ಆಗ್ರಾ (ಉತ್ತರ ಪ್ರದೇಶ): ಶುಕ್ರವಾರ ರಾತ್ರಿ ಬೀಸಿದ ಭಾರೀ ಗಾಳಿ ಹಾಗೂ ಸಿಡಿಲಿನಿಂದ ವಿಶ್ವ ಪ್ರಸಿದ್ಧ ಸ್ಮಾರಕ ತಾಜ್‌ಮಹಲ್‌ಗೆ ಹಾನಿಯುಂಟಾಗಿದೆ. ಹಾಗೂ ಭಾರೀ ಗಾಳಿಗೆ ಕಬ್ಬಿಣದ ಪೈಪ್‌ಗಳು ಉರುಳಿ ಬಿದ್ದಿರುವುದರಿಂದ ಸಣ್ಣದಾಗಿ ಮಾರ್ಬಲ್‌ಗಳು ಕಿತ್ತುಬಂದಿದ್ದು ಮತ್ತು ಯಮುನಾ ನದಿ ತಟದಲ್ಲಿರುವ ಕೆಂಪು ಮರಳುಕಲ್ಲುಗಳು ಮುರಿದಿವೆ. ಇದನ್ನೆಲ್ಲಾ ಸರಿಪಡಿಸಲು ಸುಮಾರು 20 ಲಕ್ಷ ರೂ. ಖರ್ಚಾಗಲಿದೆ ಎಂದು ಭಾರತೀಯ ಪುರಾತತ್ವ ಇಲಾಖೆ ತಿಳಿಸಿದೆ. ಪುರಾತತ್ವ ಇಲಾಖೆಯ ಅಧಿಕಾರಿಗಳ ಪ್ರಕಾರ, ಕಬ್ಬಿಣದ ಪೈಪ್‌ಗಳನ್ನು ಸ್ವಚ್ಛತೆಗಾಗಿ ಬಳಸಲಾಗುತ್ತಿತ್ತು. ಆದರೆ, ಲಾಕ್‌ಡೌನ್‌ ಕಾರಣದಿಂದ ಕೆಲಸ ನಡೆದಿದ್ದಲ್ಲ ಎಂದಿದ್ದಾರೆ. ಇನ್ನು, ಭಾರೀ ಗಾಳಿಯಿಂದ ಮೇಲೆ ಇಟ್ಟಿದ್ದ ಕಬ್ಬಿಣದ ಪೈಪುಗಳು ಬಿದ್ದಿದ್ದರಿಂದ 9 ಅಡಿ ಉದ್ದದ ಮಾರ್ಬಲ್‌ ಮತ್ತು 6 ಅಡಿ ಉದ್ದದ ಕೆಂಪು ಮರಳುಗಲ್ಲಿನ ಎರಡು ಪ್ಯಾನೆಲ್‌ಗಳಿಗೆ ಉಂಟಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪುರಾತತ್ವ ಇಲಾಖೆಯ ನೂತನ ನಿರ್ದೇಶಕಿ ವಿ ವಿದ್ಯಾವತಿ ಶನಿವಾರ ಸ್ಮಾರಕಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದಾರೆ. ಭಾರೀ ಗಾಳಿಗೆ ತಾಜ್‌ಮಹಲ್‌ ಸುತ್ತಲಿನ 12ಕ್ಕೂ ಹೆಚ್ಚು ಮರಗಳು ಧರೆಗುರುಳಿವೆ. ಪಶ್ಚಿಮದಲ್ಲಿರುವ ಕಟ್ಟಿಗೆಯ ಮುಖ್ಯದ್ವಾರಕ್ಕೂ ಕೂಡ ಭಾರೀ ಗಾಳಿಯಿಂದ ಹಾನಿಯುಂಟಾಗಿರುವುದು ತಿಳಿದುಬಂದಿದೆ. ಗಂಟೆಗೆ 124 ಕಿಮೀ ವೇಗದಲ್ಲಿ ಬೀಸುತ್ತಿದ್ದ ಭಾರೀ ಗಾಳಿಯಿಂದ ಟರ್ನ್ಸ್‌ಟೈಲ್‌ ಬಾಗಿಲು ಕೂಡ ಮುರಿದಿದೆ. ಪಶ್ಚಿಮ ದ್ವಾರದ ಪ್ರವೇಶದಲ್ಲಿದ್ದ ಲೋಹ ಶೋಧಕ ಯಂತ್ರಗಳು ಸಹ ಭಾರೀ ಗಾಳಿಗೆ ಬಿದ್ದಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಪ್ರಾಥಮಿಕ ಅಂದಾಜಿನಂತೆ ರೇಲಿಂಗ್‌ಗಳು, ಫಾಲ್ಸ್‌ ಸೀಲಿಂಗ್‌, ಮರದ ದ್ವಾರ ಮತ್ತಿತರ ಹಾನಿಗೀಡಾದ ಪ್ರದೇಶಗಳ ದುರಸ್ಥಿಗೆ 20 ಲಕ್ಷ ರೂ. ಖರ್ಚಾಗಬಹುದು ಎಂದು ಆಗ್ರಾ ವಿಭಾಗದ ಮುಖ್ಯ ಪುರಾತತ್ವಶಾಸ್ತ್ರಜ್ಞ ಹೇಳಿದ್ದಾರೆ. ಇನ್ನು, ಮಾರ್ಬಲ್‌ಗಳು ಹಾಗೂ ಕೆಂಪು ಮರಳುಗಲ್ಲುಗಳನ್ನು ರಾಜಸ್ಥಾನದಿಂದ ತರಿಸಬೇಕಾಗಿದ್ದು, ತಿಂಗಳೊಳಗೆ ದುರಸ್ಥಿ ಕಾರ್ಯ ಪೂರ್ಣಗೊಳ್ಳಲಿದೆ ಎಂದಿದ್ದಾರೆ. ಶುಕ್ರವಾರ ರಾತ್ರಿ ಬೀಸಿದ ಭಾರಿ ಗಾಳಿ ಹಾಗೂ ಸಿಡಿಲಿಗೆ ಆಗ್ರಾದಲ್ಲಿ ಕನಿಷ್ಠ ಮೂರು ಜನ ಸಾವನ್ನಪ್ಪಿದ್ದಾರೆ. ಮರಗಳು ಧರೆಗುರುಳಿದ್ದರಿಂದ ಅನೇಕ ವಾಹನಗಳು ಜಖಂ ಆಗಿವೆ. 20ಕ್ಕೂ ಹೆಚ್ಚು ಮನೆಗಳು ನೆಲಸಮವಾಗಿವೆ. ಇನ್ನು, ಆಗ್ರಾದ ಆಲ್‌ಬಾಟಿಯಾ ಪ್ರದೇಶದಲ್ಲಿ ಟೆಲಿಕಾಂ ಟವರ್‌ ನೆಲಕ್ಕಪ್ಪಳಿಸಿದ್ದರೆ, ಬಹಳಷ್ಟು ಮರಗಳು ಬಿದ್ದಿರುವುದರಿಂದ ಬಯಾನಾ ರೈಲು ಮಾರ್ಗ ಸ್ಥಗಿತವಾಗಿದೆ.
from India & World News in Kannada | VK Polls https://ift.tt/2zLn15L
