ಹರೀಶ ಮಾಂಬಾಡಿ ಬಂಟ್ವಾಳ ಮಂಗಳೂರು: ಮಳೆ ಬಂದಾಗ ಕಂಗಾಲಾಗುವ , ತೆಂಗು ಬೆಳೆಗಾರರು ಬೆಳೆಯನ್ನು ಸಂರಕ್ಷಿಸಲು ಹೊದಿಕೆಯಂತಹ ಡೂಮ್‌ ನಿರ್ಮಿಸುವುದು ಹಾಗೂ ತಾಪಮಾನ ನಿಯಂತ್ರಣ ವ್ಯವಸ್ಥೆಯಲ್ಲಿಡುವುದು ಕೆಲ ವರ್ಷಗಳಿಂದ ಕಂಡು ಬರುತ್ತಿದೆ. ಇದರ ಸುಧಾರಿತ ರೂಪ ಸೌರಶಾಖಾ ಘಟಕ. ರಾಷ್ಟ್ರೀಯ ತೋಟಗಾರಿಕಾ ಮಿಷನ್‌ನಡಿ ಸಬ್ಸಿಡಿಯೂ ದೊರಕುತ್ತಿದೆ. ಸದ್ಯ ಬೆಳೆಗಾರರಿಂದ ಈ ಘಟಕ ನಿರ್ಮಾಣಕ್ಕೆ ಭಾರೀ ಬೇಡಿಕೆ ಇದೆ. ರಾಷ್ಟ್ರೀಯ ತೋಟಗಾರಿಕಾ ಮಿಷನ್‌ ಸಹಯೋಗ ನೀಡುವ ಹಿನ್ನೆಲೆಯಲ್ಲಿ ಶಾಖ ಪೆಟ್ಟಿಗೆ ನಿರ್ಮಾಣಕ್ಕೆ 6.31 ಲಕ್ಷ ರೂ. ವೆಚ್ಚ ಆಗುತ್ತಿದ್ದು, 2.28 ಲಕ್ಷ ರೂ. ಸಹಾಯಧನ ಇಲಾಖೆಯಿಂದ ದೊರಕುತ್ತದೆ. ದೊಡ್ಡ ಕೃಷಿಕರು ಏಕಾಂಗಿಯಾಗಿ ಇದನ್ನು ಅಳವಡಿಸಬಹುದಾದರೆ, ಸಣ್ಣ ಕೃಷಿಕರು ಗುಂಪು ರಚಿಸುವ ಮೂಲಕ ಸ್ವಸಹಾಯ ಕ್ರಮದ ಮೂಲಕ ಇದನ್ನು ಹೊಂದಲು ಸಾಧ್ಯ. ಹೇಗೆ ಕಾರ‍್ಯನಿರ್ವಹಣೆ?ತೆಂಗು, ಅಡಕೆ, ಕಾಳುಮೆಣಸು, ಶುಂಠಿ, ಅರಶಿನ, ಬೀಜ ಸಂಗ್ರಹಕ್ಕಾಗಿ ತರಕಾರಿ, ಕೃಷಿ ಉತ್ಪನ್ನ ವಸ್ತುಗಳು, ಗಿಡಮೂಲಿಕೆ ಔಷಧೀಯ ಸಸ್ಯಗಳನ್ನು ಒಣಗಿಸುವ ವ್ಯವಸ್ಥೆಯನ್ನು ವೈಜ್ಞಾನಿಕ ಕ್ರಮದಲ್ಲಿ ಮಾಡಲಾಗುತ್ತದೆ. ಇದರಿಂದ ಉತ್ಪನ್ನವು ಉತ್ತಮ ಗುಣಮಟ್ಟ ಕಾಯ್ದುಕೊಳ್ಳಲು ಸಾಧ್ಯವಾಗುತ್ತದೆ. ಸಮಯದ ಉಳಿತಾಯ, ಕನಿಷ್ಠ ಖರ್ಚು ವೆಚ್ಚ, ಕ್ರಿಮಿಕೀಟಗಳಿಂದ ರಕ್ಷಣೆ ದೊರಕುತ್ತದೆ. ಹೇಗಿದೆ ಪೆಟ್ಟಿಗೆ?ಶಾಖ ಪೆಟ್ಟಿಗೆ 50 ಅಡಿ ಉದ್ದ, 12.5 ಅಡಿ ಅಗಲ, 11 ಅಡಿ ಎತ್ತರ ಇರುವಂತೆ ನಿರ್ಮಾಣ ಮಾಡಲಾಗಿದೆ. ಒಳ ಭಾಗದಲ್ಲಿ 6 ಟ್ರಾಲಿ, 96 ಟ್ರೇಗಳು ಮತ್ತು 4 ಹೀಟರ್‌ಗಳು 4 ಟರ್ಬೊ ವೆಂಟೀಲೇಟರ್‌ಗಳು ಹಾಗೂ ಎಕ್ಸಾಸ್ಟ್‌ ಫ್ಯಾನ್‌ ಅಳವಡಿಸಲಾಗಿದೆ. ಒಳ ಭಾಗದ ಉಷ್ಣಾಂಶ ನಿಯಂತ್ರಿಸಲು ಸ್ವಯಂಚಾಲಿತ ವ್ಯವಸ್ಥೆ ಇದೆ. ವಿದ್ಯುತ್‌ ಸಂಪರ್ಕ ಕಡಿತವಾದಲ್ಲಿಹೆಚ್ಚುವರಿ 1 ಕಿ.ವ್ಯಾಟ್‌ ಸೌರಶಕ್ತಿ ವಿದ್ಯುತ್‌ ಸಂಪರ್ಕವನ್ನು ಪ್ರತ್ಯೇಕವಾಗಿ ಅಳವಡಿಸಲಾಗಿದೆ. ಬಂಟ್ವಾಳ ತಾಲೂಕಿನಲ್ಲಿ ಇದನ್ನು ಪ್ರಥಮವಾಗಿ ಅಳವಡಿಸಿಕೊಂಡವರು ಕೃಷಿಕ ಹಾಗೂ ತೆಂಗು ಬೆಳೆಗಾರ ಸೌಹಾರ್ದ ಸಹಕಾರಿಯ ಅಧ್ಯಕ್ಷ ರಾಜಾ ಬಂಟ್ವಾಳ. ನರಿಕೊಂಬು ಗ್ರಾಮದಲ್ಲಿರುವ ಅವರ ಕೃಷಿ ಭೂಮಿಯಲ್ಲಿ 2018-19ನೇ ಸಾಲಿನಲ್ಲಿ ಇದನ್ನು ನಿರ್ಮಿಸಿದ್ದಾರೆ. ಆಗ ಶೇ.50ರಷ್ಟು ಸಬ್ಸಿಡಿ ದೊರಕಿದೆ. ತಾಂತ್ರಿಕ ನೆರವನ್ನು ರಾಯಚೂರಿನ ರವೀಂದ್ರ ಬಿ. ಎಂಬ ತಂತ್ರಜ್ಞರು ನಿರ್ವಹಿಸಿದ್ದರು. ನೆಲದಲ್ಲಿ ಅಡಕೆ ಹಾಕಿದಾಗ ಕೊಳೆಯುವುದು ಮತ್ತಿತರ ಸಮಸ್ಯೆ ಇರುತ್ತದೆ. ಆದರೆ ಸೌರಶಾಖ ಘಟಕದಲ್ಲಿ ಆ ಸಮಸ್ಯೆ ಇಲ್ಲ. ತೆಂಗು, ಕರಿಮೆಣಸು, ಹಲಸಿನ ಹಣ್ಣು, ಬಾಳೆಹಣ್ಣು, ಬದನೆ, ಸೋರೆಕಾಯಿ, ಬೆಂಡೆಕಾಯಿ ಬೀಜವನ್ನು ತೆಗೆಯಲು ಸಾಧ್ಯ. ಗುಣಮಟ್ಟದ ಪುಷ್ಟಿದಾಯಕ ಬೀಜ ದೊರಕುತ್ತದೆ ಎಂದು ಅವರು ಹೇಳಿದರು. ತೆಂಗು ಬೆಳೆಗಾರರ ಸೌಹಾರ್ದ ಸಹಕಾರಿ ಮೂಲಕ ರೈತರ ಬಳಿ ಹೋಗಿ ಅವರಿಗೆ ಇದನ್ನು ಮನವರಿಕೆ ಮಾಡುತ್ತಿದ್ದೇವೆ. ಉತ್ತಮ ಪ್ರತಿಕ್ರಿಯೆಯೂ ದೊರಕುತ್ತಿದೆ. ಕೃಷಿಯತ್ತ ಯುವಕರೂ ಚಿತ್ತಹರಿಸುತ್ತಿರುವ ಈ ಕಾಲಮಾನದಲ್ಲಿ ಸುಧಾರಿತ ಮಾದರಿಯ ಕೃಷಿ ಪದ್ಧತಿಗಳನ್ನು ತಂತ್ರಜ್ಞಾನ ಅಳವಡಿಸಿಕೊಂಡರೆ, ಗುಣಮಟ್ಟದ ಬೆಳೆ ಪಡೆಯಲು ಸಾಧ್ಯ ಎಂಬುದಕ್ಕೆ ಸೌರಶಾಖ ಘಟಕ ನಿದರ್ಶನ ಎಂದರು. 2018-19ನೇ ಸಾಲಿನಲ್ಲಿ ತನ್ನ ಕೃಷಿ ಭೂಮಿಯಲ್ಲಿ ಸೌರಶಾಖ ಪೆಟ್ಟಿಗೆಯ ಘಟಕ ಅಳವಡಿಸಿದ್ದು, ಇದು ಉತ್ತಮ ಪ್ರಯೋಜನ ನೀಡಿದೆ. ಪ್ರಸ್ತುತ ಬಂಟ್ವಾಳ ತಾಲೂಕಿನಲ್ಲಿ ಮೂರು ಕಡೆ ಇದನ್ನು ಅಳವಡಿಸಲಾಗಿದ್ದು, ತೋಟಗಾರಿಕೆ ಮಿಷನ್‌ನಿಂದ ಸಬ್ಸಿಡಿಯೂ ಇದಕ್ಕಿದೆ. ಆಸಕ್ತ ಕೃಷಿಕರಿಗೆ ನೆರವಾಗುವ ಕಾರ್ಯವನ್ನು ನಮ್ಮ ತೆಂಗು ಬೆಳೆಗಾರರ ಸೌಹಾರ್ದ ಸಹಕಾರಿ ಮೂಲಕವೂ ಮಾಡುತ್ತಿದ್ದೇವೆ. ರಾಜಾ ಬಂಟ್ವಾಳ, ಅಧ್ಯಕ್ಷರು, ತೆಂಗು ಬೆಳೆಗಾರರ ಸೌಹಾರ್ದ ಸಹಕಾರಿ
from India & World News in Kannada | VK Polls https://ift.tt/3mRPMRY
