ಬೆಂಗಳೂರು: ರಾಜ್ಯದಲ್ಲಿ ಸತತ ಎರಡು ದಿನ ಕೊರೊನಾ ಪ್ರಕರಣಗಳ ಸಂಖ್ಯೆ ಶತಕ ದಾಟಿತ್ತು. ಆದರೆ ಗುರುವಾರ ಮಧ್ಯಾಹ್ನದ ಹೊತ್ತಿಗೆ 75 ಕೇಸ್‌ಗಳಷ್ಟೆ ವರದಿಯಾಗಿವೆ. ಜೊತೆಗೆ ಕೇವಲ 10 ಜಿಲ್ಲೆಗಳಿಂದ ಮಾತ್ರ ಹೊಸ ಪ್ರಕರಣಗಳು ವರದಿಯಾಗಿವೆ. ಇದರೊಂದಿಗೆ ರಾಜ್ಯದಲ್ಲಿ ಒಟ್ಟು ಪ್ರಕರಣಗಳ ಸಂಖ್ಯೆ 2,493ಕ್ಕೆ ಏರಿಕೆಯಾಗಿದ್ದು, ಎರಡೂವರೆ ಸಾವಿರದ ಅಂಚಿಗೆ ತಲುಪಿದೆ.ಉಡುಪಿಯಲ್ಲಿ ಅತೀ ಹೆಚ್ಚಿನ 27 ಪಾಸಿಟಿವ್ ಪ್ರಕರಣಗಳು ದೃಢಪಟ್ಟಿವೆ. ಹಾಸನದಲ್ಲಿ 13, ಬೆಂಗಳೂರು ನಗರ 7, ಯಾದಗಿರಿ 7, ದಕ್ಷಿಣ ಕನ್ನಡ 6, ಚಿತ್ರದುರ್ಗ 6, ಕಲಬುರಗಿ 3, ಚಿಕ್ಕಮಗಳೂರು 3, ವಿಜಯಪುರ 2 ಮತ್ತು ರಾಯಚೂರಿನಲ್ಲಿ ಒಬ್ಬರಿಗೆ ಸೋಂಕು ತಗುಲಿರುವುದು ವರದಿಯಾಗಿದೆ.ಎಂದಿನಂತೆ ಹೆಚ್ಚಿನ ಎಲ್ಲಾ ಸೋಂಕಿತರಿಗೆ ಅಂತಾರಾಜ್ಯ ಪ್ರಯಾಣದ ಹಿನ್ನೆಲೆ ಇದೆ. ಮಹಾರಾಷ್ಟ್ರದ ಜೊತೆ, ತೆಲಂಗಾಣ, ತಮಿಳುನಾಡು ಮತ್ತು ಕೇರಳಕ್ಕೆ ಪ್ರಯಾಣ ಬೆಳೆಸಿದ್ದವರಲ್ಲೂ ಸೋಂಕು ಕಾಣಿಸಿಕೊಂಡಿದೆ.ಉಡುಪಿಯ 27 ಪಾಸಿಟಿವ್ ಪ್ರಕರಣಗಲ್ಲಿ 24 ಜನರಿಗೆ ಮಹಾರಾಷ್ಟ್ರ ಪ್ರಯಾಣದ ಹಿನ್ನೆಲೆ ಇದೆ. ಇನ್ನಿಬ್ಬರು ತೆಲಂಗಾಣದಿಂದ ಜಿಲ್ಲೆಗೆ ಬಂದವರು. ಒಬ್ಬರು ಕೇರಳದಿಂದ ಬಂದವರಾಗಿದ್ದಾರೆ. ಸೋಂಕಿತರಲ್ಲಿ 6 ವರ್ಷದ ಓರ್ವ ಹುಡುಗಿಯೂ ಸೇರಿದ್ದಾಳೆ. ಉಳಿದವರೆಲ್ಲರೂ ವಯಸ್ಕರಾಗಿದ್ದಾರೆ. ಇದರೊಂದಿಗೆ ಉಡುಪಿಯ ಸೋಂಕಿತರ ಸಂಖ್ಯೆ 147ಕ್ಕೆ ಏರಿಕೆಯಾಗಿದೆ.
ಹಾಸನದ 13 ಸೋಂಕಿತರಲ್ಲಿ ಇಬ್ಬರಿಗೆ ಮಹಾರಾಷ್ಟ್ರ ಪ್ರಯಾಣದ ಹಿನ್ನೆಲೆ ಇದೆ, ಒಬ್ಬರಿಗೆ ಈ ಹಿಂದಿನ ರೋಗಿಯಿಂದ ಸೋಂಕು ತಗುಲಿದೆ. ಆದರೆ ಉಳಿದ 10 ಜನರಿಗೆ ಸೋಂಕು ಬಂದಿದ್ದು ಹೇಗೆ ಎಂಬುದೇ ತಿಳಿದು ಬಂದಿಲ್ಲ. ಇದು ಸಮುದಾಯ ಪ್ರಸರಣದ ಗುಮಾನಿಯನ್ನು ಮತ್ತಷ್ಟು ಬಲಗೊಳಿಸಿದೆ.
135 ಮಂದಿಗೆ ಕೊರೊನಾ: 2418 ಕ್ಕೇರಿದ ಸೋಂಕಿತರ ಸಂಖ್ಯೆ! 47 ಬಲಿ!
ಬೆಂಗಳೂರಿನ 7 ಜನರಲ್ಲಿಯೂ ಗುರುವಾರ ಸೋಂಕು ಪತ್ತೆಯಾಗಿದೆ. ಆರು ಜನರಿಗೆ ಈ ಹಿಂದಿನ ರೋಗಿಗಳಿಂದ ಸೋಂಕು ಹರಡಿದೆ. ಇವರಲ್ಲಿ ನಾಲ್ವರು 15 ವರ್ಷದೊಳಗಿನ ಮಕ್ಕಳಾಗಿದ್ದಾರೆ. ಇನ್ನು ಸೌದಿ ಅರೇಬಿಯಾದಿಂದ ನಗರಕ್ಕೆ ಬಂದಿದ್ದ ಇನ್ನೊಬ್ಬರಲ್ಲೂ ಕೋವಿಡ್‌-19 ಸೋಂಕು ಕಾಣಿಸಿಕೊಂಡಿದೆ.
ಯಾದಗಿರಿಯ ಎಲ್ಲಾ 7 ಸೋಂಕಿತರೂ ಮಹಾರಾಷ್ಟ್ರದ ಟ್ರಾವೆಲ್‌ ಹಿಸ್ಟರಿ ಹೊಂದಿದ್ದಾರೆ. ಇವರಲ್ಲಿ ಓರ್ವ 8 ವರ್ಷದ ಬಾಲಕನೂ ಸೇರಿದ್ದಾನೆ. ಇನ್ನು ದಕ್ಷಿಣ ಕನ್ನಡದ ಎಲ್ಲಾ 6 ರೋಗಿಗಳೂ ಮಹಾರಾಷ್ಟ್ರದಿಂದ ಜಿಲ್ಲೆಗೆ ಹಿಂದಿರುಗಿದವರಾಗಿದ್ದಾರೆ.
ಚಿತ್ರದುರ್ಗದ ಎಲ್ಲಾ 6 ಜನರಿಗೆ ತಮಿಳುನಾಡು ಪ್ರಯಾಣದ ಇತಿಹಾಸವಿದೆ. ಕಲಬುರಗಿಯ ಮೂವರು ಮಹಾರಾಷ್ಟ್ರದಿಂದ ಬಂದವರು. ಇವರಲ್ಲಿ ಒಬ್ಬ 9 ವರ್ಷದ ಬಾಲಕನೂ ಇದ್ದಾನೆ.
ಚಿಕ್ಕಮಗಳೂರಿನ ಮೂವರು ಪಾಸಿಟಿವ್ ವ್ಯಕ್ತಿಗಳಲ್ಲಿ ಒಬ್ಬರು ನಬವದೆಹಲಿಯಿಂದ ಬಂದಿದ್ದರೆ, ಇನ್ನಿಬ್ಬರು ಮಹಾರಾಷ್ಟ್ರದಿಂದ ಬಂದವರಾಗಿದ್ದಾರೆ. ವಿಜಯಪುರದ ಇಬ್ಬರು ಸೋಂಕಿತರ ಕಥೆಯೂ ಇದೇ ಆಗಿದೆ.
ರಾಯಚೂರಿನ ಏಕೈಕ ಸೋಂಕಿತರು ತೀವ್ರ ಉಸಿರಾಟದ ಸಮಸ್ಯೆ (ಸಾರಿ) ಯಿಂದ ಬಳಲುತ್ತಿದ್ದಾರೆ.
ಇದೇ ಅವಧಿಯಲ್ಲಿ ಒಟ್ಟು 28 ರೋಗಿಗಳು ಕೊರೊನಾ ವೈರಸ್‌ನಿಂದ ಚೇತರಿಸಿಕೊಂಡು ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ. ಯಾದಗಿರಿ ಜಿಲ್ಲೆಯ 9 ಜನರು, ದಾವಣಗೆರೆ 8, ವಿಜಯಪುರ 4, ದಕ್ಷಿಣ ಕನ್ನಡ 3, ಬೆಳಗಾವಿ 2, ಬಾಗಲಕೋಟೆ 1 ಮತ್ತು ಮೈಸೂರಿನ ಒಬ್ಬರು ಬಿಡುಗಡೆಯಾದವರಲ್ಲಿ ಸೇರಿದ್ದಾರೆ.
ಇದರೊಂದಿಗೆ ರಾಜ್ಯದಲ್ಲಿ ಕೋವಿಡ್‌-19ನಿಂದ ಚೇತರಿಸಿಕೊಂಡವರ ಸಂಖ್ಯೆ 800 ದಾಟಿದ್ದು 809ಕ್ಕೆ ಏರಿಕೆಯಾಗಿದೆ. ಒಟ್ಟು 2,493 ಪ್ರಕರಣಗಳಲ್ಲಿ ಸಕ್ರಿಯ ಪ್ರಕರಣಗಳ ಸಂಖ್ಯೆ 1,635ಕ್ಕೆ ಹೆಚ್ಚಳವಾಗಿದೆ. ಇಲ್ಲಿಯವರೆಗೆ ರಾಜ್ಯದಲ್ಲಿ ಸೋಂಕಿಗೆ 47 ಜನರು ಬಲಿಯಾಗಿದ್ದಾರೆ. ಇನ್ನಿಬ್ಬರು ಆತ್ಮಹತ್ಯೆಗೆ ಶರಣಾಗಿದ್ದಾರೆ.
from India & World News in Kannada | VK Polls https://ift.tt/2XBfXR8
