ಎಂ.ಪ್ರಶಾಂತ್‌ ಸೂಲಿಬೆಲೆ ಬೆಂಗಳೂರು ಗ್ರಾಮಾಂತರ: ಖಾಸಗಿ ನರ್ಸರಿ ಶಾಲೆಗಳ ಮಾದರಿಯಲ್ಲಿ ಬೆಂಚು, ಕುರ್ಚಿಗಳ ಮೇಲೆ ಕುಳಿತು ಅಭ್ಯಾಸ ಮಾಡುವಂತೆ ಕೇಂದ್ರಗಳನ್ನು ಸಜ್ಜುಗೊಳಿಸುವ ಮಹತ್ವಾಕಾಂಕ್ಷೆ ಯೋಜನೆಯೊಂದನ್ನು ತಾಪಂಗೆ ಕೈಗೆತ್ತಿಕೊಂಡಿದ್ದು, ಪ್ರಥಮ ಹಂತದಲ್ಲಿ 35 ಅಂಗನವಾಡಿ ಕೇಂದ್ರಗಳು ಹೈಟೆಕ್‌ ಸ್ಪರ್ಶ ಪಡೆದುಕೊಂಡಿವೆ. ಮಗುವಿನ ಮೊದಲ ಅಕ್ಷರ ಕಲಿಕೆಯ ಕೇಂದ್ರಗಳಾಗಿರುವ ಅಂಗನವಾಡಿ ಕೇಂದ್ರಗಳು ಸಾಕಷ್ಟು ಮೂಲಭೂತ ಸಮಸ್ಯೆಗಳ ನಡುವೆ ಕಾರ್ಯ ನಿರ್ವಹಿಸುತ್ತಿವೆ. ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆ ರೋಟರಿಯಂತಹ ಸಂಸ್ಥೆಗಳ ಸಹಕಾರದೊಂದಿಗೆ ಕೆಲವು ಕೇಂದ್ರಗಳನ್ನು ಸುಸಜ್ಜಿತವಾಗಿ ಸಿದ್ಧಗೊಳಿಸಿದೆ. ಎಲ್ಲ ರೀತಿಯ ಮೂಲ ಸೌಕರ‍್ಯಗಳನ್ನು ಒಳಗೊಂಡಿವೆ. ಸರಕಾರ ಇಲಾಖೆ ಮೂಲಕ ಎಲ್ಲ ರೀತಿಯ ಸೌಲಭ್ಯಗಳನ್ನು ಒದಗಿಸಿಕೊಟ್ಟರೂ ಮಕ್ಕಳು ಕುಳಿತು ಅಭ್ಯಾಸ ಮಾಡಲು ಚೇರ್‌, ಟೇಬಲ್‌ಗಳ ವ್ಯವಸ್ಥೆ ಇರಲಿಲ್ಲ. ಈ ಕೊರತೆಯನ್ನು ಹೊಸಕೋಟೆ ತಾಪಂ ಅಧಿಕಾರಿಗಳು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ ರಾಜ್‌ ಇಲಾಖೆಯಡಿಯಲ್ಲಿರುವ ಗ್ರಾಪಂಗಳ ಮುಖಾಂತರ ನೀಗಿಸುವ ಪ್ರಯತ್ನ ಮಾಡಿದೆ. ಮೊದಲ ಹಂತದಲ್ಲಿ 35 ಕೇಂದ್ರಗಳಿಗೆ ಅವಕಾಶ ಮಾಡಿಕೊಟ್ಟಿದೆ. 310 ಅಂಗನವಾಡಿ ಕೇಂದ್ರ ಹೊಸಕೋಟೆ ತಾಲೂಕಿನ 28 ಗ್ರಾಪಂಗಳಲ್ಲಿ ಒಟ್ಟು 310 ಅಂಗನವಾಡಿ ಕೇಂದ್ರಗಳಿದ್ದು ಹೆಚ್ಚಿನ ಕೇಂದ್ರಗಳು ಗ್ರಾಮೀಣ ಭಾಗದಲ್ಲಿವೆ. ಹಲವಾರು ಕೇಂದ್ರಗಳನ್ನು ಬೆಂಗಳೂರಿನ ರೋಟರಿ ಸಂಸ್ಥೆಯವರು ಪುನರ್‌ ನಿರ್ಮಾಣ ಯೋಜನೆಯಡಿ ಕಟ್ಟಡದ ಒಳಗೆ ಮತ್ತು ಹೊರಗೆ ಟೈಲ್ಸ್‌ ಅಳವಡಿಸಿ ಹೈಟೆಕ್‌ ಸ್ಪರ್ಶ ನೀಡಲಾಗಿದೆ. ತಳಹಾಸು ಟೈಲ್ಸ್‌ ಇರುವ ಕಾರಣ ಚಿಕ್ಕ ಮಕ್ಕಳು ಅದರ ಮೇಲೆ ಕುಳಿತುಕೊಳ್ಳುವಾಗ ಥಂಡಿಯಾಗುವಂತಹ ಅವಕಾಶ ಹೆಚ್ಚಿದೆ. ತಾಪಂ ನೀಡುತ್ತಿರುವ ಚೇರ್‌, ಟೇಬಲ್‌ ವ್ಯವಸ್ಥೆಯಿಂದ ಮಕ್ಕಳು ಈ ಸಮಸ್ಯೆಯಿಂದ ಪಾರಾಗುವುದಲ್ಲದೆ ಖಾಸಗಿ ಪ್ಲೇ ಹೋಮ್‌ ಮಾದರಿಯಲ್ಲಿ ಕುಳಿತು ಕಲಿಯುವಂತಹ ವ್ಯವಸ್ಥೆಯನ್ನು ಒದಗಿಸಿಕೊಟ್ಟಿದೆ. ಇದು ಪೋಷಕರಲ್ಲಿ ಸಂತಸವನ್ನುಂಟು ಮಾಡಿರುವುದಲ್ಲದೆ ಮಕ್ಕಳನ್ನು ಕೇಂದ್ರಗಳು ಆಕರ್ಷಣೆ ಮಾಡುತ್ತಿವೆ. ಉತ್ತಮ ಆದಾಯ ಹೊಂದಿರುವ ಚೊಕ್ಕಹಳ್ಳಿ, ದೇವನಗುಂದಿ, ಕಂಬಳೀಪುರ, ದೊಡ್ಡಹುಲ್ಲೂರು ಗ್ರಾಪಂ ವ್ಯಾಪ್ತಿಯ 35 ಅಂಗನವಾಡಿ ಕೇಂದ್ರಗಳಲ್ಲಿರುವ ಮಕ್ಕಳ ಸಂಖ್ಯೆಗೆ ಅನುಗುಣವಾಗಿ ಕುಳಿತುಕೊಂಡು ಅಭ್ಯಾಸ ಮಾಡುವ ಚೇರ್‌, ಟೇಬಲ್‌ಗಳನ್ನು ಪೂರೈಕೆ ಮಾಡಲಾಗಿದೆ. ಖಾಸಗಿ ಪ್ಲೇ ಹೋಮ್‌ಗಳ ಮಾದರಿಯಲ್ಲೇ ಸರಕಾರಿ ಅಂಗನವಾಡಿ ಕೇಂದ್ರಗಳು ಇರಬೇಕು. ಕಲಿಕಾ ಚಟುವಟಿಕೆಗಳಿಗೆ ಪ್ರೋತ್ಸಾಹದಾಯಕವಾಗಿವೆ. ಮೊದಲ ಹಂತದಲ್ಲಿ ಈ ಕಾರ್ಯವಾಗಿದ್ದು ಮುಂದಿನ ದಿನಗಳಲ್ಲಿ ಮತ್ತಷ್ಟು ಕೇಂದ್ರಗಳಿಗೆ ಅವಕಾಶ ಒದಗಿಸಲಾಗುವುದು. ಶ್ರೀನಾಥ್‌ ಗೌಡ, ಇಒ, ಹೊಸಕೋಟೆ ಈ ರೀತಿ ಸೌಲಭ್ಯಗಳನ್ನು ತಾಪಂ ಆಯಾ ಗ್ರಾಪಂ ಮೂಲಕ ಕೊಡಿಸಿರುವುದು ಮಕ್ಕಳ ಕಲಿಕಾ ಪ್ರಗತಿಗೆ ಪೂರಕವಾಗಿದೆ. ಮತ್ತಷ್ಟು ಮಕ್ಕಳು ಅಂಗನವಾಡಿ ಕೇಂದ್ರಗಳಿಗೆ ಬರಲು ಆಸಕ್ತಿ ಮೂಡಲು ಸಹಕಾರಿಯಾಗಿದೆ. ಅಂಗನವಾಡಿ ಕೇಂದ್ರಗಳು ಖಾಸಗಿ ಪ್ಲೇ ಹೋಮ್‌ಗಳಿಗಿಂತ ಕಡಿಮೆಯಿಲ್ಲ. ಮೋಹನ್‌ ಕುಮಾರ್‌, ಶಿಶು ಯೋಜನಾಭಿವೃದ್ಧಿ ಅಧಿಕಾರಿ, ಹೊಸಕೋಟೆ
from India & World News in Kannada | VK Polls https://ift.tt/2S452Np
