ಟೆಕ್ಸಾಸ್: ಅವಳಿಗೆ 20 , ಅವನಿಗೆ 19 ವರ್ಷ. ಈ ಮುದ್ದಾದ ಹದಿಹರೆಯದ ಹುಡುಗ, ಹುಡುಗಿ ಬಾಲ್ಯದಿಂದಲೂ ಜತೆಯಾಗಿ ಆಡಿ ಬೆಳೆದಿದ್ದರು. ಒಬ್ಬರನೊಬ್ಬರು ಬಿಟ್ಟಿರಲಾರೆವು ಎಂಬುದು ಖಚಿತವಾದಾಗ ಬಂಧನಕ್ಕೆ ಒಳಗಾಗಿ ಜೀವನವಿಡಿ ಜತೆಯಾಗಿರಲು ನಿರ್ಧರಿಸಿದರು. ಅವರಂದುಕೊಂಡಂತೆ ಎಲ್ಲವೂ ಆಯಿತು. ರಂಗು ರಂಗಿನ ಕನಸು ಕಟ್ಟಿಕೊಂಡು ಹೊಸ ಬದುಕಿಗೆ ಕಾಲಿಟ್ಟರು. ಅವರೇನೋ ಬಯಸಿದ್ದರು ನಿಜ, ಆದರೆ ವಿಧಿಯ ಇಚ್ಛೆ ಬೇರೆಯಾಗಿತ್ತು. ಜತೆಯಾಗಿ ಬೆಳೆದವರು ಮತ್ತಷ್ಟು ಹತ್ತಿರವಾದ ಕೆಲವೇ ಕ್ಷಣಗಳಲ್ಲಿ ಜತೆಯಾಗಿಯೇ ಸಾವನ್ನಪ್ಪಿದ್ದರು. ಮದುವೆ ಮಂಟಪ ಮಸಣವಾಗಿತ್ತು. ಅಪಘಾತದ ರೂಪದಲ್ಲಿ ಅವರಿಬ್ಬರ ಬದುಕು ಚಿಂದಿಯಾಗಿ ಹೋಗಿತ್ತು. ಈ ಮನಕಲಕುವ ಘಟನೆ ನಡೆದಿರುವುದು ಅಮೆರಿಕಾದ ಟೆಕ್ಸಾಸ್ನಲ್ಲಿ. ತಮ್ಮ ಬಂಧಕ್ಕೆ ಅಧಿಕೃತ ಮುದ್ರೆಯನ್ನೊತ್ತಿ ನವವಿವಾಹಿತರಿಬ್ಬರು ರಿಸೆಪ್ಸನ್ ನಡೆಯುವ ಸ್ಥಳಕ್ಕೆ ಕಾರಲ್ಲಿ ಹೋಗುತ್ತಿದ್ದರು. ಮೋರ್ಗನ್ ಕಾರ್ ಚಲಾಯಿಸುತ್ತಿದ್ದರೆ, ಬೌಡ್ರೂಕ್ಸ್ ಆತನ ಪಕ್ಕದಲ್ಲಿ ಕುಳಿತಿದ್ದಳು. ಅಷ್ಟರಲ್ಲಿ ಊಹಿಸಲಾಗದ್ದು ನಡೆದು ಹೋಗಿತ್ತು. ಟ್ರಕ್ ಯಮರೂಪದಲ್ಲಿ ಬಂದೆರಗಿತ್ತು. ಮದುವೆಯಾದ 5 ನಿಮಿಷದೊಳಗೆ ವಧುವರರು ರಕ್ತದ ಮಡುವಲ್ಲಿ ಬಿದ್ದಿದ್ದರು. ಅವಳು ಧರಿಸಿದ್ದ ಬಿಳಿ ಗೌನ್ ಕೆಂಪಾಗಿ ಹೋಗಿತ್ತು. ಅಲ್ಲಿದೆ ಈ ಸುಂದರ ಜೋಡಿ ಮತ್ತವರ ಸಾವಿರಾರು ಕನಸುಗಳು ಸಹ ಮಣ್ಣುಪಾಲಾಗಿದ್ದವು. ಮಗ- ಸೊಸೆಯ ಕಾರನ್ನು ಹಿಂಬಾಲಿಸುತ್ತಿದ್ದ ಮತ್ತೊಂದು ಕಾರಿನಲ್ಲಿ ತಾಯಿ ಮಗನ ಸಾವಿಗೆ ಪ್ರತ್ಯಕ್ಷ ಸಾಕ್ಷಿಯಾಗಿದ್ದು, ನನ್ನ ಮಕ್ಕಳಿಬ್ಬರು ಕೊನೆಯುಸಿರೆಳೆಯುವುದನ್ನು ಕಣ್ಣಾರೆ ನೋಡಿದೆ ಎಂದು ಗೋಳಾಡುತ್ತಾಳೆ. ಈ ಭೀಕರ ಸಾವಿಗೆ ಸಂಪೂರ್ಣ ಅಮೆರಿಕಾವೇ ಕಂಬನಿ ಮಿಡಿಯುತ್ತಿದೆ.
from India & World News in Kannada | VK Polls https://ift.tt/2HqqcjL
