ಚಿಕ್ಕಬಳ್ಳಾಪುರ: ವರನ ಎತ್ತರ 3 ಅಡಿ.. ವಧುವಿನ ಎತ್ತರ 2.5 ಅಡಿ.. ಇವರನ್ನ ಥಟ್ಟನೇ ನೋಡಿದ್ರೆ ಇದೊಂದು ಬಾಲ್ಯ ವಿವಾಹ ಅನ್ನಿಸದೇ ಇರಲ್ಲ. ಅಸಲಿಗೆ ಇದು ಬಾಲ್ಯವಿವಾಹವಂತೂ ಅಲ್ವೇ ಅಲ್ಲ. ಭಾನುವಾರ ಚಿಕ್ಕಬಳ್ಳಾಪುರ ಜಿಲ್ಲೆಯ ಚಿಂತಾಮಣಿ ತಾಲೂಕಿನ ಕೈವಾರ ಕ್ಷೇತ್ರದಲ್ಲಿ ನಡೆದ ವಿವಾಹದಲ್ಲಿ ಈ ಅಪರೂಪ ಜೋಡಿಯನ್ನು ಕಂಡು ಎಲ್ಲರೂ ಒಂದು ಕ್ಷಣ ಆವಕ್ಕಾದ್ರು. ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿರುವ ಈ ಮುದ್ದಾದ ಜೋಡಿಯ ವಧುವಿನ ಹೆಸರು ಜ್ಯೋತಿ, ವರನ ಹೆಸರು ವಿಷ್ಣು. ಇಬ್ಬರು ಕೂಡ ಬೆಂಗಳೂರಿನಲ್ಲಿ ಉದ್ಯೋಗಸ್ಥರಾಗಿ ತಮ್ಮ ಕಾಲ ಮೇಲೆ ತಾವು ನಿಂತುಕೊಂಡಿದ್ದಾರೆ. ಮದುವೆಗಳು ಸ್ವರ್ಗದಲ್ಲಿ ನಿಶ್ಚಯವಾಗುತ್ತದೆ ಎನ್ನುವ ಆಸ್ತಿಕರ ಮಾತಿನಂತೆ ಈ ಪರ್ಫೆಕ್ಟ್ ಜೋಡಿಯ ವಿವಾಹ ಶ್ರೀ ಕ್ಷೇತ್ರ ಕೈವಾರದಲ್ಲಿ ಭಾನುವಾರ ನಡೆಯಿತು. ಆರಂಭದಲ್ಲಿ ನೋಡುಗರು ಇದೊಂದು ಮಕ್ಕಳ ಮದುವೆ ಎಂದುಕೊಂಡಿದ್ದರು. ಆದರೆ ಗಂಡಿಗೆ ಭರ್ತಿ 28 ವರ್ಷ ಆಗಿದ್ದರೆ, ಹೆಣ್ಣಿಗೆ 25 ವರ್ಷ ವಯಸ್ಸು. ಹಸೆಮಣೆ ಏರಿದ ಗಂಡು ವಿಷ್ಣು ಮೂಲತಃ ಬೆಂಗಳೂರಿನವರಾಗಿದ್ದು, ಮಧುಮಗಳು ಜ್ಯೋತಿ ಕೋಲಾರ ಮೂಲದವರು. ಇಬ್ಬರೂ ಪದವೀಧರರಾಗಿದ್ದು, ಬೆಂಗಳೂರಿನ ಖಾಸಗಿ ಕಂಪೆನಿಯಲ್ಲಿ ಉದ್ಯೋಗಸ್ಥರಾಗಿದ್ದಾರೆ. ಎಲ್ಲರಿಗೂ ವಿಶೇಷವಾಗಿ ಕಂಡ ಈ ಕ್ಷೇತ್ರಕ್ಕೆ ಬಂದ ಭಕ್ತಾದಿಗಳನ್ನು ಇಂದು ನಡೆದ ವಿವಾಹಗಳಲ್ಲಿ ಆಕರ್ಷಿಸಿದ್ದಾರೆ. ಕುಬ್ಜ ಜೋಡಿಗೆ ಮದುವೆ ಆಗುವುದು ತುಂಬಾ ವಿರಳ. ಸಾಕಷ್ಟು ದಿನಗಳಿಂದ ಹುಡುಗ ಹಾಗೂ ಹುಡುಗಿಯ ಪೋಷಕರ ಕಡೆಯಿಂದ ಮದುವೆ ಮಾಡಲು ಹುಡುಕಾಟದಲ್ಲಿ ನಿರತರಾಗಿದ್ದರು. ಆದರೆ ಕುಬ್ಜ ಎಂಬ ಕಾರಣಕ್ಕಾಗಿ ಸಾಕಷ್ಟು ಪ್ರಪೋಸಲ್‌ಗಳು ನಿರಾಕರಣೆಗೊಂಡಿದ್ದವು. ಇ ಮಧ್ಯೆ ಇಬ್ಬರ ಕುಟುಂಬಗಳಿಗೂ ಒಬ್ಬರಿಗೊಬ್ಬರ ಮಾಹಿತಿ ಲಭ್ಯವಾಗಿದ್ದು, ಇಬ್ಬರ ಕುಟುಂಬಗಳು ದಾಂಪತ್ಯ ಜೀವನಕ್ಕೆ ಗ್ರೀನ್ ಸಿಗ್ನಲ್ ಕೊಟ್ಟಿದ್ದಾರೆ. ಸದ್ಯ ಇಬ್ಬರು ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದು, ಇಬ್ಬರ ಪೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿವೆ. ಅನೇಕರು ಈ ಮುದ್ದಾದ ಜೋಡಿಗೆ ಶುಭಾಷಯಗಳನ್ನು ಕೋರಿದ್ದಾರೆ. ಇವರ ದಾಂಪತ್ಯ ಜೀವನ ಸುಖಮಯವಾಗಿ ಮಾದರಿಯಾಗಿರಲಿ ಅನ್ನೋದು ನಮ್ಮ ಆಶಯ ಕೂಡ.
from India & World News in Kannada | VK Polls https://ift.tt/3cXBjjH
