ಹೊಸದಿಲ್ಲಿ: ಬಹುನಿರೀಕ್ಷಿತ ಹದಿಮೂರನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್‌ ಟಿ20 ಕ್ರಿಕೆಟ್ ಟೂರ್ನಿಯು ಸೆಪ್ಟೆಂಬರ್‌ 19ರಿಂದ ಶುರುವಾಗಲಿದ್ದು, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ () ಟೂರ್ನಿ ವೇಳೆ ಬರೋಬ್ಬರಿ 20 ಸಾವಿರ ಕೋವಿಡ್-19 ಪರೀಕ್ಷೆಗಳನ್ನು ನಡೆಸಲು 10 ಕೋಟಿ ರೂ. ಮೀಸಲಿಟ್ಟಿದೆ. ಎಲ್ಲಾ ಎಂಟು ತಂಡಗಳು ಭಾರತದಲ್ಲಿ ಇದ್ದಾಗ ಫ್ರಾಂಚೈಸಿಗಲೇ ಆಟಗಾರ ತಪಾಸಣೆಯ ಭಾರ ಹೊತ್ತಿವೆ. ಆದರೆ, ಆಗಸ್ಟ್‌ 20ರ ಬಳಿಕ ಒಂದೊಂದೇ ತಂಡಗಳು ಯುಎಇಗೆ ಕಾಲಿಟ್ಟ ನಂತರ ಪ್ರತೊಯೊಬ್ಬ ಆಟಗಾರ ಮತ್ತು ಸಿಬ್ಬಂದಿ ಬಳಗದ ಟೆಸ್ಟಿಂಗ್‌ ಜವಾಬ್ದಾರಿಯನ್ನು ಬಿಸಿಸಿಐ ವಹಿಸಿಕೊಂಡಿದೆ. "ಯುಎಇ ಮೂಲದ ವಿಪಿಎಸ್‌ ಹೆಲ್ತ್‌ಕೇರ್‌ ಸಂಸ್ಥೆಯ ಜೊತೆಗೆ ಕೋವಿಡ್-19 ಟೆಸ್ಟ್‌ಗಳ ಸಲುವಾಗಿ ಒಪ್ಪಂದ ಮಾಡಿಕೊಂಡಿದ್ದೇವೆ. ಸರಿಯಾಗಿ ಎಷ್ಟು ಟೆಸ್ಟ್‌ಗಳನ್ನು ಮಾಡಲಾಗುತ್ತದೆ ಎಂದು ಹೇಳಲಾಗದು. ಆದರೆ, ಅಂದಾಜು 20 ಸಾವಿರ ಟೆಸ್ಟ್‌ಗಳನ್ನು ನಡೆಸುವ ಸಾಧ್ಯತೆ ಇದೆ. ಪ್ರತಿಯೊಂದು ಟೆಸ್ಟ್‌ಗೆ ಯುಎಇನ 200 ದಿರಾಹ್ಮ್ ನಷ್ಟು ಖರ್ಚಾಗಲಿದೆ," ಎಂದು ಹೆಸರು ಹೇಳಲು ಇಚ್ಚಿಸದ ಐಪಿಎಲ್‌ನ ಹಿರಿಯ ಅಧಿಕಾರಿ ಒಬ್ಬರು ಪಿಟಿಐ ಸುದ್ದಿ ಸಂಸ್ಥೆಗೆ ತಿಳಿಸಿದ್ದಾರೆ. "ಒಟ್ಟಾರೆ ಬಿಸಿಸಿಐ ಐಪಿಎಲ್‌ ಟೂರ್ನಿ ವೇಳೆ ಕೊರೊನಾ ವೈರಸ್‌ ಪರೀಕ್ಷೆ ಸಲುವಾಗಿ ಬರೋಬ್ಬರಿ 10 ಕೋಟಿ ರೂ. ಖರ್ಚು ಮಾಡಲಿದೆ. ಟೆಸ್ಟಿಂಗ್‌ ಸಲುವಾಗಿ ಒಪ್ಪಂದ ಮಾಡಿಕೊಂಡಿರುವ ಸಂಸ್ಥೆಯಿಂದ 75 ಮಂದಿ ವೈದ್ಯಕೀಯ ಸಿಬ್ಬಂದಿ ಈ ಸಲುವಾಗಿ ಕೆಲಸ ಮಾಡಲಿದ್ದಾರೆ," ಎಂದಿದ್ದಾರೆ. ನಿಗದಿಯಂತೆ ಮಾರ್ಚ್‌ 29ರಂದು ಮೇ 24ರವರೆಗೆ ನಡೆಯಬೇಕಿದ್ದ ಟೂರ್ನಿಯನ್ನು ಕೊರೊನಾ ವೈರಸ್‌ ಭೀತಿ ಹಿನ್ನೆಲೆಯಲ್ಲಿ ಬಿಸಿಸಿಐ ರದ್ದು ಪಡಿಸಿತ್ತು. ಇದೀಗ ಎಲ್ಲಾ ಅಡೆತಡೆಗಳ ನಡುವೆ ಯುಎಇ ಅಂಗಣದಲ್ಲಿ ಆಯೋಜಿಸಲು ಯೋಜನೆ ರೂಪಿಸಿರುವ ಬಿಸಿಸಿಐ, ಆಟಗಾರರು ಮತ್ತು ಟೂರ್ನಿಯ ಭಾಗವಾಗಿರುವ ಪ್ರತಿಯೊಬ್ಬರ ಆರೋಗ್ಯಕ್ಕೆ ಮೊದಲ ಆದ್ಯತೆ ನೀಡಿ ಸುರಕ್ಷಿತ ಕ್ರಮಗಳನ್ನು ತೆಗೆದುಕೊಂಡಿದೆ. "ಯಾವುದೇ ರೀತಿಯ ಅಪಾಯಕ್ಕೆ ಎಡೆ ಮಾಡಿಕೊಡಲು ನಾವು ಸಿದ್ಧರಿಲ್ಲ. ಆಟಗಾರರು ತಂಗಿರುವ ಪ್ರತಿಯೊಂದು ಹೋಟೆಲ್‌ಗಳಲ್ಲೂ ಪ್ರತ್ಯೇಕ ಬಯೋ ಬಬಲ್ ನಿರ್ಮಾಣ ಮಾಡಲಾಗಿದೆ. ಈ ಸಲುವಾಗಿ 50 ಮಂದಿ ಆರೋಗ್ಯ ಸಿಬ್ಬಂದಿ ಕೆಲಸ ಮಾಡುತ್ತಿದ್ದು, 25 ಮಂದಿ ಲ್ಯಾಬ್‌ ಟೆಸ್ಟಿಂಗ್‌ನಲ್ಲಿ ತೊಡಗಿದ್ದಾರೆ," ಎಂದು ವಿವರಿಸಿದ್ದಾರೆ. ಆಗಸ್ಟ್‌ 20ರಿಂದ ಆಗಸ್ಟ್‌ 28ರವರೆಗೆ ಆಟಗಾರರು ಮತ್ತು ಸಹಾಯಕ ಸಿಬ್ಬಂದಿಯನ್ನು ಒಳಗೊಂಡಂತೆ ಒಟ್ಟು 1988 ಕೋವಿಡ್-19 ಟೆಸ್ಟ್‌ಗಳನ್ನು ನಡೆಸಲಾಗಿದೆ. ಈ ಸತತ ಟೆಸ್ಟ್‌ಗಳಿಂದಲೇ ಚೆನ್ನೈ ಸೂಪರ್‌ ಕಿಂಗ್ಸ್‌ ತಂಡದ 13 ಸದಸ್ಯರಲ್ಲಿ ಕೋವಿಡ್ ಸೋಂಕು ಇರುವುದು ಪತ್ತೆಯಾಗಿತ್ತು. ಇದರಿಂದ ತಂಡ ಮತ್ತೆ 6 ದಿನಗಳ ಕ್ವಾರಂಟೈನ್‌ಗೆ ಒಳಪಟ್ಟಿದೆ. ಇನ್ನು ಸೆಪ್ಟೆಂಬರ್‌ 3ರಂದು ಸೂಪರ್‌ ಕಿಂಗ್ಸ್‌ ತಂಡದ ಆಟಗಾರರನ್ನು ಮರಳಿ ಪರೀಕ್ಷೆಗೆ ಒಳಪಡಿಸಲಾಗುತ್ತಿದ್ದು, ನೆಗೆಟೀವ್‌ ಫಲಿತಾಂಶ ಬಂದರೆ ತಂಡಕ್ಕೆ ಅಭ್ಯಾಸಕ್ಕೆ ಹಿಂದಿರುಗಲು ಅನುಮತಿ ಲಭ್ಯವಾಗಲಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3jzM0dE
