ನವದೆಹಲಿ: ಭಾರತದೊಂದಿಗೆ ಗಡಿ ತಕರಾರು ತೆಗೆದಿರುವ ಚೀನಾ ವಿರುದ್ಧ ಭಾರತೀಯರು ತಿರುಗಿ ಬಿದ್ದಿದ್ದಾರೆ. ಲಡಾಖ್ ಗಡಿಯಲ್ಲಿ ಬಂದು ಹೂಂಕರಿಸುತ್ತಿರುವ ಚೀನಿ ಡ್ರ್ಯಾಗನ್ ಇದೀಗ ಭಾರತೀಯರೆಂಬ ಹುಲಿಗಳ ಘರ್ಜನೆಗೆ ಅಕ್ಷರಶಃ ನಲುಗಿದೆ. ಗಡಿ ತಂಟೆಗೆ ಬಂದಿರುವ ಚೀನಾಗೆ ಅದರದ್ದೇ ಆದ ಭಾಷೆಯಲ್ಲಿ ಪ್ರತ್ಯುತ್ತರ ನೀಡಲು ಭಾರತೀಯ ಸೇನೆ ಹಾಗೂ ಕೇಂದ್ರ ಸರ್ಕಾರ ಯೋಜನೆ ರೂಪಿಸಿದೆ. ಇದಕ್ಕೆ ಕೈಜೋಡಿಸಿರುವ ಸಾಮಾನ್ಯ ಭಾರತೀಯ, ಚೀನಾ ವಸ್ತುಗಳನ್ನು ಕೊಳ್ಳದಿರುವ ಪ್ರತಿಜ್ಞೆ ಮಾಡುತ್ತಿದ್ದಾನೆ. ಹೌದು, ಟ್ವಿಟ್ಟರ್ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ #BoycottChineseProducts ಎಂಬ ಅಭಿಉಯಾನ ಶುರುವಾಗಿದ್ದು, ಕ್ಷಣಕ್ಷಣಕ್ಕೂ ಈ ಅಭಿಯಾನದಲ್ಲಿ ಪಾಲ್ಗೊಳ್ಳುತ್ತಿರುವವರ ಸಂಖ್ಯೆ ಅಧಿಕವಾಗುತ್ತಿದೆ. ಇನ್ನು ಮುಂದೆ ಮೊಬೈಲ್ ಸೇರಿದಂತೆ ಚೀನಾದ ಯಾವುದೇ ವಸ್ತುಗಳನ್ನು ಕೊಳ್ಳುವುದಿಲ್ಲ ಎಂದು ಜನ ಸ್ವಯಂಪ್ರೇರಿತವಾಗಿ ಪ್ರತಿಜ್ಞೆ ಮಾಡುತ್ತಿದ್ದು, ತಮ್ಮ ಮೊಬೈಲ್‌ಗಳಲ್ಲಿರುವ ಚೀನಾ ಮೂಲದ ಆಪ್‌ಗಳನ್ನೂ ಕೂಡ ಡಿಲೀಟ್ ಮಾಡುತ್ತಿದ್ದಾರೆ. ತಮ್ಮ ವಸ್ತುಗಳನ್ನು ಭಾರತೀಯರಿಗೆ ಮಾರುವ ಚೀನಾ ಅದರಿಂದ ಬಂದ ಹಣವನ್ನು ಪಾಕಿಸ್ತಾನಕ್ಕೆ ನೀಡುತ್ತದೆ. ಪಾಕಿಸ್ತಾನ ಈ ಹಣವನ್ನು ಭಾರತದ ವಿರುದ್ಧ ಜಿಹಾದ್ ಸಾರಿರುವ ಭಯೋತ್ಪಾದಕರಿಗೆ ನೀಡುತ್ತದೆ. ಈ ಉಗ್ರರು ನಮ್ಮ ಧೀರ ಭಾರತೀಯ ಸೈನಿಕರ ಮೇಲೆ ದಾಳಿ ಮಾಡುತ್ತಾರೆ. ಇದಕ್ಕೆಲ್ಲಾ ಪರೋಕ್ಷವಾಗಿ ನಾವೇ ಕಾರಣರಾಗುತ್ತಿದ್ದು, ಇನ್ನು ಮುಂದೆ ಚೀನಾದ ವಸ್ತುಗಳನ್ನು ಕೊಳ್ಳುವುದಿಲ್ಲ ಎಂದು ಸಾವಿರಾರು ಜನ ಸ್ವಯಂಪ್ರೇರಿತವಾಗಿ ಪ್ರತಿಜ್ಞೆ ಮಾಡುತ್ತಿದ್ದಾರೆ. #BoycottChineseProducts ಅಭಿಯಾನಕ್ಕೆ ಭಾರೀ ಬೆಂಬಲ ವ್ಯಕ್ತವಾಗಿದ್ದು, ಬಾಲಿವುಡ್ ಸೇರಿದಂತೆ ದೇಶದ ಚಿತ್ರರಂಗದ ಗಣ್ಯರೂ ಈ ಅಭಿಯಾನಕ್ಕೆ ಸಾಥ್ ನೀಡಿರುವುದು ವಿಶೇಷ. ಇದರಲ್ಲಿ ನಟ ಅರ್ಷದ್ ವಾರ್ಸಿ, ರಣ್‌ವೀರ್ ಶೌರಿ ಸೇರಿದಂತೆ ಅನೇಕರು ಭಾಗಿಯಾಗಿದ್ದಾರೆ. ಬಾಲಿವುಡ್‌ನ ಜನಪ್ರಿಯ ಚಿತ್ರ 3 ಈಡಿಯಟ್ಸ್‌ಗೆ ಪ್ರೇರಣೆಯಾಗಿದ್ದ ಸೋನಮ್ ವಾಂಗ್ಚುಕ್ ಟ್ವಿಟ್ಟರ್‌ನಲ್ಲಿ ಈ ಅಭಿಯಾನವನ್ನು ಆರಂಭಿಸಿದ್ದು, ಈ ಅಭಿಯಾನದಲ್ಲಿ ಲಕ್ಷಾಂತರ ಜನ ಭಾಗಿಯಾಗುತ್ತಿದ್ದಾರೆ. ಚೀನಾದ ಎಲ್ಲಾ ವಸ್ತುಗಳನ್ನು ತಿರಸ್ಕರಿಸಿ ಎಂದು ಸೋನಮ್ ವಾಂಗ್ಚುಕ್ ದೇಶವಾಸಿಗಳಲ್ಲಿ ಮನವಿ ಮಾಡಿದ್ದಾರೆ. ಒಟ್ಟಿನಲ್ಲಿ ಭಾರತದೊಂದಿಗೆ ಗಡಿ ತಕರಾರು ತೆಗೆದ ಚೀನಾ ಇದೀಗ ಸಮಸ್ತ ಭಾರತೀಯರನ್ನು ಎದುರಿಸಬೇಕಾಗಿದ್ದು, ತನ್ನ ಅತಿದೊಡ್ಡ ಮಾರುಕಟ್ಟೆಯನ್ನು ಕಳೆದುಕೊಳ್ಳುವ ಭೀತಿ ಎದುರಿಸುತ್ತಿದೆ.
from India & World News in Kannada | VK Polls https://ift.tt/36L6z1h
