ಕೋಲ್ಕತಾ: ಹಾರರ್ ಚಿತ್ರದಲ್ಲಿರುವಂತೆಯೇ 2.0 ಬುಧವಾರದಂದು ನಗರಕ್ಕೆ ಬಂದಪ್ಪಳಿಸಿದೆ. ಈ ಮೂಲಕ ಏಳು ದಿನಗಳೊಳಗೆ ಎರಡನೇ ಬಾರಿಗೆ ಚಂಡಮಾರುತ ಅಪ್ಪಳಿಸಿದೆ. ಕಳೆದ ವಾರವಷ್ಟೇ ಪಶ್ಚಿಮ ಬಂಗಾಳ ರಾಜಧಾನಿಗೆ ಅಪ್ಪಳಿಸಿದ ಅಂಫಾನ್ ಚಂಡಮಾರುತ ಭಾರಿ ನಾಶನಷ್ಟವನ್ನುಂಟು ಮಾಡಿತ್ತು. ಇದೀಗ ಏಳು ದಿನಗಳ ಬಳಿಕ ಮತ್ತದೇ ಶೈಲಿಯಲ್ಲಿ ಎಂಟ್ರಿ ಕೊಟ್ಟಿರುವ ಸೈಕ್ಲೋನ್, ಅನೇಕ ಮರಗಳು ಧರೆಗುರುಳಲು ಕಾರಣವಾಗಿದೆ. ಅನೇಕ ವಾಹನಗಳು ಜಖಂಗೊಂಡಿದೆ. ಈ ಬಾರಿ ಗಂಟೆಗೆ 96 ಕೀ.ಮೀ. ವೇಗದಲ್ಲಿ ಗಾಳಿ ಬೀಸಿತ್ತು. ಅಲ್ಲದೆ ಗುಡುಗು ಮಿಂಚು ಸಹಿತ ಭಾರಿ ಮಳೆ ಸುರಿದಿತ್ತು. ಇಲ್ಲಿ ಆಸಕ್ತಿದಾಯಕ ಸಂಗತಿಯೆಂದರೆ ಒಂದು ವಾರದ ಅಂತರದಲ್ಲಿ ಸರಿ ಸುಮಾರು ಸಮಾನವಾದ ಸಮಯದಲ್ಲಿ ಸೈಕ್ಲೋನ್ ಅಪ್ಪಳಿಸಿದೆ. ಕಳೆದ ಬುಧವಾರ ಸಂಜೆ 6.50ರ ಹೊತ್ತಿಗೆ ಗಂಟೆಗೆ 114ರಿಂದ 130 ಕೀ.ಮೀ. ವೇಗದಲ್ಲಿ ಬಂದಪ್ಪಳಿಸಿತ್ತು. ಈ ಬುಧವಾರ ಸಂಜೆ 6.30ರ ಹೊತ್ತಿಗೆ 100 ಕೀ.ಮೀ.ಗಳಷ್ಟು ವೇಗದಲ್ಲಿ ಸೈಕ್ಲೋನ್ ಅಲೆಯೆಬ್ಬಿಸಿದೆ. ಕಳೆದ ವಾರ ನಾಲ್ಕು ತಾಸುಗಳಷ್ಟು ರೌದ್ರಾವತಾರ ತೋರಿದರೆ ಈ ಬಾರಿ ಅರ್ಧ ತಾಸಿನಲ್ಲಿ ಶಾಂತವಾಗಿರುವುದು ಹೆಚ್ಚಿನ ನಾಶನಷ್ಟವುಂಟಾಗದಿರಲು ಕಾರಣವಾಗಿದೆ. ಲಾಕ್‌ಡೌನ್ ಸಡಿಲಿಕೆಯಿಂದಾಗಿ ಸಂಜೆಯ ಹೊತ್ತಿಗೆ ಹೆಚ್ಚಿನ ಟ್ರಾಫಿಕ್ ಕಂಡುಬಂದಿತ್ತು. ಇದೇ ಸಂದರ್ಭದಲ್ಲಿ ಅಂಫಾನ್ ಚಂಡಮಾರುತದ ಪ್ರಭಾವ ಕಂಡುಬಂದಿದೆ. ಬಳಿಕ ಡಿಸಾಸ್ಟರ್ ರೆಸ್ಪಾನ್ಸ್ ತಂಡವು ಸಮಯೋಚಿತವಾಗಿ ರಸ್ತೆಗೆ ಬಿದ್ದ ಮರಗಳನ್ನು ತೆರವುಗೊಳಿಸುವ ಮೂಲಕ ರಕ್ಷಣಾ ಕಾರ್ಯಾಚರಣೆಯನ್ನು ಚುರುಕುಗೊಳಿಸಲಾಯಿತು. ಕೇವಲ ಕೋಲ್ಕತಾ ನಗರ ಮಾತ್ರವಲ್ಲದೆ ಪಶ್ಚಿಮ ಬಂಗಾಳದ ಇತರೆ ಜಿಲ್ಲೆಗಳಾದ ಪುರುಲಿಯಾ, ಬಂಕುರ, ಪಶ್ಚಿಮ ಮಿಡ್ನಾಪುರ, ಜಾಗ್ರಾಮ್, ಪೂರ್ವ ಮಿಡ್ನಾಪುರ, ಹೌರಾ ಮುಂತಾದ ಜಿಲ್ಲೆಗಳಲ್ಲೂ ಚಂಡಮಾರುತದ ಪ್ರಭಾವ ಕಂಡುಬಂದಿತ್ತು.
from India & World News in Kannada | VK Polls https://ift.tt/2XD3s7r
