ವಿ.ಜೆ.ರಾಜೇಶ್‌ ಆಲ್ದೂರು (ಚಿಕ್ಕಮಗಳೂರು)ಮಾರುಕಟ್ಟೆಯಲ್ಲಿ ಉತ್ತಮ ಧಾರಣೆ ಇರುವುದನ್ನು ಅರಿತ ಕೆಲವು ಉತ್ಸಾಹಿ ಯುವ ರೈತರು ಜೀರಿಗೆ ಮೆಣಸನ್ನು ವ್ಯವಸ್ಥಿತವಾಗಿ ಬೆಳೆಯಲು ಮುಂದಾಗಿದ್ದಾರೆ. ಮನೆ ಬಳಿ, ಕಾಫಿ, ಅಡಕೆ ತೋಟಗಳಲ್ಲಿನಾಲ್ಕೈದು ಗಿಡಗಳಿಗೆ ಸೀಮಿತವಾಗಿದ್ದ ಜೀರಿಗೆ ಮೆಣಸನ್ನು ಈಗ ಎಕರೆಗಟ್ಟಲೆ ಬೆಳೆಯಲಾಗುತ್ತಿದೆ. ಮಲೆನಾಡು ಭಾಗದಲ್ಲಿ ಹಿತ್ತಿಲಿಗಷ್ಟೇ ಸೀಮಿತವಾಗಿದ್ದ, ಮಾಂಸಾಹಾರಿ ಅಡುಗೆ, ಉಪ್ಪಿನಕಾಯಿ ಹಾಕುವುದಕ್ಕೆ ಮಾತ್ರ ಉಪಯೋಗಿಸುತ್ತಿದ್ದ ಜೀರಿಗೆ ಮೆಣಸ್ಸಿನ ಮಹತ್ವ ಬಹುತೇಕ ಜನರಿಗೆ ಗೊತ್ತಿರಲಿಲ್ಲ. ವಿಪರೀತ ಖಾರ ಎಂಬ ಕಾರಣಕ್ಕೆ ಬಳಕೆ ಬಹಳ ಕಡಿಮೆ ಇತ್ತು. ಆದರೆ, ಜೀರಿಗೆ ಮೆಣಸು ಆರೋಗ್ಯವರ್ಧಕ ಎಂಬುದು ಗೊತ್ತಾಗುತ್ತಿದ್ದಂತೆ ಸಾಮಾನ್ಯ ಮೆಣಸಿಗಿಂತ ಜೀರಿಗೆ ಮೆಣಸಿಗೆ ಬೇಡಿಕೆ ಹೆಚ್ಚಾಗಿದೆ. ತಾನಾಗಿಯೇ ಹುಟ್ಟಿ ಬೆಳೆಯುವ ಜೀರಿಗೆ ಮೆಣಸಿನಕಾಯಿಗೆ ಮಾರುಕಟ್ಟೆಯಲ್ಲಿ ಹೆಚ್ಚಿನ ಬೇಡಿಕೆಯಿದೆ. ವಿಶೇಷ ಆರೈಕೆ, ಹೆಚ್ಚಿನ ನೀರಾವರಿ ಅಗತ್ಯವಿಲ್ಲದ ಬೆಳೆ. ಹಲವು ರೈತರು ಜೀರಿಗೆ ಮೆಣಸಿನ ಗಿಡಗಳನ್ನು ನೆಟ್ಟು ಬೆಳೆಸುವುದಿಲ್ಲ. ಹಕ್ಕಿಗಳು ತಿಂದು ಬೀಳಿಸಿದ ಬೀಜಗಳಿಂದ ಸಸಿಗಳು ತೋಟದಲ್ಲಿ ತಾವಾಗಿಯೇ ಹುಟ್ಟುತ್ತವೆ. ಅದರ ಪಾಡಿಗೆ ಬೆಳೆದು ಕಾಯಿ ಬಿಡುತ್ತವೆ.ಚೂರು ಮೆಣಸು, ಗಾಂಧಾರಿ ಮೆಣಸು, ನುಚ್ಚು ಮೆಣಸು, ಸಣ್ಣಮೆಣಸು, ಕಾಂತರಿ ಜೀರಿಗೆ ಮೆಣಸು, ಅಥವಾ ಬರ್ಡ್‌ ಐ ಚಿಲ್ಲಿ ಹೆಸರಿನಿಂದ ಕರೆಯುವ ಈ ಮೆಣಸಿನಕಾಯಿ ಮಲೆನಾಡಿನ ರೈತರ ಉಪ ಬೆಳೆಯಾಗಿ ಉತ್ತಮ ಆದಾಯ ಕೊಡುತ್ತಿದೆ.ಕೋವಿಡ್‌ ಕಾರಣಕ್ಕೆ ಹಳ್ಳಿಗಳಿಗೆ ವಾಪಸಾಗಿರುವ ಯುವಜನರು ಕೃಷಿಯಲ್ಲಿ ಹೊಸ ಹೊಸ ಪ್ರಯೋಗ ನಡೆಸುತ್ತಿದ್ದಾರೆ. ಲಾಭದಾಯಕ ಬೆಳೆಗಳತ್ತ ಗಮನಹರಿಸುತ್ತಿದ್ದಾರೆ. ಅಂತಹ ಲಾಭದಾಯಕ ಬೆಳೆಗಳಲ್ಲಿ ಜೀರಿಗೆ ಮೆಣಸು ಕೂಡ ಸೇರಿದೆ. ಹಿತ್ತಲಿನ ಗಿಡವಾಗಿ ಮನೆಯವರಿಗೆ ಮಾತ್ರ ಪರಿಚಿತವಾಗಿದ್ದ ಜೀರಿಗೆ ಮೆಣಸು ಅಧಿಕ ಬೇಡಿಕೆ ಪಡೆದುಕೊಳ್ಳಲು ಕಾರಣ ಅದರ ಖಾರ ಹಾಗೂ ಔಷಧೀಯ ಗುಣ. ಇತರೆ ಮೆಣಸಿನ ಕಾಯಿಗಳಿಗಿಂತ ಉತ್ತಮ ರುಚಿ ಮತ್ತು ಸುವಾಸನೆ ಹೊಂದಿರುವ ಜೀರಿಗೆ ಮೆಣಸು ಔಷಧೋಚಾರ, ಕೀಟನಾಶಕಗಳ ಸಿಂಪರಣೆಯಿಲ್ಲದೆ ನೈಸರ್ಗಿಕವಾಗಿ ಬೆಳೆಯುತ್ತದೆ. ಮಾಂಸಾಹಾರಿ ಅಡುಗೆಗಳಲ್ಲಿ ಇದನ್ನು ಹೆಚ್ಚಾಗಿ ಬಳಸಲಾಗುತ್ತದೆ. ಹೆಚ್ಚು ಶ್ರಮ ಮತ್ತು ವೆಚ್ಚ ಬೇಡದ ಜೀರಿಗೆ ಮೆಣಸು ಕೃಷಿಯಿಂದ ಆರ್ಥಿಕ ಮತ್ತು ಆರೋಗ್ಯದ ಲಾಭಗಳಿವೆ. ಕಾಫಿ, ಅಡಕೆ ತೋಟ, ಮನೆಯ ಹಿತ್ತಿಲಿಗೆ ಸೀಮಿತವಾಗಿದ್ದ ಜೀರಿಗೆ ಮೆಣಸು ಇತ್ತೀಚೆಗೆ ಆರ್ಥಿಕ ಲಾಭ ತಂದುಕೊಡುವ ವಾಣಿಜ್ಯ ಬೆಳೆಯಾಗಿ ಪರಿವರ್ತನೆಯಾಗುತ್ತಿದೆ. ತಿಂಗಳಿಗೆ ಮೂರ್ನಾಲ್ಕು ಬಾರಿ ಜೀರಿಗೆ ಮೆಣಸಿನ ಕೊಯ್ಲು ಮಾಡಬಹುದು.
ವಿ.ಜೆ.ರಾಜೇಶ್‌ ಆಲ್ದೂರು (ಚಿಕ್ಕಮಗಳೂರು)
ಮಾರುಕಟ್ಟೆಯಲ್ಲಿ ಉತ್ತಮ ಧಾರಣೆ ಇರುವುದನ್ನು ಅರಿತ ಕೆಲವು ಉತ್ಸಾಹಿ ಯುವ ರೈತರು ಜೀರಿಗೆ ಮೆಣಸನ್ನು ವ್ಯವಸ್ಥಿತವಾಗಿ ಬೆಳೆಯಲು ಮುಂದಾಗಿದ್ದಾರೆ. ಮನೆ ಬಳಿ, ಕಾಫಿ, ಅಡಕೆ ತೋಟಗಳಲ್ಲಿನಾಲ್ಕೈದು ಗಿಡಗಳಿಗೆ ಸೀಮಿತವಾಗಿದ್ದ ಜೀರಿಗೆ ಮೆಣಸನ್ನು ಈಗ ಎಕರೆಗಟ್ಟಲೆ ಬೆಳೆಯಲಾಗುತ್ತಿದೆ. ಮಲೆನಾಡು ಭಾಗದಲ್ಲಿ ಹಿತ್ತಿಲಿಗಷ್ಟೇ ಸೀಮಿತವಾಗಿದ್ದ, ಮಾಂಸಾಹಾರಿ ಅಡುಗೆ, ಉಪ್ಪಿನಕಾಯಿ ಹಾಕುವುದಕ್ಕೆ ಮಾತ್ರ ಉಪಯೋಗಿಸುತ್ತಿದ್ದ ಜೀರಿಗೆ ಮೆಣಸ್ಸಿನ ಮಹತ್ವ ಬಹುತೇಕ ಜನರಿಗೆ ಗೊತ್ತಿರಲಿಲ್ಲ. ವಿಪರೀತ ಖಾರ ಎಂಬ ಕಾರಣಕ್ಕೆ ಬಳಕೆ ಬಹಳ ಕಡಿಮೆ ಇತ್ತು. ಆದರೆ, ಜೀರಿಗೆ ಮೆಣಸು ಆರೋಗ್ಯವರ್ಧಕ ಎಂಬುದು ಗೊತ್ತಾಗುತ್ತಿದ್ದಂತೆ ಸಾಮಾನ್ಯ ಮೆಣಸಿಗಿಂತ ಜೀರಿಗೆ ಮೆಣಸಿಗೆ ಬೇಡಿಕೆ ಹೆಚ್ಚಾಗಿದೆ. ತಾನಾಗಿಯೇ ಹುಟ್ಟಿ ಬೆಳೆಯುವ ಜೀರಿಗೆ ಮೆಣಸಿನಕಾಯಿಗೆ ಮಾರುಕಟ್ಟೆಯಲ್ಲಿ ಹೆಚ್ಚಿನ ಬೇಡಿಕೆಯಿದೆ. ವಿಶೇಷ ಆರೈಕೆ, ಹೆಚ್ಚಿನ ನೀರಾವರಿ ಅಗತ್ಯವಿಲ್ಲದ ಬೆಳೆ. ಹಲವು ರೈತರು ಜೀರಿಗೆ ಮೆಣಸಿನ ಗಿಡಗಳನ್ನು ನೆಟ್ಟು ಬೆಳೆಸುವುದಿಲ್ಲ. ಹಕ್ಕಿಗಳು ತಿಂದು ಬೀಳಿಸಿದ ಬೀಜಗಳಿಂದ ಸಸಿಗಳು ತೋಟದಲ್ಲಿ ತಾವಾಗಿಯೇ ಹುಟ್ಟುತ್ತವೆ. ಅದರ ಪಾಡಿಗೆ ಬೆಳೆದು ಕಾಯಿ ಬಿಡುತ್ತವೆ.ಚೂರು ಮೆಣಸು, ಗಾಂಧಾರಿ ಮೆಣಸು, ನುಚ್ಚು ಮೆಣಸು, ಸಣ್ಣಮೆಣಸು, ಕಾಂತರಿ ಜೀರಿಗೆ ಮೆಣಸು, ಅಥವಾ ಬರ್ಡ್‌ ಐ ಚಿಲ್ಲಿ ಹೆಸರಿನಿಂದ ಕರೆಯುವ ಈ ಮೆಣಸಿನಕಾಯಿ ಮಲೆನಾಡಿನ ರೈತರ ಉಪ ಬೆಳೆಯಾಗಿ ಉತ್ತಮ ಆದಾಯ ಕೊಡುತ್ತಿದೆ.
ಪುಟ್ಟ ಮೆಣಸಿನ ಅಸಾಮಾನ್ಯ ಗುಣ
ಮಲೆನಾಡಿನ ಬಹುತೇಕ ಮನೆಗಳಲ್ಲಿ ಸಾಮಾನ್ಯವಾಗಿ ಒಂದಾದರೂ ಜೀರಿಗೆ ಮೆಣಸಿನ ಗಿಡ ಇರುತ್ತದೆ. ಸಣ್ಣ ಸಣ್ಣ ಎಲೆಗಳೊಂದಿಗೆ ಉದ್ದವಾಗಿ ಬೆಳೆಯುವ ಗಿಡದಲ್ಲಿಕೆಜಿಗಟ್ಟಲೆ ಜೀರಿಗೆ ಮೆಣಸು ಬೆಳೆಯುತ್ತವೆ. ನೇರವಾಗಿ ಜೀರಿಗೆ ಮೆಣಸು ಕಚ್ಚಿದರೆ ವಿಪರೀತ ಖಾರ. ಇಂಗ್ಲಿಷ್‌ನಲ್ಲಿ ಇದನ್ನು ಬರ್ಡ್‌ ಐ ಚಿಲ್ಲಿ ಎಂದರೆ, ಕೆಲವು ಕಡೆ ಗಾಂಧಾರಿ ಮೆಣಸು ಎಂಬುದಾಗಿಯೂ ಕರೆಯಲಾಗುತ್ತದೆ.
ಆಹಾರಕ್ಕೆ ಅದ್ಭುತ ರುಚಿ ನೀಡುವ ಜೀರಿಗೆ ಮೆಣಸು ಅತಿಹೆಚ್ಚು ಔಷಧೀಯ ಗುಣ ಹೊಂದಿದೆ. ಗ್ಯಾಸ್ಟ್ರಿಕ್‌ ಸಮಸ್ಯೆ ದೂರ ಮಾಡುವ ಜತೆಗೆ ದೇಹದ ಬೊಜ್ಜನ್ನೂ ಕರಗಿಸುತ್ತದೆ. ಕಷಾಯ, ಮಾಂಸದ ಅಡುಗೆಯಲ್ಲಿ ಹೆಚ್ಚಾಗಿ ಜೀರಿಗೆ ಮೆಣಸು ಬಳಸಲಾಗುತ್ತದೆ. ಈಗೀಗ ಮಲೆನಾಡು ಭಾಗದಲ್ಲಿ ಚಟ್ನಿ ಸೇರಿದಂತೆ ಬಹುತೇಕ ಅಡುಗೆಗಳಲ್ಲಿ ಜೀರಿಗೆ ಮೆಣಸಿನ ಬಳಕೆ ಹೆಚ್ಚಾಗಿದೆ.
ಉತ್ತಮ ಧಾರಣೆ
ಮನೆ ಬಳಕೆಗೆ ಸೀಮಿತವಾಗಿದ್ದ ಜೀರಿಗೆ ಮೆಣಸು ಈಗ ತನ್ನ ಮಾರುಕಟ್ಟೆಯನ್ನು ಹೆಚ್ಚಿಸಿಕೊಳ್ಳುತ್ತಿದೆ. ಒಣಗಿದ ಜೀರಿಗೆ ಮೆಣಸು ಆನ್‌ಲೈನ್‌ನಲ್ಲಿ ಕೆಜಿಗೆ 4-5 ಸಾವಿರ ರೂ.ಗೆ ಮಾರಾಟವಾಗುತ್ತಿದೆ. ಹಾವೇರಿ ಜಿಲ್ಲೆ ಬ್ಯಾಡಗಿ, ಶಿವಮೊಗ್ಗ, ಬೆಳಗಾವಿ ಸೇರಿದಂತೆ ಹಲವು ಕಡೆ ಜೀರಿಗೆ ಮೆಣಸು ಪೂರೈಕೆಯಾಗುತ್ತಿದೆ. ಕೆಂಪು, ಹಸಿರು ಕಾಯಿಗಳನ್ನು ಬೇರ್ಪಡಿಸಿ, ಒಣಗಿಸಿ, ಪ್ಯಾಕ್‌ ಮಾಡಿದರೆ ಉತ್ತಮ ಧಾರಣೆ ಲಭ್ಯವಾಗುತ್ತದೆ. ಮಧ್ಯಪ್ರದೇಶ, ಉತ್ತರ ಪ್ರದೇಶ, ಪಂಜಾಬ್‌ ರಾಜ್ಯಗಳು, ಜಪಾನ್‌, ಅಮೆರಿಕ, ಅರಬ್‌ ದೇಶಗಳಿಗೂ ಜೀರಿಗೆ ಮೆಣಸು ರಫ್ತಾಗುತ್ತಿದೆ. ಬೆಂಗಳೂರಿನ ಫಲದ ಇಂಡಸ್ಟ್ರೀಸ್‌ ಸೇರಿದಂತೆ ಹಲವು ಕಂಪನಿಗಳು ಮಾರುಕಟ್ಟೆ ಒದಗಿಸುತ್ತಿವೆ. ಹಸಿ ಜೀರಿಗೆ ಮೆಣಸಿಗೆ ಸ್ಥಳೀಯವಾಗಿ 500 ರೂ.ಗಳವರೆಗೆ ಧಾರಣೆ ಇದೆ. ಹೊರ ರಾಜ್ಯಗಳಲ್ಲಿಒಂದು ಸಾವಿರ ರೂ.ಗೂ ಹೆಚ್ಚು ಧಾರಣೆ ಸಿಗುತ್ತದೆ. ಮಲೆನಾಡಿನಲ್ಲಿ ಜೀರಿಗೆ ಮೆಣಸನ್ನು ಉಪ ಬೆಳೆಯಾಗಿ ಬೆಳೆಯಬಹುದು. ಇದು ಹೆಚ್ಚು ಶ್ರಮ ಅಥವಾ ಪೋಷಕಾಂಶಗಳನ್ನು ಬೇಡದ, ಕಾಡು ಬೆಳೆಯಂತೆ ಬೆಳೆಯುವುದರಿಂದ ಹೆಚ್ಚು ವೆಚ್ಚವೂ ತಗಲುವುದಿಲ್ಲ
ಲಾಭದಾಯಕ ಕೃಷಿ
ಜೀರಿಗೆ ಮೆಣಸಿಗೆ ಉತ್ತಮ ಧಾರಣೆ ಇದ್ದ ಕಾರಣ ಒಂದು ಎಕರೆಯಲ್ಲಿ 1200 ಗಿಡ ಬೆಳೆಸಿದ್ದೆ. 5-6 ತಿಂಗಳಿಗೆ ಫಸಲು ಬಂದಿದ್ದು, 4.26 ಕ್ವಿಂಟಾಲ್‌ಗೆ 3.60 ಲಕ್ಷ ರೂ. ಸಿಕ್ಕಿತು. ಖರ್ಚು ಕಳೆದು 2 ಲಕ್ಷ ರೂ. ಆದಾಯ ಬಂದಿದೆ. ನೂರಾರು ತಳಿಗಳಿದ್ದು, ಉತ್ತಮ ತಳಿಗೆ ಉತ್ತಮ ಧಾರಣೆ ಇದೆ. ಈ ಬಾರಿ ಉತ್ತಮ ತಳಿಯ ಸಸಿ ಮಡಿ ಸಿದ್ಧಪಡಿಸಿ, 2 ಎಕರೆಯಲ್ಲಿ ಬೆಳೆಯಲು ನಿರ್ಧರಿಸಿದ್ದೇನೆ.
ಉದಯಕುಮಾರ್‌, ಸಿರವಾಸೆ
from India & World News in Kannada | VK Polls https://ift.tt/3kZR63m
