ಬೆಂಗಳೂರು: ರಾಜ್ಯದಲ್ಲಿ 60 ಪತ್ತೆ ಪ್ರಯೋಗಾಲಯಗಳಿದ್ದರೂ ಗಂಟಲ ದ್ರವದ ಮಾದರಿ ಪರೀಕ್ಷೆಯ ಫಲಿತಾಂಶ ಲಭ್ಯವಾಗುವುದು ತಡವಾಗುತ್ತಿರುವುದು ಅನೇಕ ಸಮಸ್ಯೆಗಳನ್ನು ಸೃಷ್ಟಿಸಿದೆ. ಯಾದಗಿರಿಯಲ್ಲಿ ಮಹಿಳೆಯೊಬ್ಬರು ಮೃತಪಟ್ಟು ಒಂದು ವಾರದ ಬಳಿಕ ಫಲಿತಾಂಶ ಬಂದಿದೆ. ಅದೆಷ್ಟೋ ಮಂದಿ ಏಳು ದಿನಗಳ ಕ್ವಾರಂಟೈನ್‌ ಅವಧಿ ಮುಗಿಸಿದರೂ ಫಲಿತಾಂಶ ಬಾರದೆ ಮನೆಗೆ ಹೋಗಲಾಗದ ಸ್ಥಿತಿಯಲ್ಲಿದ್ದಾರೆ. ರಾಜ್ಯದಲ್ಲಿ ದಿನಕ್ಕೆ 13000 ಸ್ಯಾಂಪಲ್‌ ಪರೀಕ್ಷೆಗೆ ಅವಕಾಶವಿದ್ದು ಸರಾಸರಿ 8ರಿಂದ 10 ಸಾವಿರ ಪರೀಕ್ಷೆ ನಡೆಯುತ್ತಿದೆ. ಒಮ್ಮೆ ಗಂಟಲ ದ್ರವದ ಮಾದರಿ ಸಂಗ್ರಹಿಸಿದರೆ ಒಂದು ದಿನ ಅಥವಾ ಎರಡು ದಿನಗಳೊಳಗೆ ವರದಿ ನೀಡಬೇಕು ಎಂಬ ನಿಯಮವಿದೆ. ಆದರೆ ವಾರವಾದರೂ ವರದಿ ಬರುತ್ತಿಲ್ಲ. ಸಕಾಲದಲ್ಲಿ ವರದಿ ಬಾರದೆ ಇದ್ದಾಗ ಪರೀಕ್ಷೆಗೆ ಒಳಗಾದವರಲ್ಲಿ ಆತಂಕ ಹೆಚ್ಚಾಗುತ್ತಿದೆ. ಅದರಲ್ಲೂ ಹೊರರಾಜ್ಯದಿಂದ ಬಂದವರು ಯಾವಾಗ ಫಲಿತಾಂಶ ಬರುತ್ತದೋ, ಯಾವಾಗ ಮನೆ ಸೇರುತ್ತೇವೋ ಎಂಬ ಆತುರದಲ್ಲಿರುತ್ತಾರೆ. ಏಳು ದಿನಗಳ ಕ್ವಾರಂಟೈನ್‌ ಮುಗಿಸಿದವರು ತಮ್ಮನ್ನು ಮನೆಗೆ ಬಿಡಿ ಎಂದು ಒತ್ತಡ ಹೇರುತ್ತಿರುವುದು ಅಧಿಕಾರಿಗಳೂ ನುಂಗಲಾರದ ತುಪ್ಪವಾಗುತ್ತಿದೆ. ಒಂದೊಮ್ಮೆ ಅವರನ್ನು ಬಿಟ್ಟ ಬಳಿಕ ಸೋಂಕು ದೃಢಪಟ್ಟರೆ ಅವರ ಸಂಪರ್ಕ ಟ್ರೇಸ್‌ ಮಾಡುವುದೇ ಒಂದು ದೊಡ್ಡ ಸವಾಲಾಗಲಿದೆ. ಪರೀಕ್ಷಾ ಪ್ರಕ್ರಿಯೆಯ ನಿಧಾನಗತಿ ಮತ್ತು ರಾಜ್ಯದಲ್ಲಿ ಏಕಾಏಕಿ ಸ್ಯಾಂಪಲ್‌ ಸಂಖ್ಯೆ ಹೆಚ್ಚಿರುವುದು ವಿಳಂಬಕ್ಕೆ ಪ್ರಮುಖ ಕಾರಣ. ''ಮಾದರಿಗಳ ರವಾನೆ ಪ್ರಕ್ರಿಯೆಗೆ ಹೆಚ್ಚು ಸಮಯ ಹಿಡಿಯುತ್ತದೆ ಎನ್ನುತ್ತಾರೆ ಕೋವಿಡ್‌-19 ಕಾರ್ಯಪಡೆಯ ಲ್ಯಾಬ್‌ ಮತ್ತು ಪರೀಕ್ಷೆಯ ನೋಡಲ್‌ ಅಧಿಕಾರಿ ಡಾ.ಸಿ.ಎನ್‌.ಮಂಜುನಾಥ್‌. ಪ್ರಕ್ರಿಯೆಯೂ ವಿಳಂಬ- ಮಾದರಿಗಳನ್ನು ರವಾನೆಯಲ್ಲೇ ಸಮಯ ವ್ಯರ್ಥವಾಗುತ್ತದೆ. ಉದಾಹರಣೆಗೆ, ಕೊಡಗು, ಮಂಡ್ಯ ಹಾಗೂ ಚಾಮರಾಜನಗರದಲ್ಲಿ ಸಂಗ್ರಹಿಸಿದ ಗಂಟಲ ದ್ರವದ ಮಾದರಿಗಳನ್ನು ಮೈಸೂರಿಗೆ ರವಾನಿಸಿ ಎಂಎಂಸಿಆರ್‌ಐನಲ್ಲಿ ಪರೀಕ್ಷಿಸಲಾಗುತ್ತದೆ. ಅದು ಜಿಲ್ಲಾಆರೋಗ್ಯಾಧಿಕಾರಿ, ವಿಭಾಗಾಧಿಕಾರಿ ಕಚೇರಿ ದಾಟಿ ಬರುತ್ತದೆ. - ಆರ್‌‍ಟಿಪಿಸಿಆರ್‌ ಯಂತ್ರದಲ್ಲಿ ಒಂದು ಬ್ಯಾಚ್‌ನ ಮಾದರಿ ಪರೀಕ್ಷೆಗೆ 3 ರಿಂದ 3.30 ಗಂಟೆ ಬೇಕಾಗುತ್ತದೆ. - ಈ ಪ್ರಕ್ರಿಯೆಯಲ್ಲಿ ದಾಖಲು ಮಾಡುವ ಪ್ರತಿ ಅಂಕಿ- ಅಂಶಗಳನ್ನು ಕೇಂದ್ರ ಸರಕಾರಕ್ಕೆ ಆನ್‌‍ಲೈನ್‌ನಲ್ಲಿ ಕಳುಹಿಸುವುದಕ್ಕೆ ಸಮಯ ತಗಲುತ್ತದೆ. ಯಾಕೆ ಹೀಗಾಗಿದೆ?ಪ್ರಮುಖವಾಗಿ ಉತ್ತರ ಕರ್ನಾಟಕದ ಸ್ಯಾಂಪಲ್‌ಗಳ ಪರೀಕ್ಷೆ ವಿಳಂಬವಾಗುತ್ತಿದೆ. ಬಾಕಿ ಉಳಿದಿರುವುದರಲ್ಲಿ ಅಲ್ಲಿನ ಸ್ಯಾಂಪಲ್‌ಗಳ ಸಂಖ್ಯೆ ಹೆಚ್ಚು. ಯಾದಗಿರಿ ಮತ್ತು ಕಲಬುರಗಿ ಭಾಗದ ಸ್ಯಾಂಪಲ್‌ಗಳು ಬೆಂಗಳೂರಿನಲ್ಲಿ ಪರೀಕ್ಷೆಗೆ ಒಳಗಾಗುತ್ತಿವೆ. ಇತ್ತೀಚಿನ ದಿನಗಳಲ್ಲಿ ಈ ಭಾಗಕ್ಕೆ ಮುಂಬಯಿಯಿಂದ ಭಾರಿ ಪ್ರಮಾಣದಲ್ಲಿ ವಲಸಿಗರು ಬಂದಿರುವುದರಿಂದ ಸಹಜವಾಗಿ ಸ್ಯಾಂಪಲ್‌ ಸಂಖ್ಯೆಯೂ ಹೆಚ್ಚಿದೆ. ಅಂದರೆ ಮಾದರಿ ಸಂಗ್ರಹ ವೇಗವಾಗಿ ನಡೆಯುತ್ತಿದೆ. ಪರೀಕ್ಷೆ ಪ್ರಕ್ರಿಯೆ ನಿಧಾನವಾಗಿದೆ. ನಿಯಮ ಹೇಳುವುದೇನು?ಸೋಂಕಿತರೊಂದಿಗೆ ನೇರ ಸಂಪರ್ಕದಲ್ಲಿದ್ದವರು, ಪರೋಕ್ಷ ಸಂಪರ್ಕಿತರು, ಆರೋಗ್ಯ ಕಾರ್ಯಕರ್ತರ ಗಂಟಲ ದ್ರವದ ಮಾದರಿಯನ್ನು 12 ಗಂಟೆಯೊಳಗೆ ಪರೀಕ್ಷಿಸಬೇಕು. ಐಎಲ್‌ಐನಿಂದ ಬಳಲುತ್ತಿರುವವರ ಮಾದರಿಯನ್ನು 24 ಗಂಟೆಯೊಳಗೆ ಹಾಗೂ ಲಕ್ಷಣವಿಲ್ಲದವರ ಮಾದರಿಯನ್ನು 24 ರಿಂದ 48 ಗಂಟೆಯೊಳಗೆ ಪರೀಕ್ಷಿಸಬೇಕು. ಎಷ್ಟು ಬಾಕಿ?ಕಲಬುರಗಿ- 6314 ಯಾದಗಿರಿ- 4944 ರಾಯಚೂರು- 4883 ಮಂಡ್ಯ- 1355 ಬೆಳಗಾವಿ- 1009 ಬಾಗಲಕೋಟೆ- 978 ದಕ್ಷಿಣ ಕನ್ನಡ- 531 ಹಾಸನ- 531 ಶಿವಮೊಗ್ಗ- 349 ಗದಗ- 326 ಒಟ್ಟು- 21,102 (ಇದು ಸೋಮವಾರದ ಲೆಕ್ಕ)
from India & World News in Kannada | VK Polls https://ift.tt/3cgACiG
