ನಾಗರಾಜ್‌ ನವೀಮನೆ ಮೈಸೂರು: ಈ ಬಾರಿಯ ದಸರಾ ಮೆರವಣಿಗೆಯಲ್ಲಿ ಐದು ಸ್ತಬ್ಧಚಿತ್ರಗಳು ಮಾತ್ರ ಪ್ರದರ್ಶನಗೊಳ್ಳಲಿದ್ದು, 200 ಕಲಾವಿದರು ಹೆಜ್ಜೆ ಹಾಕಲಿದ್ದಾರೆ! ಕೋವಿಡ್‌ ಕಾರಣದಿಂದ ಈ ವರ್ಷ ಸರಳ ದಸರಾ ಆಚರಣೆಗೆ ಸರಕಾರ ಮುಂದಾಗಿರುವುದರಿಂದ ಜಂಬೂ ಸವಾರಿಯನ್ನು ಅರಮನೆ ಆವರಣಕ್ಕೆ ಸೀಮಿತಗೊಳಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಹೆಚ್ಚಿನ ಜನದಟ್ಟಣೆಯಾಗಬಾರದು ಎಂಬ ಉದ್ದೇಶದಿಂದ ಮುಂಜಾಗ್ರತ ಕ್ರಮವಾಗಿ ಸ್ತಬ್ಧಚಿತ್ರಗಳ ಸಂಖ್ಯೆ ಕಡಿಮೆ ಮಾಡಲಾಗಿದೆ. ಪ್ರತಿ ಸ್ತಬ್ಧಚಿತ್ರದ ಹಿಂದೆ 40 ಕಲಾವಿದರ ತಂಡ ಸಾಗಲಿದೆ. ಪ್ರತಿವರ್ಷ ಪ್ರತಿ ಜಿಲ್ಲೆಯಿಂದ ಒಂದೊಂದು ಲೆಕ್ಕದಲ್ಲಿ 40ಕ್ಕೂ ಹೆಚ್ಚು ಸ್ತಬ್ಧಚಿತ್ರಗಳು ಜಂಬೂಸವಾರಿಯಲ್ಲಿ ಭಾಗವಹಿಸುತ್ತಿದ್ದವು. ಇದಕ್ಕಾಗಿ ಮೂರು ತಿಂಗಳ ಮುಂಚಿನಿಂದಲೇ ತಯಾರಿ ನಡೆಯುತ್ತಿತ್ತು. ಆದರೆ, ಕೊರೊನಾ ಈ ಬಾರಿ ಎಲ್ಲವನ್ನೂ ಸೀಮಿತಗೊಳಿಸುವಂತೆ ಮಾಡಿದೆ. ಯಾವ ರೀತಿಯ ?: ಕೇಂದ್ರ ಹಾಗೂ ರಾಜ್ಯ ಸರಕಾರದ ಯೋಜನೆಗಳನ್ನು ಬಿಂಬಿಸುವ ಎರಡು ಸ್ತಬ್ಧಚಿತ್ರಗಳು, ಜಾಗತಿಕ ತಲ್ಲಣ ಮೂಡಿಸಿರುವ ಕೋವಿಡ್‌ ಜಾಗೃತಿಯ ಮತ್ತೊಂದು ಸ್ತಬ್ಧಚಿತ್ರ, ಮೈಸೂರು ಸಂಸ್ಕೃತಿಯ ಮಹತ್ವ ಸಾರುವ ಮತ್ತು ಆನೆಬಂಡಿ ಬಗ್ಗೆ ಮಾಹಿತಿ ನೀಡುವ ಎರಡು ಸ್ತಬ್ಧಚಿತ್ರಗಳು ಮೆರವಣಿಗೆಯಲ್ಲಿ ಸಾಗಿಬರಲಿವೆ. ಸ್ತಬ್ಧಚಿತ್ರಗಳ ನಿರ್ಮಾಣಕ್ಕೆ ಪರಿಕಲ್ಪನೆ ಹಾಗೂ ವಿನ್ಯಾಸವನ್ನು ಈಗಾಗಲೇ ಕಲಾವಿದರಿಗೆ ನೀಡಲಾಗಿದೆ. ಕಲಾವಿದರಿಗೆ ಎರಡು ಬಾರಿ ಪರೀಕ್ಷೆ: ಜಂಬೂಸವಾರಿ ಮೆರವಣಿಗೆಯಲ್ಲಿಗುಂಪಾಗಿ ಕಾರ‍್ಯಕ್ರಮ ನೀಡುವುದರಿಂದ ಎರಡು ಬಾರಿ ಕಲಾವಿದರಿಗೆ ಕೋವಿಡ್‌ ಟೆಸ್ಟ್‌ ಮಾಡಿಸಲು ಜಿಲ್ಲಾಡಳಿತ ನಿರ್ಧರಿಸಿದೆ. ಐದು ದಿನಗಳ ಮುಂಚೆ ಹಾಗೂ ಜಂಬೂಸವಾರಿ ಹಿಂದಿನ ದಿನ ಸೇರಿದಂತೆ ಎರಡು ಬಾರಿ ಕೊರೊನಾ ಟೆಸ್ಟ್‌ ಮಾಡಿಸಲಾಗುತ್ತದೆ. ಯಾರಿಗಾದರೂ ಪಾಸಿಟಿವ್‌ ವರದಿ ಬಂದರೆ ತಕ್ಷಣ ಪರ್ಯಾಯ ವ್ಯವಸ್ಥೆ ಮಾಡಿಕೊಳ್ಳಲಾಗುತ್ತದೆ. ಜಂಬೂಸವಾರಿ ನೋಡಲು ಬರುವವರಿಗೆ ಕೂಡ ಆರೋಗ್ಯ ತಪಾಸಣೆ ನಂತರವೇ ಒಳಗೆ ಬಿಡಲಾಗುತ್ತದೆ. ಯಾರಿಗಾದರೂ ರೋಗ ಲಕ್ಷಣಗಳಿದ್ದರೆ ಅವರನ್ನು ಕೂಡಲೇ ಹೋಂ ಐಸೋಲೇಷನ್‌ ಮಾಡಲಾಗುತ್ತದೆ. 7 ದಿನ ಅರಮನೆ ಆವರಣದಲ್ಲಿ ಸಾಂಸ್ಕೃತಿಕ ಕಾರ‍್ಯಕ್ರಮ ''ಕೊರೊನಾ ಹಿನ್ನೆಲೆಯಲ್ಲಿ ನವರಾತ್ರಿ ವೇಳೆ ಅರಮನೆ ಆವರಣದಲ್ಲಿ 7 ದಿನ ಮಾತ್ರ ಸಾಂಸ್ಕೃತಿಕ ಕಾರ‍್ಯಕ್ರಮ ನಡೆಯುತ್ತದೆ. ನಿತ್ಯ ಒಂದು ತಂಡದವರು ಮಾತ್ರ ಕಾರ‍್ಯಕ್ರಮ ನೀಡುವರು. ಪೊಲೀಸ್‌ ಬ್ಯಾಂಡ್‌ ಕಾರ‍್ಯಕ್ರಮ ಹಾಗೂ ಆಯುಧಪೂಜೆ ದಿನ ಯಾವುದೇ ಪ್ರದರ್ಶನ ಇರುವುದಿಲ್ಲ,'' ಎಂದು ಜಿಪಂ ಸಿಇಒ ಭಾರತಿ ಡಿ. ವಿಜಯ ಕರ್ನಾಟಕಕ್ಕೆ ತಿಳಿಸಿದರು. ಜಂಬೂಸವಾರಿ ದಿನ 2 ಸಾವಿರ ಜನರಿಗೆ ದಸರಾ ನೋಡಲು ಅವಕಾಶ ನೀಡಬೇಕೆಂದು ಸರಕಾರಕ್ಕೆ ಪ್ರಸ್ತಾವ ಸಲ್ಲಿಸಲಾಗಿದೆ. ಇನ್ನೂ ಅನುಮತಿ ಸಿಕ್ಕಿಲ್ಲ. ದಸರಾ ವೀಕ್ಷಣೆಗೆ ಬರುವವರಿಗೆ ಹೆಲ್ತ್‌ ಟೆಸ್ಟ್‌ ಕಡ್ಡಾಯವಾಗಿ ಮಾಡಲಾಗುವುದು. - ಬಿ.ಶರತ್‌, ಜಿಲ್ಲಾಧಿಕಾರಿ ಖಾದಿ ಗ್ರಾಮೋದ್ಯೋಗ, ಉಪ ಸಮಿತಿ, ಡಿಡಿಪಿಐ, ಮೈಸೂರು ವಿವಿ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯವರಿಗೆ ಸ್ತಬ್ಧಚಿತ್ರದ ಪರಿಕಲ್ಪನೆ ಕಳುಹಿಸಲಾಗಿದೆ. ಆಯಾ ಇಲಾಖೆಯವರು ಕಲಾವಿದರ ಕೈಯಲ್ಲಿಸ್ತಬ್ಧಚಿತ್ರ ತಯಾರಿಸುತ್ತಾರೆ. - ಡಿ.ಕೆ.ಲಿಂಗರಾಜು, ಜಂಟಿ ನಿರ್ದೇಶಕರು, ಕೈಗಾರಿಕೆ ಮತ್ತು ವಾಣಿಜ್ಯ ಇಲಾಖೆ
from India & World News in Kannada | VK Polls https://ift.tt/3igZxpa
