ಕೊರೊನಾ ವೈರಸ್‌ ಸೋಂಕು ಹಾಗೂ ಲಾಕ್‌ಡೌನ್‌ ಕಾರಣದಿಂದ ನಗರದಲ್ಲಿ ಉದ್ಯೋಗ ಕಳೆದುಕೊಂಡ ಹಲವರು ಗ್ರಾಮಾಂತರ ಪ್ರದೇಶಕ್ಕೆ ತೆರಳಿ ಕೃಷಿ, ಹೈನುಗಾರಿಕೆಯಲ್ಲಿ ತೊಡಗಿಸಿಕೊಳ್ಳಲು ಆಸಕ್ತಿ ತೋರುತ್ತಿದ್ದಾರೆ. ಅಂತಹವರ ಪಾಲಿಗೆ ಅಕ್ಷಯಕಲ್ಪ ಹೊಸ ಆಶಾಕಿರಣವಾಗಿದೆ. ಸಾವಯವ ಹಾಲಿನ ಪ್ರಯೋಜನಗಳನ್ನು ಅರಿತವರಿಂದ ಬೇಡಿಕೆ ಹೆಚ್ಚಾಗುತ್ತಿರುವ ಕಾರಣ ಹೈನೋದ್ಯಮ ಅತ್ಯುತ್ತಮ ಆಯ್ಕೆಯಾಗಿದೆ. ಲಾಭದಾಯಕವಾಗಿಸಿಕೊಂಡು, ಉದ್ಯಮಿಯಾಗಿ ಬೆಳೆಯಬೇಕು ಎಂಬ ಗುರಿ ಹೊಂದಿರುವವರಿಗೆ ಅಕ್ಷಯಕಲ್ಪ ಸಂಸ್ಥೆ ಮಾರ್ಗದರ್ಶನ ನೀಡುವ ಮೂಲಕ ಕೃಷಿಗೆ ಒತ್ತು ನೀಡಿ ದಾರಿ ದೀಪವಾಗುತ್ತಿದೆ. ಬೆಂಗಳೂರಿನಲ್ಲಿ ಬೇಡಿಕೆಯಲ್ಲಿರುವ ಸಾವಯವ ಹಾಲಿನ ಶೇ.97ರಷ್ಟು ಮಾರುಕಟ್ಟೆಯನ್ನು ಹೊಂದಿರುವ ಮತ್ತು ಚೆನ್ನೈನಲ್ಲಿ ತನ್ನ ಮಾರುಕಟ್ಟೆ ವಿಸ್ತರಿಸಿರುವ ಅಕ್ಷಯಕಲ್ಪ, ಬರುವ ದಿನಗಳಲ್ಲಿ ಗ್ರಾಹಕರಿಂದ ಮತ್ತಷ್ಟು ಉತ್ತಮ ಸ್ಪಂದನೆಯ ನಿರೀಕ್ಷೆಯಲ್ಲಿದೆ.ಆರ್ಗಾನಿಕ್‌ ವರ್ಲ್ಡ್, ಸಾರಾ ಆರ್ಗಾನಿಕ್‌, ಲೂಮಿಯಾ, ನೆಫ್ಲರ್‌ ಸೂಪರ್‌ ಮಾರ್ಕೆಟ್‌, ಫುಡ್‌ ಹಾಲ್‌ ಸೇರಿದಂತೆ ಬೆಂಗಳೂರಿನ 256 ಸ್ಟೋರ್‌ಗಳಲ್ಲಿ ಅಕ್ಷಯಕಲ್ಪ ಹಾಲು ಮತ್ತು ಹಾಲಿನ ಉತ್ಪನ್ನಗಳು ಲಭ್ಯ ಇವೆ. ಹಾಲಿನ ಬೆಲೆ ಇತರೆ ಬ್ರಾಂಡ್‌ಗಳಿಗಿಂತ ಕಡಿಮೆ ಇದೆ. ಆದರೆ, ಗುಣಮಟ್ಟದಲ್ಲಿ ಮಾತ್ರ ರಾಜಿ ಇಲ್ಲ. ಶುದ್ಧ ಹಾಲು ಮತ್ತು ಸ್ಲಿಮ್‌ ಹಾಲು ಲಭ್ಯವಿದೆ. ಅದರ ಜೊತೆಗೆ ಮೊಸರು, ಪನೀರ್‌, ಚೀಸ್‌ ಕೂಡ ಮಾರಾಟ ಮಾಡಲಾಗುತ್ತಿದೆ. ಗ್ರಾಹಕರಿಗೆ ಖರೀದಿಗೆ ಅನುಕೂಲವಾಗುವಂತೆ ಕಂಪನಿ ಪ್ರತ್ಯೇಕ ಆ್ಯಪ್‌ ಕೂಡ ಹೊಂದಿದೆ.ಅಕ್ಷಯಕಲ್ಪ ಸಂಸ್ಥೆ ಸ್ಥಾಪನೆ ಹಿಂದೆ ರೋಚಕ ಕಥೆ ಇದೆ. ಹೈನೋದ್ಯಮದ ಸ್ಥಾಪಕರಾದ ಶಶಿಕುಮಾರ್ ಬೆಂಗಳೂರು ನಗರ ಜಿಲ್ಲೆಅತ್ತಿಬೆಲೆ ಸಮೀಪದ ಗುಡ್ಡಹಟ್ಟಿ ಗ್ರಾಮದ ಬಡ ಕೃಷಿ ಕುಟುಂಬದಲ್ಲಿ ಹುಟ್ಟಿದರು. ಶಶಿಕುಮಾರ್ ಅವರು ಉನ್ನತ ವ್ಯಾಸಂಗದ ಇಚ್ಛೆ ಹೊಂದಿದ್ದರೂ ಪಾಲಕರು ಶಕ್ತರಾಗಿರಲಿಲ್ಲ. ಕೊನೆಗೆ ಸಂಬಂಧಿಕರ ನೆರವು ಪಡೆದು ಸತತ ಪರಿಶ್ರಮದಿಂದ ಉತ್ತಮ ವ್ಯಾಸಂಗ ಮಾಡಿ ಅಮೆರಿಕದ ಶಿಕಾಗೋದಲ್ಲಿ ಸ್ನಾತಕೋತ್ತರ ಪದವಿ ಮುಗಿಸಿದರು.
ವಿಪ್ರೊ ಕಂಪನಿಯಲ್ಲಿಸಾಫ್ಟ್‌ವೇರ್‌ ಎಂಜಿನಿಯರ್‌ ಆಗಿ ಕೆಲಸಕ್ಕೆ ಸೇರಿ ದೇಶ-ವಿದೇಶದಲ್ಲಿ20 ವರ್ಷಗಳ ಕಾಲ ಅದೇ ಕ್ಷೇತ್ರದಲ್ಲಿ ದುಡಿದರು. ಆದರೆ ಕೃಷಿ ಕ್ಷೇತ್ರದ ಆಕರ್ಷಣೆ ಶಶಿಕುಮಾರ್ ಅವರನ್ನು ಸೆಳೆಯುತ್ತಲೇ ಇತ್ತು. ಕೃಷಿಯಲ್ಲಿಏನನ್ನಾದರೂ ಸಾಧಿಸಬೇಕು ಎಂಬ ಆಲೋಚನೆ ದೃಢವಾಯಿತು. ಎಂಜಿನಿಯರಿಂಗ್‌ ಕ್ಷೇತ್ರದ ರೀತಿ ಕೃಷಿ ಕ್ಷೇತ್ರದಲ್ಲೂ ರೋಲ್‌ ಮಾಡೆಲ್‌ಗಳನ್ನು ರೂಪಿಸಬೇಕೆಂದು ಯೋಚಿಸಿ ಉದ್ಯೋಗ ತೊರೆದು ಹೈನುಗಾರಿಕೆ ಬೆಳವಣಿಗೆ ಮತ್ತು ಸಂಶೋಧನೆಗೆ ಒತ್ತು ನೀಡಿದರು.
2010ರಲ್ಲಿ ಅಕ್ಷಯಕಲ್ಪ ಹೆಸರಿನ ಎನ್‌ಜಿಒ ಆರಂಭಿಸಿದರು. ನಂತರ ಬೆಳವಣಿಗೆಯನ್ನು ಗಮನಿಸಿ ಸಂಸ್ಥೆಯಾಗಿ ರೂಪಿಸಿದರು. ಮಹಿಳಾ ಸ್ವಸಹಾಯ ಕಲ್ಪನೆಯಲ್ಲಿ ಹೈನೋದ್ಯಮ ಆರಂಭಿಸಲು ಉತ್ತೇಜನ ನೀಡಲಾಯಿತು. ಆರಂಭದಲ್ಲಿಮಹಿಳೆಯರ ಉದ್ಯೋಗಕ್ಕೆ ಸಾಮಾಜಿಕ ಸಮಸ್ಯೆಗಳು ಎದುರಾದವು. ಎಲ್ಲವನ್ನೂ ಎದುರಿಸಿ ಕುಟುಂಬ ಸದಸ್ಯರನ್ನು ಕೌನ್ಸೆಲಿಂಗ್‌ ಮಾಡುವ ಮೂಲಕ ಹಾದಿಯನ್ನು ಸುಲಭಗೊಳಿಸಲಾಯಿತು. ಇದೀಗ ಅಕ್ಷಯಕಲ್ಪವು ನೂರಾರು ಉದ್ಯೋಗಿಗಳಿಗೆ, ಹೈನುಗಾರರಿಗೆ ದಾರಿದೀಪವಾಗುವ ಸಂಸ್ಥೆಯಾಗಿ ಬೆಳೆದಿದೆ.
'ಅಕ್ಷಯಕಲ್ಪವು ಹೈನೋದ್ಯಮ ಆರಂಭಿಸಲು ಸಾಲ ಸೌಲಭ್ಯ ಒದಗಿಸಿಕೊಡುವ ಜತೆಗೆ ಗೊಬ್ಬರ, ಮೇವಿನ ವ್ಯವಸ್ಥೆ ಮಾಡಲಿದೆ. ನೂರಾರು ಸಂಖ್ಯೆಯಲ್ಲಿಹಸುಗಳನ್ನು ಸಾಕಲು ಅವಕಾಶ ಇಲ್ಲ. ಬದಲಿಗೆ ಗರಿಷ್ಠ 20 ಹಸುಗಳನ್ನು ಮಾತ್ರ ಸಾಕಲು ಅವಕಾಶ ನೀಡಲಾಗುತ್ತದೆ'' ಎಂದು ಶಶಿಕುಮಾರ್ ತಿಳಿಸಿದರು.
''ತಾವು ಖರೀದಿಸುವ ಹಾಲಿನ ಮೂಲ, ಅದರ ಸಂಸ್ಕರಣೆ, ಪ್ಯಾಕೇಜಿಂಗ್‌ ಮತ್ತು ಪೂರೈಕೆ ಹೀಗೆ ಪ್ರತಿ ಹಂತದ ಬಗ್ಗೆ ಗ್ರಾಹಕ ತಿಳಿದುಕೊಳ್ಳುವ ಹಕ್ಕು ಹೊಂದಿದ್ದಾನೆ. ರೈತನಿಗೆ ಇದರಿಂದ ಎಷ್ಟು ಲಾಭ ಸಿಗುತ್ತದೆ ಎನ್ನುವುದು ಕೂಡ ಗ್ರಾಹಕ ಅರಿಯಬೇಕು. ರೈತನಿಗೆ ಅನುಕೂಲವಾಗುತ್ತಿದೆ ಎಂದಾಗ ಆ ಹಾಲು, ಹೈನೋತ್ಪನ್ನಗಳ ಖರೀದಿ ಮತ್ತು ಬಳಕೆಯಿಂದ ಗ್ರಾಹಕರಿಗೂ ಸಂತೋಷವಾಗುತ್ತದೆ. ಹೀಗಾಗಿ, ಗ್ರಾಹಕರು ಹಾಲು ಖರೀದಿಗೆ ಮೊದಲು ಅವುಗಳನ್ನು ಎಲ್ಲಿಂದ ಖರೀದಿ ಮಾಡಲಾಗುತ್ತಿದೆ, ರೈತರಿಗೆ ಎಷ್ಟು ಲಾಭ ಆಗುತ್ತಿದೆ ಎಂದು ಯೋಚಿಸಿ ಖರೀದಿಸಬೇಕು,'' ಎಂದು ಶಶಿಕುಮಾರ್ ಹೇಳಿದರು.
ಭವಿಷ್ಯದ ಆಲೋಚನೆಗಳು :
''ಹೈನೋದ್ಯಮದ ಕುರಿತು ಅತ್ಯಾಧುನಿಕ ಅಭಿವೃದ್ಧಿ ಮತ್ತು ಸಂಶೋಧನಾ ಕೇಂದ್ರ ಆರಂಭಿಸಬೇಕು, ಫಾಡರ್‌ಫೀಡ್‌ ಟೆಸ್ಟ್‌ ಸೆಂಟರ್‌ಆರಂಭ ಮಾಡಬೇಕು, ಜಾಗತಿಕ ಮಟ್ಟದ ರೈತರನ್ನು ಬೆಳೆಸಬೇಕು, ಸಂಶೋಧನಾ ಕೇಂದ್ರದಲ್ಲಿಅವರನ್ನೇ ನೇಮಕ ಮಾಡಿಕೊಳ್ಳಬೇಕು ಎಂಬ ಗುರಿ ಹೊಂದಲಾಗಿದೆ. ಈ ಎಲ್ಲ ಕೆಲಸಗಳಿಗೆ ಇನ್ನೂ 2 ವರ್ಷ ಕಾಲ ಹಿಡಿಯಬಹುದು,'' ಎಂದು ಶಶಿಕುಮಾರ್ ತಿಳಿಸಿದರು.
''ಹಾಲಿ ಅಕ್ಷಯಕಲ್ಪ ಸಂಸ್ಥೆಯು ಒಟ್ಟು 50 ಸಾವಿರ ಲೀಟರ್ ಹಾಲು ಮತ್ತು ಹೈನೋತ್ಪನ್ನಗಳನ್ನು ಗ್ರಾಹಕರಿಗೆ ಒದಗಿಸುತ್ತಿದೆ. ಈ ತಿಂಗಳ ಅಂತ್ಯದಲ್ಲಿಇನ್ನೂ 20,000 ದಿಂದ 30,000 ಲೀಟರ್ ಹಾಲಿಗೆ ಬೇಡಿಕೆ ಬರುವ ನಿರೀಕ್ಷೆ ಇದೆ,'' ಎಂದು ಶಶಿಕುಮಾರ್ ತಿಳಿಸಿದರು.
ಯೋಜನೆ ಸದುಪಯೋಗ ಅಗತ್ಯ
''ಕೃಷಿ ಮತ್ತು ಹೈನೋದ್ಯಮದಲ್ಲಿ ತೊಡಗಿಸಿಕೊಳ್ಳುವವರಿಗೆ ಸರಕಾರದಿಂದ ಸಾಕಷ್ಟು ಯೋಜನೆಗಳಿವೆ. ಸಹಾಯಧನ ಸಿಗುತ್ತದೆ. ಹೀಗಾಗಿ, ಅವುಗಳನ್ನು ಸದುಪಯೋಗಪಡಿಸಿಕೊಳ್ಳಬೇಕು. ಗುಣಮಟ್ಟ ಹೆಚ್ಚಿಸಿಕೊಳ್ಳುವ ನಿಟ್ಟಿನಲ್ಲಿಕೆಲಸ ಮಾಡಬೇಕಾಗಿದೆ,'' ಎನ್ನುತ್ತಾರೆ ಶಶಿಕುಮಾರ್.
''ಅಮೆರಿಕದಲ್ಲಿ ನಾನು 14 ವರ್ಷ ಕೆಲಸ ಮಾಡಿದ್ದೇನೆ. ಸಾವಯವ ಕೃಷಿ ಉತ್ಪನ್ನಗಳು, ಹೈನೋತ್ಪನ್ನಗಳಿಗೆ ಬೇಡಿಕೆ ಇದೆ. ಅದು ಇತ್ತೀಚೆಗೆ ಇನ್ನಷ್ಟು ಹೆಚ್ಚಾಗುತ್ತಿದೆ. ಅಮೆರಿಕದಲ್ಲಿಪೂರೈಕೆಯಾಗುವ ಹಾಲಿನಲ್ಲಿಶೇ. 16ರಷ್ಟು ಸಾವಯವ ಹಾಲಿನ ಪಾಲಿದೆ. ಸಾವಯವ ಹಾಗೂ ಗುಣಮಟ್ಟದ ಹಾಲು ಪೂರೈಕೆಯಲ್ಲಿ ನ್ಯೂಜಿಲ್ಯಾಂಡ್‌ ಮುಂಚೂಣಿಯಲ್ಲಿದೆ. ನಂತರ ಆಸ್ಪ್ರೇಲಿಯಾ ಇದೆ. ಗುಣಮಟ್ಟದ ಕಾರಣ ಅಮೆರಿಕ ಸೇರಿದಂತೆ ಹಲವು ಮಾರುಕಟ್ಟೆಗಳನ್ನು ನ್ಯೂಜಿಲ್ಯಾಂಡ್‌ ನಿಭಾಯಿಸುತ್ತಿವೆ. ಆದರೆ, ನಮ್ಮ ದೇಶದ ಹಾಲಿನ ಉತ್ಪನ್ನಗಳು ಜಾಗತಿಕ ಮಟ್ಟದ ಗುಣಮಟ್ಟಕ್ಕೆ ದೊಡ್ಡ ಪ್ರಮಾಣದಲ್ಲಿ ತಲುಪಿಲ್ಲ. ಕಳೆದ 15 ವರ್ಷಗಳಲ್ಲಿ ಸಾಕಷ್ಟು ಬದಲಾವಣೆ, ಗುಣಮಟ್ಟ ಸುಧಾರಣೆಯಾಗಿದೆ. ಆದರೆ, ಗುಣಮಟ್ಟ ಇನ್ನಷ್ಟು ಹೆಚ್ಚಳವಾಗಬೇಕು. ಆಗ ಅಮೆರಿಕ, ಯೂರೋಪ್‌ ಸೇರಿದಂತೆ ವಿವಿಧ ರಾಷ್ಟ್ರಗಳಿಗೆ ಹಾಲು ಮತ್ತು ಹಾಲಿನ ಉತ್ಪನ್ನಗಳನ್ನು ರಫ್ತು ಮಾಡಲು ವಿಫುಲ ಅವಕಾಶಗಳು ದೊರೆಯುತ್ತವೆ. ಇದರಿಂದ ರೈತರ ಆದಾಯದ ಜೊತೆಗೆ ದೇಶದ ಕರೆನ್ಸಿ ಮೌಲ್ಯ ಹೆಚ್ಚಳದಲ್ಲಿ ರೈತರು ಕೊಡುಗೆ ನೀಡಿದಂತಾಗುತ್ತದೆ'' ಎಂದು ಶಶಿಕುಮಾರ್ ಹೇಳಿದರು.
''ಕಳೆದ ವರ್ಷದಲ್ಲಿ(2019) ಅಕ್ಷಯಕಲ್ಪ ಬರೋಬ್ಬರಿ 65 ಕೋಟಿ ರೂ. ಹಾಲಿನ ಉತ್ಪನ್ನಗಳನ್ನು ಮಾರಾಟ ಮಾಡಿದೆ. ಹಿಂದಿನ ವರ್ಷಗಳಲ್ಲಿ ಕ್ರಮವಾಗಿ 29 ಕೋಟಿ ರೂ., 19 ಕೋಟಿ ರೂ. ಮತ್ತು 14 ಕೋಟಿ ರೂ. ಮೌಲ್ಯದ ಉತ್ಪನ್ನಗಳು ಮಾರಾಟವಾಗಿವೆ. ಆದರೆ, ಸಂಸ್ಥೆಗೆ ಈವರೆಗೆ ಲಾಭವಾಗಿಲ್ಲ. ಹಾಲು ಮಾರಾಟ ಪ್ರಮಾಣ 1 ಲಕ್ಷ ಲೀಟರ್‌ಗೆ ಏರಿದರೆ ಸಂಸ್ಥೆಗೆ ಲಾಭ ಸಿಗಬಹುದು. ಈವರೆಗೆ ಕೇವಲ ಹೂಡಿಕೆ ಮಾತ್ರ ಮಾಡುತ್ತಿದ್ದೇವೆ. ಆದರೆ, ಬೆಳವಣಿಗೆ ಇದೆ. ಹಿಂದಿನ ಎರಡು ವರ್ಷಗಳಲ್ಲಿಅಕ್ಷಯ ಕಲ್ಪ ಹಾಲಿನ ಮಾರಾಟವೂ ದುಪ್ಪಟ್ಟಾಗಿದೆ. ಜನರಲ್ಲಿಸಾವಯವ ಹಾಲಿನ ಬಗ್ಗೆ ಹೆಚ್ಚಿನ ಅರಿವು ಮೂಡುತ್ತಿದೆ. ಹಾಲಿನ ಗುಣಮಟ್ಟ, ರುಚಿ ಸವಿದವರು ಮತ್ತೆ ಅದೇ ಹಾಲು ಖರೀದಿಸಲು ಬಯಸುವರು'' ಎಂದು ಶಶಿಕುಮಾರ್ ತಿಳಿಸಿದರು.
ಕೃಷಿಕರು ರೋಲ್‌ ಮಾಡೆಲ್‌ ಆಗಬೇಕು:
''ಎಂಜಿನಿಯರಿಂಗ್‌, ವೈದ್ಯಕೀಯ ಸೇರಿದಂತೆ ಕೃಷಿಯೇತರ ವಲಯಗಳಲ್ಲಿರೋಲ್‌ಮಾಡೆಲ್‌ಗಳು ಇರುವಂತೆ ಹೈನೋದ್ಯಮ, ಕೃಷಿಯಲ್ಲೂಮಾದರಿ ಕೃಷಿಕರು ಬೆಳೆಯಬೇಕು. ವ್ಯವಸಾಯ, ಹೈನೋದ್ಯಮವನ್ನು ಉದ್ದಿಮೆಯಂತೆ ಅಭಿವೃದ್ಧಿಪಡಿಸಬೇಕು. ನಗರಕ್ಕೆ ಹೋಗಿ ಏನಾದರೂ ಕೆಲಸ ಮಾಡಿ ಬೆಳೆಯುತ್ತೇನೆ ಎನ್ನುವಂತೆ ವ್ಯವಸಾಯ ಮಾಡುತ್ತೇನೆ ಎನ್ನುವ ಧೈರ್ಯ ಬರಬೇಕು. ರೈತರಿಗೆ ಲಾಭ ಇರಬೇಕು. ಅದಕ್ಕೆ ತಕ್ಕಂತೆ ಗ್ರಾಹಕರು ಇರಬೇಕು. ರೈತರಿಗೆ ಅನುಕೂಲ ಆಗುತ್ತದೆ ಎಂಬ ಭಾವನೆಯೊಂದಿಗೆ ಗ್ರಾಹಕರು ರೈತರ ಬೆಳವಣಿಗೆಗೆ ಸಹಕರಿಸಬೇಕು,'' ಎಂದು ಶಶಿಕುಮಾರ್ ಹೇಳಿದರು.
ಅಕ್ಷಯ ಕಲ್ಪ ಸಂಸ್ಥೆಯು ಪ್ರತಿ ಲೀಟರ್ ಹಾಲಿಗೆ 47 ರೂ. ನೀಡುತ್ತದೆ. ಆರಂಭಿಕ ಹಂತದಲ್ಲಿಹೈನೋದ್ಯಮ ಆರಂಭಿಸುವವರು ಹೂಡಿಕೆ ಮಾಡಬೇಕಾಗುತ್ತದೆ. ನಂತರದಲ್ಲಿಉತ್ತಮ ಆದಾಯ ಇರುತ್ತದೆ.
ನಿರಂತರ ನೀರು, ಮೇವು ಪೂರೈಕೆ ಇರಲಿ:
ಗುಣಮಟ್ಟದ ಹಾಲು ಮತ್ತು ಉತ್ಪಾದನೆ ಹೆಚ್ಚಳ ಆಗಬೇಕೆಂದರೆ ಹಸುಗಳಿಗೆ ಮೇವು ಮತ್ತು ನೀರಿನ ಕೊರತೆಯಾಗಬಾರದು. ಸೂಕ್ತ ರೀತಿಯಲ್ಲಿಪೂರೈಸಿದರೆ ಪ್ರತಿದಿನ ಬೆಳಗ್ಗೆ ಮತ್ತು ಸಂಜೆ ತಲಾ 4 ಲೀಟರ್‌ನಂತೆ ಒಂದು ಹಸುವಿನಿಂದ 8 ಲೀಟರ್ ಹಾಲು ಕರೆಯಬಹುದು.
ಆಸಕ್ತರಿಗೆ ಅವಕಾಶ:
ಅಕ್ಷಯಕಲ್ಪ ಸಂಸ್ಥೆಯ ನೆರವಿನೊಂದಿಗೆ ಹೈನೋದ್ಯಮ ಮಾಡುತ್ತೇವೆ ಎನ್ನುವ ಎಲ್ಲರನ್ನೂ ಸೇರಿಸಿಕೊಳ್ಳುವ ಬದಲು ಕೆಲವರನ್ನು ಮಾತ್ರ ಅಥವಾ ಗ್ರಾಮದಲ್ಲಿಒಬ್ಬರನ್ನು ಮಾತ್ರ ಆಯ್ಕೆ ಮಾಡಿಕೊಳ್ಳಲಾಗುತ್ತದೆ. ಕೃಷಿಯಲ್ಲಿಆಸಕ್ತಿ ಹೊಂದಿದ್ದು ಸುಮಾರು 3ರಿಂದ 5 ಎಕರೆ ಜಮೀನು, ಸಾವಯವ ಕೃಷಿ ಕ್ರಮಗಳ ಅಳವಡಿಕೆ, ಸೆಗಣಿ ಗೊಬ್ಬರ ಉತ್ಪಾದನೆ, ಹಸುಗಳಿಗೆ ಮೇವು ಮತ್ತು ನೀರು ಪೂರೈಕೆ, ಹಾಲನ್ನು ನೇರವಾಗಿ ಯಂತ್ರದ ಮೂಲಕ ಕರೆದು ಸಂಸ್ಕರಣಾ ಘಟಕಕ್ಕೆ ತಲುಪಿಸುವ ಕುರಿತು ತರಬೇತಿ ಪಡೆದುಕೊಂಡು ಅದನ್ನು ಅಳವಡಿಸಿಕೊಳ್ಳುವವರಿಗೆ ಆದ್ಯತೆ ನೀಡಲಾಗುತ್ತದೆ.
ಅಕ್ಷಯಕಲ್ಪ ಸಂಸ್ಥೆಯಿಂದ ಸಾವಯವ ಕೃಷಿಯಲ್ಲಿತೊಡಗಿಸಿಕೊಂಡಿರುವ 200 ರೈತರು ಎಲ್ಲಖರ್ಚುಗಳನ್ನು ಕಳೆದು ತಿಂಗಳಿಗೆ ಸರಾಸರಿ 65 ಸಾವಿರ ರೂ. ಆದಾಯ ಗಳಿಸುತ್ತಿದ್ದಾರೆ. 200 ಜನರಲ್ಲಿ89 ಜನ ಮಹಿಳೆಯರಿದ್ದಾರೆ. ಕೃಷಿ ಭೂಮಿ ಇದ್ದರೂ ವಿವಿಧ ಕಾರಣಗಳಿಂದ ಕೃಷಿ ಮಾಡಲಾಗದೆ ಕ್ಯಾಬ್‌ ಚಾಲನೆ ಹಾಗೂ ಇನ್ನಿತರ ಕೆಲಸ ಅರಸಿ ನಗರದತ್ತ ತೆರಳಿ ವಾಪಸ್‌ ಬಂದು ಅಕ್ಷಯ ಕಲ್ಪ ಸಂಸ್ಥೆಯ ಮೂಲಕ ಹೈನೋದ್ಯಮದಲ್ಲಿತೊಡಗಿಸಿಕೊಂಡವರು 62 ಜನರಿದ್ದಾರೆ.
300 ಜನರಿಗೆ ಉದ್ಯೋಗ:
ಅಕ್ಷಯಕಲ್ಪ ಹೈನೋದ್ಯಮದಲ್ಲಿ200 ರೈತರು ಸೇರಿ 300 ಉದ್ಯೋಗಿಗಳಾಗಿದ್ದಾರೆ. ತಿಪಟೂರಿನಲ್ಲಿಹಾಲಿನ ಘಟಕ ಇದೆ. ತಿಪಟೂರಿನಿಂದ 50 ಕಿ.ಮೀ ಸುತ್ತಲಿನ ಪ್ರದೇಶಗಳಲ್ಲಿನ ಗ್ರಾಮಗಳ ರೈತರನ್ನು ಆಯ್ಕೆ ಮಾಡಿ ಹೈನೋದ್ಯಮದಲ್ಲಿತೊಡಗಿಸಿಕೊಳ್ಳಲಾಗಿದೆ. ತಿಪಟೂರಿನಿಂದ ಹಾಲು ಬೆಂಗಳೂರಿಗೆ ಬರುತ್ತದೆ. ಸಾವಯವ ಹಾಲಿನ ದರ 70 ರೂ. ಇದೆ. ಚೆನ್ನೈನಲ್ಲೂಅಕ್ಷಯ ಕಲ್ಪ ಹಾಲು ಮಾರಾಟ ಮತ್ತು ಹೈನೋದ್ಯಮ ಆರಂಭಿಸಲು ಯೋಜಿಸಲಾಗಿದೆ.
30 ಸಾವಿರ ಲೀಟರ್‌ಹಾಲು, 5000 ಲೀಟರ್ ಮೊಸರು, 2000 ಲೀಟರ್ ಪನ್ನೀರ್‌ ಮತ್ತು ಚೀಸ್‌ ಮತ್ತಿತರ ಉತ್ಪನ್ನಗಳ ರೂಪದಲ್ಲಿಮಾರಾಟವಾಗುತ್ತಿದೆ. ''ಸಾವಯವ ವಸ್ತುಗಳಿಗೆಂದೇ ಮಾರುಕಟ್ಟೆ ಇಲ್ಲ. ಆದರೆ, ನಾವು ಅದನ್ನು ಸೃಷ್ಟಿ ಮಾಡಬೇಕು. ಜನರಿಗೆ ಈ ಕುರಿತು ಅರಿವು, ಜ್ಞಾನ ಮೂಡಿದಾಗ ಮಾತ್ರ ಅವುಗಳನ್ನು ಖರೀದಿಸುತ್ತಾರೆ,'' ಎನ್ನುವುದು ಶಶಿಕುಮಾರ್ ಅವರ ಅಭಿಪ್ರಾಯ.
ಅಕ್ಷಯಕಲ್ಪ ಹಾಲು ಕರೆಯುವ ಕೇಂದ್ರದಲ್ಲಿ ಸ್ವಚ್ಛತೆಗೆ ಅತಿ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ. ಯಂತ್ರದ ಮೂಲಕ ಹಾಲು ಕರೆದು ಅದೇ ಸ್ಥಳದಲ್ಲೇ ಪರೀಕ್ಷೆಗೆ ಒಳಪಡಿಸಿ ಆ್ಯಂಟಿ ಬಯೋಟಿಕ್‌ ಪರೀಕ್ಷೆಯನ್ನು ಕೂಡ ಅಲ್ಲೇ ಮಾಡಲಾಗುತ್ತದೆ. ಈ ಡೇಟಾವನ್ನು ಕ್ಲೌಡ್‌ನಲ್ಲಿ ಸಂಗ್ರಹಿಸಿಡಲಾಗುತ್ತದೆ. ಪ್ರತಿ ಹೊಲದಲ್ಲೂ ಶೀತಲೀಕರಣ ಘಟಕ ಇರುತ್ತದೆ. ಹೀಗಾಗಿ, ಹಾಲನ್ನು ಅಲ್ಲೇ ಸಂಗ್ರಹಿಸಿಡಲಾಗುತ್ತದೆ. ಹೊಲದಿಂದ ಹಾಲು ಘಟಕ ತಲುಪುತ್ತದೆ. ಘಟಕದಲ್ಲಿವಿವಿಧ ಹೆಸರುಗಳು ಮತ್ತು ಗುಣಮಟ್ಟದ ಆಧಾರದ ಮೇಲೆ ಗ್ರಾಹಕರ ಬೇಡಿಕೆ ಮತ್ತು ಅಗತ್ಯಕ್ಕೆ ತಕ್ಕಂತೆ ಪ್ಯಾಕಿಂಗ್‌ ಮಾಡಿ ಮಾರುಕಟ್ಟೆಗೆ ಕಳುಹಿಸಲಾಗುತ್ತದೆ. ಸಾವಯವ ಹಾಲಿನಲ್ಲಿ ಕೊಬ್ಬಿನಂಶವನ್ನು ತೆಗೆಯುವುದಿಲ್ಲ.
ಸಾವಯವ ಗುಣಮಟ್ಟ ಪ್ರಮಾಣಪತ್ರ
ಕೇಂದ್ರ ಕೃಷಿ ಇಲಾಖೆಯಿಂದ ಮಾನ್ಯತೆ ಪಡೆದಿರುವ ಅಫಿಡಾ ಎಂಬ ಸಂಸ್ಥೆ ಹಾಲಿನ ಗುಣಮಟ್ಟವನ್ನು ಪ್ರಮಾಣೀಕರಿಸುತ್ತದೆ. ವರ್ಷಕ್ಕೊಮ್ಮೆ ಮತ್ತು ದಿಢೀರ್‌ ಆಗಿಯೂ ಆಡಿಟ್‌ ಮಾಡಬಹುದು. ಸಾವಯವ ಹಾಲಿಗೆ ಚಿಕ್ಕಮಗಳೂರಿನ ಕಡೂರಿನಿಂದ ಹಿಡಿದು ಚಿತ್ರದುರ್ಗವರೆಗಿನ ದೇಶಿಯ ಸೀಮೆ ಹಸುಗಳನ್ನು ಬಳಸಲಾಗುತ್ತದೆ. ಅದೇ ರೀತಿ ಕ್ರಾಸ್‌ ಬ್ರೀಡ್‌, ಹಳ್ಳಿ ಕಾಡು, ಅಮೃತ್‌ಮಹಲ್‌ ತಳಿ ಕೂಡ ಇವೆ.
ಕೊರೊನಾ ಭೀತಿಯ ಬಳಿಕ ಪ್ರತಿದಿನ 20 ಕ್ಕೂ ಹೆಚ್ಚು ಜನರು ಕರೆ ಮಾಡಿ ಅಕ್ಷಯ ಕಲ್ಪ ಹೈನೋದ್ಯಮ ಕಾರ್ಯಕ್ರಮದಲ್ಲಿಭಾಗವಹಿಸಬಹುದೇ ಎಂದು ಕೇಳುತ್ತಿದ್ದಾರೆ. ನೇರ ತರಬೇತಿ ಸಾಧ್ಯವಿಲ್ಲ. ಹೀಗಾಗಿ, ವರ್ಚುವಲ್‌ ತರಬೇತಿ ನೀಡುತ್ತಿದ್ದೇವೆ. ಮುಂದಿನ ವರ್ಷಗಳಲ್ಲಿನಮ್ಮ ಸಂಸ್ಥೆಯಲ್ಲಿಇನ್ನು 500 ಜನ ಕೆಲಸ ಮಾಡಬಹುದು. ಈ ನಿಟ್ಟಿನಲ್ಲಿಕೆಲಸ ಮಾಡುತ್ತಿದ್ದೇವೆ. ತಿಪಟೂರು ಸುತ್ತಮುತ್ತ ಹೆಚ್ಚಿನ ಗಮನ ಹರಿಸಿದ್ದೇವೆ ಎನ್ನುತ್ತಾರೆ ಶಶಿಕುಮಾರ್.
ಕೊರೊನಾ ವೇಳೆ ಪೂರೈಕೆ ವ್ಯತ್ಯಯವಿಲ್ಲ:
ಬೆಂಗಳೂರಿನಲ್ಲಿ 45 ಸಾವಿರ ಮನೆಗಳಿಗೆ 42 ಸಾವಿರ ಲೀಟರ್ ಹಾಲು ಪೂರೈಕೆಯಾಗುತ್ತಿದೆ. ಕೊರೊನಾ ಭೀತಿಯ ಕಾರಣದಿಂದ ಹಾಲಿನ ಪೂರೈಕೆಯಲ್ಲಿ ಯಾವುದೇ ವ್ಯತ್ಯಯ ಉಂಟಾಗಿಲ್ಲ. ಸೋಂಕು ಹರಡದಂತೆ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಂಡು ಹಾಲಿನ ಪೂರೈಕೆ ನಿರಂತರವಾಗಿರುವಂತೆ ನೋಡಿಕೊಳ್ಳಲಾಗಿದೆ. ಸ್ವಚ್ಛತೆ ಹಾಗೂ ಸುರಕ್ಷತೆ ಕಾಪಾಡಿಕೊಂಡು, ಸ್ಯಾನಿಟೈಸೇಷನ್‌, ಮಾತ್ರ ಬಳಕೆ ಮಾಡಿಕೊಂಡು ಪೂರೈಕೆ ಮಾಡಲಾಗುತ್ತದೆ. ಅಕ್ಷಯ ಕಲ್ಪ ಹಾಲು ಉತ್ಪಾದಿಸುವ ರೈತನ ಹೊಲಕ್ಕೆ ಕಾಲಿಡುವ ಮೊದಲೇ ಸ್ಯಾನಿಟೈಸೇಷನ್‌ ಪ್ರಕ್ರಿಯೆ ಮಾಡಲಾಗುತ್ತದೆ.
from India & World News in Kannada | VK Polls https://ift.tt/2TQiHJq
