ಹೊಸದಿಲ್ಲಿ: ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ಹಾಗೂ ನಡುವಿನ ರೋಚಕ ಪಂದ್ಯ ಕೊನೆಯ ಹಂತದ ಒಂದೊಂದು ಎಸೆತದಲ್ಲೂ ತೀವ್ರ ಕುತೂಹಲ ಕೆರಳಿಸಿತ್ತು. ಆದರೆ, ಅಂತಿಮವಾಗಿ ಸೂಪರ್ ಓವರ್‌ನಲ್ಲಿ ಆರ್‌ಸಿಬಿ ಜಯ ದಾಖಲಿಸಿತು. ಆದರೆ, ನಿಯಮಿತ ಓವರ್‌ಗಳಲ್ಲಿ ಅತ್ಯದ್ಭುತ ಬ್ಯಾಟಿಂಗ್ ಮಾಡಿದ್ದ ಅವರನ್ನು ಸೂಪರ್ ಓವರ್‌ನಲ್ಲಿ ಏಕೆ ಆಡಿಸಲಿಲ್ಲ ಎಂದು ಮುಂಬೈ ಇಂಡಿಯನ್ಸ್ ನಾಯಕ ಬಹಿರಂಗ ಪಡಿಸಿದ್ದಾರೆ. ನಿಯಮಿತ ಓವರ್‌ಗಳಲ್ಲಿ ಮುಂಬೈ ಇಂಡಿಯನ್ಸ್‌ಗೆ ಕೊನೆಯ 4 ಎಸೆತಗಳಲ್ಲಿ 17 ರನ್‌ಗಳ ಅಗತ್ಯವಿತ್ತು. ಈ ವೇಳೆ ಇಶಾನ್‌ ಕಿಶಾನ್‌ ಸತತ ಎರಡು ಸಿಕ್ಸರ್‌ಗಳನ್ನು ಸಿಡಿಸುವ ಮೂಲಕ ಕೊನೆಯ ಎರಡು ಎಸೆತಗಳಲ್ಲಿ 5 ರನ್‌ಗಳಿಗೆ ತಂದಿಟ್ಟರು. ನಂತರ ಅವರು ವಿಕೆಟ್‌ ಒಪ್ಪಿಸಿದರು. ಕೊನೆಯ ಎಸೆತದಲ್ಲಿ ಕೀರನ್ ಪೊಲಾರ್ಡ್ ಬೌಂಡರಿ ಸಿಡಿಸುವ ಮೂಲಕ ಪಂದ್ಯ ಟೈ ಆಯಿತು. ಆ ಮೂಲಕ ಪಂದ್ಯದ ಫಲಿತಾಂಶ ನಿರ್ಧರಿಸಲು ಸೂಪರ್ ಓವರ್‌ ಮೊರೆ ಹೋಗಬೇಕಾಯಿತು. ಸೂಪರ್ ಓವರ್‌ನಲ್ಲಿ ಕೀರನ್ ಪೊಲಾರ್ಡ್ ಜತೆಗೆ ಇಶಾನ್‌ ಕಿಶಾನ್‌ ಕ್ರೀಸ್‌ಗೆ ಬರಬಹುದು ಎಂದು ಎಲ್ಲರೂ ನಿರೀಕ್ಷಿಸಿದ್ದರು. ಆದರೆ, ನಾಯಕ ರೋಹಿತ್‌ ಶರ್ಮಾ ಹಾರ್ದಿಕ್‌ ಪಾಂಡ್ಯ ಅವರನ್ನು ಕಳುಹಿಸಿ ಅಚ್ಚರಿ ಮೂಡಿಸಿದರು. ನವದೀಪ್‌ ಸೈನಿ ಅದ್ಭುತವಾಗಿ ಬೌಲಿಂಗ್‌ ಮಾಡಿ ಕೇವಲ 7 ರನ್‌ ನೀಡಿದರು. ಪೊಲಾರ್ಡ್ ಔಟ್‌ ಆದ ಬಳಿಕ ಹಾರ್ದಿಕ್‌ ಪಾಂಡ್ಯ ದೊಡ್ಡ ಹೊಡೆತಗಳನ್ನು ಹೊಡೆಯುವಲ್ಲಿ ವಿಫಲರಾದರು. ಅದ್ಭುತ ಪ್ರತಿಭಾನ್ವಿತ ಎಡಗೈ ಬ್ಯಾಟ್ಸ್‌ಮನ್ ಇಶಾನ್‌ ಕಿಶಾನ್‌ ಟೈ ಆದ ಬಳಿಕ ಸಂಪೂರ್ಣವಾಗಿ ಬರಿದಾಗಿದ್ದರು ಮತ್ತು ಸೂಪರ್ ಓವರ್‌ನಲ್ಲಿ ಬ್ಯಾಟಿಂಗ್ ಮಾಡದೇ ಇರಲು ಇದು ನಿಜವಾದ ಕಾರಣವಾಗಿದೆ ಎಂದು ರೋಹಿತ್‌ ಶರ್ಮಾ ತಿಳಿಸಿದ್ದಾರೆ. "ಇಶಾನ್‌ ಕಿಶಾನ್‌ ಪಂದ್ಯ ಟೈ ಆದ ಬಳಿಕ ಬರಿದಾಗಿದ್ದರು ಹಾಗೂ ಅವರು ಆರಾಮದಾಯಕವಾಗಿ ಕಾಣಿಸಲಿಲ್ಲ. ನಾವು ಅವರನ್ನೇ ಕಳುಹಿಸಬೇಕೆಂದು ಅಂದು ಕೊಂಡಿದ್ದೆವು. ಆದರೆ, ಅವರು ಫ್ರೆಶ್‌ ಆಗಿ ಕಾಣಿಸಿಕೊಂಡಿಲ್ಲ. ಆದರೆ, ದೊಡ್ಡ ಹೊಡೆತಗಳನ್ನು ಹೊಡೆಯುವಲ್ಲಿ ಹಾರ್ದಿಕ್‌ ಪಾಂಡ್ಯಗೆ ಎತ್ತಿದ ಕೈ ಹಾಗಾಗಿ, ಅವರನ್ನು ಸೂಪರ್ ಓವರ್‌ನಲ್ಲಿ ಕಳುಹಿಸಿದೆವು. ನಾವು 7 ರನ್‌ಗಳನ್ನು ಗಳಿಸಿದ್ದರೂ, ನಾವು ಒಂದು ಅನಿರೀಕ್ಷಿತ ಬೌಂಡರಿ ನೀಡಿದ್ದರಿಂದ ಪಂದ್ಯ ಸೋಲಬೇಕಾಯಿತು. ನಿಯಮಿತ ಓವರ್‌ಗಳಲ್ಲಿ ನಾವು ಮಾಡಿದ್ದ ಕಮ್‌ಬ್ಯಾಕ್‌ ಅದ್ಭುತವಾಗಿತ್ತು," ಎಂದು ರೋಹಿತ್‌ ಶರ್ಮಾ ತಿಳಿಸಿದರು. ಆರ್‌ಸಿಬಿ ನೀಡಿದ್ದ 202 ರನ್‌ಗಳನ್ನು ಗುರಿ ಹಿಂಬಾಲಿಸುತ್ತೇವೆ ಎಂಬುದನ್ನು ನಾನು ನಿರೀಕ್ಷೆ ಮಾಡಿರಲಿಲ್ಲ ಎಂದು ಹೇಳಿದ ರೋಹಿತ್‌ ಶರ್ಮಾ, ಕೀರನ್ ಪೊಲಾರ್ಡ್ ಹಾಗೂ ಇಶಾನ್‌ ಕಿಶಾನ್‌ ಗುರಿ ಸಮೀಪ ತಲುಪಿಸಿದರು ಎಂದು ಹೇಳಿದರು. ಕೊನೆಯ 5 ಓವರ್‌ಗಳಲ್ಲಿ ಮುಂಬೈ ಇಂಡಿಯನ್ಸ್‌ಗೆ 90 ರನ್‌ಗಳ ಅಗತ್ಯವಿತ್ತು. ಆದರೆ, 17ನೇ ಓವರ್‌ನಲ್ಲಿ ಪಂದ್ಯಕ್ಕೆ ತಿರುವು ಸಿಕ್ಕಿತು. ಕೀರನ್ ಪೊಲಾರ್ಡ್, ಆಡಮ್‌ ಝಂಪಾ ಓವರ್‌ನಲ್ಲಿ ಸತತ ಸಿಕ್ಸರ್‌ಗಳನ್ನು ಸಿಡಿಸುವ ಮೂಲಕ 27 ರನ್‌ಗಳನ್ನು ಕಲೆಹಾಕಿದರು. ನಂತರದ ಓವರ್‌ನಲ್ಲಿ ಯಜ್ವೇಂದ್ರ ಚಹಲ್‌ಗೆ ಇನ್ನೂ ಮೂರು ಸಿಕ್ಸರ್‌ಗಳನ್ನು ಸಿಡಿಸಿದರು. ನಂತರ ಕೊನೆಯ ಎರಡು ಓವರ್‌ಗಳಲ್ಲಿ 31 ರನ್‌ಗಳ ಅಗತ್ಯವಿತ್ತು. 19ನೇ ಓವರ್‌ನಲ್ಲಿ ನವದೀಪ್‌ ಸೈನಿ ಚಾಣಾಕ್ಷತನದಿಂದ ಬೌಲಿಂಗ್‌ ಮಾಡಿದ್ದರು. ಅವರು ಕೇವಲ 12 ರನ್‌ಗಳನ್ನು ನೀಡಿದ್ದರು. ಆದರೆ, ಕೊನೆಯ ಓವರ್‌ನಲ್ಲಿ ಇಶಾನ್‌ ಕಿಶಾನ್‌, ಇಸುರು ಉದಾನ ಅವರಿಗೆ ಸತತ ಎರಡು ಸಿಕ್ಸರ್‌ಗಳನ್ನು ಸಿಡಿಸಿದರು. ನಂತರ ಮುಂಬೈಗೆ ಕೊನೆಯ ಎರಡು ಎಸೆತಗಳಲ್ಲಿ 5 ರನ್‌ಗಳ ಅಗತ್ಯವಿದ್ದಾಗ ಇಶಾನ್‌ ಕಿಶಾನ್‌ ಕ್ಯಾಚ್‌ ನೀಡಿದರು. ಕೊನೆಯ ಎಸೆತದಲ್ಲಿ ಕೀರನ್ ಪೊಲಾರ್ಡ್ ಬೌಂಡರಿ ಸಿಡಿಸಿ ಸೂಪರ್ ಓವರ್‌ಗ ಕರೆದುಕೊಂಡು ಹೋದರು. ಕ್ಷಣ ಕ್ಷಣದಲ್ಲಿ ಆರ್‌ಸಿಬಿ ತಂಡ ತೋರಿದ ಹೋರಾಟವನ್ನು ರೋಹಿತ್‌ ಶರ್ಮಾ ಶ್ಲಾಘಿಸಿದರು. "ಇದು ಕ್ರಿಕೆಟ್‌ನ ಅದ್ಭುತ ಪಂದ್ಯ. ಗುರಿ ಬೆನ್ನತ್ತಿದ್ದ ನಾವು ಆರಂಭದಲ್ಲಿ ಪಂದ್ಯದಲ್ಲಿ ಇರಲಿಲ್ಲ. ಆದರೆ, ಇಶಾನ್‌ ಕಿಶಾನ್‌ ಹಾಗೂ ಕೀರನ್ ಪೊಲಾರ್ಡ್ ಅವರು ತಂಡಕ್ಕೆ ಅದ್ಭುತ ಕೊಡುಗೆಯನ್ನು ನೀಡಿದರು. 200 ರನ್‌ಗಳನ್ನು ಗುರಿ ಹಿಂಬಾಲಿಸುವ ಸಾಮರ್ಥ್ಯ ನಮ್ಮ ತಂಡಕ್ಕಿದೆ. ಆದರೆ, ನಾವು ಉತ್ತಮ ಆರಂಭ ಕಾಣಲಿಲ್ಲ. ಆರಂಭಿಕ 6-7 ಓವರ್‌ಗಳಲ್ಲಿ ನಾವು ಮೂರು ವಿಕೆಟ್‌ಗಳನ್ನು ಕಳೆದುಕೊಂಡೆವು. ಪೊಲ್ಲಿ(ಪೊಲಾರ್ಡ್) ಕ್ರೀಸ್‌ನಲ್ಲಿ ಇದ್ದರೆ, ಏನು ಬೇಕಾದರೂ ಆಗಬಹುದು. ಇಶಾನ್‌ ಕೂಡ ಅದ್ಭುತವಾಗಿ ಹೊಡೆಯುತ್ತಿದ್ದರು. ನಮಗಿಂತ ಆರ್‌ಸಿಬಿ ಅತ್ಯುತ್ತಮವಾಗಿ ಹೋರಾಟ ನಡೆಸಿದ್ದರು," ಎಂದು ರೋಹಿತ್‌ ಶರ್ಮಾ ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/338YF1J
