ಪಾಟ್ನಾ: ಸರಣಿ ಲಾಕ್‌ಡೌನ್‌ನಿಂದಾಗಿ ಸಂಕಷ್ಟಕ್ಕೆ ಸಿಲುಕಿರುವ ವಲಸೆ ಕಾರ್ಮಿಕರಿಗಾಗಿ ಭಾರತೀಯ ರೈಲ್ವೆ ಇಲಾಖೆ ವಿಶೇಷ ಸೇವೆ ಒದಗಿಸುತ್ತಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಈ ಶ್ರಮಿಕ್ ರೈಲುಗಳ ಮೂಲಕ ಲಕ್ಷಾಂತರ ವಲಸೆ ಕಾರ್ಮಿಕರು ತಮ್ಮ ತಮ್ಮ ಸ್ವಂತ ರಾಜ್ಯಗಳಿಗೆ ಹೋಗುತ್ತಿದ್ದಾರೆ. ಸಂಕಷ್ಟದ ಸಮಯದಲ್ಲಿ ಮನೆ ತಲುಪಿಸುತ್ತಿರುವ ಶ್ರಮಿಕ್ ರೈಲುಗಳ ಕುರಿತು ವಲಸೆ ಕಾರ್ಮಿಕರು ಮೆಚ್ಚುಗೆಯ ಮಾತುಗಳನ್ನಾಡುತ್ತಿದ್ದಾರೆ. ಈ ಮಧ್ಯೆ ಮಿಜೋರಾಂಗೆ ತೆರಳುತ್ತಿದ್ದ ಶ್ರಮಿಕ್ ರೈಲೊಂದನ್ನು ಮಾರ್ಗ ಮಧ್ಯೆಯೇ ತಡೆದ ಗ್ರಾಮಸ್ಥರು, ರೈಲಿನಲ್ಲಿದ್ದ ಎಲ್ಲ ಪ್ರಯಣಿಕರಿಗೂ ಊಟ ಹಂಚಿದ ಘಟನೆ ಬಿಹಾರದಲ್ಲಿ ನಡೆದಿದೆ. ಮಿಜೋರಾಂನತ್ತ ತೆರಳುತ್ತಿದ್ದ ಶ್ರಮಿಕ್ ರೈಲನ್ನು ತಡೆದ ಗ್ರಾಮಸ್ಥರು, ತಂಡೋಪತಂಡವಾಗಿ ಬಂದು ಎಲ್ಲಾ ಪ್ರಯಾಣಿಕರು ಊಟ ಹಂಚಿದ್ದಾರೆ. ಪ್ರಯಾಣಿಕನೋರ್ವ ಮಾಡಿದ ಇದರ ವಿಡಿಯೋವೊಂದನ್ನು ಖುದ್ದು ಮಿಜೋರಾಂ ಮುಖ್ಯಮಂತ್ರಿ ತಮ್ಮ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಬಿಹಾರದ ಬೇಗುಸರಾಯ್‌ ಜಿಲ್ಲೆಯಲ್ಲಿ ನಡೆದ ಈ ಘಟನೆ ತಮ್ಮ ಅಂತರಂಗವನ್ನು ಮುಟ್ಟಿದೆ ಎಂದು ಟ್ವೀಟ್ ಮಾಡಿರುವ ಮಿಜೋರಾಂ ಮುಖ್ಯಮಂತ್ರಿ ಜೊರಾಮ್‌ಥಾಂಗ್, ಭಾರತದ ಒಗ್ಗಟ್ಟು ಸದಾಕಾಲ ಹೀಗೆಯೇ ಮುಂದುವರೆಯಲಿ ಎಂದು ಹಾರೈಸಿದ್ದಾರೆ.
from India & World News in Kannada | VK Polls https://ift.tt/3djJVQh
