ಶೂನ್ಯಬಡ್ಡಿ ಅಲ್ಪಾವಧಿ ಬೆಳೆ ಸಾಲಕ್ಕೆ ಲಿಮಿಟ್! ಒಂದು ಕುಟುಂಬ 3 ಲಕ್ಷ ರೂ. ಮೀರಂಗಿಲ್ಲ..!

ಆರಗ ರವಿ ಚಿಕ್ಕಮಗಳೂರು: ಶೂನ್ಯ ಬಡ್ಡಿಯ ಬೆಳೆಸಾಲಕ್ಕೆ ಸರಕಾರ ಹೊಸ ನಿಯಮಗಳನ್ನು ರೂಪಿಸಿದ್ದು, ಒಂದು ಕುಟುಂಬಕ್ಕೆ ಗರಿಷ್ಠ 3 ಲಕ್ಷ ರೂ. ಮಿತಿ ನಿಗದಿಪಡಿಸಿದೆ. ಒಂದು ಕುಟುಂಬದಲ್ಲಿ ಎಷ್ಟೇ ಖಾತೆಗಳಿದ್ದರೂ ಆ ಗರಿಷ್ಠ 3 ಲಕ್ಷ ರೂ. ಮಾತ್ರ ಶೂನ್ಯ ದರದಲ್ಲಿ ಸಾಲ ಪಡೆಯಬಹುದಾಗಿದೆ. ಈ ಹಿಂದೆ ಒಂದೇ ಕುಟುಂಬದವರಾದರೂ ಬೇರೆ ಬೇರೆ ಖಾತೆಯಲ್ಲಿ ಶೂನ್ಯ ಬಡ್ಡಿ ದರದಲ್ಲಿ ಸಾಲ ಪಡೆಯಲು ಅವಕಾಶವಿತ್ತು. ಆದರೆ, ಈಗ ಒಂದು ಕುಟುಂಬದಲ್ಲಿ 3-4 ಖಾತೆಗಳಿದ್ದರೂ ಆ ಎಲ್ಲ ಖಾತೆಗಳ ಒಟ್ಟು ಸಾಲದ ಮೊತ್ತ 3 ಲಕ್ಷ ರೂ. ಮೀರುವಂತಿಲ್ಲ. ಸಾಲದ ಗರಿಷ್ಠ ಮಿತಿಯನ್ನು ಮೀರಿದರೆ ನಿಗದಿತ ಬಡ್ಡಿಯನ್ನು ಸಂಬಂಧಿಸಿದ ರೈತರು ಪಾವತಿಸಬೇಕಾಗುತ್ತದೆ. ಸಾಲ ಪಡೆದ ರೈತ ಸರಕಾರಿ ಅಥವಾ ಸರಕಾರಿ ಸ್ವಾಮ್ಯದ ಸಂಸ್ಥೆಗಳಲ್ಲಿ ನೌಕರನಾಗಿದ್ದು, ಮಾಸಿಕ 20 ಸಾವಿರ ರೂ. ವೇತನ ಅಥವಾ ಪಿಂಚಣಿ ಪಡೆಯುತ್ತಿದ್ದರೆ, ಕಳೆದ 3 ವರ್ಷಗಳಲ್ಲಿ ಆದಾಯ ತೆರಿಗೆ ಪಾವತಿಸಿದ್ದರೆ, ಬಡ್ಡಿ ಪ್ರೋತ್ಸಾಹ ಧನದ ಲಾಭ ಸಿಕ್ಕುವುದಿಲ್ಲ. ಈ ಬಗ್ಗೆ ಸಾಲದ ಅರ್ಜಿಯ ಜತೆಗೇ ರೈತನಿಂದ ಬ್ಯಾಂಕ್‌ಗಳು ದೃಢೀಕರಣ ಪಡೆದುಕೊಳ್ಳಬೇಕು. ಶೂನ್ಯ ಬಡ್ಡಿದರವು 2020 ಏಪ್ರಿಲ್‌ 1ರಿಂದ 2021 ಮಾರ್ಚ್ 31ರ ವರೆಗೆ ಮಂಜೂರು ಮಾಡಿದ ಕೃಷಿ ಅಲ್ಪಾವಧಿ ಸಾಲಕ್ಕೆ ಮಾತ್ರ ಅನ್ವಯಿಸುತ್ತದೆ. ರೈತರು ಎರಡು ಸಹಕಾರ ಸಂಘಗಳ ಕಾರ‍್ಯವ್ಯಾಪ್ತಿಯಲ್ಲಿ ಭೂಮಿ ಹೊಂದಿದ್ದರೆ ರೈತನು ವಾಸಿಸುತ್ತಿರುವ ವ್ಯಾಪ್ತಿಯ ಸಂಘದಲ್ಲಿ ಪಡೆದ ಸಾಲಕ್ಕೆ ಮೊದಲು ಬಡ್ಡಿ ಸಹಾಯ ಧನ ಪಾವತಿಸಬೇಕು. 3 ಲಕ್ಷ ರೂ. ಮಿತಿಯಲ್ಲಿ ಇತರೆ ಸಂಘದ ವ್ಯಾಪ್ತಿಯಲ್ಲಿ ಪಡೆದ ಸಾಲಗಳಿಗೆ ನಂತರ ಸಹಾಯಧನ ವಿತರಿಸಬೇಕು. ರೈತರು ಸಾಲ ಪಡೆಯಲು ಸಲ್ಲಿಸುವ ದಾಖಲೆಗಳಲ್ಲಿ ಕಡ್ಡಾಯವಾಗಿ ಆಧಾರ್‌ ಕಾರ್ಡ್‌ ನಕಲು, ಆಧಾರ್‌ ಕಾರ್ಡ್‌ ಬಳಕೆಯ ಘೋಷಣಾ ಪತ್ರ ನೀಡಬೇಕು. ಸಾಲದ ಗುರಿ ಎಷ್ಟು? ಪ್ರಸಕ್ತ ಆರ್ಥಿಕ ವರ್ಷದಲ್ಲಿ ರಾಜ್ಯದಲ್ಲಿ ಅಂದಾಜು 24.50 ಲಕ್ಷ ರೈತರಿಗೆ 14,500 ಕೋಟಿ ರೂ. ಅಲ್ಪಾವಧಿ ಬೆಳೆ ಸಾಲ ವಿತರಿಸುವ ಗುರಿಯನ್ನು ಅಪೆಕ್ಸ್‌ ಮತ್ತು ಡಿಸಿಸಿ ಬ್ಯಾಂಕ್‌ಗಳು ಹೊಂದಿವೆ. ಸಾಲ ವಿತರಣೆಯಲ್ಲಿ ಹೊಸ ಸದಸ್ಯರಿಗೆ, ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡದವರಿಗೆ ಪ್ರತ್ಯೇಕವಾಗಿ ಶೇ. 24.10 ಗುರಿ ನಿಗದಿಪಡಿಸಲು ಸೂಚಿಸಲಾಗಿದೆ. ಸಾಲದ ಮಿತಿ ನಿಗದಿ ಹೇಗೆ? ಒಂದು ಕುಟುಂಬಕ್ಕೆ ಗರಿಷ್ಠ 3 ಲಕ್ಷ ರೂ.ವರೆಗೆ ಸರಕಾರ ಬಡ್ಡಿ ಸಹಾಯ ಧನ ನೀಡುತ್ತದೆ. 3 ಲಕ್ಷ ರೂ.ಗಿಂತ ಹೆಚ್ಚು ಪಡೆದಿರುವ ಸಾಲಕ್ಕೆ ಸಂಬಂಧಿಸಿದ ರೈತರು ಬಡ್ಡಿ ಪಾವತಿಸಬೇಕು. ಅಂದರೆ ಕುಟುಂಬದ ಸದಸ್ಯರು ಒಟ್ಟಾರೆ ಎಷ್ಟೇ ಸಾಲ ಪಡೆದಿದ್ದರೂ ಯಾವ ಸದಸ್ಯನ ಸಾಲದ ಗಡುವು ಮೊದಲು ಬರುತ್ತದೋ ಅಂತಹ ಸದಸ್ಯರಿಗೆ ಮೊದಲ 3 ಲಕ್ಷ ರೂ.ವರೆಗಿನ ಸಾಲಕ್ಕೆ ಮಾತ್ರ ರಾಜ್ಯ ಸರಕಾರದ ಬಡ್ಡಿ ಸಹಾಯಧನ ದೊರೆಯುತ್ತದೆ. ಉದಾಹರಣೆಗೆ ಮೊದಲನೇ ಸದಸ್ಯರ ಸಾಲ 1 ಲಕ್ಷ, ಎರಡನೇ ಸದಸ್ಯನ ಸಾಲ 1.50 ಲಕ್ಷ, ಮೂರನೇ ಸದಸ್ಯನ ಸಾಲ 2 ಲಕ್ಷ ರೂ.ಗಳಾಗಿದ್ದರೆ ಮೊದಲ ಎರಡು ಸದಸ್ಯರಿಗೆ ಪೂರ್ಣ ಮೊತ್ತಕ್ಕೆ ಹಾಗೂ 3ನೇ ಸದಸ್ಯನಿಗೆ 50 ಸಾವಿರ ರೂ.ಗಳಿಗೆ ಮಾತ್ರ ಬಡ್ಡಿ ಸಹಾಯಧನ ಸಿಗುತ್ತದೆ. ಉಳಿದ 1.50 ಲಕ್ಷ ರೂ.ಗಳಿಗೆ ಬಡ್ಡಿ ಸಹಾಯಧನ ಸಿಗುವುದಿಲ್ಲ. 3ನೇ ಸದಸ್ಯ ಸುಸ್ತಿಯಾದರೂ ಕೂಡ ಮೊದಲ ಎರಡು ಸದಸ್ಯರಿಗೆ ಬಡ್ಡಿ ಸಹಾಯಧನ ಸಿಗುತ್ತದೆ. ಕುಟುಂಬವೆಂದರೆ ಗಂಡ, ಹೆಂಡತಿ ಹಾಗೂ 18 ವರ್ಷದೊಳಗಿನ ಅವಲಂಬಿತ ಮಕ್ಕಳು. ರೇಷನ್‌ ಕಾರ್ಡ್‌ ಆಧಾರದಲ್ಲಿ ಕುಟುಂಬವನ್ನು ಗುರುತಿಸಬೇಕು. 2 ಕುಟುಂಬದ ಸದಸ್ಯರು ಒಂದೇ ರೇಷನ್‌ ಕಾರ್ಡ್‌ನಲ್ಲಿದ್ದರೆ ಹೊಸ ರೇಷನ್‌ ಕಾರ್ಡ್‌ ಪಡೆಯುವವರೆಗೂ ಅದನ್ನು ಒಂದೇ ಕುಟುಂಬ ಎಂದು ಪರಿಗಣಿಸಲಾಗುತ್ತದೆ.

from India & World News in Kannada | VK Polls https://ift.tt/2ECQv8r