ಹೊಸದಿಲ್ಲಿ: ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಜಾಗತಿಕ ಆಕರ್ಷಣೆಯನ್ನು ಹೊಂದಿರುವ ಟೂರ್ನಿಯಾಗಿದ್ದು, ವಿದೇಶಿ ಆಟಗಾರರಿಲ್ಲದೆ ಆತಿಥ್ಯ ವಹಿಸುವುದರಲ್ಲಿ ಅರ್ಥವಿಲ್ಲ ಎಂದು ಕಿಂಗ್ಸ್ ಇಲೆವೆನ್ ಪಂಜಾಬ್ ಸಹ-ಮಾಲೀಕ ನೆಸ್ ವಾಡಿಯಾ ಅಭಿಪ್ರಾಯ ಪಟ್ಟಿದ್ದಾರೆ. ಮಾರ್ಚ್‌ 29ರಂದು ಆರಂಭವಾಗಬೇಕಿದ್ದ ವಿಶ್ವದ ಶ್ರೀಮಂತ ಫ್ರಾಂಚೈಸಿ ಲೀಗ್‌, ಕೊರೊನಾ ವೈರಸ್ ಮಾರಣಾಂತಿಕ ಸೋಂಕಿನಿಂದ ಮುಂದೂಡಲಾಗಿದೆ. ಇದೀಗ ಮುಂದಿನ ಸೆಪ್ಟಂಬರ್‌ ಮತ್ತು ಅಕ್ಟೋಬರ್‌ ಅವಧಿಯಲ್ಲಿ ಐಪಿಎಲ್ `13ನೇ ಆವೃತ್ತಿಯನ್ನು ಆಯೋಜಿಸಲು ಬಿಸಿಸಿಐ ಎದುರು ನೋಡುತ್ತಿದೆ. ಅಕ್ಟೋಬರ್‌-ನವೆಂಬರ್‌ನಲ್ಲಿ ಆಸ್ಟ್ರೇಲಿಯಾ ಆತಿಥ್ಯದಲ್ಲಿ ಐಸಿಸಿ ಟಿ20 ವಿಶ್ವಕಪ್‌ ನಡೆಯದೇ ಇದ್ದರೆ ಮಾತ್ರ ಐಪಿಎಲ್ ನಡೆಸಲು ಸಾಧ್ಯ ಇಲ್ಲದೇ ಹೋದಲ್ಲಿ ಅಸಾಧ್ಯ. ಐಪಿಎಲ್ ಆಯೋಜಿಸುವ ಬಗ್ಗೆ ಫ್ರಾಂಚೈಸಿಗಳು ಮಿಶ್ರ ಅಭಿಪ್ರಾಯವನ್ನು ವ್ಯಕ್ತಪಡಿಸಿವೆ. ಪ್ರಯಾಣದ ನಿಯಮಗಳೊಂದಿಗೆ ಐಪಿಎಲ್ ಟೂರ್ನಿಯನ್ನು ಭಾರತೀಯ ಆಟಗಾರರೊಂದಿಗೆ ಮಾತ್ರ ನಡೆಸಬೇಕು ಎಂದು ರಾಜಸ್ಥಾನ ರಾಯಲ್ಸ್‌ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದೆ. ರಾಜಸ್ಥಾನ ರಾಯಲ್ಸ್‌ ಫ್ರಾಂಚೈಸಿ ಯೋಜನೆಯನ್ನು ಮೂರು ಬಾರಿ ಚಾಂಪಿಯನ್ಸ್‌ ಚೆನ್ನೈ ಸೂಪರ್‌ ಕಿಂಗ್ಸ್ ತಳ್ಳಿ ಹಾಕಿದೆ. ಇದೀಗ ಕಿಂಗ್ಸ್ ಇಲೆವೆನ್ ಪಂಜಾಬ್ ಕೂಡ ಅದೇ ಭಾವನೆಯನ್ನು ಪ್ರತಿಧ್ವನಿಸುತ್ತಿದೆ. "ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಭಾರತೀಯ ಆಟಗಾರರಿಂದ ನಡೆಯುವ ಅಂತಾರಾಷ್ಟ್ರೀಯ ಟೂರ್ನಿಯಾಗಿದೆ. ವಿಶ್ವದಲ್ಲಿಯೇ ಪ್ರೀಮಿಯರ್‌ ಕ್ರಿಕೆಟಿಂಗ್‌ ಈವೆಂಟ್‌ ಇದಾಗಿದೆ. ಈ ಟೂರ್ನಿಗೆ ಅಂತಾರಾಷ್ಟ್ರೀಯ ವೇದಿಕೆ ಬೇಕು ಹಾಗೂ ಇಂಟರ್‌ನ್ಯಾಷನಲ್‌ ಸ್ಟಾರ್‌ಗಳು ಬೇಕು," ಎಂದು ಪಿಟಿಐಗೆ ವಾಡಿಯಾ ತಿಳಿಸಿದ್ದಾರೆ. "ಆದರೆ, ಆ ಸಮಯದಲ್ಲಿ ಯಾವ ವಿದೇಶಿ ಆಟಗಾರರಿಗೆ ಪ್ರಯಾಣಿಸಲು ಅವಕಾಶವಿದೆ ಎಂಬುದನ್ನು ನೋಡಬೇಕಾಗಿದೆ (ನಿರ್ಬಂಧಗಳನ್ನು ಪರಿಗಣಿಸಿ). ಬಿಸಿಸಿಐಗೆ ಯಾವಾಗ ಟೂರ್ನಿ ನಡೆಯಬಹುದು ಎಂಬುದರ ಬಗ್ಗೆ ಲೆಕ್ಕಾಚಾರ ಮಾಡಲು ಹಲವಾರು ಅಸ್ಥಿರಗಳಿವೆ ಎಂದು ನಾನು ಭಾವಿಸುತ್ತೇನೆ. ನಾಳೆ ಪ್ರಕರಣಗಳು ಹೆಚ್ಚಾಗುತ್ತಿದ್ದರೆ, ಆಗ ಏನಾಗುತ್ತದೆ? ಈ ಕ್ಷಣಕ್ಕೆ ಕೋವಿಡ್ -19 ಹೊರತುಪಡಿಸಿ ಬೇರೆ ಯಾವುದನ್ನೂ ಯೋಚಿಸುವುದು ಅವಿವೇಕದ ಸಂಗತಿಯಾಗಿದೆ," ಎಂದು ಹೇಳಿದರು. ಜುಲೈ-ಆಗಸ್ಟ್‌ನಲ್ಲಿ ಭಾರತದಲ್ಲಿ ಸಾಂಕ್ರಾಮಿಕ ರೋಗವು ಉತ್ತುಂಗಕ್ಕೇರಲಿದೆ ಎಂದು ಕೆಲವು ತಜ್ಞರು ಸೂಚಿಸುವುದರೊಂದಿಗೆ, ವಾಡಿಯಾ ಐಪಿಎಲ್ ಬಗ್ಗೆ ಮಾತನಾಡುವುದು ಅಕಾಲಿಕವೆಂದು ನಂಬಿದ್ದಾರೆ. "ನಮ್ಮೆಲ್ಲರಿಗೂ ಮುಖ್ಯವಾದ ವಿಷಯವೆಂದರೆ ಪ್ರಸ್ತುತ ಪರಿಸ್ಥಿತಿಯನ್ನು ನಿಭಾಯಿಸುವುದು. ಇದು ಇನ್ನೊಂದು ಅಥವಾ ಎರಡು ತಿಂಗಳವರೆಗೆ ಇರಬಹುದು ಅಥವಾ ಹೆಚ್ಚು ಇರಬಹುದು. ಒಮ್ಮೆ ವೈರಸ್ ಕಡಿಮೆಯಾದ ನಂತರ, ಐಪಿಎಲ್ ಅನ್ನು ಯಾವಾಗ ನಡೆಸಬಹುದು ಮತ್ತು ಅದನ್ನು ಎಲ್ಲಿ ನಡೆಸಬಹುದು ಎಂಬುದರ ಕುರಿತು ನಾವು ಹೆಚ್ಚು ಸ್ಪಷ್ಟತೆಯನ್ನು ಹೊಂದಬಹುದು," ಎಂದು ವಾಡಿಯಾ ಹೇಳಿದರು. "ನನ್ನ ಅನುಭವದ ಪ್ರಕಾರ ಐಪಿಎಲ್ ಅನ್ನು ನೋಡಲು ಭಾರತೀಯ ಪ್ರೇಕ್ಷಕರು ಸಂತೋಷಪಡುತ್ತಾರೆ ಎಂದು ಖಾತ್ರಿಯಿದೆ. ಜರ್ಮನಿಯಲ್ಲಿ ಫುಟ್ಬಾಲ್ ಈಗಾಗಲೇ ಪ್ರಾರಂಭವಾಗಿದೆ ಮತ್ತು ಇಪಿಎಲ್ ಶೀಘ್ರದಲ್ಲೇ ಪ್ರಾರಂಭವಾಗುತ್ತಿದೆ. ಐಪಿಎಲ್ ನಡೆಯುವ ಸಾಧ್ಯತೆಯನ್ನು ನಾನು ನೋಡುತ್ತಿದ್ದೇನೆ. ಆದರೆ ಮುಂದಿನ ಎರಡು ತಿಂಗಳಾದರೂ ವೈರಸ್ ಅನ್ನು ಎದುರಿಸುವ ಅಗತ್ಯತೆ ಇದೆ." ಎಂದು ವಾಡಿಯಾ ತಿಳಿಸಿದ್ದಾರೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3dkJJ39
