ರಾಜೇಂದ್ರ ಕೃಷ್ಣರಾಜನಗರ: ಸತತವಾಗಿ ಸುರಿದ ಮಳೆಗೆ ಬೆಳೆಯೊಂದಿಗೆ ತೋಟಗಾರಿಕೆ ಬೆಳೆಗಳಲ್ಲದೆ ಹೂವಿನ ಬೆಳೆಯೂ ಹಾಳಾಗಿ ಹೂವಿನ ಬೆಲೆ ಗಗನಕ್ಕೇರಿದ್ದು ದೇವರಿಗೆ ಹಾಗೂ ನಾರಿಯರು ಮುಡಿಗೇರಿಸುವ ಹೂವು ಕೊಳ್ಳುವುದೇ ಕಷ್ಟವಾಗಿದೆ. ಕಳೆದ ಒಂದು ತಿಂಗಳಿನಿಂದ ಸುರಿಯುತ್ತಿರುವ ಮಳೆಯಿಂದ ಈಗಾಗಲೆ ಭತ್ತ, ರಾಗಿ ಸೇರಿದಂತೆ ಕಾಳುಗಳ ಬೆಳೆ ಹಾಳಾಗಿರುವುದಲ್ಲದೆ ತೋಟಗಾರಿಕೆ ಬೆಳೆಗಳಾದ ಟೊಮೆಟೋ, ಬದನೆ, ಬೀನ್ಸ್‌ ಸೇರಿದಂತೆ ಇತರೆ ಬೆಳೆಗಳು ನೆಲ ಕಚ್ಚಿದ ಕಾರಣ ತರಕಾರಿ ಬೆಲೆಯಲ್ಲಿ ಭಾರಿ ಏರಿಕೆಯಾಗಿರುವ ಕಾರಣ ದಿನನಿತ್ಯದ ಆಹಾರದ ತರಕಾರಿ ಬಳಕೆಯಲ್ಲಿ ಭಾರಿ ಏರು ಪೇರಾಗಿದೆ. ಇದೇ ರೀತಿ ಸುರಿದ ಮಳೆಗೆ ಹೂವಿನ ತೋಟಗಳು ಸಹ ಹಾಳಾಗಿರುವ ಕಾರಣ ಹೂವಿನ ಬೆಲೆ ಗಗನಕ್ಕೇರಿದ್ದು ಮದುವೆ, ಮುಂಜಿ, ಗೃಹಪ್ರವೇಶ ಸೇರಿದಂತೆ ಇನ್ನಿತರೆ ಕಾರ್ಯ ಮಾಡುವವರ ಪಾಲಿಗೆ ಅದರಲ್ಲೂ ಹೂವು ಮುಡಿಯಲು ಬಹಳ ಇಷ್ಟಪಡುವ ಮಹಿಳೆಯರ ಪಾಲಿಗೆ ಹೂವು ಹಾವಾಗಿ ಪರಿಣಮಿಸಿದೆ. ಎಂದಿನ ದಿನಗಳಲ್ಲಿ ಮಲ್ಲಿಗೆ, ಕಾಕಡ, ಮರ್ಲೆ, ಸೇವಂತಿಗೆ, ಕನಕಾಂಬರ ಹೂವು ಮೀಟರ್‌ವೊಂದಕ್ಕೆ ನೂರರ ಗಡಿ ದಾಟಿದರೆ ಸಭೆ ಸಮಾರಂಭ ಹಾಗೂ ಮದುವೆ ಗೃಹ ಪ್ರವೇಶಗಳಿರುವ ಸಂದರ್ಭದಲ್ಲಿ ಇದೇ ಹೂವಿನ ಬೆಲೆ ಮೀಟರ್‌ವೊಂದಕ್ಕೆ ಇನ್ನೂರು ರೂ. ಗಡಿ ದಾಟಿ ಕೊಳ್ಳುವವರ ಕೈ ಸುಡುವಂತೆ ಮಾಡಿದೆ. ಸುಗಂಧರಾಜ ಹೂವಿನ ಸಾಮಾನ್ಯ ಹಾರದ ಬೆಲೆ 150 ರೂ.ಗೆ ಅಧಿಕವಾಗಿದ್ದು ಇದೇ ಹಾರ ಕಾರ್ಯಕ್ರಮಗಳು ಇರುವ ಸಂದರ್ಭದಲ್ಲಿ 250ರ ಗಡಿ ದಾಟಿ ಹೂವಿನ ಸಹವಾಸವೇ ಬೇಡ ಎಂಬ ಪರಿಸ್ಥಿತಿ ನಿರ್ಮಾಣವಾಗಿದೆ. ಹೂವಿನ ಬೆಲೆ ಗಗನ ಕುಸುಮ ಆಗಿರುವ ಕಾರಣ ಉಳ್ಳವರು ಮಾತ್ರ ಇಂತಿಷ್ಟು ಎಂದು ಹೂ ಖರೀದಿ ಮಾಡಿ ಕಾರ್ಯಕ್ರಮ ಮಾಡುವಂತಾದರೆ ಬಡವರು, ಮಧ್ಯಮ ವರ್ಗದವರು ಮಾತ್ರ ತೀರಾ ಅವಶ್ಯಕತೆ ಇದ್ದರೆ ಇಲ್ಲವೆ ಅವಶ್ಯಕತೆಗೆ ಅನುಗುಣವಾಗಿ ಹೂ ಖರೀದಿ ಮಾಡುವಂತಾಗಿದೆ. ಇಂತಹ ಸಂದರ್ಭದಲ್ಲಿ ಹಲವಾರು ಬಡ ಹಾಗೂ ಮಧ್ಯಮ ಹೂ ವ್ಯಾಪಾರಿಗಳು, ರಸ್ತೆಬದಿಯಲ್ಲಿ ವ್ಯಾಪಾರ ಮಾಡುವವರು ಹೆಚ್ಚಿನ ಬೆಲೆಗೆ ಹೂ ತಂದು ವ್ಯಾಪಾರ ಮಾಡಲಾಗದೆ ಹೂವಿನ ವ್ಯಾಪಾರವನ್ನು ತಾತ್ಕಾಲಿಕವಾಗಿ ನಿಲ್ಲಿಸಿದ್ದು ಹೆಚ್ಚಿನ ಮಟ್ಟದಲ್ಲಿ ವ್ಯಾಪಾರ ಮಾಡುವವರು ಮಾತ್ರ ಹೂವಿನ ಅಂಗಡಿ ಇಟ್ಟು ವ್ಯಾಪಾರ ಮಾಡುವಂತಾಗಿದೆ. ಇನ್ನೂ ವ್ಯಾಪಾರ ನಡೆಸುವ ಮಾರುಕಟ್ಟೆಯಲ್ಲಿ ಸರಕು ಕಡಿಮೆ ಇರುವುದನ್ನು ನೋಡಿಕೊಂಡು ಬೆಲೆ ನಿಗದಿಪಡಿಸುವ ಕೆಲವರು ಒಂದಕ್ಕೆ ಎರಡರಷ್ಟು ಬೆಲೆ ಪೀಕುವುದು ಸಾಮಾನ್ಯವಾಗಿದ್ದು ತೀರಾ ಅವಶ್ಯಕತೆ ಇರುವವರು ಬೆಲೆ ಎಷ್ಟಾದರೂ ಆಗಲಿ ಹೂ ಬೇಕು ಎಂದು ಮಳೆರಾಯನನ್ನು ಹಾಗೂ ವ್ಯಾಪಾರಿಗಳನ್ನು ಶಪಿಸುತ್ತಲೆ ಹೂ ಖರೀದಿಸುವಂತಾಗಿದೆ.
from India & World News in Kannada | VK Polls https://ift.tt/3d37KNC
