿತು. ಹೆಚ್ಚುವರಿ 30 ಅಥವಾ 40 ರನ್‌ಗಳು ಗಳಿಸಿದ್ದರೆ, ಪಂದ್ಯ ನಮ್ಮ ಪಾಲಿಗೆ ಅದ್ಭತವಾಗಿ ಇರುತ್ತಿತ್ತು," ಎಂದು ವಾರ್ನರ್‌ ತಿಳಿಸಿದರು. 143 ರನ್‌ಗಳ ಗುರಿ ಹಿಂಬಾಲಿಸಿದ ಕೋಲ್ಕತಾ ನೈಟ್‌ ರೈಡರ್ಸ್ ತಂಡ ಆರಂಭಿಕ ಎಂಟು ಓವರ್‌ಗಳ ಒಳಗೆ ಸುನೀಲ್‌ ನರೇನ್‌, ನಿತೀಶ್‌ ರಾಣಾ ಹಾಗೂ ದಿನೇಶ್‌ ಕಾರ್ತಿಕ್‌ ಅವರು ಔಟ್‌ ಆದರು. ಆದರೆ, ಶುಭಮನ್‌ ಗಿಲ್‌ ಒಂದು ತುದಿಯಲ್ಲಿ ನಿಂತು 19ನೇ ಓವರ್‌ನಲ್ಲಿ ಕೆಕೆಆರ್‌ಗೆ ಗೆಲುವು ತಂದುಕೊಟ್ಟರು. ಆ ಮೂಲಕ ಕೆಕೆಆರ್‌ ವಿರುದ್ಧ ಸನ್ ರೈಸರ್ಸ್ ಸತತ ಐದನೇ ಪಂದ್ಯದ ಸೋಲು ಇದಾಯಿತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3kTYU6C
