ಮುಚ್ಚಿದ್ದ ಸರಕಾರಿ ಶಾಲೆ ರಿಓಪನ್‌: 80ಕ್ಕೂ ಅಧಿಕ ಶಾಲೆಗಳ ಆರಂಭಕ್ಕೆ ಪೋಷಕರ ಒತ್ತಾಯ, ಅಧಿಕಾರಿಗಳಿಗೆ ಪತ್ರ!

ನಾಗರಾಜ್‌ ನವೀಮನೆ ಮೈಸೂರು ಬೆಂಗಳೂರು: ರಾಜ್ಯದ ಹಲವೆಡೆ ವಿದ್ಯಾರ್ಥಿಗಳಿಲ್ಲ ಎಂದು ಮುಚ್ಚಿದ್ದ ಸರಕಾರಿ ಶಾಲೆಗಳನ್ನು ಜನರೇ ಮುಂದೆ ನಿಂತು ತೆರೆಯುತ್ತಿದ್ದಾರೆ. ಸುಮಾರು 80ರಷ್ಟು ಶಾಲೆಗಳ ಮರು ಆರಂಭಕ್ಕೆ ಪೋಷಕರೇ ಜಿಲ್ಲಾ ವಿದ್ಯಾಂಗ ಉಪನಿರ್ದೇಶಕರಿಗೆ ಪತ್ರ ಬರೆದಿದ್ದು, ಶಿಕ್ಷಣ ಇಲಾಖೆಯೂ ಈ ನಿಟ್ಟಿನಲ್ಲಿ ಭರವಸೆಯನ್ನು ನೀಡಿದೆ. ಕೆಲವು ಕಡೆ ಆಗಲೇ ಶಾಲೆಗಳ ಮರು ಆರಂಭಕ್ಕೆ ಆದೇಶವೇ ಹೊರಬಿದ್ದಿದೆ. ಮೈಸೂರು ಭಾಗದಲ್ಲಿ ಅತಿ ಹೆಚ್ಚು ಶಾಲೆಗಳ ಮರು ಆರಂಭಕ್ಕೆ ಬೇಡಿಕೆ ಬಂದಿದೆ. ಹಾಸನ ಒಂದರಲ್ಲೇ 24 ಶಾಲೆಗಳು ಮತ್ತೆ ತೆರೆದುಕೊಳ್ಳಲಿವೆ. ಖಾಸಗಿ ಶಿಕ್ಷಣ ಸಂಸ್ಥೆಗಳ ಆರಂಭ, ಆಂಗ್ಲಮಾಧ್ಯಮ ಶಿಕ್ಷಣದ ಬಯಕೆಯಿಂದಾಗಿ ಕಳೆದ ಕೆಲವು ವರ್ಷಗಳಲ್ಲಿ ಹಲವಾರು ಸರಕಾರಿ ಶಾಲೆಗಳು ವಿದ್ಯಾರ್ಥಿಗಳಿಲ್ಲದೆ ಮುಚ್ಚಿದ್ದವು. ಇದೀಗ ಸರಕಾರಿ ಶಾಲೆಗಳಲ್ಲಿ ಸಿಗುತ್ತಿರುವ ಸವಲತ್ತುಗಳು, ಕೊರೊನಾದಿಂದಾಗಿ ಹದಗೆಟ್ಟಿರುವ ಆರ್ಥಿಕ ಸ್ಥಿತಿಯಿಂದಾಗಿ ಮತ್ತೆ ಸರಕಾರಿ ಶಾಲೆಗಳ ಆಕರ್ಷಣೆ ಹೆಚ್ಚಿದೆ. ಹೀಗಾಗಿ ಮುಚ್ಚಿದ ಶಾಲೆಗಳಿಗೂ ಬೇಡಿಕೆ ಬಂದಿದೆ. ಪೋಷಕರು ಮರು ತೆರೆಯುವಂತೆ ಡಿಡಿಪಿಐಗಳಿಗೆ ಮನವಿ ಸಲ್ಲಿಸುತ್ತಿದ್ದು, ನಿರ್ದಿಷ್ಟ ಪ್ರಕರಣಗಳನ್ನು ಪರಿಗಣಿಸಿ ಅಧಿಕಾರಿಗಳು ನಿರ್ಧಾರ ಕೈಗೊಳ್ಳುತ್ತಿರುವುದು ಕಂಡುಬಂದಿದೆ. 10 ಮಕ್ಕಳ ದಾಖಲಾತಿ ಇದ್ದರೆ ಶಾಲೆಯನ್ನು ಮರು ತೆರೆಯಲು ಅವಕಾಶವಿದೆ. ಟಿಸಿ ಕೊಡಲು ಶಾಲೆಗಳ ಹಿಂದೇಟು ಕೋಲಾರ ಜಿಲ್ಲೆಯಲ್ಲಿನ ಕೆಲವೊಂದು ಶಾಲೆಗಳು ಶುಲ್ಕ ಪಾವತಿಸುವಂತೆ ಪೋಷಕರ ಬೆನ್ನುಬಿದ್ದಿದ್ದಾರೆ. ಇದರಿಂದ ಬೇಸತ್ತಿರುವ ಪೋಷಕರು ಮಕ್ಕಳನ್ನು ಸರಕಾರಿ ಶಾಲೆಗೆ ಸೇರಿಸಲು ಮುಂದಾಗಿದ್ದಾರೆ. ಆದರೆ, ಖಾಸಗಿ ಶಾಲೆಗಳು ಮಕ್ಕಳ ವರ್ಗಾವಣೆ ಪ್ರಮಾಣ ಪತ್ರ ನೀಡದೆ ಸತಾಯಿಸುತ್ತಿರುವುದು ಕಂಡುಬಂದಿದೆ. ದಾಖಲಾತಿ ಮಾಡಿಕೊಳ್ಳಲು ಆನ್‌ಲೈನ್‌ನಲ್ಲಿ ಟಿಸಿ ಮಾಹಿತಿ ನಮೂದಿಸಬೇಕಾಗಿರುವ ಹಿನ್ನೆಲೆಯಲ್ಲಿ ಸಮಸ್ಯೆಯಾಗುತ್ತಿದೆ. ಖಾಸಗಿ ಶಾಲೆಗಳು ಟಿಸಿ ನೀಡದಂತಹ ಸಂದರ್ಭದಲ್ಲಿ ಬಿಇಒ ಅವರು ಅನುಮತಿ ನೀಡಲು ಸರಕಾರ ಅವಕಾಶ ಕಲ್ಪಿಸಲು ಚಿಂತನೆ ನಡೆಸುತ್ತಿದೆ ಎಂದು ಡಿಡಿಪಿಐ ಜಯರಾಮರೆಡ್ಡಿ ತಿಳಿಸಿದ್ದಾರೆ. ಜನರೇ ಮುಂದೆ ನಿಂತು ತೆರೆದರು ಎಚ್‌.ಡಿ.ಕೋಟೆಯ ನಿಂಗೇನಹಳ್ಳಿಯ ಪೋಷಕರೇ ನನ್ನ ಬಳಿ ಬಂದು ಮುಚ್ಚಿರುವ ಸರಕಾರಿ ಶಾಲೆಯನ್ನು ತೆರೆಯುವಂತೆ ಮನವಿ ಮಾಡಿದರು. ನಂತರ ಶಿಕ್ಷಣಾಧಿಕಾರಿಗಳೊಂದಿಗೆ ಸಭೆ ನಡೆಸಿ ಶಾಲೆಯನ್ನು ಪುನಃ ತೆರೆಯಲಾಯಿತು. ಪೋಷಕರೇ ಇಡೀ ಶಾಲೆ ಆವರಣವನ್ನು ಗುಡಿಸಿ ಸ್ವಚ್ಛಗೊಳಿಸಿದರು. ಅದೇ ರೀತಿ ತಾಳೆಗೌಡನಹುಂಡಿ, ತಾರಕದಲ್ಲೂಕಳೆದ ಎರಡು ವರ್ಷದಿಂದ ಮುಚ್ಚಿದ್ದ ಎರಡು ಶಾಲೆಗಳನ್ನು ತೆರೆಯಲಾಗಿದೆ ಎಂದು ಎಚ್‌.ಡಿ. ಕೋಟೆ ಬಿಇಒ ರೇವಣ್ಣ 'ವಿಜಯ ಕರ್ನಾಟಕ'ಕ್ಕೆ ತಿಳಿಸಿದರು. ಮರು ಆಸಕ್ತಿಗೆ ಕಾರಣವೇನು?

• ಕೊರೊನಾದಿಂದ ಉಂಟಾಗಿರುವ ಆರ್ಥಿಕ ಸಂಕಷ್ಟ.
• ಸರಕಾರಿ ಶಾಲೆಗಳಲ್ಲಿಆಂಗ್ಲಮಾಧ್ಯಮ ಆರಂಭ
• ಶುಲ್ಕ, ಪುಸ್ತಕ, ಊಟದ ಚಿಂತೆ ಇರುವುದಿಲ್ಲ.
• ಆನ್‌ಲೈನ್‌ ತರಗತಿ ಮೇಲೆ ನಂಬಿಕೆ ಕಡಿಮೆ
• ವಿದ್ಯಾಗಮ ಯೋಜನೆ ಸಮರ್ಪಕ ಅನುಷ್ಠಾನ.
• ಉತ್ತಮ ಫಲಿತಾಂಶ ಮತ್ತು ನುರಿತ ಬೋಧಕ ವರ್ಗ
• ಪಂಚಾಯಿತಿ ಮತ್ತು ಊರಿನವರ ಪ್ರಯತ್ನ

ಯಾವ ಜಿಲ್ಲೆಯಲ್ಲಿ ಎಷ್ಟು ಶಾಲೆ?

• ಶೈಕ್ಷಣಿಕ ಜಿಲ್ಲೆ ಶಾಲೆ
• ಹಾಸನ 24
• ಮಂಡ್ಯ 10
• ತುಮಕೂರು 6
• ಕೊಡಗು 5
• ಮೈಸೂರು 4
• ವಿಜಯಪುರ 3
• ಶಿರಸಿ 3
• ಚಾಮರಾಜನಗರ 2
• ದಕ್ಷಿಣ ಕನ್ನಡ 1
• ಮಧುಗಿರಿ 1
• ಚಿಕ್ಕಬಳ್ಳಾಪುರ 1

ಬಹುತೇಕರು ಖಾಸಗಿ ಶಾಲೆಗಳಿಂದ ಪುನಃ ಸರಕಾರಿ ಶಾಲೆಗೆ ಬಂದಿದ್ದಾರೆ. 'ವಿದ್ಯಾಗಮ' ಯೋಜನೆ ನಮ್ಮನ್ನು ಮತ್ತೊಮ್ಮೆ ಕೈಹಿಡಿದಿದೆ. ಕನಿಷ್ಠ 10 ಮಕ್ಕಳಿದ್ದರೆ ತೆರೆಯಲು ಅವಕಾಶವಿದೆ. ಹಾಗಾಗಿ ಈ ವರ್ಷ ಮೈಸೂರು ಜಿಲ್ಲೆಯಲ್ಲಿ ಮುಚ್ಚಿದ್ದ 4 ಸರಕಾರಿ ಶಾಲೆಯನ್ನು ಪುನಃ ತೆರೆಯಲಾಗಿದೆ. ಡಾ.ಪಾಂಡುರಂಗ, ಡಿಡಿಪಿಐ ಮೈಸೂರು ಮಡಿಕೇರಿ ತಾಲೂಕಿನ ಮದನಾಡು, ಸೋಮವಾರ ಪೇಟೆ ತಾಲೂಕಿನ ಎರಡು ಸರಕಾರಿ ಶಾಲೆ ಸೇರಿ ಒಟ್ಟು 5 ಶಾಲೆ ತೆರೆಯಲು ಪ್ರಸ್ತಾವನೆ ಸಿದ್ಧಪಡಿಸಲಾಗಿದೆ. ದಾಖಲಾತಿ ಮುಗಿದಿದ್ದು, ಈ ವರ್ಷದಿಂದ ಮತ್ತೆ ಬಾಗಿಲು ತೆರೆದು ಮಕ್ಕಳಿಗೆ ಕಲಿಕೆ ಶುರು ಮಾಡಲಾಗುವುದು. ಪಿ.ಎಸ್‌.ಮಚ್ಚಾಡೋ, ಡಿಡಿಪಿಐ ಕೊಡಗು. ಖಾಸಗಿಯಿಂದ ಸರಕಾರಿಗೆ ರಾಜ್ಯಾದ್ಯಂತ ಖಾಸಗಿ ಶಾಲೆಗಳಿಂದ ಸರಕಾರಿ ಶಾಲೆಗೆ ಶಿಫ್ಟ್‌ ಆಗುವ ಪ್ರಕ್ರಿಯೆಯೂ ಬಿರುಸು ಪಡೆದಿದೆ. ಇದುವರೆಗೆ ಸುಮಾರು 5000ಕ್ಕೂ ಅಧಿಕ ಮಕ್ಕಳು ದಾಖಲಾತಿ ಮಾಡಿಕೊಂಡಿದ್ದಾರೆ. ಹಾವೇರಿ(4424), ಗದಗ(4000), ವಿಜಯಪುರ(4000), ಬಾಗಲಕೋಟೆ(3800), ಚಿಕ್ಕೋಡಿ(3500), ತುಮಕೂರು (3455) ಗರಿಷ್ಠ ಮಕ್ಕಳು ಸೇರ್ಪಡೆಗೊಂಡಿದ್ದಾರೆ. ಬಹುತೇಕ ಎಲ್ಲ ಜಿಲ್ಲೆಗಳಲ್ಲಿ ಈ ಪ್ರಕ್ರಿಯೆ ನಡೆಯುತ್ತಿದೆ.

from India & World News in Kannada | VK Polls https://ift.tt/34bf8ld