ಮಂಗಳೂರು: ಹೊರವಲಯದ ದೇರಳಕಟ್ಟೆಯ ಹಾಸ್ಟೆಲೊಂದಕ್ಕೆ ರಾತೋರಾತ್ರಿ ನುಗ್ಗಿ ವಿದ್ಯಾರ್ಥಿನಿಗೆ ದೌರ್ಜನ್ಯವೆಸಗಿ, ಹಣ ಮಾಡಿದ ಆರೋಪ 6ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದಲ್ಲಿ ಸಾಬೀತಾಗಿದ್ದು, ಅಪರಾಧಿಗೆ 7 ವರ್ಷ ಕಠಿಣ ಸಜೆ ಮತ್ತು 25 ಸಾವಿರ ರೂ. ದಂಡ ವಿಧಿಸಿ ತೀರ್ಪು ನೀಡಿದೆ. ಮೈಸೂರು ಕೆ.ಆರ್‌. ನಗರದ ನಾಗೇಶ ಆಲಿಯಾಸ್‌ ನಾಗು(30) ಶಿಕ್ಷೆಗೊಳಗಾದ . ಪ್ರಕರಣ ವಿವರ 2017ರ ಡಿ.4ರಂದು ಸಂಜೆ ದೇರಳಕಟ್ಟೆಗೆ ತೆರಳಿದ್ದ ಆರೋಪಿ ನಾಗೇಶ್‌ ಅಲಿಯಾಸ್‌ ನಾಗು ರಾತ್ರಿ ಮೆಡಿಕಲ್‌ ಕಾಲೇಜೊಂದರ ವಿದ್ಯಾರ್ಥಿನಿಯರ ಬಳಿ ತಂಗಿದ್ದು, ಹಾಸ್ಟೆಲ್‌ಗೆ ನುಗ್ಗಿ ಸುಲಿಗೆ ಮಾಡಲು ಸಂಚು ರೂಪಿಸಿದ್ದ. ಡಿ.5ರಂದು ಮುಂಜಾನೆ 4.30ರ ವೇಳೆಗೆ ವಿದ್ಯಾರ್ಥಿನಿಯರ ಹಾಸ್ಟೆಲ್‌ ಚಾವಣಿಯೇರಿ ಅಲ್ಲಿಂದ 2ನೇ ಮಹಡಿಗೆ ಇಳಿದು ಅಲ್ಲಿ ಮಲಗಿದ್ದ ಮೆಡಿಕಲ್‌ ವಿದ್ಯಾರ್ಥಿನಿಯೊಬ್ಬಳ ಕೋಣೆ ಪ್ರವೇಶಿಸಿದ್ದಾನೆ. ಈ ಸಂದರ್ಭ ನಿದ್ದೆ ಮಂಪರಿನಲ್ಲಿದ್ದ ವಿದ್ಯಾರ್ಥಿನಿ ಆತಂಕಕ್ಕೊಳಗಾಗಿದ್ದು, ಕೂಡಲೇ ಆರೋಪಿಯು ಆಕೆಯ ಬಾಯಿಗೆ ಪ್ಲಾಸ್ಟರ್‌ ಹಾಕಿ, ಆಕೆಯ ಕಾಲುಗಳನ್ನು ಆಕೆಯ ಝೀನ್ಸ್‌ ಪ್ಯಾಂಟ್‌ನಲ್ಲಿ ಕಟ್ಟಿ ದೌರ್ಜನ್ಯವೆಸಗಿದ್ದಾನೆ. ಇದಾದ ನಂತರ ತನ್ನಲ್ಲಿದ್ದ ಕಬ್ಬಿಣದ ರಾಡ್‌ ತೋರಿಸಿ ಆಕೆಯನ್ನು ಬೆದರಿಸಿ 5 ಲಕ್ಷ ರೂ.ಗೆ ಬೇಡಿಕೆಯಿಟ್ಟಿದ್ದು, ವಿದ್ಯಾರ್ಥಿನಿ ಹೆದರಿ ತನ್ನಲ್ಲಿ ಅಷ್ಟು ಹಣವಿಲ್ಲ ಎಂದು ಹೇಳಿ ಟೇಬಲ್‌ ಮೇಲಿದ್ದ ಪರ್ಸ್‌ ಮತ್ತು ಎಟಿಎಂ ಕಾರ್ಡ್‌ ತೋರಿಸಿದ್ದಾಳೆ. ಆರೋಪಿ ಎಟಿಎಂ ಕಾರ್ಡ್‌ನ ಪಿನ್‌ ಕೇಳಿದ್ದು, ಆಕೆ ಕೈಸನ್ನೆಯಿಂದಲೇ ಹೇಳಿದ್ದಾಳೆ. ಅದನ್ನು ಹಿಡಿದುಕೊಂಡು ಹೋದ ಆರೋಪಿ ಇನ್ನೊಂದು ರೂಮ್‌ಗೆ ಹೋಗಿ ವಿದ್ಯಾರ್ಥಿನಿಯೊಬ್ಬಳ ಮೊಬೈಲ್‌ ಕಳವು ಮಾಡಿದ್ದಾನೆ. ಇದಾದ ಬಳಿಕ ದೌರ್ಜನ್ಯಕ್ಕೊಳಗಾದ ಯುವತಿ ಬೊಬ್ಬೆ ಹಾಕಿದಾಗ ಬೇರೆ ಕೊಠಡಿಗಳಲ್ಲಿದ್ದ ವಿದ್ಯಾರ್ಥಿನಿಯರು ಓಡಿ ಬಂದು, ವಿದ್ಯಾರ್ಥಿನಿಯನ್ನು ಬಿಡಿಸಿದ್ದಾರೆ. ಅಷ್ಟರಲ್ಲಿ ಆರೋಪಿ ಪರಾರಿಯಾಗಿದ್ದ. ಪರ್ಸ್‌ನಲ್ಲಿದ್ದ 3 ಸಾವಿರ ರೂ. ಪಡೆದ ಆರೋಪಿ, ಕಂಕನಾಡಿಯ ಎರಡು ಎಟಿಎಂ ಮತ್ತು ಮೈಸೂರು ಕೆ.ಆರ್‌. ನಗರದ ಎಟಿಎಂನಿಂದ ಒಟ್ಟು 8,000 ರೂ. ಡ್ರಾ ಮಾಡಿದ್ದಾನೆ. ಆರೋಪಿ ನಾಗೇಶ್‌ ಮಂಗಳೂರಿನ ಹಲವು ಕಾಲೇಜು ಹಾಸ್ಟೆಲ್‌ಗಳ ಕ್ಯಾಂಟೀನ್‌, ಹೋಟೆಲ್‌ಗಳಲ್ಲಿ ಕೆಲಸ ಮಾಡಿಕೊಂಡಿದ್ದ. ಈ ಬಗ್ಗೆ ಉಳ್ಳಾಲ ಠಾಣೆಯಲ್ಲಿ ಕೇಸು ದಾಖಲಾಗಿತ್ತು. ಪ್ರಕರಣದ ಬಗ್ಗೆ 6ನೇ ಹೆಚ್ಚುವರಿ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ ನ್ಯಾಯಾಧೀಶರಾದ ಸೈದುನ್ನೀಸಾ ಸಮಗ್ರ ವಿಚಾರಣೆ ನಡೆಸಿ ಅಪರಾಧಿಗೆ ಶಿಕ್ಷೆ ವಿಧಿಸಿ ತೀರ್ಪು ಪ್ರಕಟಿಸಿದ್ದಾರೆ. ಸರಕಾರದ ಪರವಾಗಿ ಪಬ್ಲಿಕ್‌ ಪ್ರಾಸಿಕ್ಯೂಟರ್‌ ಜಯರಾಮ ಶೆಟ್ಟಿ ವಾದ ಮಂಡಿಸಿದ್ದರು. ಶಿಕ್ಷೆ ಪ್ರಮಾಣ ಅಪರಾಧಿಗೆ ಐಪಿಸಿ 457ಕ್ಕೆ(ಅಕ್ರಮ ಪ್ರವೇಶ) 7 ವರ್ಷಗಳ ಕಠಿಣ ಸಜೆ ಮತ್ತು 10 ಸಾವಿರ ರೂ. ದಂಡ, ದಂಡ ಪಾವತಿಗೆ ತಪ್ಪಿದರೆ ಮತ್ತೆ 1 ವರ್ಷ ಸಾದಾ ಸಜೆ, ಐಪಿಸಿ 380ಕ್ಕೆ(ಸುಲಿಗೆ) 5 ವರ್ಷ ಕಠಿಣ ಸಜೆ, 5 ಸಾವಿರ ರೂ. ದಂಡ, ದಂಡ ತಪ್ಪಿದರೆ ಹೆಚ್ಚುವರಿ 1 ವರ್ಷ ಸಾದಾ ಸಜೆ ಮತ್ತು ಐಪಿಸಿ 397ಕ್ಕೆ(ಮಾರಕಾಸ್ತ್ರ ಹಿಡಿದು ಬೆದರಿಕೆ) 7 ವರ್ಷಗಳ ಕಠಿಣ ಸಜೆ, 10 ಸಾವಿರ ರೂ. ದಂಡ, ದಂಡ ಪಾವತಿಗೆ ತಪ್ಪಿದರೆ ಮತ್ತೆ 1 ವರ್ಷ ಸಾದಾ ಸಜೆ ಹಾಗೂ ಐಪಿಸಿ 354ಕ್ಕೆ(ಲೈಂಗಿಕ ದೌರ್ಜನ್ಯ) 5 ವರ್ಷ ಕಠಿಣ ಸಜೆ, 5 ಸಾವಿರ ರೂ. ದಂಡ, ದಂಡ ಪಾವತಿಗೆ ತಪ್ಪಿದರೆ ಮತ್ತೆ 1 ವರ್ಷ ಸಾದಾ ಸಜೆ ವಿಧಿಸಿ ನ್ಯಾಯಾಧೀಶರು ತೀರ್ಪು ನೀಡಿದ್ದಾರೆ. ಸಾಕ್ಷ್ಯ ನೀಡಿದ ಸಿಸಿಟಿವಿ ದಾಖಲೆ ಹಾಸ್ಟೆಲ್‌ ಕಟ್ಟಡದಲ್ಲಿದ್ದ ಆರೋಪಿಯ ಬೆರಳಚ್ಚು ಹಾಗೂ ಕಂಕನಾಡಿಯ ಎರಡು ಮತ್ತು ಕೆ.ಆರ್‌. ನಗರದ ಒಂದು ಎಟಿಎಂನಲ್ಲಿ ಆತ ಹಣ ಡ್ರಾ ಮಾಡುವಾಗ ಆರೋಪಿಯ ಚಹರೆ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಈ ದಾಖಲೆಗಳು ತನಿಖೆಗೆ ಸಹಕಾರಿಯಾಗಿವೆ. ಇದೇ ದಾಖಲೆಯನ್ನು ಆಧರಿಸಿ 2017ರ ಡಿ.10ರಂದು ಆರೋಪಿಯನ್ನು ಪೊಲೀಸರು ಬಂಧಿಸಿದ್ದರು. ಪ್ರಕರಣಕ್ಕೆ ಸಂಬಂಧಿಸಿ 25 ಮಂದಿ ಸಾಕ್ಷಿಗಳನ್ನು ವಿಚಾರಣೆಗೊಳಪಡಿಸಲಾಗಿತ್ತು. ಉಳ್ಳಾಲ ವೃತ್ತ ನಿರೀಕ್ಷಕ ಗೋಪಿಕೃಷ್ಣ ಅವರು ಪ್ರಾಥಮಿಕ ತನಿಖೆ ನಡೆಸಿದ್ದರು. ಅಪರಾಧ ಮತ್ತು ಸಂಚಾರ ವಿಭಾಗದ ಡಿಸಿಪಿ ಆಗಿದ್ದ ಉಮಾ ಪ್ರಶಾಂತ್‌ ವಿಶೇಷ ತನಿಖೆ ನಡೆಸಿ ದೋಷಾರೋಪಣಾ ಪಟ್ಟಿ ಸಲ್ಲಿಸಿದ್ದರು.
from India & World News in Kannada | VK Polls https://ift.tt/3j7I2sN
