ಕ್ಯಾಲಿಫೋರ್ನಿಯಾ: ಮನರಂಜನಾ ಕ್ಷೇತ್ರದ ದಿಗ್ಗಜ ಸಂಸ್ಥೆಯು ಅಮೆರಿಕದಲ್ಲಿರುವ ಥೀಮ್‌ ಪಾರ್ಕ್‌ನ 28,000 ಸಿಬ್ಬಂದಿಯನ್ನು ಕೆಲಸದಿಂದ ತೆಗೆದು ಹಾಕುವುದಾಗಿ ಮಂಗಳವಾರ ತಿಳಿಸಿದೆ. ಕೊರೊನಾ ವೈರಸ್‌ ಸಾಂಕ್ರಾಮಿಕದಿಂದ ಬಿಕ್ಕಟ್ಟು ಎದುರಾಗಿದ್ದು, ನೌಕರರನ್ನು ಕೆಲಸದಿಂದ ತೆಗೆಯಲು ಡಿಸ್ನಿ ನಿರ್ಧರಿಸಿದೆ ಎಂದು ಸಂಸ್ಥೆ ತಿಳಿಸಿದೆ. ಈ ಬಗ್ಗೆ ದಿ ನ್ಯೂ ಯಾರ್ಕ್‌ ಟೈಮ್ಸ್‌ಗೆ ಪ್ರತಿಕ್ರಿಯೆ ನೀಡಿರುವ ಡಿಸ್ನಿ ಪಾರ್ಕ್‌ನ ಮುಖ್ಯಸ್ಥ ಜೋಶ್‌ ಡಿ ಅಮೆರೊ, ಈ ರೀತಿಯ ಕ್ರಮಕೈಗೊಳ್ಳುವುದು ನಿಜಕ್ಕೂ ನೋವುಂಟು ಮಾಡಿದೆ. ಆದರೆ ಸಾಂಕ್ರಾಮಿಕದ ಅವಧಿ ಅನಿಶ್ಚಿತತೆಯಿಂದ ಇದ್ದು ಹಾಗೂ ದೀರ್ಘಕಾಲದವರೆಗೆ ಇದರ ಪರಿಣಾಮ ಮುಂದುವರಿಯಲಿದ್ದು ಇದೊಂದೆ ಆಯ್ಕೆಯು ನಮಗೆ ಉಳಿದಿದೆ. ಅಂತರ ಕಾಯ್ದುಕೊಳ್ಳಬೇಕಾದ ಅವಶ್ಯಕತೆಯಿಂದಾಗಿ ಕಾರ್ಯನಿರ್ವಹಿಸಬಹುದಾದ ಸಿಬ್ಬಂದಿ ಪ್ರಮಾಣದಲ್ಲೂ ಇಳಿಕೆ ಮಾಡಬೇಕಿದೆ ಎಂದು ತಿಳಿಸಿದ್ದಾರೆ. ಥೀಮ್‌ ಪಾರ್ಕ್‌ನಲ್ಲಿ ನಾಲ್ಕನೇ ಒಂದು ಭಾಗ ನೌಕರರು ಅಥವಾ 28,000 ಸಿಬ್ಬಂದಿಯನ್ನು ಕೆಲಸದಿಂದ ತೆಗೆಯುವುದಾಗಿ ಕಂಪನಿ ಹೇಳಿದೆ. ಕೋವಿಡ್‌ಗೂ ಮುನ್ನ ಕ್ಯಾಲಿಫೋರ್ನಿಯಾ ಮತ್ತು ಫ್ಲೋರಿಡಾದಲ್ಲಿರುವ ಡಿಸ್ನಿ ಥೀಮ್‌ ಪಾರ್ಕ್‌ಗಳಲ್ಲಿ ಸುಮಾರು 1,10,000 ಜನರು ಕಾರ್ಯನಿರ್ವಹಿಸುತ್ತಿದ್ದರು. ಉದ್ಯೋಗ ಕಡಿತದಿಂದ ಆ ಪ್ರಮಾಣ 82,000ಕ್ಕೆ ಇಳಿಯಲಿದೆ. ಜಾನ್‌ ಹಾಪ್ಕಿನ್ಸ್ ಯೂನಿವರ್ಸಿಟಿ ಪ್ರಕಾರ, ಅಮೆರಿಕದಲ್ಲಿ ಒಟ್ಟು 71,80,411 ಪ್ರಕರಣಗಳು ದಾಖಲಾಗಿದ್ದು, 2,05,774 ಮಂದಿ ಸಾವಿಗೀಡಾಗಿದ್ದಾರೆ.
from India & World News in Kannada | VK Polls https://ift.tt/345bPMs
