ಹೊಸದಿಲ್ಲಿ: ಕೊರೊನಾ ವೈರಸ್‌ನಿಂದಾಗಿ ಜಾಗತಿಕ ಕ್ರೀಡಾ ಚಟುವಟಿಕೆಗಳು ಕಳೆದ ಎರಡು ತಿಂಗಳುಗಳಿಂದ ಸ್ಥಗಿತವಾಗಿದ್ದವು. ಇದೀಗ ಒಂದೊಂದಾಗಿಯೇ ಕಟ್ಟುನಿಟ್ಟಿನ ನಿಯಮಗಳ ಅಡಿಯಲ್ಲಿ ಗರಿಗೆದರುತ್ತಿವೆ. ಅದರಂತೆ ಜುಲೈನಲ್ಲಿ ಇಂಗ್ಲೆಂಡ್‌ ಹಾಗೂ ವೆಸ್ಟ್‌ ಇಂಡೀಸ್ ನಡುವೆ ನಡೆಯುವ ಟೆಸ್ಟ್‌ ಸರಣಿಗೆ ಗ್ರೀನ್‌ ಸಿಗ್ನಲ್‌ ನೀಡಿದೆ ಎಂದು ಕೆರಿಬಿಯನ್‌ ಕ್ರಿಕೆಟ್ ಮಂಡಳಿ ತಿಳಿಸಿದೆ. ಜೂನ್‌ ತಿಂಗಳಲ್ಲಿಯೇ ವೆಸ್ಟ್‌ ಇಂಡೀಸ್ ತಂಡ ಟೆಸ್ಟ್‌ ಸರಣಿ ಆಡಲು ಇಂಗ್ಲೆಂಡ್‌ಗೆ ಪ್ರವಾಸ ಕೈಗೊಳ್ಳಬೇಕಾಗಿತ್ತು. ಆದರೆ, ಕೊರೊನಾ ವೈರಸ್‌ ಇಡೀ ವಿಶ್ವದಾದ್ಯಂತ ವ್ಯಾಪಕವಾಗಿ ಹರಡಿದ್ದರಿಂದ ಸರಣಿಯನ್ನು ಜುಲೈಗೆ ಮುಂದೂಡಲಾಗಿತ್ತು. ಇದೀಗ ಇಂಗ್ಲೆಂಡ್‌ ಹಾಗೂ ವೇಲ್ಸ್‌ ಕ್ರಿಕೆಟ್ ಅಕಾಡೆಮಿಯು ಜುಲೈ ತಿಂಗಳಲ್ಲಿ ಮೂರು ಪಂದ್ಯಗಳ ಟೆಸ್ಟ್‌ ಸರಣಿ ಆಯೋಜಿಸಲು ಎದುರು ನೋಡುತ್ತಿದೆ. "ಇಂಗ್ಲೆಂಡ್‌ ಪ್ರವಾಸದ ಅವಧಿಯಲ್ಲಿ ಆಟಗಾರರು ಮತ್ತು ಸಿಬ್ಬಂದಿಯನ್ನು ಜೈವಿಕ ಸುರಕ್ಷಿತ ವಾತಾವರಣದಲ್ಲಿ ಇರಿಸಲು ವಿವರವಾದ ಯೋಜನೆಗಳನ್ನು ಕ್ರಿಕೆಟ್ ವೆಸ್ಟ್‌ ಇಂಡೀಸ್ ಸ್ವೀಕರಿಸಿದೆ ಮತ್ತು ಪರಿಶೀಲಿಸಿದೆ. ಈ ಸರಣಿಯ ಎಲ್ಲಾ ಪಂದ್ಯಗಳನ್ನು 'ಮುಚ್ಚಿದ ಕ್ರೀಡಾಂಗಣ'ಗಳಲ್ಲಿ ಆಡಿಸಲಾಗುತ್ತಿದೆ," ಎಂದು ತನ್ನ ಹೇಳಿಕೆಯಲ್ಲಿ ತಿಳಿಸಿದೆ. ಇಂಗ್ಲೆಂಡ್‌ ಪ್ರವಾಸದ ವೇಳೆ ಆಟಗಾರರ ಮತ್ತು ಸಹಾಯಕ ಸಿಬ್ಬಂದಿಯ ಚಲನೆ ಮತ್ತು ಇದಕ್ಕೆ ಅನುಕೂಲವಾಗಲು ತನ್ನ ರಾಷ್ಟ್ರೀಯ ಸರ್ಕಾರದಿಂದ ಅನುಮತಿ ಪಡೆಯುವುದಾಗಿ ಕ್ರಿಕೆಟ್ ವೆಸ್ಟ್‌ ಇಂಡೀಸ್ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ. ಕೈಗೊಳ್ಳುವ ಎಲ್ಲ ಸದಸ್ಯರನ್ನು ಮೆಡಿಕಲ್‌ ಸ್ಕ್ರೀನಿಂಗ್‌ ಹಾಗೂ ಟೆಸ್ಟ್‌ಗೆ ಒಳಪಡಿಸಲಾಗುತ್ತದೆ. ಜತೆಗೆ, ಇಂಗ್ಲೆಂಡ್‌ಗೆ ತೆರಳಲು ಖಾಸಗಿ ವಿಮಾನವನ್ನು ಬಳಸಿಕೊಳ್ಳಲಾಗುವುದು ಎಂದು ಹೇಳಿದೆ. ಮೂರು ಪಂದ್ಯಗಳ ಟೆಸ್ಟ್‌ ಸರಣಿಗಾಗಿ ಇಂಗ್ಲೆಂಡ್‌ ಹಾಗೂ ವೇಲ್ಸ್‌ ಕ್ರಿಕೆಟ್ ಅಕಾಡೆಮಿಯು ಅತ್ಯುತ್ತಮ ಆತಿಥ್ಯವನ್ನು ಒದಗಿಸಲಿದೆ ಎಂದು ನಾವು ಭಾವಿಸಿದ್ದೇವೆ. ಯುಕೆ ಸರ್ಕಾರದಿಂದ ಸರಣಿಯ ಯೋಜನೆಗಳ ಒಪ್ಪಿಗೆಗಾಗಿ ಕಾಯುತ್ತಿದೆ ಎಂದು ಕ್ರಿಕೆಟ್ ವೆಸ್ಟ್‌ ಇಂಡೀಸ್ ತಿಳಿಸಿದೆ. ವೆಸ್ಟ್‌ ಇಂಡೀಸ್ ಹಾಗೂ ಇಂಗ್ಲೆಂಡ್‌ ನಡುವಿನ ಟೆಸ್ಟ್‌ ಸರಣಿ ಆಯೋಜನೆ ಕುರಿತಂತೆ ಇಸಿಬಿಯು ಸರ್ಕಾರದ ಸಚಿವರೊಂದೊಗೆ ಒಪ್ಪಂಧ ಮಾಡಿಕೊಂಡಿದೆ ಎಂಬುದನ್ನು ಬ್ರಿಟನ್‌ನ ಸನ್‌ ಸುದ್ದಿ ಪತ್ರಿಕೆ ಶುಕ್ರವಾರ ವರದಿ ಮಾಡಿತ್ತು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/2TSs3Eo
