ಮುಹಮ್ಮದ್‌ ಆರಿಫ್‌ ಮಂಗಳೂರು ಮಂಗಳೂರು: ಬಹುತೇಕ ಜಿಲ್ಲೆಗಳಲ್ಲಿ ಎಚ್‌ಐವಿ , ಚಿಕಿತ್ಸೆ ಶೂನ್ಯ ಪ್ರಗತಿ ಸಾಧಿಸಿರುವ ಹಿನ್ನೆಲೆಯಲ್ಲಿ ಕರ್ನಾಟಕ ರಾಜ್ಯ ಏಡ್ಸ್‌ ಪ್ರಿವೆನ್ಶನ್‌ ಸೊಸೈಟಿ ಹಾಗೂ ಹಿರಿಯ ಅಧಿಕಾರಿಗಳಿಂದ ವರ್ಷಾತ್ಯದೊಳಗೆ ಗುರಿ ಸಾಧಿಸಲು ಕ್ರಮ ಕೈಗೊಳ್ಳುವಂತೆ ಸೂಚನೆ ನೀಡಲಾಗಿದೆ. ರಾಜ್ಯಮಟ್ಟದಿಂದ ಆಯಾ ಅಧಿಕಾರಿಗಳು ಏಡ್ಸ್‌, ಕ್ಷಯ, ಮಲೇರಿಯಾ ನಿಯಂತ್ರಣ ಇತ್ಯಾದಿ ಕೆಲಸ ಮಾಡಲು ಹೇಳುತ್ತಿದ್ದರೆ, ಡಿಸಿ, ಡಿಎಚ್‌ಒಗಳು ಕೋವಿಡ್‌ ನಿರ್ವಹಣೆಗೆ ಪ್ರಥಮ ಆದ್ಯತೆ ನೀಡಲು ತಾಕೀತು ಮಾಡುತ್ತಿದ್ದಾರೆ. ಇದರಿಂದ ಜಿಲ್ಲಾಮಟ್ಟದ ಅಧಿಕಾರಿಗಳು ಅಡಕತ್ತರಿಯಲ್ಲಿ ಸಿಲುಕಿದ್ದಾರೆ. ದಕ್ಷಿಣ ಕನ್ನಡ ಜಿಲ್ಲೆಯ 19 ಐಸಿಟಿಸಿ ಕೇಂದ್ರಗಳಲ್ಲಿ ಹಿಂದೆ ಪ್ರತೀ ತಿಂಗಳು ಐದು ಸಾವಿರ ಮಂದಿಯ ತಪಾಸಣೆಯಲ್ಲಿ 100ರಷ್ಟು ಪಾಸಿಟಿವ್‌ ಪ್ರಕರಣ ಪತ್ತೆಯಾಗುತ್ತಿತ್ತು. ವೆನ್ಲಾಕ್‌ ಆಸ್ಪತ್ರೆಯಲ್ಲಿ 500 ತಪಾಸಣೆಯಲ್ಲಿ 50ರಷ್ಟು ಪಾಸಿಟಿವ್‌ ಕೇಸು ಬರುತ್ತಿತ್ತು. ನಂತರ ಪಾಸಿಟಿವ್‌ ಸಂಖ್ಯೆ ಕಡಿಮೆಯಾಗಿತ್ತು. ಜಿಲ್ಲೆಯಲ್ಲಿ 2016ರಲ್ಲಿ45,040 ತಪಾಸಣೆಯಲ್ಲಿ 629 ಮಂದಿ ಪಾಸಿಟವ್‌ ಆಗಿದ್ದರು. 2017ರಲ್ಲಿ56,029ರಲ್ಲಿ595 ಪಾಸಿಟಿವ್‌, 2018ರಲ್ಲಿ65,632ರಲ್ಲಿ530 ಪಾಸಿಟಿವ್‌, 2019ರಲ್ಲಿ56,110ರಲ್ಲಿ422 ಪಾಸಿಟಿವ್‌ ಆಗಿತ್ತು. ಈ ವರ್ಷ ಏಳು ತಿಂಗಳಲ್ಲಿ8,937 ಮಂದಿಯ ತಪಾಸಣೆ ನಡೆಸಿದ್ದು, 76 ಮಾತ್ರ ಪಾಸಿಟಿವ್‌ ಬಂದಿದೆ. ಮಂಗಳೂರಿನ ವೆನ್ಲಾಕ್‌ ಆಸ್ಪತ್ರೆಯಲ್ಲಿ ಪಾಸಿಟಿವ್‌ ದೃಢಪಟ್ಟು ಚಿಕಿತ್ಸೆಗೆ ನೋಂದಣಿ ಮಾಡುವವರ ಸಂಖ್ಯೆ ಮಾಸಿಕ ಸರಾಸರಿ 25 ಇರುತ್ತಿತ್ತು. ಜನವರಿ-29, ಫೆಬ್ರವರಿ-23, ಮಾರ್ಚ್-15, ಏಪ್ರಿಲ್‌-7, ಮೇ- 6, ಜೂನ್‌- 16, ಜುಲೈ-12, ಆಗಸ್ಟ್‌- 12, ಸೆಪ್ಟೆಂಬರ್‌-15 ಹೀಗೆ ಇಳಿಮುಖವಾಗಿದೆ. ಮಾರ್ಚ್ ನಿಂದ ಎಚ್‌ಐವಿ ವಿಭಾಗದ ಎಲ್ಲ ಸಿಬ್ಬಂದಿಯನ್ನು ಕೋವಿಡ್‌ ತಪಾಸಣೆ ವಿಭಾಗಕ್ಕೆ ನಿಯೋಜಿಸಲಾಗಿದೆ. ಆರಂಭದಲ್ಲಿ ಐಸಿಟಿಸಿ ಕೇಂದ್ರ ಮುಚ್ಚಲಾಗಿತ್ತು. ಮುಂದೆ ಅರ್ಧ ದಿನ ಇತ್ತು. ನಂತರ ರೋಗಿಗಳ ದಾಖಲಾತಿ ನಿಲ್ಲಿಸಲಾಗಿದೆ. ಕೆಲವರು ಲಾಕ್‌ಡೌನ್‌ ಬಳಿಕ ಊರಿಗೆ ಮರಳಿದ್ದಾರೆ. ಕೆಲವರು ಮಾತ್ರೆ ತೆಗೆಯುವುದನ್ನೇ ಬಿಟ್ಟಿದ್ದಾರೆ. ಆಸ್ಪತ್ರೆಗೆ ಬರಲು ಹೆದರುತ್ತಿದ್ದಾರೆ. ಪತ್ತೆ ವಿಳಂಬ ಮಾರಣಾಂತಿಕ ಎಚ್‌ಐವಿ ತಪಾಸಣೆ ವಿಭಾಗದ ಸಿಬ್ಬಂದಿಯನ್ನು ಕೋವಿಡ್‌ ವಿಭಾಗಕ್ಕೆ ನಿಯೋಜಿಸಿದ್ದರಿಂದ ಮತ್ತು ಜನರು ಕೋವಿಡ್‌ಗೆ ಹೆದರಿ ಆಸ್ಪತ್ರೆಗೆ ಬಾರದ ಹಿನ್ನೆಲೆಯಲ್ಲಿಎಚ್‌ಐವಿ ತಪಾಸಣೆ ಕುಂಠಿತಗೊಂಡಿದೆ. ಇದು ಮಾರಣಾಂತಿಕ ಎನ್ನುತ್ತಾರೆ ತಪಾಸಣೆ ವಿಭಾಗದ ಅಧಿಕಾರಿಗಳು. ಎಚ್‌ಐವಿ/ಏಡ್ಸ್‌ ಸೋಂಕು ಪ್ರಥಮ ಹಂತದಲ್ಲಿ ಪತ್ತೆಯಾದರೆ, ಆಹಾರ ಪದ್ಧತಿ ಮತ್ತು ಜೀವನಶೈಲಿ ಬದಲಾವಣೆಯಿಂದ ಹೆಚ್ಚು ಕಾಲ ಬದುಕಬಹುದು. ಪತ್ತೆಯೇ ವಿಳಂಬವಾದರೆ ಬದುಕಿಸುವುದು ಕಷ್ಟ ಎಂದು ಅಧಿಕಾರಿಗಳು ಹೇಳುತ್ತಿದ್ದಾರೆ.
from India & World News in Kannada | VK Polls https://ift.tt/3jiPYY5
