ವೆಲ್ಲಿಂಗ್ಟನ್‌: ಆಕ್‌ಲ್ಯಾಂಡ್‌ನ ಮಿಡ್ಲ್‌ಮೋರ್‌ ಆಸ್ಪತ್ರೆಯಿಂದ ಕೊರೊನಾ ಸೋಂಕಿತರೊಬ್ಬರು ಪೂರ್ಣ ಚೇತರಿಸಿಕೊಂಡು ಡಿಸ್ಚಾರ್ಜ್‌ ಆಗುವ ಮೂಲಕ ನ್ಯೂಜಿಲೆಂಡ್‌ನಲ್ಲಿ ಚಿಕಿತ್ಸೆಗೊಳಗಾದ ಸೋಂಕಿತರ ಸಂಖ್ಯೆ ಶೂನ್ಯಕ್ಕೆ ಇಳಿದೆ. ಈ ಪುಟ್ಟ ರಾಷ್ಟ್ರದ ಯಾವುದೇ ಆಸ್ಪತ್ರೆಯಲ್ಲಿ ಸದ್ಯ ಕೊರೊನಾ ಸೋಂಕಿತರಿಲ್ಲ. ಜತೆಗೆ ಕಳೆದ ಐದು ದಿನಗಳಿಂದಲೂ ಒಂದೇ ಒಂದು ಹೊಸ ಸೋಂಕಿನ ಪ್ರಕರಣ ಈ ದೇಶದಲ್ಲಿ ಪತ್ತೆಯಾಗಿಲ್ಲ. ಇನ್ನು ರಾಷ್ಟ್ರಾದ್ಯಂತ ಕೇವಲ 21 ಸೋಂಕಿತರಿದ್ದು ಅವರೆಲ್ಲರನ್ನೂ ಮನೆಯಲ್ಲೇ ಕ್ವಾರಂಟೈನ್‌ನಲ್ಲಿ ಇರಿಸಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಆರೋಗ್ಯ ಸಚಿವಾಲಯದ ಪ್ರಧಾನ ನಿರ್ದೇಶಕ ಡಾ. ಆ್ಯಶ್ಲೆಬ್ಲೂಮ್‌ಫೀಲ್ಡ್‌ ಬುಧವಾರ ತಿಳಿಸಿದ್ದಾರೆ. ನ್ಯೂಜಿಲೆಂಡ್‌ನ ಎಲ್ಲ ಅಧಿಕೃತ ಕೊರೊನಾ ಪರೀಕ್ಷೆ ಪ್ರಯೋಗಾಲಯಗಳು ಇದುವರೆಗೂ 2.67 ಲಕ್ಷ ಟೆಸ್ಟ್‌ಗಳನ್ನು ನಡೆಸಿವೆ. ಸೋಂಕಿತರ ಪತ್ತೆಗೆ ಎನ್‌ಝೆಡ್‌ ಕೋವಿಡ್‌ ಟ್ರೇಸರ್‌ ಆ್ಯಪ್‌ ಮತ್ತು ಆರೋಗ್ಯ ಸೇವಾ ಸಿಬ್ಬಂದಿಗೆ ಕೊರೊನಾ ಪ್ರಕರಣಗಳ ಮಾಹಿತಿ ನೀಡುವ ಮತ್ತೊಂದು ಆ್ಯಪ್‌ಅನ್ನು ಅಲ್ಲಿನ ಸರಕಾರ ಬಿಡುಗಡೆ ಮಾಡಿದೆ. ಇದುವರೆಗೂ ದೇಶದಲ್ಲಿ1,504 ಮಂದಿಗೆ ಕೊರೊನಾ ಸೋಂಕು ತಗುಲಿದ್ದು, ಆ ಪೈಕಿ 1,462 ಮಂದಿ ಗುಣಮುಖರಾಗಿದ್ದಾರೆ. ಒಟ್ಟು 21 ಮಂದಿ ಬಲಿಯಾಗಿದ್ದಾರೆ.
from India & World News in Kannada | VK Polls https://ift.tt/2M6j9is
