ಹೊಸದಿಲ್ಲಿ: ಅಮೆರಿಕ ಪರ ಕ್ರಿಕೆಟ್ ಆಡಲು ಭಾರತ ತೊರೆದಿದ್ದ ಯುವ ಪ್ರತಿಭೆ ಉನ್ಮುಕ್ತ್ ಚಾಂದ್, ಮುಂಬರುವ ಬಿಗ್ ಬ್ಯಾಷ್ ಲೀಗ್ ಟಿ20 ಕ್ರಿಕೆಟ್ ಟೂರ್ನಿಯಲ್ಲಿ ಮೆಲ್ಬೋರ್ನ್ ರೆನೆಗೇಡ್ಸ್ ತಂಡದ ಪರ ಆಡಲಿದ್ದಾರೆ. ಕಿರಿಯರ ವಿಶ್ವಕಪ್ ಟೂರ್ನಿಯಲ್ಲಿ ಭಾರತದ 19 ವರ್ಷದೊಳಗಿನವರ ತಂಡವನ್ನು ಮುನ್ನಡೆಸಿ ಚಾಂಪಿಯನ್ಸ್ ಪಟ್ಟ ಗೆದ್ದು ಕೊಟ್ಟಿದ್ದ ಕ್ಯಾಪ್ಟನ್ 28 ವರ್ಷದ ಬಲಗೈ ಬ್ಯಾಟ್ಸ್ಮನ್, ಬಿಬಿಎಲ್ 2021-22 ಟೂರ್ನಿಯಲ್ಲಿ ಮೆಲ್ಬೋರ್ನ್ ತಂಡದ ಪರ ಆಡುವ ಒಪ್ಪಂದ ಪಡೆಯುವ ಮೂಲಕ ಈ ಸಾಧನೆ ಮಾಡಿದ ಮೊದಲ ಭಾರತೀಯ ಆಟಗಾರ ಎನಿಸಿಕೊಂಡಿದ್ದಾರೆ. ಭಾರತದ ಯಾವುದೇ ಆಟಗಾರನಿಗೆ ವಿದೇಶಿ ಲೀಗ್ಗಳಲ್ಲಿ ಆಡುವ ಅವಕಾಶ ಮಾಡಿಕೊಡುವುದಿಲ್ಲ. ಕೇವಲ ನಿವೃತ್ತಿ ಪಡೆದ ಆಟಗಾರರು ಬಿಸಿಸಿಐನಿಂದ ಎನ್ಒಸಿ ಪಡೆದು ಬೇರೆ ಲೀಗ್ಗಳಲ್ಲಿ ಆಡಬೇಕಾಗುತ್ತದೆ. ಆಗಸ್ಟ್ನಲ್ಲಿ ಎಲ್ಲಾ ಮಾದರಿಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿಸಿ ಬಿಸಿಸಿಐನಿಂದ ಎನ್ಒಸಿ ಪಡೆದಿದ್ದ ಉನ್ಮುಕ್ತ್ ಚಾಂದ್ ಯುಎಸ್ಎ ತಂಡದ ಪರ ಕ್ರಿಕೆಟ್ ಆಡಲು ಅಮೆರಿಕಕ್ಕೆ ತೆರಳಿದ್ದರು. ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿ ಉನ್ಮುಕ್ತ್ ಚಾಂದ್ ಡೆಲ್ಲಿ ಡೇರ್ಡೆವಿಲ್ಸ್ (ಈಗ ಡೆಲ್ಲಿ ಕ್ಯಾಪಿಟಲ್ಸ್), ಮುಂಬೈ ಇಂಡಿಯನ್ಸ್ ಮತ್ತು ರಾಜಸ್ಥಾನ್ ರಾಯಲ್ಸ್ ತಂಡಗಳ ಪರ ಆಡಿದ್ದಾರೆ. ದಿಲ್ಲಿ ತಂಡದ ಪರ ರಣಜಿ ಕ್ರಿಕೆಟ್ ಟೂರ್ನಿಯಲ್ಲಿ 67 ಪ್ರಥಮದರ್ಜೆ ಪಂದ್ಯಗಳನ್ನೂ ಆಡಿದ ಅನುಭವ ಅವರಲ್ಲಿದೆ. "ನನಗೆ ಬಹಳಾ ಸಂತಸವಾಗಿದೆ. ಮೆಲ್ಬೋರ್ನ್ ರೆನೆಗೇಡ್ಸ್ ತಂಡದ ಭಾಗವಾಗಿರುವುದಕ್ಕೆ ಬಹಳಾ ಉತ್ತಮ ಅನುಭವ ತಂದುಕೊಟ್ಟಿದೆ. ನಾನು ಬಿಗ್ ಬ್ಯಾಲ್ ಲೀಗ್ ಟೂರ್ನಿಯನ್ನು ಹಿಂಬಾಲಿಸಿದ್ದೇನೆ. ಇಲ್ಲಿ ಅವಕಾಶ ಸಿಕ್ಕಿರುವುದು ನನ್ನ ಪಾಲಿಗೆ ಬಹುದೊಡ್ಡ ಸಂಗತಿ. ಇಲ್ಲಿ ಉತ್ತಮ ಕ್ರಿಕೆಟ್ ಆಡುವುದನ್ನು ಎದುರು ನೋಡುತ್ತಿದ್ದೇನೆ," ಎಂದು ಚಾಂದ್ ತಮ್ಮ ಅಧಿಕೃತ ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಮೆಲ್ಬೋರ್ನ್ ರೆನೆಗೇಡ್ಸ್ ತಂಡ ಈ ಬಗ್ಗೆ ತನ್ನ ಸೋಷಿಯಲ್ ಮೀಡಿಯಾ ಖಾತೆಗಳಲ್ಲಿ ವಿಡಿಯೋ ಒಂದನ್ನೂ ಹಂಚಿಕೊಂಡಿದೆ. "ಮೆಲ್ಬೋರ್ನ್ಗೆ ತೆರಳಿ ಆಟವಾಡುವುದನ್ನು ಎದುರು ನೋಡುತ್ತಿದ್ದೇನೆ. ಆಸ್ಟ್ರೇಲಿಯಾದಲ್ಲಿ ಆಡುವುದನ್ನು ನಾನು ಬಹಳಾ ಆನಂದಿಸಿದ್ದೇನೆ. ನಾನು ಈ ಮೊದಲು ಮೆಲ್ಬೋರ್ನ್ಗೆ ಭೇಟಿ ನೀಡಿಲ್ಲ. ಅಲ್ಲಿ ಭಾರತೀಯರ ಸಂಖ್ಯೆ ಹೆಚ್ಚಿದೆ. ಅವರೆದುರು ಆಡುವುದು ಉತ್ತಮ ಅನುಭವ ನೀಡಲಿದೆ. ಅವರೆಲ್ಲಾ ಕ್ರೀಡಾಂಗಣಕ್ಕೆ ಬಂದು ಪ್ರೋತ್ಸಾಹಿಸುತ್ತಾರೆ ಎಂಬ ನಿರೀಕ್ಷೆ ಇದೆ," ಎಂದು ಉನ್ಮುಕ್ತ್ ಹೇಳಿಕೊಂಡಿದ್ದಾರೆ. ಪ್ರಥಮ ದರ್ಜೆ ಕ್ರಿಕೆಟ್ನಲ್ಲಿ ಒಟ್ಟು 67 ಪಂದ್ಯಗಳನ್ನು ಆಡಿರುವ ಉನ್ಮುಕ್ತ್ ಚಾಂದ್, 31.57ರ ಸರಾಸರಿಯಲ್ಲಿ 3379 ರನ್ಗಳನ್ನು ಗಳಿಸಿದ್ದಾರೆ. ಇದರಲ್ಲಿ 8 ಶತಕ ಮತ್ತು 16 ಅರ್ಧಶತಕಗಳು ಸೇರಿದ್ದು, 151 ರನ್ ಅವ ವೈಯಕ್ತಿಕ ಗರಿಷ್ಠ ಸ್ಕೋರ್ ಆಗಿದೆ. ಲಿಸ್ಟ್ 'ಎ' ಕ್ರಿಕೆಟ್ನಲ್ಲೂ 120 ಪಂದ್ಯಗಳನ್ನಾಡಿ 7 ಶತಕ ಮತ್ತು 32 ಅರ್ಧಶತಕಗಳೊಂದಿಗೆ 4505 ರನ್ಗಳನ್ನು ಬಾರಿಸಿದ್ದಾರೆ. ಟಿ20 ಕ್ರಿಕೆಟ್ನಲ್ಲಿ ಉನ್ಮುಕ್ತ್ ಪ್ರದರ್ಶನ ಅಷ್ಟು ಹೇಳಿಕೊಳ್ಳುವಂತ್ತೇನು ಇಲ್ಲ. 77 ಪಂದ್ಯಗಳಲ್ಲಿ 1565 ರನ್ಗಳನ್ನು ಗಳಿಸಿದ್ದಾರೆ. 3 ಶತಕ ಮತ್ತು 5 ಅರ್ಧಶತಕ ಬಾರಿಸಿರುವ ಚಾಂದ್ 22.35ರ ಸರಾಸರಿ ಹೊಂದಿದ್ದಾರೆ. 125 ರನ್ ಅವರ ಟಿ20 ಕೆರಿಯರ್ನ ಶ್ರೇಷ್ಠ ಸ್ಕೋರ್ ಆಗಿದೆ.
from Sports News in Kannada, Latest Kannada Sports News | ಕ್ರೀಡೆ-ಕ್ರಿಕೆಟ್ ಸುದ್ದಿ, - Vijaya Karnataka https://ift.tt/3nZGtR8
