ಸಂತೋಷ್‌ ಕಾಚಿನಕಟ್ಟೆ ಶಿವಮೊಗ್ಗ ಬೆಂಗಳೂರು:ಬೆಂಗಳೂರಿನ ಎಂ.ಎಸ್‌.ರಾಮಯ್ಯ ವಿಶ್ವವಿದ್ಯಾಲಯದ ಆನ್ವಯಿಕ ವಿಜ್ಞಾನ ವಿಭಾಗದ ವಿಜ್ಞಾನಿಗಳು ಕುರಿತು ಸಮಗ್ರ ನಡೆಸಲು ಸಿದ್ಧರಾಗಿದ್ದಾರೆ. ಅಡಕೆ ಕಾರ್ಯಪಡೆಯು ಮುಂದಿನ 18 ತಿಂಗಳೊಳಗೆ ಸಮಗ್ರ ಸಂಶೋಧನೆ ಸಲ್ಲಿಸಲು ಗಡವು ನೀಡಿದೆ. ಕಳೆದ 20 ವರ್ಷದಲ್ಲಿ ಹಲವು ಸಂಶೋಧಕರು ಮತ್ತು ಅಧಿಕೃತ ಸಂಶೋಧನಾ ಸಂಸ್ಥೆಗಳು ಅಡಕೆ ಆರೋಗ್ಯಕ್ಕೆ ಹಾನಿಕಾರಕವಲ್ಲ ಎಂಬುದನ್ನು ವರದಿಗಳ ಮೂಲಕ ನಿರೂಪಿಸಿವೆ. ಆದರೆ, ಕ್ಲಿನಿಕಲ್‌ ಟ್ರಯಲ್ಸ್‌ ಮತ್ತು ಅದರ ಮಾನದಂಡದ ಅನ್ವಯ ಸಂಶೋಧನೆ ನಡೆದಿಲ್ಲ. ಈ ಸಂಶೋಧನೆಯು ಪೂರ್ಣಗೊಂಡಲ್ಲಿ ಸುಪ್ರೀಂ ಕೋರ್ಟ್‌ನಲ್ಲಿ ನಡೆಯುತ್ತಿರುವ ಕಾನೂನು ಹೋರಾಟಕ್ಕೆ ಹಾಗೂ ಅಡಕೆ ಭವಿಷ್ಯಕ್ಕೆ ಬಲ ತಂದು ಕೊಡುವ ವಿಶ್ವಾಸ ಮೂಡಿಸಿದೆ. ಸಂಶೋಧನಾ ತಂಡ ಸಂಶೋಧನೆಗಾಗಿ ಎಂ.ಎಸ್‌.ರಾಮಯ್ಯ ವಿಶ್ವವಿದ್ಯಾಲಯದ ಸಮ ಉಪಕುಲಪತಿ ಪ್ರೊ.ಗೋವಿಂದ್‌ ಆರ್‌.ಕಡಂಬಿ ಅವರ ಮಾರ್ಗದರ್ಶನದಲ್ಲಿ ಪ್ರೊ.ಮಾಧವನ್‌, ಡಾ.ದೇವಯ್ಯ, ವಿ.ವಿ.ಭಟ್‌ ಹಾಗೂ ಬಯೋಟೆಕ್ನಾಲಜಿ, ಫಾರ್ಮಸಿ, ಕೆಮಿಸ್ಟ್ರಿ ಮತ್ತು ಬಾಟ್ನಿಯ ವಿಜ್ಞಾನಿಗಳನ್ನು ಒಳಗೊಂಡ ತಂಡವನ್ನು ರಚಿಸಲಾಗಿದೆ. ಈ ತಂಡವು ಐಎಎಚ್‌ಆರ್‌, ಮೈಸೂರಿನ ಆಹಾರ ತಂತ್ರಜ್ಞಾನ ಸಂಶೋಧನಾ ಕೇಂದ್ರ(ಸಿಎಫ್‌ಟಿಆರ್‌ಐ), ಕಾಸರಗೋಡಿನ ಸಿಪಿಸಿಆರ್‌ಐ, ಕೋಯಿಕೊಡ್‌ನಲ್ಲಿರುವ ಅಡಕೆ ನಿರ್ದೇಶನಾಲಯ, ವಾರಾಣಸಿ ಸಂಶೋಧನಾ ಪ್ರತಿಷ್ಠಾನ, ಬೆಂಗಳೂರು ಕೃಷಿ ವಿಶ್ವವಿದ್ಯಾಲಯ ಹಾಗೂ ಶಿವಮೊಗ್ಗ ಕೃಷಿ ಮತ್ತು ತೋಟಗಾರಿಕೆ ವಿಶ್ವವಿದ್ಯಾಲಯದ ವಿಜ್ಞಾನಿಗಳ ಸಲಹೆಗಳನ್ನು ಪಡೆದುಕೊಳ್ಳಲಿದೆ. ಸಂಶೋಧನೆ ಹೇಗೆ? ರಾಜ್ಯದಲ್ಲಿ ಮಲೆನಾಡು, ಅರೆಮಲೆನಾಡು, ಕರಾವಳಿ ಮತ್ತು ಬಯಲು ಸೀಮೆಯಲ್ಲಿ ಅಡಕೆ ಬೆಳೆಯಲಾಗುತ್ತದೆ. ಈ ನಾಲ್ಕೂ ವಲಯಗಳಿಂದ ಹೊಂಬಾಳೆ, ಮಣಿ ಕಟ್ಟುವಾಗ, ಕಾಯಿ ಮತ್ತು ಬಲಿತ ಅಡಕೆಯನ್ನು ಸಂಶೋಧನೆಗೆ ಒಳಪಡಿಸಲಾಗುವುದು. ಅಷ್ಟೇ ಅಲ್ಲದೆ ರಾಸಾಯನಿಕ ಬಳಸದೆ ಬೆಳೆದ ಅಡಕೆಯನ್ನೂ ಸಂಶೋಧನೆಗೆ ಒಳಪಡಿಸಲಾಗುವುದು. ಪ್ರತಿಯೊಂದರಲ್ಲೂ ಏನೇನು ಅಂಶಗಳಿವೆ. ಅವುಗಳಲ್ಲಿ ಮಾನವನಿಗೆ ಅನಾರೋಗ್ಯ ಉಂಟು ಮಾಡುವ ಅಥವಾ ಆರೋಗ್ಯಕ್ಕೆ ಪೂರಕವಾದ ಅಂಶಗಳನ್ನು ಗುರುತಿಸಲಾಗುತ್ತದೆ. ಅದಕ್ಕಾಗಿ ಪ್ರತಿಯೊಂದು ವಲಯದ ಆಯ್ದ ತೋಟಗಳಿಗೆ ಭೇಟಿ ನೀಡಿ ಮಾದರಿಗಳನ್ನು ಸಂಗ್ರಹಿಸಲಾಗುತ್ತದೆ. ಕಾನೂನು ಹೋರಾಟದಲ್ಲಿ ಪ್ರತಿಯೊಂದಕ್ಕೂ ಸಾಕ್ಷಿ ಒದಗಿಸಬೇಕಾಗಿರುವ ಹಿನ್ನೆಲೆಯಲ್ಲಿ ಎಲ್ಲ ಪ್ರಕ್ರಿಯೆಗಳನ್ನು ದಾಖಲು ಮಾಡಲಾಗುತ್ತದೆ ಎನ್ನುತ್ತಾರೆ ಪ್ರೊ.ಮಾಧವನ್‌. ನಮ್ಮ ದೇಶದಲ್ಲಿ ಅದರಲ್ಲೂ ದಕ್ಷಿಣ ಭಾರತದಲ್ಲಿ 3 ಸಾವಿರ ವರ್ಷಗಳಿಂದ ಜನ ಅಡಕೆಯನ್ನು ಸಾಂಪ್ರದಾಯಿಕವಾಗಿ ತಿನ್ನುತ್ತಾ ಬಂದಿದ್ದಾರೆ. ಹಾಗೆ ನಿಜವಾಗಲೂ ಅಡಕೆಯಿಂದ ಕ್ಯಾನ್ಸರ್‌ ಬರುವುದಾಗಿದ್ದರೆ ಅಡಕೆ ತಿನ್ನುವವರಿಗೆಲ್ಲ ಕ್ಯಾನ್ಸರ್‌ ಬರಬೇಕಾಗಿತ್ತು. ಆದರೆ, ಸಾಂಪ್ರದಾಯಿಕವಾಗಿ ತಾಂಬೂಲದಂತೆ ಅಡಕೆ ಬಳಸುವವರು ದೀರ್ಘಾಯುಷಿಗಳಾಗಿದ್ದಾರೆ. ಇದಕ್ಕೆ ಉದಾಹರಣೆಯಾಗಿ ನಮ್ಮ ಕಣ್ಣ ಮುಂದೆ ಲಕ್ಷಾಂತರ ಜನ ಇದ್ದಾರೆ. ಅಡಕೆ ಕ್ಯಾನ್ಸರ್‌ಕಾರಕವೆಂದು ನಿರೂಪಿಸಿದ ಸಂಶೋಧನೆಯಲ್ಲಿ ತಾಂಬಾಕುಯುಕ್ತ ಅಡಕೆಯನ್ನು ಬಳಸಲಾಗಿದೆ. ಇದೊಂದು ಕಾರಣದಿಂದಲೆ ಅಡಕೆಯ ಮಾನ ಹರಾಜು ಮಾಡಿದೆ. ನಮ್ಮ ಆಯುರ್ವೇದ ಪದ್ಧತಿಯಲ್ಲಿ ಅಡಕೆಗೆ ಔಷಧೀಯ ಮೌಲ್ಯವಿದೆ. ಹೀಗಾಗಿ ಆಯುಷ್‌ ಮಾನದಂಡದ ಅನ್ವಯವೆ ಸಂಶೋಧನೆಗೆ ಆದ್ಯತೆ ನೀಡಲಾಗುತ್ತಿದೆ ಎನ್ನುತ್ತಾರೆ ಡಾ.ದೇವಯ್ಯ. ಇದರ ಜತೆಯಲ್ಲಿ ಅಡಕೆ ಬೆಳೆಯಲ್ಲಿ ರಾಸಾಯನಿಕಗಳ ಬದಲಿಗೆ ನೈಸರ್ಗಿಕ ಔಷಧಗಳನ್ನು ಬಳಸಿ ರೋಗ ನಿಯಂತ್ರಣ ಮಾಡಬಹುದಾದ ಕ್ರಮಗಳ ಬಗ್ಗೆಯೂ ಸಂಶೋಧನೆ ನಡೆಸಲಾಗುತ್ತಿದೆ. ಸಂಶೋಧನೆ ಮುಗಿದ ಬಳಿಕ ನಮ್ಮ ಸಂಸ್ಥೆ ವತಿಯಿಂದ ಅಡಕೆ ಬೆಳೆಯುವ ಪ್ರದೇಶಗಳಲ್ಲಿ ಅಡಕೆಯಲ್ಲಿರುವ ಆರೋಗ್ಯಕ್ಕೆ ಪೂರಕವಾದ ಅಂಶಗಳು, ಅಡಕೆ ರೋಗಗಳು ಮತ್ತಿತರ ವಿಷಯಗಳನ್ನು ಒಳಗೊಂಡಂತೆ ಜಾಗೃತಿ ಕಾರ್ಯಕ್ರಮಗಳನ್ನು ಸಹ ನಡೆಸಲು ತೀರ್ಮಾನಿಸಲಾಗಿದೆ ಎಂದು ಎಂದು ಪ್ರೊ. ಗೋವಿಂದ್‌ ಕೆ.ಕಡಂಬಿ ಅವರು ತಿಳಿಸಿದರು. ಅಡಕೆ ಕಾರ್ಯಪಡೆಯು ಅಡಕೆ ಮೇಲೆ ಕ್ಲಿನಿಕಲ್‌ ಟ್ರಯಲ್‌ ನಡೆಸುವ ಹೊಣೆಯನ್ನು ನಮ್ಮ ಸಂಸ್ಥೆಗೆ ನೀಡಿದೆ. ನಾವು ಈಗಾಗಲೆ ಅದರ ರೂಪುರೇಷೆಗಳನ್ನು ಸಿದ್ಧಪಡಿಸಿದ್ದು, ತಂಡ ಸಹ ರಚಿಸಲಾಗಿದೆ. 18 ತಿಂಗಳಲ್ಲಿ ಸರಕಾರಕ್ಕೆ ವರದಿ ಸಲ್ಲಿಸಲಾಗುವುದು. ಪ್ರೊ.ಗೋವಿಂದ್‌ ಕೆ.ಕಡಂಬಿ, ಸಮ ಉಪಕುಲಪತಿ, ಎಂ.ಎಸ್‌.ರಾಮಯ್ಯ ವಿಶ್ವವಿದ್ಯಾಲಯ, ಬೆಂಗಳೂರು
from India & World News in Kannada | VK Polls https://ift.tt/2G7HtAB
