ಬೆಂಗಳೂರು: ಕ್ಷಯರೋಗ ಇರುವವರಲ್ಲಿ ಕೋವಿಡ್‌ ಹೆಚ್ಚು ಅಪಾಯ ಉಂಟು ಮಾಡುತ್ತಿದೆ ಎಂಬುದು ಅಧ್ಯಯನಗಳಿಂದ ಗೊತ್ತಾಗಿದೆ. ಕ್ಷಯರೋಗವನ್ನು ಗಂಭೀರವಾಗಿ ಪರಿಗಣಿಸದೆ ಇದ್ದರೆ ಕೋವಿಡ್‌ ಸೋಂಕಿತರಿಗೆ ಲಕ್ಷಣಗಳು ವೇಗವಾಗಿ ಹೆಚ್ಚಾಗುವ ಮೂಲಕ ಅವರ ಆರೋಗ್ಯ ಕ್ಷೀಣಿಸುತ್ತದೆ. ಕ್ಷಯರೋಗ ಇರುವವರಲ್ಲಿ ಅದಾದಲೇ ಬೇರೆ ಕಾಯಿಲೆಗಳು ಇರಬಹುದು. ಕೆಲವೊಮ್ಮೆ ಅಪೌಷ್ಟಿಕತೆ, ಮಧುಮೇಹ, ಎಚ್‌ಐವಿ ಮುಂತಾದ ಕಾಯಿಲೆಗಳ ಜೊತೆ ಕ್ಷಯರೋಗ ಇರುವವರು ಜೀವಿಸುತ್ತಿರುತ್ತಾರೆ. ಕೋವಿಡ್‌ ಸೋಂಕಿತರಲ್ಲಿ ಕ್ಷಯರೋಗ ಇದ್ದರೆ ಅಪಾಯದ ಪ್ರಮಾಣ ದುಪ್ಪಟ್ಟಾಗುತ್ತದೆ. ಇಂಥ ಅಪಾಯ ನಿಯಂತ್ರಣಕ್ಕೆ ತಪಾಸಣೆ ಮತ್ತು ಪರೀಕ್ಷೆ ಮಾಡಬೇಕು ಎಂದು ಆರೋಗ್ಯ ಇಲಾಖೆ ನಿರ್ದೇಶನ ನೀಡಿದೆ. ಅದೇ ರೀತಿ ಈಗಾಗಲೇ ದೃಢಪಟ್ಟಿದ್ದರೆ ಅಂತಹವರಿಗೆ ಲಕ್ಷಣಗಳ ಆಧಾರದ ಮೇಲೆ ಕೋವಿಡ್‌ ತಪಾಸಣೆಯನ್ನು ಮಾಡಬೇಕು ಎಂದು ನಿರ್ದೇಶನ ನೀಡಲಾಗಿದೆ. ಕ್ಷಯ ರೋಗ ಇದ್ದರೆ ಕೋವಿಡ್‌ ಪರೀಕ್ಷೆ ಕ್ಷಯ ರೋಗ ಇರುವವರು ಕೋವಿಡ್‌ ಪರೀಕ್ಷೆಗೆ ಒಳಪಡಬೇಕು. ಕೋವಿಡ್‌ ಪಾಸಿಟಿವ್‌ ಬಂದರೆ ಕೋವಿಡ್‌ ಜೊತೆಗೆ ಕ್ಷಯರೋಗದ ಚಿಕಿತ್ಸೆ ಎಂದಿನಂತೆ ಮುಂದುವರೆಸಬೇಕು. ತಪಾಸಣೆ ಯಾವಾಗ?ಪ್ರಮುಖವಾಗಿ ನಾಲ್ಕು ಲಕ್ಷಣಗಳ ಆಧಾರದ ಮೇಲೆ ಕೋವಿಡ್‌ ಸೋಂಕಿತರಿಗೆ ಕ್ಷಯರೋಗ ತಪಾಸಣೆ ಮಾಡಬೇಕು. ಎರಡು ವಾರಗಳವರೆಗೆ ಕೆಮ್ಮು, 2 ವಾರಗಳವರೆಗೆ ನಿರಂತರ ಜ್ವರ, 2 ವಾರಗಳಲ್ಲಿ ಅಸಹಜ ಎನಿಸುವಷ್ಟು ತೂಕ ಕಡಿಮೆಯಾಗುವುದು ಮತ್ತು ರಾತ್ರಿ ವೇಳೆ ಬೆವರುತ್ತಿದ್ದರೆ ಕ್ಷಯರೋಗ ತಪಾಸಣೆ ಮತ್ತು ಪರೀಕ್ಷೆ ಮಾಡಬೇಕು. ಕ್ಷಯರೋಗ ಇರುವವರ ಸಂಪರ್ಕಕ್ಕೆ ಬಂದಿದ್ದರೆ ಮತ್ತು ಈ ಮೊದಲು ಕ್ಷಯರೋಗ ಇದ್ದು, ಗುಣಮುಖರಾಗಿ ಮತ್ತೆ ಲಕ್ಷಣ ಕಾಣಿಸಿದರೆ ತಪಾಸಣೆ ಮಾಡಿಸಬೇಕು. ಜ್ವರ, ಒಣಕೆಮ್ಮು, ತಲೆನೋವು, ಮೈ-ಕೈ ನೋವು, ಉಸಿರಾಟಕ್ಕೆ ತೊಂದರೆ ಲಕ್ಷಣಗಳು ಇರುವ 'ಸಾರಿ' ಆರೋಗ್ಯ ಸಮಸ್ಯೆಯು 10 ದಿನಗಳಿಗೂ ಹೆಚ್ಚು ಕಾಲ ಮುಂದುವರೆದರೆ ತಪಾಸಣೆ ಮಾಡಬೇಕು. ಗಂಟಲು ನೋವು, ಕೆಮ್ಮು, ಸುಸ್ತು, ತಲೆನೋವು, ಚಳಿ, ಜ್ವರ ಸೇರಿದಂತೆ ಕೋವಿಡ್‌ನಂತೆಯೆ ಲಕ್ಷಣಗಳು ಇರುವ 'ಐಎಲ್‌ಐ' ಆರೋಗ್ಯ ಸಮಸ್ಯೆಯ ಲಕ್ಷಣಗಳು 10 ದಿನಗಳಿಗೂ ಹೆಚ್ಚು ಕಾಲ ಇದ್ದರೆ ಕ್ಷಯರೋಗ ತಪಾಸಣೆ ಮಾಡಬೇಕು.
from India & World News in Kannada | VK Polls https://ift.tt/3jdxRmI
