ಶಾರ್ಜಾ: ಭಾನುವಾರ ರಾತ್ರಿ ಕಿಂಗ್ಸ್ ಇಲೆವೆನ್‌ ಪಂಜಾಬ್‌ ವಿರುದ್ಧ ಕಠಿಣ ಹೋರಾಟ ನಡೆಸಿ ಗೆಲುವು ಸಾಧಿಸಿದ ಬಳಿಕ ಮಾತನಾಡಿದ ಸಹ ಆಟಗಾರ ರಾಹುಲ್‌ ತೆವಾಟಿಯಾ ಅವರ ಪ್ರದರ್ಶನವನ್ನು ಕೊಂಡಾಡಿದರು. ಶಾರ್ಜಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಪಂಜಾಬ್‌ ಫ್ರಾಂಚೈಸಿ ನೀಡಿದ್ದ 224 ರನ್‌ಗಳ ಗುರಿಯನ್ನು ರಾಜಸ್ಥಾನ್‌ ರಾಯಲ್ಸ್ ಯಶಸ್ವಿಯಾಗಿ ಬೆನ್ನತ್ತಿತ್ತು. ರಾಜಸ್ಥಾನ್‌ ರಾಯಲ್ಸ್ ಪರ ಸಂಜು ಸ್ಯಾಮ್ಸನ್‌, ಸ್ಟೀವನ್‌ ಸ್ಮಿತ್‌ ಹಾಗೂ ರಾಹುಲ್‌ ತೆವಾಟಿಯಾ ಅರ್ಧಶತಕಗಳನ್ನು ಸಿಡಿಸಿದ್ದರು. ಆ ಮೂಲಕ ರಾಜಸ್ಥಾನ್‌ ರಾಯಲ್ಸ್ ನಾಲ್ಕು ವಿಕೆಟ್‌ಗಳ ಗೆಲುವಿಗೆ ನೆರವಾಗಿದ್ದರು. ನಾಲ್ಕನೇ ಬ್ಯಾಟಿಂಗ್‌ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿದ ತೆವಾಟಿಯಾ ಒಂದು ಹಂತದಲ್ಲಿ 19 ಎಸೆತಗಳಲ್ಲಿ 13 ರನ್‌ಗಳನ್ನು ಗಳಿಸಿ ಹೆಣಗಾಡುತ್ತಿದ್ದರು. ಆದರೆ, 18ನೇ ಓವರ್‌ನಲ್ಲಿ ತೆವಾಟಿಯಾ, ಶೆಲ್ಡನ್‌ ಕಾಟ್ರೆಲ್‌ ಓವರ್‌ಗೆ ಐದು ಸಿಕ್ಸರ್‌ಗಳನ್ನು ಸಿಡಿಸಿ ಪಂದ್ಯದ ತಿರುವನ್ನು ಬದಲಾಯಿಸಿದರು. ರಾಜಸ್ಥಾನ್‌ ರಾಯಲ್ಸ್ ತಂಡದ ನಾಲ್ಕು ವಿಕೆಟ್‌ಗಳ ಗೆಲುವಿನಲ್ಲಿ ರಾಹುಲ್‌ ತೆವಾಟಿಯಾ 53 ರನ್‌ಗಳನ್ನು ಸಿಡಿಸಿದರು. ಪಂದ್ಯದ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಸಂಜು ಸ್ಯಾಮ್ಸನ್‌," ರಾಹುಲ್‌ ತೆವಾಟಿಯಾ ಅವರನ್ನು ಬ್ಯಾಟಿಂಗ್‌ ನಾಲ್ಕನೇ ಕ್ರಮಾಂಕದಲ್ಲಿ ಕಳುಹಿಸುವುದು ಟೀಮ್‌ ಮ್ಯಾನೇಜ್‌ಮೆಂಟ್‌ ನಿರ್ಧಾರ. ರಾಹುಲ್‌ ತೆವಾಟಿಯಾ ಲೆಗ್‌ ಸ್ಪಿನ್ನರ್‌ ಆಗಿರುವುದರಿಂದ, ಅವರ ಬ್ಯಾಟಿಂಗ್‌ ಮೇಲೆ ನಾವು ಸಾಕಷ್ಟು ಕೆಲಸ ಮಾಡಿದ್ದೇವೆ. ತರಬೇತಿ ಅವಧಿಯಲ್ಲಿ ಅವರ ಬ್ಯಾಟಿಂಗ್‌ ಸಾಮರ್ಥ್ಯವನ್ನು ಕಂಡಿದ್ದೇವೆ. ಈ ಕಾರಣದಿಂದಲೇ ಅವರನ್ನು ಮೇಲಿನ ಕ್ರೆಮಾಂಕದಲ್ಲಿ ಆಡಿಸಲಾಯಿತು, ಅಂತೆಯೇ ಇದಕ್ಕೆ ಪ್ರತಿಫಲ ಸಿಕ್ಕಿದೆ," ಎಂದು ಹೇಳಿದರು. "ಅವರಿಂದ ಮೂಡಿಬಂದ ಪ್ರದರ್ಶನ ಅದ್ಭುತವಾಗಿತ್ತು. ತೆವಾಟಿಯಾ ತುಂಬಾ ಹೃದಯವನ್ನು ತೋರಿಸಿದರು, ಅವರು ಎಂದಿಗೂ ಸ್ಪರ್ಧೆಯಿಂದ ಕೆಳಗಿಳಿಯಲಿಲ್ಲ. ಆರಂಭದಲ್ಲಿ ಸ್ವಲ್ಪ ಹಿನ್ನಡೆಯಾಗಿದ್ದರೂ, ನಂತರ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿದರು. ಅಂತಾರಾಷ್ಟ್ರೀಯ ಬೌಲರ್‌ಗೆ ಸಿಡಿಸಿದ ಐದು ಸಿಕ್ಸರ್‌ಗಳು ಅವರ ಸಾಮರ್ಥ್ಯವನ್ನು ಸಾಬೀತುಪಡಿಸಿತು. ಮುಂದಿನ ಪಂದ್ಯಗಳಲ್ಲಿ ಅವನು ನಮಗೆ ನಿರ್ಣಾಯಕ ಪಾತ್ರವಹಿಸಲಿದ್ದಾರೆ," ಎಂದು ಎಡಗೈ ಬ್ಯಾಟ್ಸ್‌ಮನ್‌ ಅನ್ನು ಶ್ಲಾಘಿಸಿದರು. ಚೆನ್ನೈ ಸೂಪರ್‌ ಕಿಂಗ್ಸ್ ವಿರುದ್ಧ ಕಳೆದ ಪಂದ್ಯದಲ್ಲಿ ಸಂಜು ಸ್ಯಾಮ್ಸನ್‌ 74 ರನ್‌ಗಳನ್ನು ಸಿಡಿಸಿದ್ದರು ಹಾಗೂ ಇದೀಗ ಕಿಂಗ್ಸ್ ಇಲೆವೆನ್‌ ಪಂಜಾಬ್‌ ವಿರುದ್ಧ 85 ರನ್‌ಗಳನ್ನು ಕಲೆ ಹಾಕಿದ್ದಾರೆ. ಪಂಜಾಬ್‌ ವಿರುದ್ಧ 224 ರನ್‌ಗಳ ಗುರಿ ಹಿಂಬಾಲಿಸಿದ ಬಗ್ಗೆ ಮಾತನಾಡಿದ ಅವರು, "ಚೇಸ್‌ ಮಾಡುವ ವೇಳೆ, ಒಂದೇ ಹಾದಿಯಲ್ಲಿ ಹೋಗಬೇಕಾಗುತ್ತದೆ, 220ಕ್ಕೂ ಹೆಚ್ಚಿನ ರನ್‌ಗಳ ಗುರಿ ಬೆನ್ನತ್ತುವಾಗ ಆಲೋಚನಾ ಪ್ರಕ್ರಿಯೆ ವಿಷಯವು ತುಂಬಾ ಸುಲಭವಾಗಿರುತ್ತದೆ. ಅದೇನೆಂದರೆ ಚೆಂಡನ್ನು ನೋಡುವುದು ಹಾಗೂ ಹೊಡೆಯುವುದು ಎಂದರ್ಥ," ಎಂದು ಸಂಜು ಸ್ಯಾಮ್ಸನ್‌ ತಿಳಿಸಿದರು. ಪಂಜಾಬ್‌ ವಿರುದ್ಧದ ಪಂದ್ಯಕ್ಕೆ ಯಶಸ್ವಿ ಜೈಸ್ವಾಲ್‌ ಹಾಗೂ ಡೇವಿಡ್‌ ಮಿಲ್ಲರ್ ಅವರನ್ನು ಕೈಬಿಟ್ಟು, ಅಂಕಿತ್ ರಜಪೂತ್‌ ಮತ್ತು ಜೋಸ್‌ ಬಟ್ಲರ್ ಅವರನ್ನು ಆಡಿಸಲಾಯಿತು. ಈ ಬಗ್ಗೆ ಪ್ರತಿಕ್ರಿಯಿಸಿ,"ಶಾರ್ಜಾ ಅಂಗಣ ಬೌಲರ್‌ಗಳ ಪಾಲಿಗೆ ಕಷ್ಟವಿದೆ. ಹಾಗಾಗಿ ನಮಗೆ ಒಂದು ಬೌಲರ್‌ ಹೆಚ್ಚುವರಿಯಾಗಿ ನಮಗೆ ಅಗತ್ಯಿವಿತ್ತು. ಹಾಗಾಗಿ, ಯಶಸ್ವಿ ಜೈಸ್ವಾಲ್‌ ಅವರನ್ನು ಕೈಬಿಟ್ಟು ಅಂಕಿತ್ ರಜಪೂತ್‌ಗೆ ಸ್ಥಾನ ನೀಡಲಾಯಿತು. ಜೋಸ್‌ ಬಟ್ಲರ್ ತಂಡದಲ್ಲಿ ಆಡಬೇಕಾಗಿದೆ ಮತ್ತು ಇದನ್ನು ಡೇವಿಡ್‌ ಮಿಲ್ಲರ್ ಅರ್ಥ ಮಾಡಿಕೊಂಡಿದ್ದಾರೆ," ಎಂದು ಸಂಜು ಸ್ಯಾಮ್ಸನ್‌ ತಿಳಿಸಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3i6IN3R
