ಹೊಸದಿಲ್ಲಿ: ಬುದ್ದಿವಂತ ಕ್ರಿಕೆಟಿಗ ಎಂದು ಗುರುತಿಸಿಕೊಂಡಿರುವ ಮಾಜಿ ನಾಯಕ ಮಹೇಂದ್ರ ಸಿಂಗ್‌ ಧೋನಿಗೆ ಭಾರತೀಯ ಕ್ರಿಕೆಟ್‌ನಲ್ಲಿ ಇನ್ನೂ ಅವಕಾಶಗಳಿವೆ ಎಂದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯ ಮಾಜಿ ಖಜಾಂಚಿ ಅನಿರುದ್ದ್‌ ಚೌಧರಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. "ಧೋನಿ ಇನ್ನೂ ಫಿಟ್ ಆಗಿ ಇದ್ದು, ಭಾರತದಲ್ಲಿಯೇ ಅತ್ಯಂತ ಶ್ರೇಷ್ಠ ವಿಕೆಟ್‌ ಕೀಪರ್‌ ಆಗಿದ್ದಾರೆ ಹಾಗೂ ಕ್ರಿಕೆಟ್‌ನ ಅತ್ಯಂತ ಬುದ್ದಿವಂತ ಆಟಗಾರರಾಗಿದ್ದಾರೆ," ಎಂದು ಅವರು ನೀರಜ್‌ ಮೋದಿ ಶಾಲೆಯ ಕಾರ್ಯಕ್ರಮವೊಂದರಲ್ಲಿ ತಿಳಿಸಿದ್ದಾರೆ. "ಪಂದ್ಯದ ಸಂದರ್ಭದಲ್ಲಿ ನೀವು ಗಮನಿಸಬಹುದು, ಆಟಗಾರರನ್ನು ಬಲಕ್ಕೆ ಹಾಗೂ ಎಡಗೈ ಚಲಿಸುವಂತೆ ಅವರು ಮಾಡುತ್ತಿರುತ್ತಾರೆ. ಆಟಗಾರರು ತಾನು ನಿಂತಿದ್ದ ಸ್ಥಳದಲ್ಲೇ ಇನಿಂಗ್ಸ್‌ ಅನ್ನು ಮುಗಿಸಿರುತ್ತಾರೆ. ಅಷ್ಟರ ಮಟ್ಟಿಗೆ ಧೋನಿ ಅಂಗಳದಲ್ಲಿ ಕಾರ್ಯಪ್ರವೃತ್ತರಾಗಿರುತ್ತಾರೆ. ಎಲ್ಲದಕ್ಕಿಂತ ಮುಖ್ಯವಾಗಿ ಅವರು ತೀರ್ಮಾನ ತೆಗೆದುಕೊಳ್ಳುವುದರಲ್ಲಿ ಅತ್ಯುತ್ತಮರಾಗಿದ್ದಾರೆ," ಎಂದು ವಿವರಿಸಿದರು. ವಿಶ್ವದ ಶ್ರೀಮಂತ ಫ್ರಾಂಚೈಸಿ ಲೀಗ್‌ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಟಿಆರ್‌ಪಿ ಅಲ್ಲದಿದ್ದರೂ ದೇಶಿ ಕ್ರಿಕೆಟಿಗರಿಗೋಸ್ಕರವಾದರೂ ನಡೆಯಬೇಕು ಎಂದು ಅನಿರುದ್ದ್‌ ಚೌಧರಿ ಹೇಳಿದ್ದಾರೆ. ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಮಾರ್ಚ್‌ 29 ರಂದೇ ಆರಂಭವಾಗಬೇಕಿತ್ತು. ಕೊರೊನಾ ವೈರಸ್‌ ಇಡೀ ವಿಶ್ವದಾದ್ಯಂತ ವ್ಯಾಪಕವಾಗಿ ಹರಡಿದ್ದರಿಂದ 13ನೇ ಆವೃತ್ತಿಯನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿದೆ. ಇದೇ ವರ್ಷ ಅಕ್ಟೋಬರ್‌ ಮತ್ತು ನವೆಂಬರ್‌ನಲ್ಲಿ ಆಸ್ಟ್ರೇಲಿಯಾ ಆತಿಥ್ಯದಲ್ಲಿ ಐಸಿಸಿ ಟಿ20 ವಿಶ್ವಕಪ್ ನಡೆಯಬೇಕಿದೆ. ಒಂದು ವೇಳೆ ಅಕ್ಟೋಬರ್‌ ವೇಳೆಗೆ ಕೊರೊನಾ ವೈರಸ್‌ ಒಂದು ಹಂತಕ್ಕೆ ನಿಯಂತ್ರಣವಾಗದ ಪಕ್ಷದಲ್ಲಿ ಜಾಗತಿಕ ಮಹತ್ವದ ಟೂರ್ನಿಯನ್ನು ಮುಂದೂಡುವುದು ಖಚಿತ. ವಿಶ್ವಕಪ್ ಮುಂದೂಡಿದ್ದೇ ಆದಲ್ಲಿ ಸೆಪ್ಟೆಂಬರ್‌ ಅಂತ್ಯದಿಂದ ನವೆಂಬರ್‌ ಆರಂಭದ ಒಳಗಾಗಿ ಐಪಿಎಲ್‌ 13ನೇ ಆವೃತ್ತಿಯನ್ನು ನಡೆಸುವ ಬಗ್ಗೆ ಬಿಸಿಸಿಐ ಅಂದುಕೊಂಡಿದೆ. ಐಪಿಎಲ್‌ ನಡೆಯುವ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿದ ಅವರು, "ಒಂದು ವೇಳೆ ಐಪಿಎಲ್‌ ಟೂರ್ನಿಯನ್ನು ಬೇರೆ ದೇಶಕ್ಕೆ ಸ್ಥಳಾಂತರಿಸಿದರೂ ಸಮಯದಲ್ಲಿ ಜಾಸ್ತಿ ವಿಭಿನ್ನವಾಗಿರುವ ರಾಷ್ಟ್ರಕ್ಕೆ ಬದಲಾಯಿಸುವುದಿಲ್ಲ. ಏಕೆಂದರೆ, ಟೂರ್ನಿ ಪ್ರಸಾರ ಮಾಡುವ ಬ್ರಾಡ್‌ಕಾಸ್ಟರ್‌ಗಳಿಗೆ 8 ಗಂಟೆ ಅಗತ್ಯವಾಗಿರುತ್ತದೆ. ಅವರಿಗೆ ಭಾರತೀಯ ಕಾಲಮಾನ ಅತ್ಯಂತ ಮುಖ್ಯವಾಗಿರುತ್ತದೆ," ಎಂದು ಹೇಳಿದರು.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3dj5Y9A
