ಬಿಜಿಂಗ್: ಕೊರೊನಾ ವೈರಸ್ ಹಾವಳಿಯ ಪರಿಣಾಮವಾಗಿ ವಿಶ್ವದ ಎರಡು ಬೃಹತ್ ಶಕ್ತಿಗಳ ಮಧ್ಯೆ ಸೃಷ್ಟಿಸಿರುವ ಕಂದರ ದಿನೇ ದಿನೇ ಹೆಚ್ಚುತ್ತಿದೆ. ಅಮೆರಿಕ-ಚೀನಾ ಪರಸ್ಪರ ದೂರವಾಗುತ್ತಿದ್ದು, ಇದು ಹೊಸ ಜಾಗತಿಕ ಸಮಸ್ಯೆಯ ಸೃಷ್ಟಿಗೆ ಕಾರಣವಾಗಿದೆ. ಕೊರೊನಾ ವೈರಸ್ ಕುರಿತು ಮುನ್ಸೂಚನೆ ನೀಡದ ಚೀನಾ ಮೇಲೆ ಅಮೆರಿಕ ಮುನಿಸಿಕೊಂಡಿದೆ. ಅಲ್ಲದೇ ಕೊರೊನಾ ವೈರಸ್ನ್ನು ಉದ್ದೇಶಪೂರ್ವಕವಾಗಿ ಸೃಷ್ಟಿಸಲಾಗಿದೆ ಎಂಬ ಗಂಭೀರ ಆರೋಪವನ್ನೂ ಮಾಡಿದೆ. ಇಷ್ಟಕ್ಕೆ ಸುಮ್ಮನಾಗದ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಚೀನಾ ಮೇಲೆ ಆರ್ಥಿಕ ದಿಗ್ಬಂಧನ ಹೇರುವ ಮಾತುಗಳನ್ನಾಡಿದ್ದಾರೆ. ಅಲ್ಲದೇ ಹಾಂಕಾಂಗ್ಗೆ ಅನ್ವಯಿಸುವಂತೆ ಚೀನಾ ಜಾರಿಗೆ ತರಲು ಉದ್ದೇಶಿಸಿರುವ ಕಾನೂನನ್ನು ಅಮೆರಿಕ ವಿರೋಧಿಸಿದೆ. ಈ ಎಲ್ಲಾ ಬೆಳವಣಿಗೆಗಳ ಕುರಿತು ಪ್ರತಿಕ್ರಿಯೆ ನೀಡಿರುವ ಚೀನಾ, ಸದ್ಯದ ಪರಿಸ್ಥಿತಿಯಲ್ಲಿ ಅಮೆರಿಕ ಹಾಗೂ ಚೀನಾ ಎರಡೂ ರಾಷ್ಟ್ರಗಳು ಶೀತಲ ಸಮರದ ಅಂಚಿಗೆ ಬಂದು ನಿಂತಿವೆ ಎಂದು ಮಾರ್ಮಿಕವಾಗಿ ಹೇಳಿದೆ. ಈ ಕುರಿತು ಮಾತನಾಡಿರುವ ಚೀನಾ ವಿದೇಶಾಂಗ ಸಚಿವ ವಾಂಗ್ ವೈ, ಅಮೆರಿಕದ ಉದ್ದೇಪೂರ್ವಕ ವೈರತ್ವದ ಪರಿಣಾಮವಾಗಿ ನಾವು ಆ ರಾಷ್ಟ್ರದೊಂದಿಗೆ ಶೀತಲ ಸಮರದ ಅಂಚಿಗೆ ಬಂದು ನಿಂತಿರುವಂತೆ ತೋರುತ್ತಿದೆ ಎಂದು ಅಭಿಪ್ರಾಯಪಟ್ಟಿದ್ಧಾರೆ. ಅಮೆರಿಕ ಹಾಗೂ ಚೀನಾ ವಿಶ್ವದ ಎರಡು ಬೃಹತ್ ಆರ್ಥಿಕ ಹಾಗ ಮಿಲಿಟರಿ ಶಕ್ತಿಗಳು, ಈ ಎರಡೂ ರಾಷ್ಟ್ರಗಳ ನಡುವೆ ಉದ್ಭವಿಸುವ ಬಿಕ್ಕಟ್ಟು ಜಾಗತಿಕ ಪರಿಣಾಮ ಬೀರಲಿರುವುದು ನಿಶ್ಚಿತ ಎಂದು ವಂಗ್ ವೈ ಆತಂಕ ವ್ಯಕ್ತಪಡಿಸಿದ್ದಾರೆ. ಕೊರೊನಾ ವೈರಸ್ ಹಾವಳಿಯ ಪರಿಣಾಮವಾಗಿ ಚೀನಾದ ಮೇಲೆ ಕಿಡಿಕಾರುತ್ತಿದ್ದ ಅಮೆರಿಕ ಇದೀಗ ಚೀನಾದ ಆಂತರಿಕ ವಿಚಾರದಲ್ಲೂ ಮೂಗು ತೂರಿಸುತ್ತಿದೆ. ಚೀನಾದೊಂದಿಗೆ ಸುದೀರ್ಘ ಶೀತಲ ಸಮರದಲ್ಲಿ ತೊಡಗಲು ಅಮೆರಿಕ ಹವಣಿಸುತ್ತಿದೆ ಎಂದು ವಾಣಗ್ ವೈ ಅಸಮಾಧಾನ ಹೊರಹಾಕಿದ್ದಾರೆ. ಒಟ್ಟಿನಲ್ಲಿ ಕೊರೊನಾ ವೈರಸ್ ಹಾವಳಿ ಮತ್ತು ಆ ನಂತರದ ಬೆಳವಣಿಗೆಗಗಳು ಜಗತ್ತಿನ ಎರಡು ಬೃಹತ್ ಶಕ್ತಿಶಾಲಿ ರಾಷ್ಟ್ರಗಳ ನಡುವೆ ವೈಮನಸ್ಸು ಸೃಷ್ಟಿಸಿರುವುದು ಸ್ಪಷ್ಟ.
from India & World News in Kannada | VK Polls https://ift.tt/2TB7tYS
