ಸುನಿಲ್‌ ಪೊನ್ನೇಟಿ ಮಡಿಕೇರಿ ಮಡಿಕೇರಿ: ಮನೆಯಲ್ಲಿ ಇದ್ದುಕೊಂಡು ಮಾಡುವ ಕೆಲಸವನ್ನು ಪ್ರವಾಸಿತಾಣಗಳಲ್ಲಿನ ಅಥವಾ ರೆಸಾರ್ಟ್‌ಗಳಲ್ಲಿ ಒಂದಿಷ್ಟು ದಿನ ಉಳಿದುಕೊಂಡು ನಿರ್ವಹಿಸುವುದಕ್ಕೆ 'ವರ್ಕೇಷನ್‌' ಎನ್ನಲಾಗುತ್ತದೆ. ಮನೆಯಿಂದ ದೂರವಾಗಿ ಬದಲಾದ ವಾತಾವರಣದಲ್ಲಿ ಕೆಲಸ ಮಾಡುವುದರಿಂದ ಮನಸ್ಸು ಪ್ರಫುಲ್ಲವಾಗುತ್ತದೆ. ಬಿಡುವಿನ ಅವಧಿಯಲ್ಲಿ ಸುತ್ತಲಿನ ಪ್ರೇಕ್ಷಣೀಯ ತಾಣಗಳಿಗೆ ಭೇಟಿ ಕೊಟ್ಟು ಕರ್ತವ್ಯದ ಒತ್ತಡವನ್ನು ಹಗುರ ಮಾಡಿಕೊಳ್ಳುವ ಅವಕಾಶ ಇಲ್ಲಿದೆ. ಕೊರೊನಾ ಸಾಂಕ್ರಾಮಿಕ ಕಾಯಿಲೆ ವ್ಯಾಪಿಸುತ್ತಿದ್ದಂತೆಯೇ ಮುನ್ನೆಚ್ಚರಿಕೆ ಕ್ರಮವಾಗಿ ಬಹಳಷ್ಟು ಸಂಸ್ಥೆಗಳು ತಮ್ಮ ಉದ್ಯೋಗಿಗಳಿಗೆ ಮನೆಯಿಂದಲೇ ಕೆಲಸ ಮಾಡುವಂತೆ ಸೂಚಿಸಿದವು. ಲಾಕ್‌ಡೌನ್‌ ಅವಧಿ ಮುಗಿದು ಜನಜೀವನ ಸಹಜ ಸ್ಥಿತಿಗೆ ಬರುತ್ತಿದ್ದರೂ ವರ್ಕ್ ಫ್ರಮ್‌ ಹೋಮ್‌ ಇನ್ನು ಕೂಡ ಮುಂದುವರಿದಿದೆ. ಕಚೇರಿಯಲ್ಲಿ ಕೆಲಸ ಮಾಡುವುದಕ್ಕೂ ಮನೆಯಲ್ಲಿದ್ದುಕೊಂಡು ಕಾರ್ಯನಿರ್ವಹಿಸುವುದಕ್ಕೂ ಸಾಕಷ್ಟು ವ್ಯತ್ಯಾಸಗಳಿದ್ದು, ಏಕತಾನತೆ ಕಾಡುವ ಎಲ್ಲಾ ಸಾಧ್ಯತೆಗಳಿರುತ್ತದೆ. ಮನಸ್ಸು ಬದಲಾವಣೆ ಬಯಸುತ್ತಿರುತ್ತದೆ. ಇಂಥ ಉದ್ಯೋಗಿಗಳನ್ನು ಗುರಿಯಾಗಿರಿಸಿಕೊಂಡು 'ವರ್ಕೇಷನ್‌' ಪರಿಕಲ್ಪನೆ ರೂಪುಗೊಂಡಿದೆ. ಹಿಮಾಚಲ ಪ್ರದೇಶ, ಉತ್ತರಾಖಂಡ ಸೇರಿದಂತೆ ದೇಶದ ಪ್ರಮುಖ ಪ್ರವಾಸಿ ತಾಣಗಳಲ್ಲಿ ಇದ್ದ 'ವರ್ಕೇಷನ್‌' ಪರಿಕಲ್ಪನೆ ಕೊಡಗಿನಲ್ಲೂ ಶುರುವಾಗಿದೆ. ಇಲ್ಲಿಯ ಪ್ರತಿಷ್ಠಿತ ರೆಸಾರ್ಟ್‌ಗಳು, ಹೋಮ್‌ಸ್ಟೇಗಳು ತಮ್ಮಲ್ಲಿ'ವರ್ಕೇಷನ್‌'ಗೆ ಅವಕಾಶ ಮಾಡಿಕೊಡುತ್ತಿವೆ. ಪ್ರವಾಸಿಗರ ಕೊರತೆಯಿಂದ ಕೊಠಡಿಗಳನ್ನು ಖಾಲಿ ಬಿಡುವುದರ ಬದಲು ಸಾಮಾನ್ಯ ದರಕ್ಕಿಂತಲೂ ಕಡಿಮೆ ದರಕ್ಕೆ ಪ್ಯಾಕೇಜ್‌ಗಳನ್ನು ರೂಪಿಸಲಾಗಿದ್ದು, ದಿನವೊಂದಕ್ಕೆ 2 ಸಾವಿರದಿಂದ 6 ಸಾವಿರ ತನಕ ದರ ನಿಗದಿಪಡಿಸಲಾಗಿದೆ. 2 ದಿವಸದಿಂದ 2-3 ವಾರದ ತನಕ ತಂಗುವುದಕ್ಕೆ ಅಗತ್ಯವಿರುವ ಪ್ಯಾಕೇಜ್‌ಗಳೂ ಇವೆ. 'ವರ್ಕೇಷನ್‌' ಪರಿಕಲ್ಪನೆಗೆ ಜಿಲ್ಲೆಯಲ್ಲಿ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಬೆಂಗಳೂರು ಸೇರಿದಂತೆ ದೊಡ್ಡ ನಗರಗಳ ಉದ್ಯೋಗಿಗಳು ಇದರ ಪ್ರಯೋಜನ ಪಡೆಯಲಾರಂಭಿಸಿದ್ದಾರೆ. ಬೆರಳೆಣಿಕೆಯಷ್ಟು ರೆಸಾರ್ಟ್‌ಗಳು ಮತ್ತು ಕೆಲವು ಹೋಮ್‌ಸ್ಟೇಗಳು ಮಾತ್ರ ಪ್ರವಾಸೋದ್ಯಮದ ಈ ಹೊಸ ದಾರಿಗೆ ತೆರೆದುಕೊಂಡಿದ್ದು, ಬದಲಾವಣೆ ಬಯಸಿ ಬರುವ ಪ್ರವಾಸಿಗಳ ರೂಪದಲ್ಲಿರುವ ವಿವಿಧ ಸಂಸ್ಥೆಗಳ ಉದ್ಯೋಗಿಗಳಿಗೆ ಅನುಕೂಲಕರ ವಾತಾವರಣ ಕಲ್ಪಿಸಿ ಕೊಡಲು ಪ್ರಯತ್ನಿಸಲಾಗುತ್ತಿದೆ. ಕೆಲವು ಪ್ರವಾಸೋದ್ಯಮಿಗಳು ಹೆಚ್ಚುವರಿ ಶುಲ್ಕ ತೆಗೆದುಕೊಂಡು ತಾವೇ ಪ್ರವಾಸಿತಾಣಗಳಿಗೆ ಕರೆದುಕೊಂಡು ಹೋಗುವ ಆಕರ್ಷಕ ಪ್ಯಾಕೇಜ್‌ಗಳನ್ನೂ ಪರಿಚಯಿಸಿದ್ದಾರೆ. ಈ ಮೂಲಕವೂ ಜಿಲ್ಲೆಯ ಪ್ರವಾಸೋದ್ಯಮ ಪುನಶ್ಚೇತನಕ್ಕೆ ಪ್ರಯತ್ನಗಳು ನಡೆದಿವೆ. ಹೈಸ್ಪೀಡ್‌ ಇಂಟರ್ನೆಟ್‌ಗೆ ಪ್ರಯತ್ನ 'ವರ್ಕೇಷನ್‌'ಗೆ ಗ್ರಾಹಕರು ಪ್ರಮುಖವಾಗಿ ಉತ್ತಮ ಗುಣಮಟ್ಟದ ಇಂಟರ್ನೆಟ್ ಸಂಪರ್ಕ ಬಯಸುತ್ತಾರೆ. ಆದರೆ ಕೊಡಗಿನ ಬಹುತೇಕ ಪ್ರದೇಶಗಳಲ್ಲಿ ವೇಗದ ಅಂತರ್ಜಾಲ ಸಂಪರ್ಕದ್ದೇ ದೊಡ್ಡ ಸಮಸ್ಯೆಯಾಗಿದೆ. ಹಾಗಾಗಿ ಹೋಮ್‌ಸ್ಟೇ ಮತ್ತು ರೆಸಾರ್ಟ್‌ ಮಾಲೀಕರು ತಮ್ಮಲ್ಲಿ ಇಂಟರ್ನೆಟ್ ಸಂಪರ್ಕದ ಗುಣಮಟ್ಟ ಹೆಚ್ಚಿಸುವತ್ತ ಗಮನಹರಿಸಿದ್ದಾರೆ. ಕಚೇರಿ ಕೆಲಸಕ್ಕೆ ಅಗತ್ಯವಾದ ಪೀಠೋಪಕರಣ, ಸ್ಥಳೀಯ ಪದ್ಧತಿಯ ಆಹಾರಗಳನ್ನೂ ಒದಗಿಸಲಾಗುತ್ತದೆ. ಕೊರೊನಾ ಹಿನ್ನೆಲೆಯಲ್ಲಿ ಸರಕಾರದ ಮಾರ್ಗಸೂಚಿಯಂತೆ ಅಗತ್ಯ ಮುಂಜಾಗ್ರತಾ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಪ್ರವಾಸಿಗರು ಮತ್ತು ತಮ್ಮಲ್ಲಿ ಕೆಲಸ ಮಾಡುವ ಸಿಬ್ಬಂದಿ ಆರೋಗ್ಯದ ಕಡೆಯೂ ಗಮನ ಹರಿಸಲಾಗುತ್ತಿದೆ. 'ವರ್ಕೇಷನ್‌' ಪರಿಕಲ್ಪನೆಗೆ ಜಿಲ್ಲೆಯಲ್ಲಿ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಕೊರೊನಾ ಲಾಕ್‌ಡೌನ್‌ ನಂತರದ ದಿನಗಳಲ್ಲಿ ಜನಪ್ರಿಯವೂ ಆಗುತ್ತಿದೆ. ಸಾಕಷ್ಟು ಹೋಮ್‌ಸ್ಟೇಗಳಲ್ಲಿ ಇದಕ್ಕಾಗಿ ವಿಶೇಷ ವ್ಯವಸ್ಥೆಗಳನ್ನೂ ಕಲ್ಪಿಸಲಾಗಿದೆ. ಗುಣಮಟ್ಟದ ಇಂಟರ್ನೆಟ್ ಸಂಪರ್ಕದ ಸಮಸ್ಯೆ ಸ್ವಲ್ಪ ಕಾಡುತ್ತಿದೆ. ನವೀನ್‌ ಅಂಬೇಕಲ್‌, ಸಹ ಕಾರ್ಯದರ್ಶಿ, ಜಿಲ್ಲಾಹೋಮ್‌ಸ್ಟೇ ಅಸೋಸಿಯೇಷನ್‌
from India & World News in Kannada | VK Polls https://ift.tt/3jb491t
